|
يوم الاجازة ...
|
هذا اليوم والذى قديما قال عنه الشاعر:
الاجازة الاجازة حاجة فى غاية اللذاذة ..
من الليل وقبل أن يأتى الصباح أوسوس : الليلة بعد أودى الاولاد للمدرسة أجى أتم الحاجات المبدية الماعندى ليها زمن دى ، لأ احسن أنوم نومة طويلة عشان جسمى تعبان، لأ احسن أحضر الفيلم الجبناه يومداك وما شفتو، لا أحسن أنظم حساباتى وأدفع الفواتير واعرف البى والعلى ..لاأ احسن أقعد أقرا وأكتب فى المواقع السودانية فى حاجات كتيرة فايتانى وما متابعة، لا أحسن اتفشى فى لعبتى المفضلة "ماينزسويبر" حقل الالغام لأنى عايزة أسجل فى قائمة الناس الرهيبين، لأ احسن أحنن شعرى وأهتم بى نفسى أصلى ما بلقى ليها زمن، لأ احسن أتم الكتب الشايلاها معاى اثناء الترجمة وانتظار السوشيال ويركر social worker وهى تكمل خدمات عملائى ..لا أحسن اتم الكتابة البادياها لى شهور ديك وما قادرة عليها ..لا احسن اشيل معاى الفايلات البيت وأخلى شغلى يكون لى ساهل وما شاعرة بى ذنب ، لا بل أحسن أن أضرب تلفونات السودان والعالم الخارجى وأواصل عشيرتى واصدقائى الذين فتروا من انتظار مكالماتى .لا احسن أزور صديقاتى الذين حدثونى بمناسبات حصلت لهن ويتوقعن مجاملاتى لا أحسن امشى احتل فى فيس بوكى وأتشاتت مع اصدقائى وأتابع شمارهم وشمار اصدقا اصدقائهم وأرخم ترخيما شديدا، لا أحسن لا احسن لا احسن فأنا عندما أقول لنفسى "لا أحسن" هذه ، فانا أريد أن آتى بحل مدروس، أريد أن أطبق فى نفسى نظريات سايكولوجية كثيرا ما وجدت نفسى ناصحة لغيرى بها، فأنا طبيب يداوى الناس وهو( قايم جارى ).. النصائح تتلخص فى أن يتعرف الانسان على مصادر القلق ويحلها من جذورها ..فالاحسن للفرد أن يكون دافعا فواتيره غاسلا وكاويا ملابسه مصلحا كربريتره مكملا فايلاته سامعا كل أغنياته الضائعة كاتبا مذكراته وبحوثه وقصصه التى لاينهيها ابدا قارئا كل كتبه المبدية ..لاعبا ماينزسويبه محننا شعره مرتبا دواليبه ..ضاربا لأهله زائرا لصديقاته مرتاحا باله حتى يضمن النوم العميق والجهاز الهضمى الباتع والابتسامة التى تكسبه محبة الآخرين وبالتالى تتحسن أحواله الصحية والاجتماعية والنفسية ...ويصير انسانا منتجا ..ومواطنا صالحا وأما ظريفا ..
