|
|
|
 Re: خلو طرف... من (الخدمه)... (Re: naeem ali)
|
شباب من مختلف الاعمار ..والسحنات... واللهجات..
تتسمر اعينهم علي الفراغ وتطارد اشكالا وهميه من نسج خيال الانتظار المثخن بزاكرة الكلاش (والاحوال هادئه)...
المصابين بالانفصام والتوحد في نفس الوقت...
تعبث ايديهم بمجموعة اوراق تبدو متشابها ومهترئه بشكل مريح وهي مذدانه بذلك الصقر العجوز...
ذاكرتهم مقسمه الي قسمين... يشغل (الكاكي) القسم الاول كثابت...
ويتحرك القسم الثاني مابين ...
(الحواشه....الجامعه... الكارو... الطبليه... الخطيبه... الخطيئه...
العرقي... العطاله... البنقو... المجهول... بنات الهوي... الفراغ... الخوف...
(واشياء اخري مفيده)...
...............
| |
 
|
|
|
|
|
|
|
|
Re: خلو طرف... من (الخدمه)... (Re: naeem ali)
|
المكان : صاله تعاني جدرانها من الحميميه المفرطه...
تكاد تنطبق علي من عليها نشوة وازدراء ,
تطل عليها مجموعه من الشبابيك , احزر عند دخولك اليها ,, (قد تصيبك بالذهلله)..
الذمان : (سبعه درجات ونصف الدرجه) علي مقياس (المغسه)..
بين الحين والاخر يرتفع صوت احد العساكر من الشباك المجاور لمكتب (الاجراءات) ... ي
رتفع متجاوزا حد السماع ليدخل في (خانة) الازعاج...
صائحا باسم من حلت عليه (رحمات) هذه الدار
ونال (خلوووووو طرف)...
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
(عبد الله ادم تيه)
ينهض متهالكا..
يحاول ان يتصنع مشية عسكريه تخرج علي استحياء يختتمها بابتسامه (برتقاليه)...
يتلقف ورقه بيضاء في حجم كفة اليد , تنهال عليه عبارات (مبروك.... مبروك.... مبروك) ,
يكتفي بالرد عليها ناظرا بابتسامة بلها
وتبداء الهمهمات في تلك الصاله المذدحمه برائحة البشر
_ سنتين ساكي خلو الطرف
_ والله قالوا مشي لفكي عديل مانفع
_ ياخي الزول ده اهلوا من ربك عندو ود عمه شغال في طبليه في السوق الشعبي
وساكن في سوبا الحله...
قاموا حولوا السوق الشعبي وكسروا ليهم بيتهم في سوبا,
والله هم زاااتم حظهم (كج) خلاس
_انت بتعرفوا من وين..؟
_نحن قبضونا في نفس الكشه..
..........................................
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
(عصام الدين عبد الخالق عمر)
انيق بما يسمح به هذا المكان...
حذين بما يكفي لينال خلو الطرف...
عدل من وضع نظارته (قعر كبايه).. أدخل الورقه في مظروف من الحجم الكبير..
لعله لايفضل سماع (مبروك)..
وتوالت الهمهمات................
_ ده خريج هندسه
_ ايوه .. كهرباء كمان
_ خدمتو قضاها في بسط امن شامل جمبنا في السادسه
_ شكلو (بتسطل)..صاح..؟
_ يا عمك الزول ده قالوا كان اول دفعتو...
مسكييييييييييين.. في الخدمه اتعلم ليك البنقو ... بقا طوااالي (راكب الفيل)..
.......................................................
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
(تامر حسن حسين)
نهض وهو يكاد يترك بعضا منه علي المقعد...
يسير بزهو فتيات الثانوي العالي... يبدو انعم مما يجب ان يكون عليه (خاصه في مثل هذا اليوم)...
لعل خصل شعره المرتبه لا تتناغم مع ايقاع (الصلعه) التي يذدان بها معظم الموجودين,,,
او لعل شيئ اخر يجعله (مشاتر)..
وبداء الخبثاء يتهامسون................
