|
|
 القرد في عينه أمه غزال !!!!
|
أطفالنا أكبادنا التي تمشي على الأرض ولكن إلى أين إذا لم نتعهدهم بالرعاية والتوجيه وحسن التربية؟
بصراحة في بعض الناس بتعتقد أنو الطفل لما يكون مدلع يعني (ودعز , ود مغتربين ) ويحق له ما لا يحق
لغيره .. يكسر الدنيا.. يقلب أعاليها أواطيها .. يتكلم بالإنجليزي لزوم الشو .. يتعجن ويتهجن
زي ما عايز مش ود مغتربين غنيانين و(.........)يانين وما فيش حد مالي عينهم ؟؟
دة كلو كوم ولما يجوك الأطفال ديل زيارة مع أهلهم غايتو اليوم داك درجة حرارة بتكون زي حمى الخنازير
وضغطك برتفع فوق المعدل المسوح بيه,,أما صدمة السكري البتحصل ليك ديك بتغلب الطب والطبيب حتى الطب
البديل البعالج كل شي فروم أيه تو زد حيغبلو العلاج .. تعالو نشوف يوم الزيارة عشان كلنا نغني مع
بعض حبيبي آآه وقلبي تاه يوم الزيارة ..
لما يدق الجرس وتفتح الباب يجووك طايرين كأنهم فاكينهم بي نبلة وعلى بال ما تسلم على الأم والأب
يكونوا عملوا مسح شامل للبيت ورجعوا الصالون وإنت تكون لسة ما كملت السلام والمطايبة,قدمت الشكولاتة
فتحوا نصها وما أكلوا منها سوى القليل, جبت العصير قدمت ليهم الكبايات المتوسطة الحجم ختفوا
الكبيرة شربو نصها وتركوا الباقي وبعد داك تعال شوف العروض المسرحية .. طلوع في الكراسي,, كسير
كبايات دفيق عصير.. هرج ومرج .. كورايك .. تغيير قنوات تلفزيون .. لخبطة كمبيوتر.. والأهل صامتين
صمت القبور كأن الأمر لا يعنيهم باعتبار أن حرية التعبير والتصرف قاعدة من قواعد التربية الحديثة
إضافة إلى ذلك فهم يعتقدون التدليل المفرط علامة من علامات الحب دون وعي منهم بأن (من الحب
ما قتل).
الأم تتونس كأن شيئا لم يكن .. بل ترمق أطفالها بنظرات تعبر عن رضاها وسعادتها بما يقومون به
من هرج ومرج ,, الأب يتحدث بصوت عالي جدا كنوع من التغطية على المعركة التي تدور رحاها في
الغرف والممرات ... ياجماعة والله عيب ماذنب من ينتظره دوام صباحي ويظل جالسا على كرسي ساخن ينتظر
خروج ضيوفه المزعجين ,المخربين , بفارق الصبر ؟ ولماذا لا نؤدب أطفالنا ونحسن تربيتهم لأنهم أمانة
في أعناقنا؟؟ وكيف تسعد أم بطفل مدلل معجن لدرجة قف؟ وكيف يهدأ بال أب يشاهد أطفاله خارج
الشبكة مقارنة بالأطفال الآخرين ؟؟؟
عموما فتكم بعافية ومع ذلك ومع كل ما يحدث أستثني من هذه الظاهرة بعض الأسر الراقية التي تزورك في
أوقات مناسبة وبدون أطفال ..
|
|
 
|
|
|
|
|
|
|
 Re: القرد في عينه أمه غزال !!!! (Re: عواطف ادريس اسماعيل)
|
الأُستاذة / عواطف إدريس .
مُشتاقين واللهِ .. وكيف حالك .
| Quote: ( القرد في عينه أمه غزال !!!!) |
والغزال في عين أُمو شنو يا أُستاذة ؟ ههههههههههه
الله يدِّيك العافية يا عواطف ، فالموضوع مهمٌّ جدًّا ،
وفعلا واللهِ بعض الآباء ما بأدِّبوا أطفالُنْ بالطَّريقة الصَّحيحة وما بِوَرُّوهُن إنُّو دا غلط ودا عيب ودا صاح ،
وطبعًا دي مُشكلة كبيرة ، وكل كلامك القلتيهو صحيح ميَّة بالميَّة ،
فوَ اللهِ أنا عندي كم صاحب كِدَة ، عندهُنْ جِنِسْ شُفَّعْ ( لا حولَ ولا قوَّةَ إلا بالله ) ، ولمَّن الواحد من أبواتُنْ
يتَّصِـلْ عليْ ويقول لَيْ :
- كيف حالك ياخي ، وكيف أخبارك ، ياخي جاينَّكْ اللّيلة أنا والعيال ، أوْعَ تكونوا مارقين
ليكُنْ فِجَّة.
