|
|
 نـجـمــــا ت ســرقــن بـعـض شـعــاعـن مـنــك
|
واجري الاحق لي نجمات
سرقن بعض شعاعن منك
وليك ندهت
يا بنية بترمح مهرة أصيلة
اقيفي
قلبي وراك بناهد
وعقلي اتلجم وفقد الحيله
نفس الكلمة الريح الجامحة
ولون النيل
مطر العينة الرش الدارة
وبلبل ليله
كان من نفسك
ومن أحلام بتناغم فيني مكامن حسي
من يوم شفتك
فردت جناح الليل الزاخر بانغامك
أحلى خميلة
وآه
لمن منك جاني الخاطر
وغازل فيني خيال الشاعر
( هوي ياوليد
يا ساهم وساهر
شن بتدور؟
شن بتدور؟)
و سبحت سرحت
وأنت أماني الروح الفيني سماها
حاجة ترفرف شغفة قلبي
واهمس
وأنت تهيمي
احلي خليلة
ولي تهامسي
(واصل نمك
اكتب فيني غناك الحارق جوفك
وسارق
من عينيك النومة الهانية
ارسم ولون
في الآفاق الحالمة عيوني
وجوة سكوني شخبط بوحك
كلمة اصيلة
وجوة حنيني ادفن روحك
سافر جوة عيوني وابهر
بي اشعارك عاقل جني
خلي الانثى الفيني تقالدك
وفاقدة الحيلة )
وشلت
من الزمن البينا ضريرة
واعتمدنا
وسط الدايرة
موجة تشيل الفال
وترجع فال
وتغسل بي محارة الضو قلبينا
وتبقي مليكة عرشي
وابقى مليكك
وبينا بتكبر عاطفة نبيلة
واصلو سعادة الريدة الحق
انك تفرح
لمن تسمع صوت محبوبك
أو مرة يجيك الخاطر فجأة
يشفي الروح الكان معلولة
|
|
 
|
|
|
|
د.محمد حسن
ادريس خليفة علم الهدي
فيس بوك
تويتر
انستقرام
يوتيوب
بنتيريست