من أهم أجندة الاجازة فى بيتنا ألا يعرف الاولاد عنها أى شىء .. لانهم من كترة "جرينى"ولأننا لا نقضى وقتا عائليا طويلا غير المشاوير المدرسية، والذهاب والاياب من المدرسة وملحقاتها .. أظنهم صاروا يتوقون لهذه الأوقات ويتحايلون على أيجادها... لما يعرفوا انى عندى يوم اوف ..يبدوان " النقنقة:" عندما آتى لايقاظهم من النوم: ماما آى كانت قو تو سكول توديى...انا فى لهجة انجليزية وبروح أم سودانية ممعنة فى السودنة "اصيح": واااى؟؟ يطنطنوا: آى دونت فيل قود ..، عندها اقول: اوه ماى قوود" لأننى اوقن أن خبر يوم اجازتى قد تسرب الى آذانهم وأنا أتفشر به لاحدى شقيقاتى أو صديقاتى: بكرة انا مؤجزة ..اقولها بطريقة فاتحة للشهية فى اليوم حتى أثير الغيرة وأسمع: بخخخخخخختك....." وهم يستمعون الى محادثاتى التفاخرية يوم ما قبل الاجازة ...فيجهزون حالهم ويستعدون للمرض الاجازة "اب كراعا برة" ..يلمس الواحد او الواحدة "هم أصلهم فضلوا اتنين واحد وواحدة " يلمس ليك راسه أو بطنه أو أى شى "تختاره" يقرش أو تقرش صوتها وتضبلن تحت بطاطينها أو بطاطينه ...ويلعبون بقلبى الرهيف الذى هو من طراز(قلب الأم) ...والذى لا يروق لى فى هذه التمثيلية أنهم لا يصمدون كثيرا أمام الضبلنة ..وبمجرد أن ألغى كل المشاريع الادازاتية المتوقعة ...يجيئون ليستلموا الفيس بوك والتلفزيون بل ينسون ويفتحون اليوتيوب بأحلى الاغانى ولا يتوانون من رفع عقائرهم بالغناء ...
الشاهد أن اليوم المرتجى هذا يذوى ويضيع كما تضيع ذرات الرمل من ظهر صخرةتستقبل مد البحر وجزره ..فالاحتمالات غامرة ..ووأيجاد طريقة لترتيبها بالاولوية ودراسة جدواها ..نفسه مضيعة للوقت وشغل مثله مثل أى وظيفة من النوع الذى " فى مهب الريح" و"سدى" ...
__________________________ والله والله وما طالبنى حليفة ...هذا قد حدث فعلا بعد أن بدأت( أتشاقى)معكم ياقول العراقيين معظم "عملائى" الابرار ... عن موضوع الاجازة "لقد أتصلت بى مديرة حضانة أحد أطفالهم تقول ان الطفل مريض (ولاتنسوا كسر همزة ان بعد القول )ومن واجب اولياء أمره الحضور فورا لارجاعه للبيت ، سأترجم لهم أولا ..وفى هذه المدة سأقوم بلبس ملابس الشغل وقطع الاجازة اليتيمة التى لم يسمع بها الاولاد.
_________________________________________ ألم أقل لكم يضيع اليوم الموعود كما تضيع ذرات الرمل من ظهر صخرةتستقبل مد البحر وجزره ..
حتى هذه الكتابة لن تخلص ..
فاذا فيكم اصدقاء يهمهم أمرى فالتذهبوا الى القائمة ...اعلاه ...وقسموها بينكم ......وأنجزوها ...وسأطلب من الله العلى القدير أن يضعها لكم فى ميزان الحسنات ...واذا لم نجد لكم حسنات نطلب منه انقاصها من كفة السيئات ..
على الاقل فالذكرى تنفع المؤمن ...
وشكيتهم عند الله..
أشوفكم بعد شهرين...أو سنة ما معروف
|
|
|
|
|
|
|
|
Re: يوم الاجازة ... (Re: شمهروش)
|
الليله الخميس صفقه ورقيص كنا بنبدأ الاحتفال بالعباره دي في ايام الخميس وبداية الاجازه الاسبوعيه الغريبه الليله برضو الخميس الصفقه والرقيص لوجودك هنا يا استاذتنا القديره تماضر لكن لو فيها اجازه ليك من هنا .. مافي صفقه ومافي رقيص
مودتي
| |
|
|
|
|
|
|
Re: يوم الاجازة ... (Re: Tumadir)
|
نوفل ..تحياتى ..واعزازى ..
ما تقول لى الفى الصورة ده "ورقة بن نوفل" سامعة بالاسم لكن ما كنت قايلاه لسه صغنونى كده..ههههه
الليلة الخميس لكن قطموه لى بقى يشبه الاتنين ...من الحضانة مشينا الجزخانة ..من الاجزخانة ركبنا الجبخانة ..
وشتل الهبهانة المشتولة رويانة ...