- حاضر ، حاضر ، وأبشر تشرِّفوا في أيِّ وَكِتْ .. ( واللهِ إنْ بقيتَنْ عندنا مشوار ضروري نخلِّيهوا
عشان خاطِرُنْ ، شفتي المُجاملاتْ دي كيف ) .
أها لمَّنْ يجوا وحاتِكْ يا عواطف ، البيت يقلبوهو لينا ( حلبة مُصارعة ) ، وأوْعَكْ تقوم تنهر ليك
واحِدًا فيهُن ، مُؤكَّد بقولوا الزُّول دا ما داير النَّاس .. لأنُّو ما في زولا بِرْضَى ينهرولو شُفَّعوا وزَيْ ما
بقول لَيْ واحد من أصحابي ، وأظنُّ أنَّ مقولتَهُ بها كثيرٌ من الصِّدق ، لمَّا قال لَيْ : ( ياخي أولاد
المغتربين ديل أكتر أولاد في الدُّنيا دي قليلين أدب وخمجانينْ وراسُنْ قَوي وما بِسْمَعُوا الكلامْ ) .
وأنا من زمان مقتنع بي حاجة ، إنُّو الشَّارع بِرَبِّي الطِّفِل ، أها أولاد المغتربين ديل بيفتقدو لهذا
الشَّارع الجميل ، وأقصِد بالشَّارع زَيْ ما عارفة ، إنُّو زمان لمَّا كُنَّا صُغار ونطلعْ نلعبْ في الشَّارع وقِدَّام
البيوت ، أها ويقوم الواحد مِنَّنا يعمل ليهو حاجة غلط ، أها بتلقي أيِّ واحد من ناس الحِلَّة جايي
ماشي بالطَّريق بِنْهَرَكْ وبقول ليك : يا ولد ، لا ، ما تعمل كَدي ، ودا عيب ، يعني زمان كان في تقويم
للطِّفل داخل البيت ( الوالدين ) وخارج البيت ( ناس الفريق ، الحلة ، الأهل ) ، أها أولاد
المغتربين ديل باقيين علي تربية البيت فقط ، والوالدين في البيت زَيْ ما عارفة بعضهُن ماهو فاضي
وبعضهُن مُتساهِل في الموضوع ، لذلكَ التَّربية في الغربة بتفتقد لبعض عناصرها الأساسيَّة والضَّروريَّة ،
ولا أعتقدُ أنَّ البيتَ وحده سيكونُ كافيًا إلا فيما نَدَرْ ..
* وأمَّا بالنِّسبة لضجيج شُفَّعْ الضُّيوف والخمجْ حقَّهم ، أقول ليك يا عواطف غايتو المُعادلة صعبة خلاس ،
إنْ إتْكلَّمتَ معاهُنْ يقولولَكْ ماك داير النَّاس ، ويمرقوك زولا كَعَبْ بلحيل ، أها وإنْ بقيتَنْ سكتَّ ومسكتَ
خشمَكْ عليك أها بيتكْ بِقِلبوهو ليك * هريسة .
ومافي حَل غير إنُّو النَّاس كُلَّها ( خاصَّة الواليدن ) توعَى بي دور التَّربية وتعرف أهميَّتَا ،
ويحاول كُلُّ منَّا يربِّي أولادو التَّربية الصَّحيحة والقويمة .. وأظُنُّ أنَّ إحدى خالاتي كانتْ صادقةً حينما
كنتُ صغيرًا وأنا أسمعُها تستأنَسُ مع إحدى جاراتِها وتقول :
- التَّربية يا يُمَّة قَـرِشْ حَصْحاصْ .
*** وغايتو أكَّان في عائلة من عوائل الشَّثفَّع قليلين الأدب ديل إتَّصلوا عليك وقالو ليك
نحنا جايينِّكْ يا عواطف ، ما عليك إلا تقولي ليهُن ، أيوة تعالو عشان دايرين نمرُقْ كُلَّنا
علي الحديقة الفلانيَّة ، أها بعد دا ما عليكم إلا تَخُمُّوهم وتقعوا بيهن في حديقة من الحدائق
البعيدة من بيتِكْ والقريبة من بيتُنْ ، عشان ما في النِّهاية يقومو يعرِّجو مُجدَّدًا علي بيتُكُنْ.
أخيرًا أقولُ لكِ مازحًا :
_ أها الليلة يا أُستاذة عواطف مارقين فِجَّة ، عشان بندور نجيكم أنا والعيال ؟؟؟؟
هههههههههههههها .
ما تخافي شُفَّعي صُغار ومُؤدَّبين ، ومن هسَّة أنا قاعد أوَرِّيهم دا غلط ودا صاح ، ومِعَلِّمُنْ من صُغار علي
أكل الكسرة ، وآخر مَرَّة مشوا فيها السُّودان ضربو ليك الكِسْرة دي زَيَّ التَّرتيب وزَيَّ الماحصل حاجة ،
لمَّا أهلي هناك استغربو وقالو لَيْ ياخي أولادك ديل كانو عايشين في السُّعوديَّة ولّا في السُّودانْ ؟.
