لو افترضنا صحة الرواية في الاغنية , معطيات بلة ده شاب اروش (بدق الرقم و يجليهو) بلة سواق رقشة (مُعطي في متن القصيدة) امو اسمها عشة ( مُعطي في متن القصيدة) بتحبو بت مطرطشة زيو (لم تذكر اسمها في القصيدة)
فرضية 1 بت بتحب ولد اسمو بله, وسطهم الاجتماعي واحد , وصل عشق البت لي المواطن بله حدا اصبح معه كِتمان هواها امر عسير ضجت به نفسها فأغرقت به آذان خليلاتها و شنفت به آذان المواطن المحبوب بلة و من ثم سارت به الركبان و ده حقها.
فرضية 2 اغنية مصنوعة بواسطة صُناع الابتذال الحالي في بلادي , نُسجت علي إيقاع حي و راقص و تم رص كلماتها رصاَ (مع مراعاة إنضباط القافية كيفما إتفق) و استعان صاحبها علينا بصاحب اورغن سنين يحمل من المؤهلات صفر كبير + قريبو الفي الخليج رسل ليهو الاورغن و حفلة حفلتين و رحنا نحن في حق الله و برضو من حقهم.
___ إيراد اسم الحبيب او الحبيبة في الفرضيتين تاريخيا او إثنيا مسموح به علي إستحياء او علنا و التصنيف هنا اخلاقي.
05-09-2009, 11:50 AM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
عواطف تحياتي وودي شايفك دخلتي بينا زقاقات اغاني البنات والتي اعجبني في الاونة الاخيرة محاولة الفصل بينها وبين الاغنية الهابطة .. لان الفرق بينهما هو الفرق بين الجد واللعب بالنسبة لي عشة ود بلة دة انا اول مرة اسمع بيهو لكن عرفت موضوعو .. ماهو دة الفارس احلام البنات الذي ينشدنه في غنائهن لتحديد ملامح الفارس وحصانه الابيض .. ابتداء من اغاني الحماسة والمراثي وناس الخنساء .. الفرق انو الخنساء بتعدد في اوصاف رجل ارم .. لكن دي اوصاف لناس حية .. والاسم من نسج الخيال الغرض منه القافية فقط .. يعني ممكن يكون بلة ود حوا لولا الركشة بتاعتو .. سؤال واحد ماهي مواصفات هذا البلة كما وردت في الاغنية .. عشان نعرف سر عظمتو .. وللا الموضوع رقشة وخلاص??
05-09-2009, 12:32 PM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
(عابدين ..عابدين يا أبشرا ..عابدين جيبو بياسين (يس) يا ايشرا) وقتها كان (عابدين) قد استعصى على المعجبات فلجأن طائعات مختارات لأبشرا وكراماته وإخترن (يس) دون سائر السور فالمهم ان يأتى.
عابدين فى غمضة عين أصبح أمير وفارس صعب المنال لمجرد ان هنالك من هى بايرة ليها سنتين أعتقد ان عابدين قد اختير فقط لأنه كان آخر الفرسان.
مضى وقت ليس بالقصير قبل ان تظهر من هى تطالب بعريس من باريس (يا الماشى لباريس جيب لى معاك عريس) بل تشترط ان يكون (دسيِّس). الغريبة وقتها كنا نحن مغتربين السعودية ودول الخليج (سوقنا حار) قبل ان تغمرنا موجة مغتربي أمريكا. واعتقد انه لو كان هناك من يذكر اسمه لكان (إدريس) ولا ننسى (معاوية) فى قولهن (القطر الشال معاوية يتكسر زاوية زاوية) وفى الشطر الثانى (يسلم لى معاوية) وكانه سوبرمان!
ويظل التمنى هو القاسم المشترك فى كل الاحوال
مساء الخير يا استاذة،،
05-09-2009, 01:38 PM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
كالعاده منوره بمواضيعك الإجتماعية يا أستاذة.. سمعت الغنية دي اول مرة شايلنها بنيات صغار.. حقيقه عجبني اللحن اما الكلمات فلم اعرها انتباهي .. فهي مثلها مثل جل او كل أغاني البنات تحمل لغة بسيطة واوصاف مباشرة دون الرمزية المتبعة في الاغاني.. اعتقد الإعجاب بالاغنية مصدره لحنها الراقص المتسق مع الأذن السودانية وموجة العصر.. تحياتي.
