|
|
 ابوتوتة:كنت شرامى بن كلب .!
|
حلمت امى زعلانة عشان بسرق وبنسطل وبدق البوليس تبت ومشيت الحج .!
بشرب 30 سجارة بنقو فى اليوم بتصديق من بعشر والتجانى الماحى .!
ابوى من سوريا وامى من صعيد مصر وقلت شعر فى نميرى طوالى ادانى افراج.!
= ماتزوجت لانى كنت كل يوم مع واحدة تشهد لى زقاقات الشهداء وقهاوى الخرطوم .!
زمان عباس باركليز هنضب البنك ونهبو هسع بقيتوا تختفوا شنط البنات .!
= زمان البلد بى خيرا الجدادة بى طرادة و4 قزازات بى جنيه .!
نقلا عن ( الصحافة )
|
|
 
|
|
|
|
|
|
|
|
Re: ابوتوتة:كنت شرامى بن كلب .! (Re: انور التكينة)
|
قبل ثلاث سنوات وفى ونسة بصالة التحرير بجريدة الصحافة عن مشاهير مدنى وام درمان جبنا سيرة الحرامية ومعتادى الاجرام وكانت البداية باللص عباس باركليز الذى نهب البنك نهارا جهارا وانتهت بقصة مجرم خطير حكاها لنا الاستاذ عثمان سعيد مدير شؤون العاملين بشركة الوسائط المتعددة قال ان اسمه ابو توتة وانو سبب الهلع للمواطنين واتعب رجال الشرطة وكان ينشل ويسرق ويتعاطى الخمور والبنقو ويضرب بالروسية وقال انه شاهد ابوتوتة يتجول فى حلة كوكو بحثنا عنه والتقيناه امس الاول بالصدفة يجلس داخل كشك قديم جوار قسم شرطة حلة كوكو يتصفح فى احد الجرائد الرياضية وبعد السلام كانت هذه الونسة مع ابوتوتة اللص الظريف او ارسين لوبين السودانى المكتوب فى ملفه الجنائى ( من معتادى الاجرام،لايهاب رجال البوليس ،لايهرب،فظ الطباع ،لبق،حسن المعشر، سريع الاعتراف ).!
* اسمك ؟
= حسن الحاج يوسف
*وسنك ؟
=من مواليد 1917
*وعنوانك؟
= السكن حاليا حلة كوكو
*انت اصلا من وين ؟
= انا من اولاد ام درمان ابوى من سوريا وامى من صعيد مصر اتلاقو فى ام درمان وجابونى يعنى انا سودانى بالميلاد .
*لقب ابو توتة دا قصتو شنو ؟
= هو كان لقب اخونا الكبير الله يرحمو كان راجل بطل معروف بانو بدق الانجليز واول واحد فى اخوانى يخش السجن ومنو اتعلمنا الفتونة واخدنا كلنا لقب ابو توتة وامنا ماتت وهى عافية مننا وراضية عننا بعد ماربتنا ونحن ماشاء الله 17 بى الحلال خدمة يمين وعرق جبين .
*كانت شغالة شنو؟
= امنا مرا صالحة ابوى مات خلانا صغار وانا ماشفتو كتير امنا كانت بتشتغل بتبيع الفطور فى المدارس وعندها مكنة بتخيط الملابس وتبيع الطواقى يعنى حرفنجية .
* اهل ابوك فى سوريا علاقتكم بيهم مستمرة ؟
= لا انتهت بعد ابوى مات وكمان اهل امنا برضو حقروا بينا مع انهم عندهم قروش كتيرة لكن اهملونا انا للمعلومية خالى محمد حسين على صاحب المدارس الثانوية المعروفة وخالى ملاس وخالى حسن وابراهيم خلف ناس مرتاحين شديد لكن ماحصل امى مشت شحدتهم قروش وخيلانى هم السبب فى انحرافى وطلوعى من المدرسة.
*قريت وين ؟
=فى مدرسة البندر ود مدنى وكنت شاطر فى اللغة العربية استفدت منها فى وقفتى قدام القاضاة وكنت الفة الفصل وبجى الاول.
*بتتذكر المعلمين الدرسوك؟
= ايوه انا الحمد لله ذاكرتى قوية بتذكر الناظر كان اسمو الشيخ عبيد وبعدو جاء الشيخ محجوب وعلاء الدين ومن الاساتذه طه عابدين وعبد الباقى احمد سليمان الله يرحمهم .
*واتعلمت النشل والسرقة وين؟
= من السينما يوم بعد نهاية اليوم الدراسى الناظر قال لينا اى طالب بكرة يجيب معاه قرشين ونص ندخلكم السينما تحضروا فلم ارسين لوين اللص الظريف دخلت انا واخوى صبرى الله يرحمو .