وفارقتو قنعانة خليتو لى ناس فلانة ...ياناس
أها قلبتها ليك حفلة ولا ما قلبتها ..؟؟ ÷هههههه
| |
|
|
|
|
|
|
Re: يوم الاجازة ... (Re: Tumadir)
|
تماضر هلا بعودتك
بتألم جدا لما تكتبوا مرة مرة وتروحوا ساي وتجو انتي وشيري وبت قضيم وبتألم أكتر لودعزة والمريود وغيرهم من الناس الجميلة البورد ده زي ما قالت بت قضيم كنا زمان بسيطين وبنقرا لبعض ومع الزحمة رحنا من بعض تتذكري نص الدفاع الشعبي سنة 2000 البورد فاقد تألقكم عودواو كونوا بخير زي ايام زمان
تماضر لا زالت القضايا تلك القضايا ولم نتقدم( شبر) بس انتي اظهري
___ زي ما قال حميًد: دا زمن قواسي .. زمن ضلالة .. اوانطجية .. زمن حقارة .... زمن مهين
| |
|
|
|
|
|
|
Re: يوم الاجازة ... (Re: GamarBoBa)
|
قمر بوبا ..
لقد "هبشت" وترا حساسا ...والله حساسا تماما حتى انه على وشك الالتهاب ..القضايا المعلقة زادت تعليقا والكتابة أصبحت شىء غير مجدى "لا أريد أن أتصور ذلك" لكنها غير مجدية لو استمرت على "هذا المنوال"
(الاقواس عشان الكلمات المحفوظة والمعلبة دى أنا بقيت أنضرس منها ...)
مثلا فى الحياة العامة ..برغم الجهد العظيم المبذول ممن احترقوا بنيران "القضية" ..صاروا يحترقون بنيران الصمم ..تخيل مثلا وضع المرأة فى المجتمع السودانى ، ما مشى خطوة أبعد من زمان ..وأنا كمان شايفاه ..بيتردى كل يوم نص بوصة ..بقينا أميال فى التردى: الامثلة كثيرة خذ مثلا وضعها وهى طالبة جامعية تتعرض من الباب لمحاسبة الحرس الجامعى وماخفى أعظم ، وضعها كزوجة تندلق على أحلى ما فيها موية نار أو بالقليل كده تتعرض للضرب والاهانة والازدراء ..وضعها ..وهى طفلة تتعرض للخفاض وبالقانون كمان ..وضعها فى السياسة ..تتعرض للترهيب والسجن والاقصاء وضعها فى دارفور حالتها حالة ..وماذا فعلنا فى مواجهة ذلك نعرض الامور للنقاش وينتهى النقاش بأننا زنادقة او ملاحدة او خارجين أو بايعين للوطن المتابع لخطاب الحكومة وخطاب المعارضة يفتر ..من المتابعة ..نتراشق الاتهامات ..وكل زول فى موقفو ..الاجيال الاتعرضت للازاحة بالقتل أو بالتشريد أو بالتعذيب ..أو بتسميم المشهد عليها حتى لا تدرى كيف تتصرف ..هذه الاجيال صارت مضحكة فى النقاشات ...والاجيال الجديدة التى حملت اللواء وسارت على الدرب ..تتعرض لنفس المشقة ..فهنالك "مقلب" ينتظر كل واحد منا أو منهم ..مقلب كبير يكسر العين ويطأطىء الهامة ويسكت اللسان للأبد ...
وضع الطالب، وضع التعليم عامة، وضع الموظف ، وضع الاسرة، .وضع الاعلام ، وضع الصحافة ،وضع الاقتصاد ، وضع المعتربين،
نعم هنالك تحول كبير فى العالم كله لكن السودان لم ينال منه الا الطفيلية ..والوطنية أصبحت ورقة غير رابحة وأصبح لها مسميات جديدة ..
الاصدقاء فى الكتابة هنا فى المنبر صار لهم ألوان ...وأصباغ يخشون حين تلمسهم أن "تهد فيهم" أو "يهدوا فيك" ...الحوارات هى خطوط متوازية لا تلتقى أبدا ...
ياريت لو أبتعدنا خطاب جديد ، يخلينا نكمل جملتنا ونضع خطين تحت الجواب ..