05-09-2009, 08:35 PM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
انا ببكى واترمد عشان خاطر محمد .... محمد اجازتو تمت انا ببكى واهاتى عشان خاطر الهادى ...... الهادى شريك حياتى وفى نفس الاغنية غنت البنت لكثير من المهن ليس الركشة فقط يا خالة يا ريا تعال شوفى العليا قلم للافندية .... ابرة للترزية .... ومكنة للعربية ... حديد للكبانية .... وصف لي بيتو جوار الثانوية ..... وادانى عنوانو جـده السعودية
ودكتور لؤى ... كشف علي ودكتور رافت ... اشر لي
وصعب صعب يا على الحب صعب يا على سواء كان بالمارسيدس او اللفت باك
جاييييك برواقة
05-10-2009, 08:30 AM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
اما عن سؤالك واعجابك بقولك : لا أخفيكم سرا إن قلت أنني معجبة بهذا البلة حتى النخاع , و لا تسألوني عن السبب حتى لا يبطل العجب ..
كم تمنيت أن ياخذني هذا الساحر بلةودعشة سائق الركشة في نزهة عصرية بعيدا عن عيون الناس
هاك القصة كان بتقدرى على النهاية
ما مشيت لى حاجة (سعدية)؟ - مالا عندها شنو؟ - مش وقعت من (الركشة) وإتظلطت و(خيطو) ليها راسا تلاته (غرز)؟ حوار عادى يمكن أن يحدث بين أى زوجين.. زوجة تخبر زوجها بأن جارتهم ترقد مريضة إثر حادث تعرضت له، طيب أيه الغريب فى الموضوع؟ أقول ليكم.. الغريب فى الموضوع أن زوجتى العزيزة كانت تخبرنى بهذا الحادث الذى تعرضت له حاجة سعدية وهى غارقة في الضحك!! - بتضحكى مالك؟ ده هسه موضوع يضحك؟ - خلينى كدى أحكى ليكا وبعدين إنتا براك ح تعرف..
- وبعد أن أخبرتنى (حرمنا المصون) بالقصة لم أتمالك نفسى وإنفجرت فى نوبة من الضحك المتواصل كما أتوقع أن يحدث لك ذلك عزيزى القارئ وإليك القصة: بعد أن اكتمل عدد المشتركات فى الصندوق (الماسكاهو حاجة سعدية قررت أن تذهب لتسليمه إلى صاحبة (الصرفة الأولى) فقامت بوضع (القريشات) فى كيس نايلون أسود ولفها بعناية حتى لا يستبين ما بداخلها ثم أوقفت (ركشة ... - ماشة وين يا حاجة؟ - ماشة ليا يا ولدى لى ناس زيارة قدام محطة جامسكا فى الثورة! وإنطلق سائق الركشة وهو مندمج مع الأغنية التى يبثها (المسجل) بصوت عال وأخذ شارعاً جانبياً ثم آخر حتى صار بعيداً عن شارع الظلط الذى من المفترض أن يسلكه مما حدا بحاجة سعدية أن تقول له: - يا ولدى إنت ماشى بى وين؟ أنا بى هنا ما بعرف السكة! - يا حاجة إنتى مش ماشة (جامسكا)؟ أنا خلاص بوصلك! استمر سائق الركشة فترة من الوقت (يدخل بى زقاق ويطلع بى زقاق تانى) حتى توقف أمام أحد المنازل وقام بالضغط على البورى ففتح باب المنزل (3 ضل لتدخل الركشة وبداخلها الحاجة سعدية! التى تفاجأت بوجود عدد من (الشباب يلتفون حولها تفوح منهم رائحة الخمر) والدخان : - يا وليداتى أنا مرا كبيرة عاوزين منى شنو؟ - مشيراً إلى طشت كبير): ما عاوزين منك شئ يا حاجة بس نضفى لينا الكمونية دى! كان الطشت (مليان لى عينو) بالمصارين و(الكرشة) و(العفشة)، وضعت (حاجة سعدية الطشت أمام (الماسورة) وهاك يا نضافة، على الرغم من أن كمية الكمونية التى فى الطشت من الواضح انها لأكثر من (بهيمة) إلا أن مهارة حاجة سعدية قد ساعدتها فى إنجاز المهمة فى وقت قياسى مقداره ساعتان بالتمام والكمال! - وهى تستعدل ثوبها) أها يا وليداتى رجعونى حتتى! - أحدهم يناولها كيس أسود ): يا حاجة معقولة تفكينا (عكس الهوا كده وتمشى؟يعنى (الكمونية) دى ناكلا (نيه)؟ قامت حاجة سعدية بفتح الكيس الذى يحتوى على (الفحم والبصل والصلصة والبهارات، جلست على (البنبر) المتآكل من جديد، (ولعت نارا) وبدأت فى (حش البصل) ثم دق التوم والفلفل.. - أها يا وليداتى.. لى الصلصة كبيتا ليكم فيها.. خلاس ودونى لى اهلى الواطه (فللت! - خلاس يا حاجة تعالى أركبى نوصلك..