_ علي الحرام الزول ده (لا قضا خدمه لا حاجتين)
_ يكون قضا (حاجه) واحده
_ ها... ها... ها
_ طلقانه ام ضفاير الزول ده كان شاف كلاش بعينه ولا خشا معسكر..
_ طلاق شنو يا اخينا (هداك الله) من اراد ان يقسم فاليقسم بالله او ليصمت
_ ده مالو كمان...؟
_والله يا جماعه انا ما قاعد (اتكلم ساكت)...
الزول ده دفعتنا وأول ما اتخرجنا سافر... وتاني ما شفتو الا الليله... اها يكون (قضاها سفير) مثلا..؟؟
_ ياخي احسن الظن باخاك
_ اخاك في عينك زاتو هويي الخوخه... ده مالو ده ياخي...!!!
...................................................
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
انتو يا جماعه الصف ده مابمشي ولا شنو...؟
نهض احدهم كمن استيقظ مذعورا نسبة لضياع احدي المواعدات العاطفيه
_ عليك الله اقعد ما تجيب لينا هواء ... جنابو ده لو زهج ولا جات صلاة الضهر تقنع
_ الزهج عرفناه الصلاه البقنع فيها شنو يعني..؟
_ جنابو ده عنده جزء بقراهو بعد صلاة الضهر ولما يكملو بكون ذمن الشغل زاااتو انتهي.
_طيب ما يقراهو في البيت..؟
_ والله _فكره)... لما تصل الشباك كلمه بيها... مكسب...؟
...................................................
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
(بيتر مينق شول اكول)
نهض كمن داهمه كابوس... تلفت يمنة ويسره علي خطي الذهول...
مسح عرق وهمي من علي جبهته ...
ما ان تناول الورقه حتي ظهرت أقسي معاني خيبة الامل علي وجهه النحيف...
كان كمن سيشرع في التقيؤ (وبطنه فاااضيه)
_ (أسماء يا... اسم دا فيو قلط.... اسم بتاء أنا ما كدا ياكي)..
_ خلاص جيبو... خلو الطرف ده ما حقك
_ (لأ بتاء انا... نمرا اسكريا دا بتاء انا ... لكن أبو بتاء انا ,اسم بتأؤ دينق... وانا داي مكتوب مينق)..
_ خلاص امشي جيب اشهار شرعي مشفوع باليمين انو اسم ابوك ما كده...
وقدم طلب تعديل في (مكتب الانزال) بعد تقطع الايصال.. وجيب معاك استماره الحاسوب
_ وادفاء قروش تاني..؟
_ لا ادفع الباب.... (رد المنسق ببرود لا يتناسب مع الطقس)
_ واستنا تاااني أشره يوم ...؟ ده ما كلط بتأء اناء.. ياكي..!!
_ ونعمل ليكم شنو نحن...؟ ما يسموكم اسم واضح...
_ اسم داء وادح لينا.... بأدين انت قاصد شنو..؟
_ انت داير(تتجرجر) معانا ولا شنو يا مجند...
ماقلنا ليك امشي قدم طلب , نحن ما عندنا غيرك ولا شنو...؟
وتوالت الهمهمات.................
_ انا لي اكتر من شهر بجي هنا... دي المره السابعه تقريبا او التاسعه تقريبا (برضو) .. يغلطوا في اسمو....
ومره اسم ابوه.... ومره اسم جدو... مره بكتبوا (حاجه) ما ممكن تكون اسم اي (حاجه) زاتو....
-انتهي من الخدمه من سنه ونص ما قادر يمسك خلو الطرف
- شوف الزول ده جازف ليهم العربي خشا بيه الجامعه.. ما قادرين يجازفوا ليه اسمو (شان يتخارج),..,؟
- اعجمي فالعب به.
- تلعب كراعك ... انت تسكت سنه ولما تفتح خشمك ده (تقوم تتف)..؟
.................................................
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
لا ادري كيف وصلت الي الشباك... ولا متي...
كان الامر كصخره فاجأت شلال انتظاري السخيف..
ضابط حاد النظرات... (صاري صره).. كتفه مذدان بربع دسته من النجوم الذهبيه...