* قصة الفلم شنو؟
= البطل ارسين لوبين كان عاشق بت تاجر مجوهرات وداير يعرسا لكن ابوها رفض يعرسا ليه قام سرق منو المجوهرات ونشل مستندات كان شايلا معاه وجابها ليه فى صينية قال ليه المستندات دى ما بديك ليها الا تعرس لى بتك قام ابوها وافق وعرسا اها انا اتعلمت منو حركة النشل والسرقة وطبقتها فى شفع المدرسة وبقيت اسرق منهم حق الفطور والمصاريف ولما جاء الامتحان سقطت قام الناظر رفدنى من المدرسة وقال لى سيرك اتعوج شوف ليك صنعة.
*وبقيت سراق؟
= ايوه السرقة للرجال:
(سراق انا من زمان الناس دوام تخشانى
صادق انا من نشيت ماكضبت حاشانى
بخسر اخوى ان غشيتو او غشانى ).
* كمان بتقول شعر ؟
=بتهجم على الشعراء:
(ديوان الشعر بعرف بذيعو بيان
حافظ لشوقى والمتنبئ وحسان
الشعر مابكتبو جبان
وانا بحب القافية وبى حالى ربنا علمان ).
وقلت شعر لى جعفر نميرى لما جاء مرة زيارة لى سجن كوبر.
*قلت ليه شنو؟
= مرحب بالرئيس مرحب حبابك ميه
حبابك ياشجاع ياطائر الامنية
روحك طاهرة ما اظن تبقى دنية
صاروخ موجه ضد قوة الرجعية
مظلوم ياسعادتك حامل معاى اسيه
من حكم القضاء وما اظن عملت بليه
بحكم القدر مسجون ومااظن عبت وليه
يتضيع مستقبلى وتصبح حياتى رزية
واتعذب فى السجون وافقد الحرية
يرضيك حالى ياطيب النية)
*ومرقك من السجن؟
= ايوه قال يطلع فى اول افراج وانا قلت ليه بعد فكونى:
( ثورتك مؤيدة والحانى فيها مرددة
انا كل يوم بناشدة
فى صف جنودا وقائدا
ثورتكم جات فى موعدا
وجات بى نزاهة مشاهدة
البشرية كلها تسعدة
وتكفيها من شر العدا
لامفسدة لا مفرضة
ورب الاله ياأيده
وعشت انت ياقائدا).
ونميرى الله يرحمو ويغفر ليه كان راجل قليل الزيو شجاع ماعمل حاجة بطاله مابحب الحقارة ومابحقد على زول بحب وطنو جدا ربنا يجعلو من اصحاب اليمين ويسامحو الى يوم الدين .
* اول سرقة كبيرة كانت متين؟
= سرقت عمدة الشكابة وكان عمرى 17 سنة كان شايل معاه 75 جنيه ماشى بيهن سوق الجلود .
* وقبضوك؟
= لا جانى بعد 3 يوم معاه البوليس قال ليهم الحرامى دا سرقنى لكن انا شاكلتو قلت ليه انت زول ماعندك راس ومن يومها ناس البوليس ختونى تحت المراقبة .
* اول مرة دخلت السجن متين ؟
= يوم 12 -12 -1949 سرقت تاجر كبير فى مدنى وادونى سنتين سجن و فكونى بعد سنتين وبعد مرقت تانى سجنونى سنتين عشان سرقت وضربت عسكرى اسمو نديم روسة وقعتو قدامى فى الواطة وحولونى من سجن مدنى لسجن الاصلاحية كوبر وفيه اتعلمت فنون الاجرام وطلعت منو شرامى بن كلب وحرامى محترف ونشال خطير اى زول بجى بى جمبى منشول منشول.
*المساجين حقروا بيك وانت حرامى صغير ؟
= شوف السجن اهم شى فيه انك تنفش ريشك يعنى لو صغير ضعيف زى الغنماية وعملت فيها اسد مافى زول بسعلك لكن لو سمين قدر البغل و عملت فيها مسكين حقك راح وفى فُتوات كبار وكتار خشوا السجن وطلعوا منو بنات وانا خشيت بى خطة ونجحت.
*عملت شنو؟
مثلت فيها مناضل وكنت اطلع قدام المساجين والسجانين فى راس العنبر واهتف واقول يسقط الاستعمار وتسقط ادارة السجون مابتعلمنا الصنعة بس بتعلمنا البنقو وقلة الادب والسجان يمشى يكلم المدير يجى العنبر يقولوا ليه دا ابو توتة طوالى يرجع
لانى ما بخاف وعندى روسية قوية والخلاهم يصدقوا كانت امى بتجيب لى المخدرات جوه السجن.