وصدقّيني أيِّ طفل في هذه الدُّنيا بِسْمع الكلام إنْ وجدَ الدَّليل ، اللَّهمَّ إلا ما يلقى المُرشِد الصَّحيح ،
وأعتقدُ جازمًا أنَّ الْعِبءَ الأكبرَ يَقَعُ على الوالدينْ .. ليسَ أكثَرْ ..
احتراماتي الشَّديدة .
أخوك / محمَّد زين .
____________________________________________
* هريسة : قصدتُ منها كِسِّير لمبات الكهربا بالجِدِّيع حقَّ الشُّفَّع ،
ووِسِّيخْ الملايات بي كِرعيهُنْ وكسِّير السَّراير بالنِّطِّيطْ بتاع شُفَّع الضيوف .
والمعنَى أكيد ما بِغَبى السَّامع والقاريء الكريم ، اللَّهُمَّ إلا أنْ يكون
ما جَرَّبْ نوع شُّفَّع الضيُوف البنتكلَّم عنَّهُنْ فوقْ ديل .
* قَـرِشْ : أكِلْ بي صوت يُضرِسُ السَّامع والأسنانْ ، وفيه شبه استحالة
للإنسان العادي لِذلكَ من صُعوبتِهِ يُضربُ بهِ المثلُ ، لكنَّهُ يعودُ أخيرًا بفائدةٍ
عظيمة .
| |
|
|
|
|
|
|
|
|
 Re: القرد في عينه أمه غزال !!!! (Re: محمَّد زين الشفيع أحمد)
|
أها لمَّنْ يجوا وحاتِكْ يا عواطف ، البيت يقلبوهو لينا ( حلبة مُصارعة ) ، وأوْعَكْ تقوم تنهر ليك
واحِدًا فيهُن ، مُؤكَّد بقولوا الزُّول دا ما داير النَّاس .. لأنُّو ما في زولا بِرْضَى ينهرولو شُفَّعوا وزَيْ ما
بقول لَيْ واحد من أصحابي ، وأظنُّ أنَّ مقولتَهُ بها كثيرٌ من الصِّدق ، لمَّا قال لَيْ : ( ياخي أولاد
المغتربين ديل أكتر أولاد في الدُّنيا دي قليلين أدب وخمجانينْ وراسُنْ قَوي وما بِسْمَعُوا الكلامْ ) .
وأنا من زمان مقتنع بي حاجة ، إنُّو الشَّارع بِرَبِّي الطِّفِل ، أها أولاد المغتربين ديل بيفتقدو لهذا
الشَّارع الجميل ، وأقصِد بالشَّارع زَيْ ما عارفة ، إنُّو زمان لمَّا كُنَّا صُغار ونطلعْ نلعبْ في الشَّارع وقِدَّام
البيوت ، أها ويقوم الواحد مِنَّنا يعمل ليهو حاجة غلط ، أها بتلقي أيِّ واحد من ناس الحِلَّة جايي
ماشي بالطَّريق بِنْهَرَكْ وبقول ليك : يا ولد ، لا ، ما تعمل كَدي ، ودا عيب ، يعني زمان كان في تقويم
للطِّفل داخل البيت ( الوالدين ) وخارج البيت ( ناس الفريق ، الحلة ، الأهل ) ، أها أولاد
المغتربين ديل باقيين علي تربية البيت فقط ، والوالدين في البيت زَيْ ما عارفة بعضهُن ماهو فاضي
وبعضهُن مُتساهِل في الموضوع ، لذلكَ التَّربية في الغربة بتفتقد لبعض عناصرها الأساسيَّة والضَّروريَّة ،
ولا أعتقدُ أنَّ البيتَ وحده سيكونُ كافيًا إلا فيما نَدَرْ ..
* وأمَّا بالنِّسبة لضجيج شُفَّعْ الضُّيوف والخمجْ حقَّهم ، أقول ليك يا عواطف غايتو المُعادلة صعبة خلاس ،
إنْ إتْكلَّمتَ معاهُنْ يقولولَكْ ماك داير النَّاس ، ويمرقوك زولا كَعَبْ بلحيل ، أها وإنْ بقيتَنْ سكتَّ ومسكتَ
خشمَكْ عليك أها بيتكْ بِقِلبوهو ليك * هريسة .
ومافي حَل غير إنُّو النَّاس كُلَّها ( خاصَّة الواليدن ) توعَى بي دور التَّربية وتعرف أهميَّتَا ،
ويحاول كُلُّ منَّا يربِّي أولادو التَّربية الصَّحيحة والقويمة .. وأظُنُّ أنَّ إحدى خالاتي كانتْ صادقةً حينما
كنتُ صغيرًا وأنا أسمعُها تستأنَسُ مع إحدى جاراتِها وتقول :
- التَّربية يا يُمَّة قَـرِشْ حَصْحاصْ .