على مشارف الحى قام سائق الركشة بإنزال (حاجة سعدية) التى إتجهت صوب منزلها بينما انطلق السائق عائداً إلى شلته.. - مالك يا حاجة إتأخرتى وجاية فترانة كده؟ - كيفن ما اجى فترانة وتعبانة؟ ومنضفه (كمونيت) الدنيا والعالمين!! - أجى (كمونيت) شنو ياحاجة ما قلتى ماشة تودى قروش (الصندوق) الوداك للكمونيات شنو؟ وبعد أن قامت حاجة سعدية بسرد الحكاية وسط دهشة الحاضرين خاطبتها حفيدتها (الطالبة قائلة: - والله يا حبوبة بركة البقت على الكمونية مع الحاجات البنقراها فى الجرائد دى! لما كان من الضرورى تسليم مبلغ (الختة لصاحبتها فقد قامت (حاجة سعدية بإرتداء ملابسها فى عصر اليوم التالى ثم قا مت بوضع (القريشات) فى كيس نايلون أسود) لفته بعناية حتى لا يستبين ما بداخله ثم أوقفت (ركشة..
- ماشة وين يا حاجة؟ - ماشة ليا يا ولدى لى ناس زيارة قدام محطة (جامسكا) فى الثورة! وإنطلق سائق الركشة بالشارع الرئيسى الذى بعد أن تحرك قليلاً وجده مغلقاً فى منتصفه بسبب بعض الإصلاحات فاضطر إلى أن ياخذ شارعاً جانبيا ثم آخر وعندما إنتبهت (حاجة سعدية) إنو (الشوارع ما ياها) قذفت بنفسها من الركشة وهى تصيح: - وحات الله ما بقدر على الكمونية تااانى
05-10-2009, 09:02 AM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
غايتو شركات العربيات لو سمعوا بأغني البنات عندنا .. كانوا أدوا المؤلفين و المؤلفات بتاعة الأغاني دي جائزة عربية موديل السنة .. إبتداءا من سائق البوباي و إلى :
التايوتا جات ماشة بي هنا الله ينصر دين السايقه
ثم
التي لا تفرق بين تشتشة سيجارة و وخز القلوب :
طارت لى شرارة حرقتني بي ناره قال لي متأسف النار نار السيجارة
***
غايتو دي معقولة شديد ، و تنتقد وأد البنات الجديد :
كان حقو تسألني يا يابا في أمري
تعرف كمان فكري في شريك عمري
مش حية تدفني في بيت يكون قبري
والله يابا حرام يبقى الزواج جبري..
**
أما هذه فمحيرة للغاية
]سايق العظمة سافر خلاني وين يا لماشي لي باريس جيب لي معاك عريس شرطاً يكون لبيس من هيئة التدريس
لبيس ممكن ، من هيئة التدريس أيام زمان ممكن برضو ، بس من باريس كيف ؟ في مدرسين باريس دي يمكن يشوفوها في الأطلس و يمكن لا.
في المحصلة النهائية ، فإن أغاني البنات هي تيرموميتر نابض لشريحة كبيرة من المجتمع ، مآسيه و مشاكله و أحاسيسه و إعجابه و نفوره
دمتم
05-10-2009, 05:44 PM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
كثير من أغاني البنات يتضمن صدقية وواقعية للأسماء التي تورد فيها.. وبعضها يحرف قليلا لضرورة القافية اللحنية.. فإسم حمادة مثلا.. هو من تدليع اسم محمد ومتلازماته من أحمد, محمود, حماد, حامد... المدهش في المجلس العسكري الإنتقالي كان هنالك اسم حماد عبدالعزيز حمادة, لأننا لم نسمع سوداني بهذه التسمية ناهيك أن يكون عسكريا.. والمدهش أن جده ايضا حمادة الشئ الذي جعلني لا أصدق هذا الإسم لليوم.. بعد فوز الصادق بالوزارة سمعت حنان بلو بلو تتغنى: يا الصادق أب عمة.. يا قائد الأمة.. طبعا لو قالت الصادق المهدي لإنفلت اللحن والإيقاع.. السيسبانة.. خضراء ورويانة... كنت أتخيلها تلك شجرة السيسبانة الطويلة التي أمام منزلكم عندما يتغنن بنات الحي بها..