ياريت الغم ده يروح من صدورنا ونبتدع أساليب جديدة ..للحوار ..فالحوار عمره ما جاب الا طيب ...
يازول ما أكرهك سؤالك عنى وعن صديقاتى خفيفات الظل ..فالمكان هذا طارد ..والمشغوليات ما بتخلص ...
بنسوى البنقدر عليه والبغلبنا ده عاد بنقول غلبنا....تانى شنو؟؟ ههههه
| |
|
|
|
|
|
|
Re: يوم الاجازة ... (Re: Tumadir)
|
طماطم زماااان حصلت عليا نفس مشكلتك دي.. قامت واحدة صحبتي اهدتني كتاب عن ال Time Management الحقيقة الكتاب دمو تقييييل و اضفتو لقائمة الحاجات ( اللو حصلية )! لكن يوم كدا ربنا هداني و قعدت قريتو بمزااااج
اول حاجة الشي دا بيقول ليك رتٌب أولوياتك.... لقيت كل الحاجات أولويات!! تاني بيقول ليك ألغي الما مستعجل... لقيت كل الحاجات مستعجلة! .....إلخ إلخ إلخ
المهم...على قول تبارك...
خليني أحاول أرتب معاك الامور * أول حاجة نقسم المهام دي على الاسبوع...يعني ما نردمها كلها يوم الاجازة... القال ليك منو ما ممكن تحنني شعرك خلال ايام الدوام؟ أصحي من الصباح..لُخي حنتك في أكبر كورة في المطبخ...غطيها و ختيها في حتة مضلمة و امرقي شغلك اول ما تجي راجعة...ألتخيها في راسك مسافة جهزتي العشاء للوليدات... قبل ما تنشف اضربي تلفون لصاحباتك جامليهم و كان في فَرَقَة اضربي تلفونات عالمية غسلي الحنة و نشفي شعرك و نووووومي
تاني يوم المسا... بعد تعشي الوليدات...اقعدي ساعة في الفيس بوك... و قبل ما تنومي أقري صفحتين تلاتة من كتاب نفسك تقريهو..... و هكذا.......
أها... لمن تجي الاجازة ما تعملي حاجة غير تتمددي طوييييييلة في اقرب سرير و تنادي وليداتك يعصروا ليك رجلينك... منها تتونسي معاهم و منها ترتاحي في عضمك. و.... كدا يعني.
| |
|
|
|
|
|
|
Re: يوم الاجازة ... (Re: mamkouna)
|
شفتى يا ممكنونة انتى جى طيبة طيبة ما عادية ..
أقول ليك كيف؟؟
شفتى زمن لخ الحنة القلتية لى ده الواطة عندنا هنا ضلام وأنا أساسق من البويز آند قيرلز كلب ..لى الواى أم سى أي ...جيبو محمد ودوا يسرى ..اطفوا البوتاجاز ولعوا الفرن ...والسر الاكبر الما قلتو ل"عزيزى القارىء" هنا
انى بشتغل
two full time jobs
شغلة النهار زى فيها فلهمة كده واجتماعات وسفريات ومؤتمرات وحبة اجازات ...وشغلة الليل فيها زى "سغالة" كده ومرة عجوز وعندها مشاكل عقلية ..يعنى النوم من 8 مساء لى عشرة ونص ...أستغل من حداشر بالليل لى سبعة الصباح والصباح أجى طايرة طيران عشان أجهز الفطور وأفطر الجماعة ديل ..وأدوديهم المدرسة قبل تمانية ..وأرجع طيران للحمام والقشرة وأمشى شغل الصباح القلتو ليك داك ....وأرجع زى ستة ..عندى ساعتين لتحضير الغدا وجيب الناس ووديهم ...وأنوم ....
قال كورة كبيرة قال ...هههههه أمشى أقرى كتاب تانى اسمو "اخنق فطس " ولا شى تانى ..كتابك بنفع مع المواطنين العاديين ....