*** وغايتو أكَّان في عائلة من عوائل الشَّثفَّع قليلين الأدب ديل إتَّصلوا عليك وقالو ليك
نحنا جايينِّكْ يا عواطف ، ما عليك إلا تقولي ليهُن ، أيوة تعالو عشان دايرين نمرُقْ كُلَّنا
علي الحديقة الفلانيَّة ، أها بعد دا ما عليكم إلا تَخُمُّوهم وتقعوا بيهن في حديقة من الحدائق
البعيدة من بيتِكْ والقريبة من بيتُنْ ، عشان ما في النِّهاية يقومو يعرِّجو مُجدَّدًا علي بيتُكُنْ.
أخيرًا أقولُ لكِ مازحًا :
_ أها الليلة يا أُستاذة عواطف مارقين فِجَّة ، عشان بندور نجيكم أنا والعيال ؟؟؟؟
هههههههههههههها .
ما تخافي شُفَّعي صُغار ومُؤدَّبين ، ومن هسَّة أنا قاعد أوَرِّيهم دا غلط ودا صاح ، ومِعَلِّمُنْ من صُغار علي
أكل الكسرة ، وآخر مَرَّة مشوا فيها السُّودان ضربو ليك الكِسْرة دي زَيَّ التَّرتيب وزَيَّ الماحصل حاجة ،
لمَّا أهلي هناك استغربو وقالو لَيْ ياخي أولادك ديل كانو عايشين في السُّعوديَّة ولّا في السُّودانْ ؟.
وصدقّيني أيِّ طفل في هذه الدُّنيا بِسْمع الكلام إنْ وجدَ الدَّليل ، اللَّهمَّ إلا ما يلقى المُرشِد الصَّحيح ،
وأعتقدُ جازمًا أنَّ الْعِبءَ الأكبرَ يَقَعُ على الوالدينْ .. ليسَ أكثَرْ ..
احتراماتي الشَّديدة .
حمادة ..
نهارك سعيد ..
لا يفتى ومالك في المدينة والله كفيت ووفيت ..
يديك العافية .. ويخلي ليك وليداتك إن شاء الله ..
| |
|
|
|
|
|
|
|
|
 Re: القرد في عينه أمه غزال !!!! (Re: ترهاقا)
|
توتو ..
كيفك يا ملك ملوك النيل ..
والله كلامك صاح مية بالمية ..
عارف يا ترهاقا مرة اتعمل تحقيق مع المراهقين في مجلة صباح الخير تصور هؤلاء المراهقين قالوا
بالصوت العالي "مش إحنا أبواتنا اللي مفروض يتربو" !!
عموما متشكرة جدا لهذه المداخلة الطيبة ..
| |
|
|
|
|
|
|
|
|
|
Re: القرد في عينه أمه غزال !!!! (Re: وليد الطيب قسم السيد)
|
عواطف
تحياتي
قبل ما اكمل قراية الموضوع عايز اهنئك عليه .. لانو فعلا التربية عندنا مشكلة ومشكلة اكبر لما تكون تربية اغتراب .. وقبل ما اواصل قراية .. وقبل ما يضرب جرس الباب .. اتذكرت واحدة قريبتنا لما تعزم الناس لمناسبة بتكتب في الدعوة الرجاء عدم اصطحاب الاطفال
| |
|
|
|
|
|
|
|
|
|
Re: القرد في عينه أمه غزال !!!! (Re: وليد الطيب قسم السيد)
|
عطوفه ازيك .. والله بقرأ كلامك وانا ميته من الضحك
اختك ما عندها اخلاق بتعريفه خصوصاً لعينة الشفع القليلي الادب ديل
الشافع منهم من ما يخش البيت كانو خشى تحدي معاي
نهير وحدير وكان روحي حرقتني بخبطو وبجر ليهو اضانو
وبكون نفسي نفسي اتفشي فيهو ضرب , الكلام دا وهو بعيد من اهلو طبعاً
بخلي يبكي ويكورك وامو تسالو مالك في شنو وقعت  .. اها هو من الزعله ما بقدر يتكلم
غايتوالكلام دا في بيت ابوي ... ما عارفه كان عملت بيت ح اسوي شنو ؟؟
| |
|
|
|
|
|
|
|
|
|
Re: القرد في عينه أمه غزال !!!! (Re: وليد الطيب قسم السيد)
|
طوفي
ضحكتيني وذكرتيني قصة ولدى مع عمو بخيت ود يوسف احد ظرفاء المدينة
الحاصل عندى ولد كان عمرو خمس سنوات وطوالي بجي يتحكحك جنبي ويطلب ليهو قريشات واقوم اديها ليهو ويجري جرى للبقالة .
انا حذرتو من المطالبة بفلوس لو معاى اى ضيف . الود ظل ملتزم بهذه التوجيهات فترة طويلة .