تحياتي
عبدالعزيز
05-10-2009, 11:04 AM
mamkouna
mamkouna
تاريخ التسجيل: 12-05-2004
مجموع المشاركات: 2246
يا توفي انتي بتعرفي عمك حسبو يعاين لي شتت قصبوا!! طبعاً الغنية دي عندي معاها قصة لذيذة أيام ما كانت طالعة موضة كنت معاي صحبتي طالعين مشوار بي عربيتها ومشغلين المسجل بأعلي صوت طبعاً شباب وكدة لسة ما جلسنا أها وقفنا في شارع كدة داخل حارة عشان نكب موية للعربية من سبيل في الشارع دة والغنية أشتغلت رش أها فجأة يقوم علينا راجل بي عصاية أمشوا يا أولادالحرام يا قليلين الأدب ويا الفعلتوا و يا التركتوا طبعاً انا أنخلعت والبت كضمت المهم ربنا فكفكنا منو بالجلالة انتي عارفة الراجل دة طلع في النهاية أسموا حسبو ومن ديك وعيك الغنية دي قاعدة تبوظ أعصابي
عمك حسبو يعاين لي شتت قصبوا يعاين لي اررررررررررررررررررح
05-10-2009, 11:42 PM
وليد الطيب قسم السيد
وليد الطيب قسم السيد
تاريخ التسجيل: 04-30-2009
مجموع المشاركات: 2245
بله يابلة دق الرقم جلى بله ود عشة السايق الركشة دق الرقم طشه بله ود عايد دق الرقم زايد بله الجموعي بكاني بي دموعي بل ده الهندي دقه الرقم عندي بله ده الحنان الساكن أمدرمان بلة ودعشه دق الرقم خشه
وخفت بالجد يكون بلة هو نفس بلة بتاع المثل المعروف (يحلنا الحل بلة)
لانو وحسب اعتقادى صاحب مشاكل وان كان مكسر الجكس ....
وهنالك نزار...نزار بوبار بريدو السايق الدفار بريدو نزار انا ماسألتو براهو وقف عجلتو بي نظرة واحدة بهدلتو نزار جاب لي دبلة والدبلة ماقدري صنقر قعد جمبي ده الكسر سلوك قلبي.....
وهنالك حسن حسون....حسن حسون الريده ماجبرية احيَّ سبب لي ازى سبب لي ازيه انا حبك ده الركبوا العربية الولد ده جا ماري بالعصرية الولد ده لو ماكلام شعبية مقتنعة بالشخصية اللبسوه البوقي الولد ده والركبوه سزوكي قالي كمان بلسانه الولد ده بجي وبشاور ابوكي ولائحة الشباب المكسرين البنات كتيره .......كدى يا استاذة شوفى لينا اغنية تتماشى مع اسمى ده وليد خلينا ندخل مع الجماعه ديل فى تنافس.........
وليد 500 سابقا
05-11-2009, 07:20 AM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
البريدو عسل.. ليه ما اتصل: فوضى وقلة أدب، فناني النهيــق
عادل سيدأحمد ...