* مدمن مخدرات؟
= ايوه من صغير بشرب 30 سجارة بنقو و4 دفاتر برنسيس و10 علب بينسون وامى لما اجى البيت مسطول كانت بتضحك شديد لانى بقول ليها نكات وبضحكها وبنسيها الهم وما بشاكلا ولا بقول كلام فارغ ولا بعمل حاجات بطالة وقضيت اكتر من 26 سنة فى السجن وقلت وانا خارج فى اخر قضية:
(سجن كوبر بقى جميل للغاية
فيه الحوت والرغيف والشاى بالكباية
الولد البقول اقسمت انى براى
طفية النور جوه السجن من الخوف يبقى فى الجراية ).
* بتجيب المخدرات من وين ؟
= البلد دى زمان كانت كلها مخدرات البنقو كان بجى من الجنوب بالجنازير وبكون مزروع فى اى بيت .
* اكبر مروج حشيش زمان منو؟
= عمك سوار الدهب راجل من ناس ام درمان كان موزع بنقو .
* احسن محل بتنشل فيه وين ؟
= فى الاسواق وسط التجمعات لكن اهم موقع كان محل التاشيرات وزارة الداخلية وانا بحب التحدى عشان كدا كنت بسرق ناس البوليس وكنت معروف بانى سرقك عينك عينك مابتلب حيط وما بكسر دكان وفى النشل بس بدفر الزول فى الشارع وتسمع معليش ما معليش ويدى دى لو لحقت خشت فى جيبو حقو راح لو مسكنى بديه روسية .
*كتلت كم زول؟
= لا كلو الا الكتل دقيت ناس كتار حرامية وبواليس منهم ضابط كبير لاقنى مارق من بيت حشيش قلت ليه تقبضنى ليه ماتقبض ناس البيت وناولتو روسية .
* رايك شنو فى المجرمين هسع ؟
= حرامية زمان ابطال زى عباس باركليز هنضب البنك وسرق القروش زمان نحن بنسرق القروش عشان نديها النسوان هسع المجرمين بقوا يسرقوا شنط النسوان ويغتصبوا الاطفال هم لو رجال مايكسروا الدكاكين او البنوك ذى ماعمل باركليز وانا لاقيتو فى السجن وكان صاحبى .
* اشهر القضاة الوقفت قدامهم منو؟
= كتار لكن بذكر مولانا مبارك المدنى والريح الامين حاج احمد سنهورى ومحمد محجوب وقسم الله التقر وابو رنات كنت قدام القاضى بعمل مسكين بقول ليهم امى مرا محتاجة عشان يدونى مدة قليلة.
= منو من بواليس زمان كان بتعبك ؟
= ااخخخ والله رجعتنا لى ايام زمان ومطاردات البوليس اكتر واحد عندى معاه مشاكل معاه الويس سدرة دا قبطى من اولاد مدنى كان مصاحبنى من ظابط لغاية مابقى مدير بوليس .
* اتزوجت كم مرة ؟
= للاسف ما اتزوجت لانو ايام الشباب كنت كل يوم مع واحدة خاصة انو زمان كانت بيوت الدعارة مفتوحة وتحت اشراف الحكومة والحبشيات كتار جدا والسودانيات اتعلمن منهن المشى البطال كنا بنسرق ونشترى ليهن الدهب المبيت مع المرا كان بس بى 25 قرش.
* محلات المزاج كانت وين؟
= زمان فى اى زقاق بتلقى البيرة والشرى والوسكى والكونياك ما كان حاجة غريبة استمرت الخمارات لغاية ايام نميرى زمان
النسوان العاهرات ببيعن الاربعة قزازات بى جنيه واشهر محل للمزاج فى الخرطوم كان فى الديوم وعند ابو صليب محلو الان الان موجود جمب ترب الخواجات جوار السكة حديد فى الشارع رقم 19 و 21 وفى ام درمان جمب الاسبتالية وفى زقاقات الشهداء وفريق السوق وكنا بنمشى بحرى للنسوان بس ات قايل البخلينا محافظين لى هسع شنو؟
*شنو؟
= زمان الدنيا كانت بى خيرا الاكل راقد الجدادة تجيك (ماسكة بونية حارة من المطبخ بى 5 قروش وزمان ياولدى السمك الفرايد 3 قطع القطعة قدر اليد بى قرشين الاستعمار كان عندو فؤائد لكن الانجليز كانوا بهينونا ونحن هسع الحمد لله بعد الاستقلال احرار مافى اهانة .
