|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: المسافر)
|
يا جماعة ما معقول, وين ناس أم درمان (طبعا الطلبة النضاف ديل زي ما قالت حنين للبلد) لازم يكونوا من أم درمان....شايف ناس الحلفايا دايرين يتسلبطوا في واحد منهم و في الأخير إختلفوا!!! و طبعا ما ح يكونوا من ناس الخرطوم لأنو ناس الخرطوم ديل ما عندهم حزب كارب يقدر يرسل أولادو لألمانيا و بعدين هم زاتم ما بعرفوا المانيا دي واقعة وين في الخرطة. أما ناس بحري ديل سيبم ساكت.
مدني شنو, و بورسودان شنو, ديلك الزمن داك الخرطوم زاتا ما عارفنها وين.
أما ناس أتبرا ما فاضين من سك القطر
فعشان كدا بنوجه سؤلنا الجاي لناس أم درمان النضاف و فاهمين
يا ناس أم درمان, في 1959 في كم زول بدق عود, و كم زول بعزف كمنجة
و ديل طلبة, واحد بعزف كمنجة و التاني عود و في 1959
و برضو ما عرفتوهم? حكايتكم شنو إنتو?
زهجتونا
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: Nasr)
|
Quote: اغا والثانى من اليمين اسمه عباس عبد القادر. |
في نهاية العام الماضي كتب الي شخص الماني وجد اسمي في احد المواقع اليكترونية يسال عن "عباس عبد القادر" لان والده كان صديقا وزميلا لعباس في مطلع الستينات يدرسون الطب معا والان وهو في كبره يتمني ان يجتمع بالدكتور عباس عبدالقادر .. حاولت جهدي بحثا واشار الي احد المنتديين في موقع سودانيز (باللغة الانجليزية ) بان له ابنا في اوربا وانه سيبعث اليه بعنوان الالماني كما بينته له ...للاسف ضاع عنوان الالماني و وبقية الرسائل التي تداولناها عندما تعرض احدالاجهزة التي استعملها الي عطل ما ...
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: ihsan fagiri)
|
صدقت ياكستاوى ,, أهو الناس جات وأكدت ليك إن صورك كلها طلعت ناس أم درمان . ولو قوقلت لسه حتلقى كمان صور من سنة 1800 م لأمدرمانيين وصلو مع كولمبس وأسسو أمريكا ,, وأديك معلومه كمان , هل تصدق إن مصطفى سعيد بتاع موسم الهجره للشمال من أبناء أبروف ؟
كوستاوى ,, والله ريحتنى فى حنانى ,,
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: كمال علي الزين)
|
Quote: الشخص الجالس رقم 2 من اليمين ويظهر طرف وجهه هو العم خليل ابو زيد .. الشخص الواقف وبيصفق هو العم الطاهر عبد الباسط ... |
يا علاء الدين حيمورة نشطت ذاكرتنا ياخ العم خليل أبوزيد من أوائل الطلاب السودانيين الذين درسوا بألمانيا .. من أبناء حي بانت غرب بأمدرمان تبوأ مناصب متعددة في النشاط الاجتماعي لأحياء الموردة وبانت وحي الضباط وكان ضمن الاداريين في نادي الموردة الرياضي.. كما كان نشطاً أيضاً في جمعية الصداقة السودانية الألمانية قبل أن يصادر نشاطها النظام المايوي عقب إنقلاب 19 يوليو 1071.
أما الخال الراحل الطاهر عبد الباسط فهو في الأساس لم يكن ضمن الدارسين بجمهورية المانيا الديمقراطية بل هو (أول افريقي) يدرس بجمهورية المجر الشعبية على الاطلاق.. وتخصص في علوم الاقتصاد.. عند دراستنا لاحقاً بالمجر علمنا من المجريين أنه كان ضمن من دافعوا عن الاشتراكية عندما شارك في الدفاع عن بودابست العاصمة على الهجوم الذي واجهته (الثورة الاشتراكية) من قبل أعدائها عام 1956! وفي هذه الصورة ربما يكون في زيارة صيفية لأصدقائة بألمانيا.. علماً بأنه كان عضواً باللجنة المركزية للحزب الشيوعي السوداني والتي انتخبت في مؤتمره الرابع عام 1967,, وفصل عن الحزب بعد الانقسام الشهير عام 1970.