مرة من المرات جاني عمنا بخيت الراجل الظريف ده . الود بقى يحوم ويحوم حولي ويعاين في الراجل شاكي في انو ضيف ولا ما ضيف . وقت الضيف طوّل الود عاين لي وعاين للضيف قال يا ابوي انت المعاك ده ضيف ولا اشحدك ساى؟
والله انا والضيف لحدى اليوم نضحك فيها
| |
|
|
|
|
|
|
|
|
|
Re: القرد في عينه أمه غزال !!!! (Re: الطيب شيقوق)
|
عواطف
عودة سريعة بعد الاضطلاع على المداخلات
طبعا هي اساسا المشكلة مش في الاطفال وانما في الاباء والامهات ..
مفروض الانسان ما يخش في تجربة الانجاب الا بعد دراسة وافية لسيكلوجية الطفل واساليب تربيته والتعامل معه .. لانو الطفل دة اهم زول في الدنيا .. وحتى بعد ولادته يجب علينا ان نتعلم الاساليب التربوية السليمة لكل مرحلة عمرية .. وقد اصبحت هذه المعرفة متاحة اليوم لكل الاباء والامهات ..
وبعدين اطفال السودانيين مغتربين ومحليين ما محتاجين يسجلو ليك زيارة عشان يصدعوك .. لو ركبتي معاهم المواصلات الداخلية ساي بتكرهي حياتك .. اما اذا كانت سفرية طويلة فحتكرهي حياتك وما بعد الممات
| |
|
|
|
|
|
|
|
|
|
Re: القرد في عينه أمه غزال !!!! (Re: عواطف ادريس اسماعيل)
|
احيك يا استاذه عواطف على الطلة الحلوة وعوديتنا كل مرة موضوعك يكون شيق وملامس للحياة اليومية
بس انا شايفكم مركزين على التربية من منظور الاهل والاسرة واغفلتو موضوع البيئة العايشين فيها اولادنا
تصورى اولاد مقفوليين اسبوع او اكتر فى شقة غرفتين وصالة وبعداك تعالى طلعيهم برة وهم شفع صغار
اكيد عاوزين يلعبو وينططو والفرحه لا تسعهم يا جماعه ما احلى الحرية وعليكم الله اتحملوهم شوية وشنو
لو كسرو كباية او وسخو شوية فى سبيل تشوف ضحكة طفل وفرحة صغيرونى اما شفع السودان فحرام نقارن بينهم
وبين عيال المغتربين حيث اللعب فى الشارع والحبوبة والخالة والعم... معليش يا عطفوة شوية صبر وانا كنت
مفكر نزوركم مع عيالى لكن بعد ده بنجيكم مع المدام فقط اما العيال نخليهم مع بتاع البقالة !!!!! حلوة!!!
| |
|
|
|
|
|
|
|
|
|
Re: القرد في عينه أمه غزال !!!! (Re: الطيب شيقوق)
|
سلامات شباب
انا جني و جن الشفع الما مودبين ديل ... شفع يقعوا في ود العين ... يا خي انا ولدتي ولادتي زمان و قلت خلاص اتحليت من ظيطة الشفع دي ... لكن كربتك شنو يا حليمة تبدئ تاني من الصفر و تربي ليك جنون جداد .... دا مقولة امي المفضلة وقت اولاد اخواني و اخواتي يجيبوا كثافتها ... لكن والله معاها حق لانهم كتااااااااااااااااار و قليلين ادب بالفطرة .... المهم ما علينا احكي ليكم دي
مره بتحكي لي زوجة اخوي عن شافعة اهلها مغتربين في السعودية , بعدين دي علي طول بتحرج امها المهم الام حذرت البت و قالت ليها لو جاني ضيف اوعكي تتكلم اي كلمة ... البنت التزمت بالتحذير فترة و بعدين البنت مخزن جيد للمعلومات .... مره جاتهم زيارة واحدة من الجارات و بدت القطيعة ... ما شفتي يا فلانة ... فلانة والله جات اختها من السودان وضعتها وسرقت دهبها انتهي.
المرة المسروقة ذاتها بعد فتره جاتهم زيارة ... بس قال ليك الشافعة تعاين لامها و تعاين للمره المسروقة ... تعاين و تعاين وقت غلبها قامت سألت امها:
يا ماما دي مش فلانة ال اختها جات من السودان وضعتها و سرقت دهبها؟
| |
|
|
|
|
|
|
|
|
|
Re: القرد في عينه أمه غزال !!!! (Re: حافظ حسن ابراهيم)
|
والله يا حافظ ما عارفة أقول شنو ؟ أضحك ولا أبكي غايتو قصص عجيبة عن أولاد المغتربين بس ربنا يدينا
الصبر وطول البال ..
أمبارح صاحبتي جوها أسرتين زيارة مع 12 طفل مش رفعوا كثافتها وبس جاتها صدمة سكري عديل كدة
ربنا يستر إن شاء الله ..