_ورقك ده ناقص....
-ناقص شنو سعادتك؟
- انتو قريتو جامعات لكن ما استفدتوا حاجه..
- ورقي ده ناقص (فايده) ولا شنو.؟ همهمت في اقصي زقاقات قلبي ... واجبت... نعم سعادتك..
- يسد نفسك... وين (أخر صرفيه).؟
_ انا اصلا ما صرفت... (لا ادري لما قلتها بحياءوتوتر) ..
_ اصلا...!!!! بتتفلسف علينا..؟ اصلا قال..!! وليه ما صرفت يا مجند يا طيره.؟
_ والله ما عارف سعادتك... من بديت الخدمه ما ادوني قروش..
(وحسع) انتهيت ليا سبعه شهور وجيت اطلع خلو الطرف.. ما داير اي قروش.. عفيتا للخدمه.
_ والقال ليك منو الخدمه دايره منك عفو.؟.. قبيح..!
_ لا يا سعادتك ما القصد والله... بس انا محتاج لخلو الطرف.
_ وانا ما حا اديك ليه
_ ليه سعادتك.؟
_ ورقك ناقص..
_ لكن سعأ..
_ البعدو.
........................
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
تنحيت عن الشباك... تسمرت في زهول.. واستمر (المد البشري) في التوافد علي (شباك الخلوووو............)
..................................
_ ورقك ناقص... قريتوا جامعات لكن ما استفدتوا حاجه... وين (الافاده الطبيه).
_ أهو دي سعادتك
_ وليه ما مختومه.؟
_ مختومه سعادتك.
_ طيب ما تعال اقعد مكاني واشتغل الشغل ده انت..!!!
_ العفو سعادتك.
_ العفنه التكتلك... قول امين
_ امين سعادتك
_ اقول ليك ما مختومه... تقول لي مختومه..؟
_ اسف سعادتك
_ أسف..!!!!!! انتوا كلكم فلاسفه..؟؟ أااه.!
_ بس ما فاهم الناقص شنو سعادتك.؟
_ناقص ختم تاني.
_ ياتو ختم سعادتك.؟
_ ما تسالني..
_أسال منو سعادتك.؟
_ انت مجند طيره.؟ ما تسالني.. شوف ليك اي زول تاني.. قبيح.. البعدو.... البعدو.
........................................................
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
_ انتوا ... قريتوا جامعات لكن ما استفدتوا حاجه...
امشي اشتري فايل.. خت فيه ورقك ده, بنبيع تسالي نحن.؟
_الفايل معاي سعادتك ... بس اتشرط ..
انا لي شهر كل يوم بجي هنا... بنطلوني اتشرط سعادتك. خليه الفايل
_ البعدو..
_ سعادتك انا...
_ قلت ليك جيب فايل... البعدو... البعدو
.......................................................................
_انتو ... قريتوا جامعات لكن ما استفدتوا حاجه... انت ادربت وين..؟
_ادربنا في معسكر المرخيات يا جنابو...
(واضعا( كوعه) علي شباك المنسق زااااااااااتو... اتصور.!!!)
_ ومالك (متكل) علي الشباك كده.؟ عيان.؟
_ عندي ملاريا جنابو.
_ فحصتها متين.؟
_ مافحصتها يا جنابو..
_ وعرفتها ملاريا كيف.... انت دكتور.؟
_ لا يا جنابو.. ما كده... انا....
_ (مقاطعا).. معناها كذاب... وورقك ده ناقص شهادة تدريب... البعدو
_ لا لا نحن ما عندنا شهادت تدريب سعادتك انا (حالات خاصه) عيانين كنا..
البعدو البعدو قلت ليك.. الله
................................................
| |
|
|
|
|
|
|
|
|
|
Re: خلو طرف... من (الخدمه)... (Re: معاذ حسن)
|
الاخ الحبيب معاذ
Quote: مبروك يا نعيم
سرد واقعي جدا
عايشنا بعض تفاصيله.
|
طبعا (مبروك) بتاعت خلو الطرف...
من اروع المبروكات علي الاطلاق...
خاصه لو قضيت الخدمه (كاكي وكلاش)..
بتبقي مبروك حلوه خلاس..
الله يبارك فيك يا اخوي...
تفاصيل (الخدمه)...
ما (ازعجك بعضها) فكثيرها حرام...
جزيل تقديري
| |
|
|
|
|
|
|
|
|
|
Re: خلو طرف... من (الخدمه)... (Re: naeem ali)
|
يا نعيم
Quote: تامر حسن حسين)
نهض وهو يكاد يترك بعضا منه علي المقعد...
|
بالجد عبارتك دى لوحة، يا مان و الله اكاد اراه بعين الخيال هو يهض من مقعده و زوائد الجسد المُترهل تلحق به فى كسل و خمول، يا زول دا جن عديل، ولا يخلو من حقد طبقى دفين.
تعرف انا قريتها من قبل نشرها هنا بى زمن كانت حايمة صم وير عن طريق الايميلات، و فى احد الايام انتظرنى ابن عمى محمد باسكال متهلل الاسارير، و هذا نادرا ما يحدث و نحن نتشارك ضنك الحياة و ضغوطها فى بلاد الفرنجة هذه، قال لى يا زول فى قصة جاتنى بالايميل و الله خطيرة عديل، ح اعمل ليك ليها فور ورد، قلت خيراً دون ان ابدى كثير اٍهتمام لاننى اعرف انه فى بعض الاحيان يزايد بقليل من البهارات و التشويق. المهم يا زول رسل لى القصة فى الايميل عليك امان الله لمن وصلت الى قولك "نهض و هو يكاد يترك بعض من منه على المقعد" نهضت انا واقفاً من سحر البيان و براعة التصور كمن لدغته عقرب، قولت ليهو ديناااااااك دا زول صعب. حتى ذلك الوقت و اللحظة لم اكن اعرف ان نعيم على الكاتب هذا هو نعيمنا فى الاندرلاب الذى نعرف، يقاسمنا كوب القوة، صفحات الجرائد و اكايس الصعوط.
درّب القلم على الكتابة يا نعيم بالكتابة و كتر المحاولات، عوجة تب ما عندك يا فنان.
| |
|
|
|
|
|
|
|
|
|
Re: خلو طرف... من (الخدمه)... (Re: abubakr salih)
|
Quote: بالجد عبارتك دى لوحة، يا مان و الله اكاد اراه بعين الخيال هو يهض من مقعده و زوائد الجسد المُترهل تلحق به فى كسل و خمول، يا زول دا جن عديل، ولا يخلو من حقد طبقى دفين.
تعرف انا قريتها من قبل نشرها هنا بى زمن كانت حايمة صم وير عن طريق الايميلات، و فى احد الايام انتظرنى ابن عمى محمد باسكال متهلل الاسارير، و هذا نادرا ما يحدث و نحن نتشارك ضنك الحياة و ضغوطها فى بلاد الفرنجة هذه، قال لى يا زول فى قصة جاتنى بالايميل و الله خطيرة عديل، ح اعمل ليك ليها فور ورد، قلت خيراً دون ان ابدى كثير اٍهتمام لاننى اعرف انه فى بعض الاحيان يزايد بقليل من البهارات و التشويق. المهم يا زول رسل لى القصة فى الايميل عليك امان الله لمن وصلت الى قولك "نهض و هو يكاد يترك بعض من منه على المقعد" نهضت انا واقفاً من سحر البيان و براعة التصور كمن لدغته عقرب، قولت ليهو ديناااااااك دا زول صعب. حتى ذلك الوقت و اللحظة لم اكن اعرف ان نعيم على الكاتب هذا هو نعيمنا فى الاندرلاب الذى نعرف، يقاسمنا كوب القوة، صفحات الجرائد و اكايس الصعوط |
اسعدني حديثك يا بكري يا صديق..
اسعدني حد الزهو..
جزيل حبي واشواقي...
| |
|
|
|
|
|
|
| |
naeem ali
معاذ حسن
عادل خياري
abubakr salih
HAIDER ALZAIN
فيس بوك
تويتر
انستقرام
يوتيوب
بنتيريست