نتشرت الأغاني المنحطة.. حتى في أروقة المثقفين.. وقد رماني حظي الأغبر - قبل أيام - في حفلتي تخريج، لأخواتي بجامعة الخرطوم. «المتفننان» - ولا أقول الفنانان.. ويا لخيبتي، في هاتين الليلتين البائستين.. فقد تفننا، في عذاب وتعذيب الحاضرين..!. وكادا أنْ يقتلا داخلنا، فرح نجاح وفلاح بناتنا..!. ٭٭٭ صعد إلى المسرح.. أحدهم.. وردد: قنبلة.. سماحة الزول في الطول والعُلا..!. قنبلة.. قالوا احتمال تنفجر..!. قنبلة.. بقيف.. واللّهِ، ما بجر.. العيون كلاشنكوف.. والقوام يشهي الشوف..!. ٭٭٭ أما الكارثة الثانية.. فقد ابتلاني الله بحضور حفلة تخريج أُخرى.. وقد شوَّه الفرحة، ببغاء آخر.. «طمم» بطونا، بأنكر الأصوات.. وأردأ الألحان.. وأفظع الكلمات: البريدو عسل ليه ما اتصل.. لاقاني هناك.. تحت الشجر داك حكيت ليه الحصل.. ما إنت السبب.. ورا.. ورا.. ورا.. ده زولي الوحيد.. بريدو شديد.. يوم أشوفك يبقى العيد.. أنا.. أنا.. أنا.. ورا.. ورا.. ورا..!. ٭٭٭ والذي هوَّن علينا بلاوي هذا الهبوط الشديد.. ما حدث في حفل آخر..مع الذي كان ينبغي أنْ يحيي الحفلة.. وقد قتلها: - الطلاب والطالبات، بدأوا مراسم التخريج.. - مقدم البرنامج كان يعلن عن حفل ساهر، يحييه «واحد كدا»..!. - الواحد دا.. جاء الساعة 01 ونص، ليلاً..!. والحفلة بتنتهي11..!. - رفض يطلع المسرح، بحجة «الحر والزحمة»..!. - الطلبة قالوا له: نحن دافعين ليك 3 ملايين جنيه..!. - غنى، بالقوة.. وتحت تهديد الضرب والعلقة الخفيفة..!. - بعد أنْ غنى أغنية، في غاية التفاهة والإسفاف.. توقف.. بحجة أن الساعة 11، جات..!. علماً بأن الساعة كانت 11 إلا ربع..!. ٭٭٭ الطلبة، قرروا يعملوا «الفرق».. فقد شفوا صدور قوم مؤمنين: - جلدوا المُتفنِّن، جلدة محترمة..!. - وجلدوا الأوركسترا «أربعة أشخاص»..!. - وحتى بتاع «الساوند»، نال نصيبه..!. ٭٭٭ لقد لعبت، بنجاح باهر، دور «المديدة حرقتني»... فحرضت «الطالبات» والطلبة: - دقوه... بس، ما تأذوه..!. - ولو عندكم عشرة عنقالة... أَبطحوه.. وأدوني فُرصة، أكون أنا الجلاد..!. ٭٭٭ نعم.. لقد سيَّروه، حتى عربته..!. وقد ضرب «الثكلي»..!. ولدهشتي، فإنَّ صوته في «الكواريك».. أجمل من صوته في الغناء..!. ٭٭٭ رغم أن السلوك الطلابي، كان مخالفاً للقانون.. إلاَّ أنني أحسست براحة عجيبة.. فاعتبرت هذا السلوك، هو دفاع عن كرامة الفن السوداني..!. ٭٭٭ إنَّ بغاث الطير، قد انتشر..!. وفنانو الهبوط والنهيق، أزعجوا الكاشف وكرومة وإبراهيم عوض.. في قبورهم..!. ٭٭٭ لعنة الله تغشاكم..!. لعنة الله تغشاكم..!. وتغشاكم وتغشاكم وتغشاكم
ديل اتخرجو من وين البجيبو زى دا لى حفلة تخريج والله الجامعات مستواها منحط اكتر من الفنانين
ورا ورا ورا
لاتحت
وصلت إلى بريدي هذه الرسالة فأحببت أن أعرضها عليكم ....
مع كل التقدير لكاتب المقال ..
05-12-2009, 07:19 AM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
حيث أن أهل البادية في صباحتها الحارة يعتقدون في أهمية فك الريق ..
وذلك المقصود من البلة.. وهو من ينجد أهله بفكة الريق وتوفير الترياق فهو بله لأنه يبكر لهم ببلة الريق.. فهو أبكر .. يبكر بصلة أهله وإطعامهم .. وهو البدري
وإن كان " راكب التاتي وجالب العنافي أب سيفاً بقسم الزول محل ما يوافي"
فهو البلال..