كوستاوي
يا شقي الحال مين وين لميت في صورة ناس إحسان فقيري دي! لكين ما وقعت لينا في جرح! عندي معاك نضمي .. ناولني إيميلك في إيميلي دا:- [email protected]
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: ihsan fagiri)
|
هجام سلامات، الثالث من اليمين هو الخال د. تاج الدين يوسف صالح وقد انتقل من ألمانيا الشرقية في 1963 إلى ألمانيا الغربية وكان (ماخِد) ليهو ألمانية إسمها (مارقوت) له منها أمينه وأميره ويوسف وناس زينب قالوا (بتقرب ) لي هيلموت كول ، قالوا يا نصر بت خالو لَزَم والحمدلله ما طلعت قريبة الفوهرر أو (سِرَّهم )، وقالوا في عرسا رقصوها ناس عواطف هامبورج لأنو عوضيه شتوتجارت إعتذرت وقالوا غنوا ليها ( ورا ورا ورا BMW ) ، ثم تزوج من ألمانية أخرى إمرأة فاضلة تسمى (إنقريد) من دوزلدورف له منها منير ونوره ويسكن حاليا في مدينة بوخوم. طبعا يا كوستاوي الناس التانيين ما عرفتهم لكن أكيد من أمدرمان ، وبالتحديد من المسالمه وحي العرب زي التاج، كمال سالم ، قريبك راح منك؟ كلامي دا ما كلو هزار يا نصر ما تجي تقول لي دي ما زوجة الرئيس ودي حرم (السفاره) وسوالفك بتاعت بوست عبود إياها. أها أنا زاتي أغالتك و.. الرد بالسد،
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: محمد المرتضى حامد)
|
Quote: هجام سلامات، الثالث من اليمين هو الخال د. تاج الدين يوسف صالح وقد انتقل من ألمانيا الشرقية في 1963 إلى ألمانيا الغربية وكان (ماخِد) ليهو ألمانية إسمها (مارقوت) له منها أمينه وأميره ويوسف وناس زينب قالوا (بتقرب ) لي هيلموت كول ، قالوا يا نصر بت خالو لَزَم والحمدلله ما طلعت قريبة الفوهرر أو (سِرَّهم )، وقالوا في عرسا رقصوها ناس عواطف هامبورج لأنو عوضيه شتوتجارت إعتذرت وقالوا غنوا ليها ( ورا ورا ورا BMW ) ، ثم تزوج من ألمانية أخرى إمرأة فاضلة تسمى (إنقريد) من دوزلدورف له منها منير ونوره ويسكن حاليا في مدينة بوخوم. طبعا يا كوستاوي الناس التانيين ما عرفتهم لكن أكيد من أمدرمان ، وبالتحديد من المسالمه وحي العرب زي التاج، كمال سالم ، قريبك راح منك؟ |
شكرا ليك يابن خالتى محمد المرتضى ,, وحقيقة لم أعرف العم التاج ولا العم الطاهر عبد الباسط فقد كانوا شبابا ممتلئ بالحيويه ولكن كما قال كوستاوى كنت متأكد إنو الناس ديل من أم درمان ,, أها ياجماعه حتى الآن تأكد تماما إن هنالك إثنين من أعمامى فى هذه الصور , وأحد من المظاهر وواحد من المسالمه حد يزود .
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: عمر الفاروق عبد الله الشيخ)
|
.. يا كوستا يا بديع يا مُتعب !
بالرجاء ما تجيب صور زي دي وتدخلنا في قصة (دآمة الاسود ) في لعبة الوست : وراها حتى نراها
وصلنا الان مايلي بخصوص الصورة الاثرية الكلام من صديق فرح رمرم ( نمرة إتنين شمال الصورة )
.. رضا البرير قام بمتابعة امر الصورة مع صديق فرح، جزيل مودتي و شكري لرضا الحفي الصفي .. الانيس الما تناسى ، و الحبيب الما جار او تجنا
صحبك ود حامد، حسم امر الزول الثالث خالو الاسطورة (تاج الدين يوسف صالح) علاء حيمورة اكد امر خليل ابو زيد، و ذاك الواقف بصفق (طاهر عبد الباسط) البقية: تفريدة صديق فرح رمرم
صديق فرح، فردة و صاحب السر حيمورة في تلك الالمانيا المُجزأة شرقا و غربا ( تزوج صديق و السر من بنات المانيا فصارا مثل مصطفى سعيد، كما ظل يقول صديق)
الاخ احمد طراوه تحية ندية نداوة ذلك الزمن الجميل
فى الصورة (عود وكمان) من الشمال الى اليمين فاروق يوسف اغا توفى فى حادث سير فى المانيا اثناء دراسته صديق فرح قمر الدين قرمبع عازف الكمان عمران محمد على سعيد عازف العود د/عبد الباسط عباس جالس على يد الكرسى عيادته الان فى الثورة فيصل بشير جالس على الكرسى الواقف لم يعرف بعد ( طاهر عبد الباسط برواية علاء حيمورة) الجالس خلف الكرسى لم يعرف بعد (تاج الدين يوسف برواية ود حامد)
تقبل تحيات صديق فرح وهو بخير .. ولكم كل الاشواق .. رضا
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: Kostawi)
|
الأخ/ كوستاوي...
شكرا جزيلا على قبول الدعوة...
ودي دلالة على أنك رجل كريم...
أما بخصوص أولاد أم درمان... ذكرتني
أيام خالد حسن عباس كان وزير للصحة...
أجمتعت به أحد النقابات التقنية.. لمناقشته في مطالب مهنية...
ولما أشتد النقاش.. وحيث أنه لم يكن الرجل المناسب للوظيفة...
أذكر أنه على حسب رواة الواقعة... أنو الوزير قال ليهم: انا ود أم درمان
وما في زول يوريني أعمل شنو أو يناقشني...
وكان أن دق أسفينا آخر في نعش مايو...
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: Kamal Karrar)
|
Quote: أيام خالد حسن عباس كان وزير للصحة...
أجمتعت به أحد النقابات التقنية.. لمناقشته في مطالب مهنية...
ولما أشتد النقاش.. وحيث أنه لم يكن الرجل المناسب للوظيفة...
أذكر أنه على حسب رواة الواقعة... أنو الوزير قال ليهم: انا ود أم درمان
وما في زول يوريني أعمل شنو أو يناقشني... |
الأخ كمال كرار
شكرا ليك بس المشكلة في خالد حسن عباس مقدم المسدس قبل أم درمان
أولاد أم درمان مفروض يعتذروا للشعب السوداني عن إنقلاب مايو و يسيروا على نهج ود أم درمان الكبير محجوب شريف الذي أعتذر للشعب السوداني.
لك كل الإحترام
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: Kostawi)
|
الأخ/ الابن!(غالباً) كوستاوي لك التحية والود
شكراً على هذه الصورة التي أعادت لي ذكريات عزيزة عن سنوات زاهية، أرجو أن أشركك وأصدقائك في بعضها.. فأنا من جيل هؤلاء الشباب النضيرين الذين يبدو من سيمائهم أنهم مقبلين على الحياة ومنفتحين على المستقبل بكل البشر والتفاؤل. وبما أن الذكريات (نهضت بجيلها) كما قال شاعرنا محمد عوض الكريم القرشي .. فقد نهضت بي هذه الذكريات .. كيف لا وقد أعادت لي ذكرى العديد من الأصدقاء .. من بينهم العزيز الخالد السر حيمورة وزملائه وأبناء دفعته من خريجي خورطقت (1956م)، عمران محمد علي (عازف العود)، وعلي السبكي، ومحمود عز الدين- وهم من الرعيل الأول الذي درس بألمانيا الديمقراطية.
وفي عام 1958م تم اختيار مجموعة كبيرة للدراسة في ألمانيا منهم الأصدقاء أبو القاسم البشير، والمرحوم أنور سعد، وود حمد، وفيصل بشير، وتاج الدين يوسف. وكان يوم سفرهم يوما تاريخيا لا ينسى، إذ أنه أسهم في تشكيل مستقبل الحكم في السودان وأدخل البلاد في ما عرف بالدائرة الشريرة!
في منتصف شهر نوفمبر كان الشباب المبعوثون قد أكملوا إجراءات سفرهم من حيث التذاكر والتأشيرات والحجز .. وبقوا في الأيام الأخيرة قبل السفر ضيوفاً على أصدقائهم وأبناء دفعتهم الذين التحقوا بجامعة الخرطوم في يوليو من ذلك العام ( ونعم الضيافة في داخليات جامعة الخرطوم ذات الخمس نجوم في تلك السنوات!). كان الغرض من بقائهم بداخليات الجامعة هو قربهم من مكاتب الإجراءات في الخرطوم ومن المطار .. وأيضاً للمشاركة في حفلات وداعهم مع أصدقائهم بالجامعة. أذكر أن ود حمد - والذي كان يقيم معنا في داخلية سوباط بالبركس - هو الذي أيقظني من النوم مبكراً، وحسبت أنه أراد أن يودعني والذهاب إلى المطار.. ولكنه أيقظني ليبلغني بالنبأ الكبير!!
ففي صبيحة اليوم المحدد لسفرهم في السابع عشر من نوفمبر حدثت المفاجأة الكبرى التي كان من الممكن أن تحرف مسارهم المخطط له وتغير مستقبلهم .. فقد هب الجيش فجراً .. وعزفت الموسيقى .. وأعلن الفريق إبراهيم عبود البيان رقم (1)! غير أنهم وللمفارقة تمكنوا من السفر بصورة طبيعية مساء نفس اليوم، إذ أن المطار كان مفتوحا، ولم تكن به قوائم محظورين!! محبتي عبد المنعم خليفة
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: Abdul Monim Khaleefa)
|
الابن كوستاوي (استقر رأيي!) سلامي لك ولأصدقائك دعني أواصل حديث الذكريات ..
Quote: طبعا الطلبة النضاف ديل زي ما قالت (حنين للبلد) لازم يكونوا من أم درمان |
Quote: صدقت ياكستاوى ,, أهو الناس جات وأكدت ليك إن صورك كلها طلعت ناس أم درمان |
Quote: الناس التانيين ما عرفتهم لكن أكيد من أمدرمان ، وبالتحديد من المسالمه وحي العرب |
أقدر هذا الانبهال في عشق أمدرمان .. فهي مدينة لها مكانة في قلوبنا جميعاً، كما في قلوب عشاقها الذين شببوا بها!.. خليل فرح ، وعبد المنعم عبد الحي .. وشوقي بدري .. وعلي المك.. وخالد الكد .. وعبد القادر الرفاعي.. غير أن الحقيقة تبقى، وهي أن الوجاهة والهندمة ليست قصراً على الأمدرمانيين. فمن هم في قلب الصورة ليسوا من أمدرمان .. عمران محمد علي (عازف العود) من أبناء الأبيض – العاصمة الأولى للدولة السودانية المستقلة!.. وقمر الدين قرنبع (عازف الكمان) من المسلمية.. وصديق فرح (أكثرهم وجاهة!) من القطينة. محبتي عبد المنعم خليفة
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: Kostawi)
|
يا نصر، د. عبدالمنعم ربما لم يكن متابعا البوست المعني عن أمدرمان وغيرها من المدن وكما تفضلت ف (جهوية) الأمدرمانيين لا تتجاوز المزح وحسب فأمدرمان مدينة الجميع التي لاتعترف بقبلية أو عنصرية ، وننتهز هذه المناسبة ونورد صورة من (زِنكي الخدار والجَزُر) في سوق أمدرمان في الأربعينيات ودعاية لفيلم نار بسينما برمبل وبالطبع أمدرمان هي فنار السودان، أول سينما وأول مسرح وأول إذاعة وأول تلفزيون وأول مكتبة و( مريخ هلال) و... لي في المسالمه غزال.. عفوا للخروج عن موضوع البوست. [/img]
أين تذهب هذا المساء
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: Kostawi)
|
الصورة للدكتور سيد محمد حسني مندوب السودان في الأمم المتحدة قبل الإستقلال (1955-1956) مع هنري كابوت لودج ، سفير الولايات المتحدة لدى الأمم المتحدة. د.سيد تقدم حينها بطلب العضوية للسودان في المنظمة الدولية
د.سيد حاصل على الدكتوراة في القانون الدولي من فرنسا وشارك في إعداد إتفاقية مياه النيل ويتحدث الفرنسية والعربية والإنجليزية والعربية بنفس المستوى وهو شاعر واستاذ جامعي وله بكلاريوس في الأدب إضافة إلى القانون رحل في صمت
Note:
دكتور سيد محمد حسني هو خال (شقيق والدة) عضو البورد و زميل الدراسة و رجل القانون الأخ محمد المرتضى حامد
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: ihsan fagiri)
|
Quote: كنت اتمني انو صور الشباب تكون من جماعتنا اقصد طلبه براغ ولكن معليش |
سلامين إحسان فقيري ما ناس شرق أوربا زمان كانو زي البيدرسو في (دولة واحدة)! طيب الفوق دا ما دكتور محمد مراد وأعتقد إنكم عاصرتوه في دراستو بألمانيا الشرقية. هنا مشاركاً في مهرجان برلين للشباب والطلاب ضمن وفد السودان وكان ممثلاً لاتحاد الشباب السوداني كعضو لجنة تنفيذية منتخب في مؤتمره الثالث,, عندو بالمناسبة مقال ممتاز في عدد الميدان الآخير ,, قدر ما فتشت البوست اللي نشر فيهو أخونا عاطف مكاوي العدد ما لميت فيهو كنت عاوز أعيد نشر المقال هنا كتعريف بهذا الصديق الرائع,, ياكوستاوي حاول ساعدناوليك أجر المناولة. زمان يا إحسان كان عندكم في أبروف وبيت المال مجلة مكتوبة بخط اليد ولها تصميم بديع وبغلاف مصقول وبها صور فوتوغرافية وكانت ثقافية إجتماعية مهتمة بأخبار الحي وأنشطته الاجتماعية ,, نسيت إسمها,, وزي أصدرت نحواً من خمسة أعداد أو تزيد ,, الأعداد دي تحصلت عليها بعد فترات إصدارها بسنوات طويلة ,, وأعتقد أن من سلفني تلك الأعداد صديقة من بنات المنطقة ديك وسرعان ما استعادتها مني. بتتذكري إصدارة زي دي ,, الجهة اللي بتصدرا,, أسماء هيئة التحرير,, أي حاجة عنها؟!!.. حاولي أنحتي الذاكرة. تسلمون
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: محمد المرتضى حامد)
|
أيوة يا إحسان مراد فعلاً عاد لآلمانيا في الفترة ديك عاوز أفاجئك بصورة فوتوغرافية لفرقتكم الفنية التي كانت من أشهر الفرق الفنية وسط الطلاب الأجانب وطافت بمعطم البلدان الصورة تظهرين مع دكتورة ناهد عبد الله وهاشم حمزة الذي كان ومازال يمتلك صوتاً رخيماً وأجيز صوته بالاذاعة ولكنه هجر الغناء ويعمل حالياً كطبيب صيدلي في الأمارات على ما أعتقد ,, الصورة فيها مجموعة كبيرة من طلاب تلك الفترة وهي من إرشيف فكري بطرس القبطي ودرس هندسة وكان معاكم في الفرقة,, الآن يعيش في بودابست وشقيقه الآخر مايزال في براغ فكري يمتلك إرشيفاً ضخماً من صور الفترة ديك. الصورة دي موجودة عندي ولي كمين يوم بفتش فيهاما لاقيها.
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: د.نجاة محمود)
|
Quote: اها النقوليك ياكوستا بعد الاستقلال مباشرة سافر الي لونودون الوالد العطبراوي 100% الله يرحمه
سافر خالي هاشم عثمان ايضا الى لوندون رحمه الله ومصطفى محمد علي (ابو ندى)الى امريكا اطال الله عمرو
وعدد كبير من ابناء عطبرة سافروا الى الصبن وروسيا ايام الاندلاق الاحمر..
قال ساكين القطر قال.. |
يا دكتورة ناس أتبرا بسكو القطارات و البصات و (اللموزين) as we speak
or (as we are speaking) إنجليزي دكاترا
و الله يا نجات أنتي دايرا تعيشي في أمريكا لكن الظروف ما سمحت ليك
ياخ ما تمسخيها علينا
بالمناسبة أنا في أمريكا قبال *تيمبل*
يعني ما تحشي على الناس إنو بتعرفي أمريكا أحسن مننا
أطلعي من التاريخ دا و الويل فير البتقولي عنه دا ما موجود إنتها من زمن كلنتون
فما تبكي على أمريكتك
في أمريكا تانية يا خردة
لا أعرف أي سوداني في الويلفير لكن أعرف مجموعة كبيرة أساتذة في جامعات (كتار و مساخ) و مهندسين و أطباء و محامين و عووووووووووك
أطلعي من 86-89 بتاعتك دي!
أمريكتنا ما زي أمريكتكم يا خردة
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: Kostawi)
|
Quote: الله يا نجات أنتي دايرا تعيشي في أمريكا لكن الظروف ما سمحت ليك
ياخ ما تمسخيها علينا
بالمناسبة أنا في أمريكا قبال *تيمبل*
يعني ما تحشي على الناس إنو بتعرفي أمريكا أحسن مننا
الله يا نجات أنتي دايرا تعيشي في أمريكا لكن الظروف ما سمحت ليك
ياخ ما تمسخيها علينا
بالمناسبة أنا في أمريكا قبال *تيمبل*
يعني ما تحشي على الناس إنو بتعرفي أمريكا أحسن مننا
|
الخردة ياخي ما ترد على كلام ما اتقال سمح حركات هنادي دي خليها انت احسن من كدا
انت في زول قال ليك امريكا طردونا منها ولا شنو؟ لماالظروف ما خدمتني وشنو..؟ يا عمك انت ما بتكون اقدم من تمبل هناك لانه تمبل اتعملت في القرن الثامن عشر والتأريخ العملتو لي فيها ما ظابط برضو... الا يكون الخرتيت الهدوه لحديقة في امريكا لما اعلنت استقلالها ببقى ليكم هاهاهاهاهاهاها
مبروكة عليكم امريكتم..
Quote: يعني ما تحشي على الناس إنو بتعرفي أمريكا أحسن مننا |
دي حالة نفسية رسمي يا خردة.. شن طعما لمان اعمل فيها بعرفها ولا لا
بششششششششششششتتنة ورقاد واطة..
| |
|
|
|
|
|
|
Re: صورة نادرة لطلبة سودانين في جامعة كارل ماركس بالمانيا الإتحادية 1959, هل تعرف منهم أحد? (Re: ihsan fagiri)
|
Quote: صدقني تجربه غنيه بكل ما تحمل الكلمه من معني |
كبفك إحسان وصدقيني دا نفس الاحساس .. بمعنى أن فترة الستينات وبداية السبعينات اللي عشتوها إنتو داخل السودان والأنشطة الاجتماعية وخلافة من الكنتو مدورنها ( والمجلة المخطوطة مثالاً).. وما كان يعرف بالأسابيع الخيرية في العاصمة بواسطة إتحادات الطلاب في الجامعات والمعاهد والثانويات فضلاً عن فروع إتحاد الشباب السوداني والاتحاد النسائي ,, ومنظمات المجتمع المدني ( الجنينية) والتي بانت ( أسنانها) تماماً حالياً في السودان! ,, هذا ما يخص سودان الستينات وبداية السبعينات أما فيما يخص تجاربكم في شرق أُوروبا في تلك السنوات النضرة التي كان عليها الحال ,, ماهلاً طيباً وأنتن وأنتم، في بهاء سنوات النضارة والشباب والفتوة والوسامة.. والاحساس بالقدرة على نيل المستحيل!,, فهي تعد كما ذكرتي أعلاه أنها كانت (غنية المحتوى ومتعددة المنابر)!! ,, لو تحدثتي لنا يا إحسان فقط عن تجربتكم بخصوص الفرقة الفنية وكيف أنها نالت إحسان الكل بما فيها دول أخرى (غربية)! ,, يكون لكم أجر الحكي وعكس التجارب التاريخية,, خاصة أننا ما زلنا في خضم فترات الجاليات السودانية,, التي أصبحت ضمنها أسر بكاملها بدلاً عن مجموعات ( طلابية ) في دول الاغتراب والشتات بمدن أمريكا والغرب!( شرقه وغربه)! كل ذلك يا أختاه، يعد تجربة ثرة وفيها من الخبرات ما يجعل الناس توثق لها.. ففيها بعض شفاء للناس يا أولي الألباب ,, لو كنتم تعلمون! أحاول يا إحسان أن أجر بعض ناس الفترات ديك عشان يتكلمو ببعض ما عندهم وعندهن ,, ناس كتار.. بيبدأوا من جيل المرحوم الطاهر عبد الباسط وصحبه الميامين في صور البهجة الفوق دي مروراً بدفعات كتيرة قبل حضور دفعتكم ,, ثم دفعتي التي شهدت ( عقاب الماركسية!),, والحقوق محفوظة بالطبع - زي ما بقولو ناس سودان فور أوول - لشهيدة النساء الماركسيات ( روزا لوكسمبرج)!,, تلك التي شاهدناها بأم أعيننا ( أقصد الماركسية) ,, كيف انهارت أمام الناس كبيوت البسكويت والرمل! ,, وفي هذا فلنتحدث دون حرج!.
عصام,, يا (فزع )الحلة,, وما أدراكما بانت شرق بأمدرمان! نتطلع برضو لتجربتكم في شرق الدنيا.. ذلك الشرق الذي غاب واحتجب ,, وتبقى تجربة - أياً كان الحكم عليها - إلا أن دروسها وعبرها.. على مستويات من شهدوا وعاصروا وشافوا مهمة- زي ما قلت لاحسان - لتُنقل بكل صدق ودونما تجميل أو تقبيح أو تهويل,, لكي يقف الناس على تلك التجربة التي كانت حاضرة في أخاديد الجغرافية ومحركات التاريخ,, ولن يغشاها النسيان لآماد طويلة.
ويا عمر إدريس فعلاً بتوقع إنو زول لطش الصورة دي! ,, خاصة لمن يكتشف إنها جزء عزيز على تاريخ ,, ما كان مهتم بنسجيلو في الفترة ديك ,, بس وقع ليهو في جرح لمن لقى صورة زي دي قدامو .. وما صدق!!,, بالمناسبة ما بعثته لي مش المادة اللي كنت قاصدا ,, حا أشرح ليك تاني. وتحيات لمنى والعيال.
وشكراً لهذا (الكوستاوي) الذي جعل هذا ممكناً!!.
(عدل بواسطة حسن الجزولي on 06-08-2009, 00:58 AM)
| |
|
|
|
|
|
|
|