تسلمى حبيبة.
| |
|
|
|
|
|
|
Re: يوم الاجازة ... (Re: Salma Daoud)
|
سلامات تماضر الفي الصوره دي برهومي - ابراهيم - ود اختي وصال مهندس كبير متخصص في تكسير التلفزيونات والموبايلات ونضارات الضيوف لكن فكره حلوه بعدين ان شاء الله اسمي ورقة
Quote: وشتل الهبهانة المشتولة رويانة ...
وفارقتو قنعانة خليتو لى ناس فلانة ...ياناس |
سجلته ليه الريده القايمه في حيضانا قلوبنا متحبه والناس ماله تعبانه .. يا ناس برانا الله يهدي الاذانا يا ناس برانا ههههه
الله يسعد اسبوعك ويديك اجازه زي اجازات السودان الكتيره دي بمناسبة مافي اجازه بدونا اجازه
| |
|
|
|
|
|
|
Re: يوم الاجازة ... (Re: نوفل عبد الرحيم حسن)
|
Quote: سجلته ليه الريده القايمه في حيضانا قلوبنا متحبه والناس ماله تعبانه .. يا ناس برانا الله يهدي الاذانا يا ناس برانا ههههه |
تمة الغنية لذيذة والله يا نوفل مداخلتك كلها لذيذة خاصة الشغلة العينت فيها "ورقة" تانى ما عندى ليه اسم غير ورقة ...خلى يجيب ليه قلم ..ما شغلتى ..هههه
مودتى
| |
|
|
|
|
|
|
Re: يوم الاجازة ... (Re: Salma Daoud)
|
سلمى داؤوووود ..يا حليلك يا غالية
..وين طلال عفيفى؟؟ كل ما أشوف اسمك اتذكر انه عرفنى بيك واتونسنا التلاتة سوا.. .يا حليلو والله كان نوارة البورد بى بوستاتو المنعشة ديك ...بالله لو بتتكلمى معاه أديه تحياتى وأشواقى "الزائدة" يا عملات الجوابات الزمان ..هى الجوابات دى مشت وين صحى؟؟ ههه
محبتى واحترامى
Will do
| |
|
|
|
|
|
|
Re: يوم الاجازة ... (Re: Tumadir)
|
Quote: فيجهزون حالهم ويستعدون للمرض الاجازة "اب كراعا برة" ..يلمس الواحد او الواحدة "هم أصلهم فضلوا اتنين واحد وواحدة " يلمس ليك راسه أو بطنه أو أى شى "تختاره" يقرش أو تقرش صوتها وتضبلن تحت بطاطينها أو بطاطينه ...ويلعبون بقلبى الرهيف الذى هو من طراز(قلب الأم) ...والذى لا يروق لى فى هذه التمثيلية أنهم لا يصمدون كثيرا أمام الضبلنة ..وبمجرد أن ألغى كل المشاريع الادازاتية المتوقعة ...يجيئون ليستلموا الفيس بوك والتلفزيون بل ينسون ويفتحون اليوتيوب بأحلى الاغانى ولا يتوانون من رفع عقائرهم بالغناء ... |
... ... طمطم
أديك سر...الوالدة كعادتها سافرت مع الابناء الصغار إلى عطبرة "إجازة كل عام" وانا لى ساعتين بحاول النوم ....ومابنى البيت من دونهم "كتلة من فراغ" مميت ... حاولى إستمتعى بى يوم إجازة واحد فى حياتكــ... يطير الشغل وسنينو
وصية :- للسميحة بكرة ماشين "الشيخ الياقوت" :)
| |
|
|
|
|
|
|
Re: يوم الاجازة ... (Re: الملك)
|
Quote: فاذا فيكم اصدقاء يهمهم أمرى فالتذهبوا الى القائمة ...اعلاه ...وقسموها بينكم ......وأنجزوها ...وسأطلب من الله العلى القدير أن يضعها لكم فى ميزان الحسنات ...واذا لم نجد لكم حسنات نطلب منه انقاصها من كفة السيئات .. |
انا غايتو يا تماضر أعفيني من الفواتير والذي منه، لكن ليك على الكتب بتاعتك دي بقراها ليك كلها(لقيتني كيف)؟ إنتوا يا آل شيخ الدين قاعدين تجيبوا الإبداع ده من وين؟ ربنا يحفظكم ويخلي ليك اولادك يا رب.
| |
|
|
|
|
|
|
Re: يوم الاجازة ... (Re: الفاتح ميرغني)
|
تماضر علك طيبة تاني
Quote: مثلا فى الحياة العامة ..برغم الجهد العظيم المبذول ممن احترقوا بنيران "القضية" ..صاروا يحترقون بنيران الصمم ..تخيل مثلا وضع المرأة فى المجتمع السودانى ، ما مشى خطوة أبعد من زمان ..وأنا كمان شايفاه ..بيتردى كل يوم نص بوصة ..بقينا أميال فى التردى: الامثلة كثيرة خذ مثلا وضعها وهى طالبة جامعية تتعرض من الباب لمحاسبة الحرس الجامعى وماخفى أعظم ، وضعها كزوجة تندلق على أحلى ما فيها موية نار أو بالقليل كده تتعرض للضرب والاهانة والازدراء ..وضعها ..وهى طفلة تتعرض للخفاض وبالقانون كمان ..وضعها فى السياسة ..تتعرض للترهيب والسجن والاقصاء وضعها فى دارفور حالتها حالة ..وماذا فعلنا فى مواجهة ذلك نعرض الامور للنقاش وينتهى النقاش بأننا زنادقة او ملاحدة او خارجين أو بايعين للوطن المتابع لخطاب الحكومة وخطاب المعارضة يفتر ..من المتابعة ..نتراشق الاتهامات ..وكل زول فى موقفو ..الاجيال الاتعرضت للازاحة بالقتل أو بالتشريد أو بالتعذيب ..أو بتسميم المشهد عليها حتى لا تدرى كيف تتصرف ..هذه الاجيال صارت مضحكة فى النقاشات ...والاجيال الجديدة التى حملت اللواء وسارت على الدرب ..تتعرض لنفس المشقة ..فهنالك "مقلب" ينتظر كل واحد منا أو منهم ..مقلب كبير يكسر العين ويطأطىء الهامة ويسكت اللسان للأبد ...
|
100 100
ونحن يانا نحن ياهو ذاتو الشعب السوداني،شايلين السلاح في وش بعض، بنشرد بعض،بنقتل بعض،بنكضب،نتبادل ابتسامات النفاق في وجوهنا لبعض بنلف وندور،مشاكلنا زي ما قلتي بقت مزمنةومطباتنا كترت والله يهون.
Quote: بنسوى البنقدر عليه والبغلبنا ده عاد بنقول غلبنا....تانى شنو؟؟ ههههه |
لا شي أكثر يا استاذة وكوني بخير
| |
|
|
|
|
|
|
Re: يوم الاجازة ... (Re: GamarBoBa)
|
طمطم...طلتك مبهجة والله.. من امبارح قريت البوست ده وقعدت أضحك ...قلت لي روحي تماضر دي والله مجنونة اها سكلبتك دي اختها بت امها وابوها الحاصلة علي...لكن بس اناعندي ضروريات وضروريات ملحة...يعني هنا دفع الفواتير دي ضرورياااااااااااات ملحة لانه لو راحت عليك واخرتي يوم تاني يحلك الله من الغرامات...عشان كدة انا ريحت روحي مابنتظر اي فاتورة تجيني بدفع اول الشهر قبل استلم اي شيء مريحة روحي من الملاهاة ومتابعة الفواتير..ما ممكن يبقى علينا كله... والله يا تماضر بوستيك ده لو فتحنا للتشكي اسكتي ساكت الا ياجزوا لي ناس المنبر ديل.... تعرفي بتذكر في كلام قالته لي صديقتي اول ماجيت هنا قبل سنين...قلت ليها جنس جريكم وشلهتتكم دي ماعندي ليها طاقة ولا مروة..قالت لي دي مابلد خيارات..السيستم الامريكي ده ماعندك غير حلين..يا دخلتي السيستم ..يا دخلك..