والبلال عند كبار النساء في البادية هو برش مضفور من السعف يحفظ فيه السعف الذي يراد ضفره بعد ترطيبه بالماء ( الترطيب للبرش وليس السعف) فهو يحتفظ بالسعف في رطوبة لا تتلفه.. ويدعى الشخص بالبلال لحفظه لأهله في رطوبة لا تتلفهم .. ولكثرة دفق الماء حول بيته من كثرة الإطعام والضيوف.. فهو بلال والبلولة
05-12-2009, 08:57 AM
ALZOLZATOO
ALZOLZATOO
تاريخ التسجيل: 03-14-2002
مجموع المشاركات: 4216
والله ضحكتيني انتي اخوانك ديل اتخرجو من سلاح الذخيرة ولا شنو الغناء قنابل وكلاشنكوف
لكن يعني ح يغنو شنو ماياهو الحاجه الشايفنها قدامهم يعني اسع واحد من الجيل الجديد بيعرف زهرة السوسن شكلها كيف ما الغناء مابنفصل من الواقع رقشات وماشابه ذلك يعني مازمان الناس غنت من الاسكلا وحلا قام من البلد ولاء ودمعي للوساد بله اها الباخرة اسع مافي موجودة الرقشات نعمل شنو ناكل ممانزرع .
بعدين قصة المتفنن بتاعك الجاء الساعة واحده ذكرني قبل يومين كنت بقرا في كتاب وفيهو صفات بعض الحيوانات اها زولك ده ذكرني بالبومة وكنيتها ام الخراب يهابها الطير وتدخل اوكار كل الطيور واكل فراخها ولا تخرج بالنهار خوفا من العين لحسنها طبعا هي مفتكرة نفسها جميلة لووول يكه
بعدين بتنوم عين مفتحه وعين مغمضة واذا اخذ الانسان احدي العينين ووضعت تحت فص خاتم لا ينام ذلك الانسان اذا وضع العين المفتحه واذا وضعت العين المغمضة ينام ذلك الانسان ولمعرفة العين المغمضة من المفتحه توضع في ماء فان طفت فانها العين المفتحه وانا غطست فانها العين او العكس صحيح
اسع ماعارف الخلاني اربط فنانكم ده بالبومة دي شنو
تحياتي
زاتوووو
05-12-2009, 09:34 AM
المسافر
المسافر
تاريخ التسجيل: 06-10-2002
مجموع المشاركات: 5061
تحدثنا عن بلة وقلنا هو نفس أسم أبكر وأسم البدري وأنه مأخوذ من بلة الريق والتبكير بتوفير ما يقوم أود أهله وحفظهم من التلف وأن البلال عند نساء البادية هو حافظ وقريب ورفيق وأنيس ... والبلة في بعض المناطق هي الإدام الذي يغمس فيه الخبز الجاف والزيت الذي يصنع منه الطعام.. وجمع في البلال من فعال والبليلة طعام مكتمل تقوم به الحياة والبلال .. الليان واللين. وتغنت به النساء حنية وعاطفة وحنان
البلال بلالي أناالليلة يابلالي
والكنينة بت بلة ..
والبلال تزورني مرة
05-12-2009, 12:44 PM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
هووووووي يا عواطف سيييبي الختا واللخبتة ..:) انا قلت طفشطاشر سنة ما خمسين سنة .. وطفشطاشر سنة يعني حقبة من الزمن من قبل كممم سنة .. شخصيا سمعت الاغنية قبل سنتين ونيف..
05-12-2009, 12:34 PM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
اجمل ما في البوست هو عودة عواطف ادريس دون الحوجة لتدليع كبار السن من شاكلة فرفوري وبشبوشي وتمبوشي .. احلم بمداخلات عن غنا البنات غير مكررة .. اتمنى انو اقرا لي موضوع عن غنا البنات دون ان يتم ذكر عبارة واغاني البنات تمر بمراحل وزمان كانوا بيغنو للمدرس ولازم يكون لبيس من هيئة التدريس ثم المغترب ثم ثم .. ابحث عن الادهاش في الكتابة عن غنا البنات غير الكلام الاتكتب هنا في المنبر اككككتر من جغلومية مرة نفس الموضوع نفس المداخلات نفففففس الاغاني.. بالمناسبة اكتر حاجة استغربت ليها إنو اغنية بلة دي ليها زي طفشطاشر سنة بتتغنى وانا متاكد إنو عواطف سمعتا من زمااان لكن بيجيني احساس انو عواطف قدرت وفكرت ثم قدرت وفكرت ثم نظرت ثم نجرت ثم قالت بسسسسسس ارجع للناس ديل بي بلة ود عشة وبعد داك اشوف الحاصل.. بوست غير موفق :)
تخريمة : غنا البنات ده اسمعو نضميهو من سلمى الشيخ سلامة
05-12-2009, 12:52 PM
عواطف ادريس اسماعيل
عواطف ادريس اسماعيل
تاريخ التسجيل: 08-11-2006
مجموع المشاركات: 8006
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة