|
دندنة عاشقة ... من البلد
|
شن لى؟ يالضهبت على. تلّفت النجيض والنىْ شن لى؟ يالنَفَس والعافية .. مانايبنى منك شىْ شن لى؟ يالطبلت القيد ... بقيت غرقانه فى شبير مى شن لى؟ فى الضلمة الكاسيه وانت الباقى لمبة ضى احضن حلمى زى الجاهل اصحى بدار وألقى الصىْ بعد ما يلبّن البناتنا ... حازر لا يختفوا حَدىْ ياخلينى ابقى بلاكا ... واعرف راسى من كرعىْ ولا كمان ترش تحيىّ الورق والعود مواسمك .... يـــا خريف الرىْ.
تماضر
|
|
|
|
|
|
|
|
Re: دندنة عاشقة ... من البلد (Re: Tumadir)
|
جــد لي بعد الحال ما سرق جــد لي الليلة تمرنامرق جــد لي زرعنا عرق رويناه عرق لما فلق شب طلق وجـد لي تمرنا مرق بعد ما حشاي ضن حرق جد لي الليلة زدنا طرق وفوق الزيت ربيت ومرق جد لي تمرنا مرق
| |
|
|
|
|
|
|
Re: دندنة عاشقة ... من البلد (Re: بارعة)
|
اهلا يا نداى يا محور حديثى.. ومنعطف رجاى اهلا بالنجوم ... رشت فى فضاى بى شتل الحروف ... يزهر فى غناى يا لحن المروج... ودفقة شوق... مساى يا وعيى وحقيقتى... ومنيتى.. ومعناى اتفضل ... وصلت..مرحب..جوة..جاى امشى فى الرمش.. واسبح فى دماى اتفضل... وصلت.... اعمل ليكا ... شــــاى؟
| |
|
|
|
|
|
|
Re: دندنة عاشقة ... من البلد (Re: Tumadir)
|
جــد لي عودو شقه فتق شايل شخاليبه كرق ودفيقه كفانا النبق جــد لي سيفنا المابصدو درق القدة جفيرو ماهو ورق حدو التقيل ماهو رق حازمو ابنفيل ماهو رق جــد لي تمرنا مرق
| |
|
|
|
|
|
|
Re: دندنة عاشقة ... من البلد (Re: Tumadir)
|
... .. . تماضر الأنثى الدائمة الحضور العملاقة بهيبة .. جميلة هى دندنات عاشقتك وأكثر القا منها لغتك تلك السهلة المتمنعة تنسرب بلا استئذان تتوغل وتتحّكر وتقعد ثم بعد ذلك تلقى السلام .. أيتها الجميلة بدهشة لاتغيبى واعيدينا الى الزمان الجميل .. نمارس الصمت فى حضورك وكل الانصات .. لك كل الود .. وسلام ...
| |
|
|
|
|
|
|
Re: دندنة عاشقة ... من البلد (Re: Tumadir)
|
ويقبل نحونا هنا عمر الدوش ويقول:
شميس المغرب الممحوق تبين فوق وجهك المحروق تبين صفرة سنيناتك يبين ضل الكلام مقلوب.. وات ياصالح الأيام لا صادقت هدماً زين ولا حتيت تراب السوق
تحياتى ودعزة
| |
|
|
|
|
|
|
Re: دندنة عاشقة ... من البلد (Re: wadazza)
|
طعم الصبر عشرق جوه الجوف اكوس زولا حنين كان بى قليبى يطوف يطرد الوجعة ويستر الحال ويصد الخوف محطات حبه مافيها حديث لازمنا فيه وقوف اهديه ضئ العين وكت الدنيا تعمى وبيها يشوف هو انا .. انا هو .. دحين منو التانى ما معروف
| |
|
|
|
|
|
|
Re: دندنة عاشقة ... من البلد (Re: dreams)
|
.. مشيوله ف موجة ريدك .. نسمة تهبها ريح مشيولة..على جيهاتك..طيرة جناحا جريح مرسومة مدينة.. على باب المرصاد.. ابطالها بعاد واحلاما سهاد والبحر على مد الرؤيا.. حالم وفسيح
مشيولة ف حدقة ريدك.. زى الريشة..على جيهاتك..طيرة جناحا جريح
| |
|
|
|
|
|
|
Re: دندنة عاشقة ... من البلد (Re: Tumadir)
|
و شن لي يا حبيب عيني غير أرجاك تجيني في النهارات في تبرد لي حشاي و تفرج غبينتن لي و تطوف في البلد شايل الفرح و الضي و شن لي غير الصبر و أحي من الصبر لما يوقد في اللحيم الحي
| |
|
|
|
|
|
|
Re: دندنة عاشقة ... من البلد (Re: noha_g)
|
بحلب ليكا نجمة ... ضو يضحك معاك وانقش ليك حديث.. يشاقق فى ثراك اكتحال عيونى من دهشة رؤاك وماخضاب يدايا سوى شفق سماك شذاى ... من امانك..وانتظار لقاك بس ادينى خاترك... ورسل لى حجاك!!