حبيت بس ادخل اقول ليك متابعين... انتي بس ماتحرمينا...
| |
|
|
|
|
|
|
Re: يوم الاجازة ... (Re: حنين للبلد)
|
حنين للبلد ...والله يا حنين الفواتير دى خصوصا الثابتة الكل شهر عاملة نظام انها "ما بتدخل على" بشيلوها أول بأول ...لكن فى النوع "المتحركة" هههه بتعرفيها مش؟؟ دى ياها المجهجهانى ..لأنها "هى تلاتية لكن قدها رباعى"
وحسة أنا بقول ليك عندى شغلتين ...انا عندى خمسة شغلات ..احسبهم ليك؟؟ على الاتنين المعروفات ديل انا مترجمة بالقطعة ...وعلى التلاتة ديك ..الفن تصدقى انه أنا بمشى أعرض هنا وهناك وسط الجوطة دى؟ والخامسة ياها الفل تايم مام ديك المعلومة ...يعنى فى زول بعمل كده؟؟ الدنيا دى بقيت ما بعرف فيها أى شى غير "الشغل" وسبحان الله من القرآن الكريم ده كلو ما مرقت ليك الا الآية " وقل اعملوا فسيرى الله أعمالكم" ؟؟
تحياتى عاملة صورة بروفايلك( المشرقة) دى ...
ياربى اشراقة الحاصل عليها شنو؟؟ بعرف الناس بختوا صورة بروفايل الناس المتضامنين معاهم ...لعل مافى عوجة؟؟
| |
|
|
|
|
|
|
Re: يوم الاجازة ... (Re: Tumadir)
|
Quote: ياربى اشراقة الحاصل عليها شنو؟؟ بعرف الناس بختوا صورة بروفايل الناس المتضامنين معاهم ...لعل مافى عوجة؟؟ |
والله يا تماضر مافي عوجة الحمد لله...لكن في محبة... اليومين دي جواي إشراق بمحبتها...
| |
|
|
|
|
|
|
Re: يوم الاجازة ... (Re: الفاتح ميرغني)
|
Quote: نا غايتو يا تماضر أعفيني من الفواتير والذي منه، لكن ليك على الكتب بتاعتك دي بقراها ليك كلها(لقيتني كيف)؟ إنتوا يا آل شيخ الدين قاعدين تجيبوا الإبداع ده من وين؟ ربنا يحفظكم ويخلي ليك اولادك يا رب. |
الفاتح ميرغنى:
الاجابة على الجزء الاول من المداخلة: لقيتك شدييييييد ولضيض ...وبرضو ما بطال معاى على الاقل أقؤاهم وتعال "لخص لى" هههه تتذكر الملخص بتاع المدرسة داك ...مبالغة لكن...ههه
اما الجزء التانى فبدل ما أجاوب ليك بحكى ليك قصة عمار ولد ياسر أخوى لما كان صغير ...
مريم بت خالتى آمنة جات البيت ..اها قامت عاينت ليه لقت حواجبينو حلوااات ومتواسيااات وسود ..قالت ليه: السوا ليك حواجبينك حلوات كده شنو؟ قال ليها "بوش مصرور وجدية كده" دى أمى ..قالت ليه سوتن ليك بى شنو؟
بنفس المصرور والقدوم داك: قاليها: بى صوف.
أها الابداع ده سوتو لينا أمى ...بى صوف. -------
"رحمة الله تغشاهم"
| |
|
|
|
|
|
|
Re: يوم الاجازة ... (Re: الملك)
|
Quote: البيت من دونهم "كتلة من فراغ" مميت ... |
ربنا يكتب سلامتهم ويجيبهم ليك بالسلامة ..وانت كمان ياخوى "حافظوا على نظافة مدينتكم" .
..اوع الوالده ترجع تلقاك محشر الصحانة تحت السرير والكبابى بى باقى شا ييهم وخالى الماسورة تنقط وناسى الغسيل فى الطشت وخالى نور الحوش مولع تحت الشمس ...
وكل أنواع المواجع البعملوها "الاولاد" بالذات فى غياب الأم ...
ووصيتك حنوصلها للسميحة ..باذن الله ..مع خالص التحيات والاحترام
| |
|
|
|
|
|
|
|