|
خمش التعازي والتهاني( كت اند بيست) وما يستصحب ذلك من اسقاطات لغوية
|
بالامس خمشت لي تعزية من واحد عزاااااااااي وقلت اتصفح شوية في التعازي عشان ما يكتشفوا الخمشة - نسيت خليت الخمشة معلقة (كوبيد) ومشيت بوستات التهاني وقلت اجامل مع الجماعة وكنت فاكر خامش عبارات تهنئة . فتحت محل بكري حقت (رد) وما ركزت كويس وتوووش نزلت الكلام واديتو قفاي بدون اقراهو .
قفلت المنبر العام ومشيت لي لدعوة بمناسبة وداع احد الوجهاء وكنت حاكر كراع في كراع افاصح سااى مرات اعوج لساني زى ناس البندر ومرات اخمش الكلنكس زى ناس البندر ومرات ارمي لي كلمة كلمتين بالانقليزي عشان اكون زى ناس البندر .
الموبايل رن واخدت بيهو تكية فنجرة زى ناس البندر وصوتي همس براااااااحة زى ناس البندر
الوووووووو معاى منو؟ معاك ابو بكر الرطاني من دبي . بشر يا ابا رشا . ابشر شنو يا الرطاني ؟ الحق يا العريريب انت كبيت ليك تعزية محل تهنئة . قطعت المحادثة وعرقي اتصبب ولهجتي مع الناس اتغيرت وعيوني حمرت .
طوالي قلت لصاحب الدعوة معذرة انا ماشي وجاي معاي ضيوف منتظرين في الحر امام باب بيتي بمشى بجيهم وبجيكم سرييييييع . سيد الدعوة قال لي بطلاق اكان ما اتغديت ما بنخليك تمشى حتى لو منتظراك كوندا ذاتها .
اعمل شنو يا اخونا الراجل اخرني ووقت اتغديت وجيت جاري لحقت عدلت التهنئة لكن لقيت فيسل هليل المسنوح خمش العزاء وعلق عليهو . بقيت في التلمنى في فيسل عشان يعدل برضو لكن المسنوح قالوا سافر بودابست زوجتو ولدت ليهو بنية .
|
|
|
|
|
|
|
|
Re: خمش التعازي والتهاني( كت اند بيست) وما يستصحب ذلك من اسقاطات لغوية (Re: Ahmed al Qurashi)
|
ود القرشي
تستاهل يا ودشيقوق دى شفقتك ...
يا دوب فهمت استعجالك امس فى الغداء مع ناس محمد عثمان ... كان تفهمنا الحكاية
بقت لي عبرة ونصيحتي للخماشين الاتي :-
التاكد بان المادة المخموشة تتواءم مع الماعون الذي ينوي الخامش تلصيق المادة المخموشة فيه
التاكد من سلامة لغة المادة المخموشة
توخي الحذر من خمش مادة لشخص له علاقة لصيقة بالمخموش اليه لان المادة المخموشة قد تحتوي على عبارات مثل ( التعازي للاخت سكينة ) فانت لا تعرف سكينة ودى بتكشف حالك مع المخموش له لو كان متابعا لبوست التهنئة او العزاء .
على الخامش ان يجعل المادة المخموشة فووووووووق المادة المخموش منها حتى يتهم المخموش منه بانه هو الخامش
ان كنت على عجل يمكنك ان تخمش سريييييييع وتضيف اى كليمة لزوم ال variation بين المادة المخموشة والمخموش منها .
هييييييييييع كع
| |
|
|
|
|
|
|
Re: خمش التعازي والتهاني( كت اند بيست) وما يستصحب ذلك من اسقاطات لغوية (Re: محمد على طه الملك)
|
د شيقوق تحياتي
زي ما حصلك حصل لي صاحبنا وكان سايق ليهو جماعة لي فاتحة وقام غلط في الشارع ومما شاف ليهو صيوان مشي عليهم وبكل ثقة قال ليهم الفاتحة!!!
الجماعة اتلخمو والنسوان ضربن السكلي وبقو اسالو فيهو
السيرة حصلها حادث؟ اوع يكون العريس جاتو حاجة؟ اوع يكون في وفيات؟ ............الخ
صاحبنا قاليهم معليش ياجماعة انا قاصد عزاء فلان الفلاني
قاللو ياخ جننتنا دا في الشارع الثاني
| |
|
|
|
|
|
|
Re: خمش التعازي والتهاني( كت اند بيست) وما يستصحب ذلك من اسقاطات لغوية (Re: الطيب شيقوق)
|
ود عمي سلام واحد من أهلي كبير بالعمر جنو مناسبات وخاصة (الفواتح) لا يتاخر ثانية بس الخبر وصل تلقاه مع المرسال .. مرة مشو (حلة) في الضهرة فوق فاتحة وقت الفطور فات جوع كافر الجماعة دخلوهم صالون مليان صحون ... زولك وقف قدام الجماعة منبها و مناديا ( ما تكتروا كل صحنين فوق نفر) ... أها ياخوي الله يكون في عونك مع زحمة المناسبات ووجوب المشاركات .. شفت بالله الدنيا تغيرت كيفين ... رنة جرس وتلم في زولك ، وقلبة ماوس تقوم باللازم وين زمن الزاملة واللوري والمراكب والمشي الكداري ؟؟ ... فتك بعافية لا إسقاطات ولا لغوية بطل الحساسية الزائدة أنت كبيرناو زعيمنا .....والما عارفك أرسلوا لينا بهنا .. تحياتي الشفيع إبراهيم
| |
|
|
|
|
|
|
Re: خمش التعازي والتهاني( كت اند بيست) وما يستصحب ذلك من اسقاطات لغوية (Re: Alshafea Ibrahim)
|
ابن عمي الشفيع القاسمي الما حمج
كييييييييفك
Quote: شفت بالله الدنيا تغيرت كيفين ... رنة جرس وتلم في زولك ، وقلبة ماوس تقوم باللازم وين زمن الزاملة واللوري والمراكب والمشي الكداري ؟؟ |
واللة عينة زولكم ده عندنا بالكوم - ده النوع مما يسمع خبر ويقولوا ليهو عربية ناس فلان برة تلقاهو خمش الجلابية والعمة و تلقاهو هو بلف في العمة وفي طريقه للعربية ويصيح نادوا فلان وامشوا لفلان .
يا اخي انا افتكر بعد التطور التقني في الاتصالات حقو الناس تكتفي برنة موبايل او ايميل وبيكون ده فيهو وفرة للزمن على ان يحول مبلغ الصرف للعربية لاسرة المرحوم .
لك خالص ودي
| |
|
|
|
|
|
|
Re: خمش التعازي والتهاني( كت اند بيست) وما يستصحب ذلك من اسقاطات لغوية (Re: abubakr)
|
مقتنع وبس !! ونسي الدوبيت وبيسمع ناننسي عجرم وبياكل ماك بيرجر ويوم صاحبو الملباري غشاهو وجاب ليهو براتاونان بسالونة مليانة بهارات وقال ليهو انها بيتزا وهاك ياخمجي وباقي القصة عند ناس الاسعاف ....امسكوه يا خلق الله وسلسلوه
انا ما من ناس البندر لكن جني وجن المتبندرين وهم ما ناس بندر عمرهم كلو مع الدراب وخمج القرير في طرف البحر ووقت الشمس تغيب يفتشوا للبركاوي الصاااااااااااااااااااااافي لزوم القرمشة
| |
|
|
|
|
|
|
|