شكرا على الطلة ..
| |
|
|
|
|
|
|
|
|
 Re: القرد في عينه أمه غزال !!!! (Re: Muna Khugali)
|
مووووووووووووني ...
مشتاقة جدا جدا لونستك الحلوة واللاب توب بتاعك الجميل ...
ماما جارة كيف أصبحت ؟؟
عارفة هنا في أبوظبي لما يكون في عرس سودانيين في فندق ناس الفندق بيشلوا هم من الحاجات الذكرتيها
دي غايتو الله يكون في العون ...
مشكورة يا بعد عمري جاياكم قريب ... إنتظروووووووووني ...
| |
|
|
|
|
|
|
|
|
|
Re: القرد في عينه أمه غزال !!!! (Re: الفاتح ميرغني)
|
| Quote: اول حاجه يعملوهاالأطفال انهم يدخلوا الحمامات يفتحو المواسير ويجروا ورق التواليت لغاية البكره الكبيرة ما تنتهي.. |
الحمد لله المافى رتاين
كان الشفع يسّاككوا جنبها والواحد يعاين ليوشه فى قعر الرتينة يلقاه مطاول يضحك ويقوم جارى
| |
|
|
|
|
|
|
|
|
|
Re: القرد في عينه أمه غزال !!!! (Re: عبدالعزيز الفاضلابى)
|
سلامات عواطف
لقد لاحظت أن معظم الأطفال المخرمجين لا يكونوا على ذلك في بيوتهم.. غاية الأدب ويتلقون التحذيرات من والديهم.. بينما يسكت الوالدان عن السلوك المشين لأطفالهم عند زيارة الآخرين..
تخيلي الألوان والفرش واللوحة.. الكمبيوتر.. (ممنوع اللمس)!!
تزورك أسرة من الشاكلة إياها وحاجياتك موضوعة مجهزة لمواصة الرسم!!
لماذا المجاملة على حساب الدمار.. فإعطاء التحذيرات للوالدين بأن الطفل معرض للعقاب عند الخطأ.. شئ ضروري.. مهما كان الفهم لها.. لأنهم لا يرضون بذلك في بيوتهم..
تعرفي ان أجمل شئ النظام والأدب للأطفال.. وهذا ما تربينا عليه.. وبدون ذلك لا يستقيم أي طعم للإجتماعيات..
تحياتي
عبدالعزيز
| |
|
|
|
|
|
|
|
|
|
Re: القرد في عينه أمه غزال !!!! (Re: الطيب شيقوق)
|
سلام استاذة عواطف
وتحية لكل المتداخلين ضيوف هذا البوست الجميل ...
اها عندنا صديق ظريف جدا اتزوج وجهز الشقة من مجاميعو ولم يكن متعود على زيارة الاسر .. اتصل به
احد معارفه وقال ليه نحن في الطريق الى منزلكم ومعاي الاولاد .. قال مرحب بيكم ... اها بمجرد
دخولهم وقبل الضيافة كان صديقي قد فقد الكثير من التحف الجميلة وكسر ما كسر وكان صديقي ينظر
الى والدهم ورد فعله في هذا الخراب وان يوقف ابناءه من هذه الفوضى ولكن والدهم كان يكتفي بجملة
يا ولد اقعد ساي .. والاطفال ما شغالين بكلام ابوهم .. صديقي صبر الى ان انتهت الزيارة وودعهم وهو مغبون ... مر اسبوع واتصل به مرة ثانية وقال ليه نجن جائنكم زيارة .. لم يتردد صديقي وقال له
مرحب بيك انت لوحدك .. لكن لو معاك اولادك فأعفيني من زيارتك لي ولا استطيع استقبالكم ...
________
مقولة للاخ محمد ابراهيم يلخص فيها الاغتراب ويقول ( الاغتراب راجل كذاب وزوجة سمينة واولاد قليلين ادب )
مشتاقين يا شيقا
| |
|
|
|
|
|
|
|
|
|
Re: القرد في عينه أمه غزال !!!! (Re: علاء الدين حيموره)
|
علوية ود حيمورة
| Quote: مرحب بيك انت لوحدك .. لكن لو معاك اولادك فأعفيني من زيارتك لي ولا استطيع استقبالكم ... |
هو دا كويس تعال احكي ليك :-
عندما كنت محاميا بمدينة السوكي كان في قاضي ظريف جدا ورمانسي حتى النخاع . زولنا ده عندو في حوش البيت حديقة مزينة باجمل انواع الزهور وبنلقاهو دائما ماسك الخرطوش ويرش في الزهور بالموية ونحن بس نجر كراسينا ونجلس جنبو و نحكي ليهو .
نقل احد القضاة من محكمة كادقلي للسوكي ليسكن في منزل مجاور لقاضينا الرومانسي . وكنا في انتظار ذلك القاضي الجديد لاستقباله . اها المساء وصلت عربة خاصة بالقاضي الجديد وعلى ظهرها غنم كادوقلي ( القرج) والقرج نوع من الاغنام متعود على تسلق الجبال والحيشان .
استقبلنا القاضي الضيف باغنامه واتونسنا واتعشينا ورحنا ننوم - اتري قاضينا الجديد طلق غنمو بالليل في الحوش المجاور لحوش قاضينا الرومانسي - القرج جاعت ونطت على حوش قاضينا الرومانسي ومعطت ليك الزهور والاشجار كلها .
انا جيت الصباح للقضاة ولقيت ليك قاضينا الرومانسي زعلان مطلع عفشو برة قال اما الاستقالة او النقل من البلد الفيهو القاضي اب غنم ده .
| |
|
|
|
|
|
|
|
|
|
Re: القرد في عينه أمه غزال !!!! (Re: الطيب شيقوق)
|
اها كمان في مشكلة تانية انو الاطفال المزعجين ديل اما ان يكونوا اطفال هادئين في بيوتهم واهلهم قادرين عليهم .. لكن اول ما يدخلو قرية يفسدوها ويجعلوا اعزة اهلها اذلة .. ويدخلوا اهلهم في اضافرين اصابع رجليهم .. وفي نفس الوقت الانتي عايزة تزجريهم اهلهم بكونو عايزين يذبحوهم .. لكن ساكتين احتراما لوجودهم في بيتك .. وفي الحالة دي انتي ست البيت والمطلوب منك المحافظة على الهدوء .. ويجب ان لا نخشى في الحق لومة لائم .. فاذا كنا حتى في الحاجات البسيطة دي ما قادرين نواجه انفسنا والاخرين فكيف في الامور العظام
اكيد شقاوة الاطفال شئ طبيعي .. بل انو الحركة والنشاط والتعبير كلها امور مطلوبة عشان يتعلم ويكبر .. لكن كمان هذه النشاطات يجب ان يكون عليها كنترول تحت ادارة الوالدين
Quote: هاهاهاها مساء الورد
ربى لا تحرم بيت من الاطفال
مودتى
|
الاخ سيف الدين
قال تعالى ويدعو الانسان بالشر دعاءه بالخير وكان الانسان عجولا
| |
|
|
|
|
|
|
|
|
 Re: القرد في عينه أمه غزال !!!! (Re: elfadl abdellatif)
|
Quote: اها كمان في مشكلة تانية انو الاطفال المزعجين ديل اما ان يكونوا اطفال هادئين في بيوتهم واهلهم قادرين عليهم .. لكن اول ما يدخلو قرية يفسدوها ويجعلوا اعزة اهلها اذلة .. ويدخلوا اهلهم في اضافرين اصابع رجليهم .. وفي نفس الوقت الانتي عايزة تزجريهم اهلهم بكونو عايزين يذبحوهم .. لكن ساكتين احتراما لوجودهم في بيتك .. وفي الحالة دي انتي ست البيت والمطلوب منك المحافظة على الهدوء .. ويجب ان لا نخشى في الحق لومة لائم .. فاذا كنا حتى في الحاجات البسيطة دي ما قادرين نواجه انفسنا والاخرين فكيف في الامور العظام
اكيد شقاوة الاطفال شئ طبيعي .. بل انو الحركة والنشاط والتعبير كلها امور مطلوبة عشان يتعلم ويكبر .. لكن كمان هذه النشاطات يجب ان يكون عليها كنترول تحت ادارة الوالدين |
الفضل ..
يزيد فضلك ...
والله كلامك صاح مية بالمية ولكن مرات كدا بتجيك الجلطة عديل خصوصا لم يبدوا يكسروا في التحف أو
يدفقوا العصير في الكنب آآآآآآآآآآآآآخ من زي ديلة وآآسفاي !!!
| |
|
|
|
|
|
|
|
|
|
Re: القرد في عينه أمه غزال !!!! (Re: ناهد بشير الطيب)
|
نانا...
سلامات .. وحمد لله على السلامة ..
شكرا على كلماتك الحلوة زيك ..
عارفة يا ناهد موقعك دة ما عايزني فتح لي مرة واحدة وبعدين حلف حتى ما قدرت أشكر الناس اللي
رحبوا بي .. غايتو شوفي لي صرفة ..
تسلمي يا بعد عمري ..
| |
|
|
|
|
|
|
|
|
|
Re: القرد في عينه أمه غزال !!!! (Re: الفاتح شلبي)
|
Quote:
القرد في عينه أبوه صاروخ |
من المواقف التي لا أنساها...
ذهبت زيارة لأحد الأقارب في يوم الجمعة.. فهو يسكن في فيلا كبيرة خارج المدينة لديها حوش
وبينما نحن جلوس في الصالون سمعنا صوت سيارة في الحوش الخارجي
وقف الرجل لينظر من زجاج النافذة..
فإذا به بدأ يصيح ويصفق في يديه...ويردح...