*فتوات زمان منو؟
= اولاد مدنى ناس محجوب ومحمود ود(اللبخ) واولاد ام درمان حسن وحسين وود ابيض وعبد الوهاب عبد اللطيف كنا بنتلاقى فى القهاوى ندور الشكلة وبتعبوا البوليس .
* بتتلاقو فى قهوة منو ؟
= فى قهوة الزئبق وقهوة العيلفون وقهوة سركيز وقهوة مهدى حامد فى ام درمان .
* فى السجن بتحب تسمع منو من الفنانين ؟
= بسمع فى الرادى ابو داوود وسيد خليفة وحسن عطية وطوالى بغنى (خدارى البى حالو ماهو دارى جافانى ).
*شايف جمبك جرايد رياضية كتيرة انت هلالابى ولا مريخابى ؟
= انا كنت لاعب كورة زمان وانا هلالابى لكن لما المريخ يكون لاعب باسم الوطن بشجعو و(نحن اى منتصر معاه بننعصر) والجرايد دى مابشتريها بجى الهوا شايلا .
*قصة التوبة شنو؟
= وانا نايم حلمت انو امى زعلانة منى شديد عشان بسرق وبشرب البنقو وبدق البوليس وبتابع النسوان قمت طوالى تبت لله والرسول ومن نهاية الثمانينات ما رجعت السجن بقيت ماسك دربى سبحتى وصلاتى وبقرا فى اليوم 5 اجزاء من القران الكريم مشيت الحج صليت فى مكة والمدينة وزرت احد وقبا.
*وشغال شنو ؟
= الكشك دا صدقوا لي بيه ناس الحكومة عشان تبت و فتحتو طبلية قدام قسم شرطة حلة كوكو من 1986 لغاية 2005 كنت باكل بضراعى اكل حلال لكن يوم جاء واحد عقيد قال تانى ماداير كشك قدام قسم البوليس اضطريت انقلو وختيتو قدام مبانى كلية الطب البيطرى جامعة السودان بس هنا مافى سوق سكنت فيه وبقيت احرس العربيات بالليل العربية بى جنيهين والحمد لله والشكر لله ما بشحد لى زول وناس وزارة الشؤؤون الاجتماعية مشيت ليهم زمان ساعدونى تانى ما مشيت ليهم.
*هسع لو لقيت ليك بنقوية بنقويتين بتفوتا ؟
= تبت لله والرسول مع انو عندى رخصة اشرب البنقو لكن لانى عندى ارادة بقيت ما من المدمنين ووعندى شهادة مكتوب فيها جمهورية السودان الديمقراطية وزارة الصحة مستشفى الامراض العصبية والنفسية شهادة مرضية السيد :حسن الحاج يوسف يعانى من اكتئاب نفسى داخلى وكان يتردد على المستشفى سنوات طويلة تلاحظ من خلالها انه يتهرب من المرض باللجوء لتعاطى المخدرات المختلفة فاصبحت جزءا من علاجه وحاولنا ان نخلصه من هذا الداء ولم يستجب وهذه شهادة منا . د.التجانى الماحى د.طه بعشر تحت اشراف مدير المستشفى شيخ ادريس عبد الرحيم ).
*******
من المحرر:
وانا ماشى مديت يدى لى عمنا اللص الظريف ابو توتة وقلت ليه شكرا ليك ومع السلامة قال لى ماتنقطع وبعد خطوتين نادانى تانى وقال لى هاك قلمك دا نشلتو منك وانت بتسلم على عشان تعرف انو ابو توتة نشال خطير .!
========
| |
|
|
|
|
|
|
|
|
|
Re: ابوتوتة:كنت شرامى بن كلب .! (Re: سيف الدولة كامل)
|
Quote: الا يستحق هذا الشيخ دارا تأويه
|
أو الادنى ان يمنح كشكه فى موقع متميز و يمنح رأسمال يعينه
على اهوال الحياة ، فعزيمته ما زالت متقدة و مثل هذا لا برضى
ان تأويه دار العجزة ... على الاقل شبع سجون .
| |
|
|
|
|
|
|
|
|
|
Re: ابوتوتة:كنت شرامى بن كلب .! (Re: انور التكينة)
|
التكينة
عنوان بوستك جذاب ، جيت جارى بس بطنى طمت طوالى ..!! عارف لية..؟
لانك خاتى صورة بطيخة بدل صورتك .. وانا مابكرة حاجة فى الدنيا دى ذى البطيخ ..!
ليك الله شيلة عشان الواحد يقدر يخش البوست بمزاج ..!!
| |
|
|
|
|
|
|
| |
انور التكينة
النورس الحزين
سيف الدولة كامل
مزمل خيرى
فيس بوك
تويتر
انستقرام
يوتيوب
بنتيريست