الليلة .. الليلة.. الليلة.. الليلة..
وقفت فإذا أسرة تخرج من السيارة .. قلت ليه في شنو؟
قال لي ياخي ده عندو أطفال الجن الأزرق يخاف منهم..
في تلك اللحظة سمعنا الباب الخارجي للفيلا والباب الداخلي وباب الصالون .. كاف كاف كاف
واندفع ثلاثة أطفال مثل الصاروخ وعبرو الصالون في سرعة البرق واتجهوا للداخل ..
عند وصول الضيف الزائر (أبو الصواريخ) كان أحدهم قد إصطاد البنت الصغرى لصاحب البيت وبدأ في جرها من رجليها جراً وجرى بها عبر الممرات ...
عندما بدأ الضيف الزائر بالسلام بادره صاحب البيت ياخي انت ما سمعت بزواج فلان...ياخي نحن لو تأخرت دقيقة واحدة كان ما وجدتنا. بس أيانا المرقنا..انت لقيتنا ماشين .. كل الناس مشت.. انت ما مشي؟
طبعاً الضيف الزائر عرف أنه مطرود .. أجاب أيوة ماشي.. يلا يا أولاد..
بقت مشكلتو في كيف يجمع هذه الصواريخ العابرة التي انتشرت في الغرف ، البيت فيه ثمانية غرف وكل منهم اتجه إلى اتجاه..
كانت مهمة صعبة التحكم في ثلاثة صواريخ ذاتية الحركة وإدخالها مرة أخرى إلى السيارة.. الرجلين ونسائهم جاهدوا في هذه المصيدة..
وعندما تحركت السيارة بالزائر المطرود.. قلت لمضيفي ..
عساك أحرجت الراجل..
قال لي إحراج شنو؟ دي حرابة دي.. هو عارف انه حامل معاه قنابل موقوتة .. يدخل في بيوت الناس..
| |
|
|
|
|
|
|
|
|
|
Re: القرد في عينه أمه غزال !!!! (Re: المسافر)
|
المسافر ..
بركة الجيت ..
بركة الجيت ..
عسل إنت وبسكويت
آآآآآآآآي
والله قصة تفطس من الضحك كويس إنه زولك المطرود بيفهم طيب وقت هم حساس كدة ليه ما ربى أولاده
يستاهل الطردة ..
شكرا على الطردة الحلوة .. سوري أقصد الطلة الحلوة ...
| |
|
|
|
|
|
|
|
|
|
Re: القرد في عينه أمه غزال !!!! (Re: الفاتح شلبي)
|
الأخ العزيز الفاتح ..
كل الحب ..
مع احترامي لوجهة نظرك ولكن لسنا وحدنا اللي عندهم أطفال يسدوا عين الشمس فهناك جنسيات أخرى
لدى كل أسرة أكثر من 12 طفل ولكن لا تسمع لهم صوتا .. ليه بقى؟؟ عشان بياخدوهم الحدائق العامة
عشان يفرغوا الطاقة ولكن نحن كسودانيين لا نعرف ثقافة زيارة الحدائق والأماكن المفتوحة .. كل
ما في الأمر ناخد الأطفال من البيت ليزوروا بيتا آخر وليحدثوا هذا الكم الهائل من الهرج والمرج
في الوقت الذي تتفق فيه بقية الأسر للخروج معا مع أطفالهم للنزهة وتناول وجبة الغداء في الحديقة
عموما شكرا على مرورك الجميل ..
| |
|
|
|
|
|
|
|
|
|
Re: القرد في عينه أمه غزال !!!! (Re: عبدالعزيز الفاضلابى)
|
شكرايا أستاذة... واقع فعلا مر... المشكلة بعد الشيطنة دي كلها لمن يرجعوا السودان ما حياكلو عيش...ودي نقطة مهمة... نحن غافلين عنها ... الله يستر غيتو... انا والله طوالي في بالي ياخوانا ديل لمن يكبروا حيقدروا يدافروا ليهم في مواصلات ولا حيقدروا يمشو يجيبوا ليهم كيس خضار من السوق ...مشكلة فقدان الشارع والمجتمع ليها آثار بعيدة المدي وخطيرة ...التربية في البيت مقدور عليها..
الله يستر غيتو
| |
|
|
|
|
|
|
| |
عواطف ادريس اسماعيل
محمَّد زين الشفيع أحمد
ترهاقا
وليد الطيب قسم السيد
elfadl abdellatif
Dalal Ezzaldin
الطيب شيقوق
محمد عثمان عبدالله
حافظ حسن ابراهيم
عبد الدائم سيد أحمد
Muna Khugali
عبدالعزيز الفاضلابى
الفاتح ميرغني
Abdlaziz Eisa
علاء الدين حيموره
ناهد بشير الطيب
حذيفه ابراهيم الكباشي
الفاتح شلبي
المسافر
فيس بوك
تويتر
انستقرام
يوتيوب
بنتيريست