| |
|
|
|
|
|
|
Re: دندنة عاشقة ... من البلد (Re: Tumadir)
|
شيتن لى بلادنا الغايبة مالمتناغير للى ومن قومتنا نص وجعتنا شفنا القمرة دون الضي وحالنا اللهلهب الاشعار يزيد فى نارا كل شوى لانا قنعنا لاالبيبان بتقفل ذاتا لما الهم يكاجر الحى ولما نغنى ليك ياتماضر ضوقىالعافية وابى النى شوفى الحسرة تيجان راسنا ونحن اللى ضلام الكى ملعون النباح الساهر الليل والليل ينفحك بالصي وملعون الضلام البخاوى الريح وابوالتى تى
| |
|
|
|
|
|
|
Re: دندنة عاشقة ... من البلد (Re: zumrawi)
|
النادرة والمبدعة تماضر شيخ الدين
لك كل الود والتجلة
اعجبتني جدا القصيده الفوق وقبل ان اتطلع علي اي تعليقات اخري بديت انجر علي نفس النسق وعشان ما يطير حا اكتبو هسي ولازم بفتش ليه تكملة
شن ليك؟؟؟؟؟؟؟؟؟؟؟؟؟؟
ليك العزة من قامتك بتبرق ضى وليك العافية جاتك حافية من تالا الصعيد والصي
فراشتين عافو ضفتنا ورحيقها الني وطارو بعيد عن النيل والجروف والفي
*عشان يلقوك (يا بت يا حديقة ويشمو العافية من نفسك حقيقة
وينسو الدنيا كل الدنيا جنب عينيك لمعانها وبريقه
ورود وزهور عطور ونور نداك بعزم فراش القاش
يعدي بحور ونحن وراه كاسرين سور
ومحل ما تميل القمره نلاقيك فارشة كل الضى
ورودك ياها جنتنا ورحيقه
* معليش
البت الحديقة استعرتها من مناداة مبدعنا الموصلي لتماضر شيخ الدين وانت فعلا كذلك
| |
|
|
|
|
|
|
Re: دندنة عاشقة ... من البلد (Re: Tumadir)
|
Tumadir, Yazoul, wadazza, hero, Cola, Almusafer, Noha g, Soma, zumrawi. I feel half drunk now. Sorry I cannot talk Arabic today.
Nazar that’s terrific. Munsharak saneen.
| |
|
|
|
|
|
|
Re: دندنة عاشقة ... من البلد (Re: Ahlalawad)
|
اهل العوض
يا اخي وين خيمة الحاردلو- العمارات؟؟؟؟؟؟؟؟
ووين شيخ العرب وسنجاوي والهمباتي ؟؟؟ فرتقت الخيمة واللا شنو؟؟؟؟؟؟؟؟؟؟؟؟؟؟؟
الاستاذة تماضر
شايفك خليتي البوست زاتو اوع يكون كلامنا ما في محلو؟؟؟؟ والله كنت ناوي اتم النجرتو فوق لكن لما شفت ما في حد دخل بعد اهل العوض قلت لازم يكون في عك حصل؟؟؟ واحسن اقيف لا حدي هنا بدل ما يجيني سلك طاير والله يكضب الشينة
| |
|
|
|
|
|
|
Re: دندنة عاشقة ... من البلد (Re: Tumadir)
|
ما شن لى؟ ما من الشفتو......
شفت الشوق مضبوح وينازع بين الغربة وباب المنهل شفت الغيم فى الحجب اتجمع، عتم شوف الافق اتكتل حسيت بالدمع الساخن جرى استرسل والقلب الطفل اتتضهب بين الضلع يتلفت ويسأل شفت ، وحات الشوف ، الريد فى ساحة روحى اتقدل ونان ماشفت الضو بتنزل زى الملك الجايى مرسل شفت الغنا بتسامع من المدى، حافيهو الصدى دوبيت البدو اوتار الشدو اسلس واسهل
شفت النار والنور، الروح والراح، بس ما بقبض الا الريح، ما بشرب الا سراب الصحرا ما بسمع الا رنين الصوت، والشوق مضبوح وينازع بين الغربة وباب المنهل
وما شن لى؟
| |
|
|
|
|
|
|
Re: دندنة عاشقة ... من البلد (Re: Tumadir)
|
برضو ما شن ليك بس؟؟؟؟؟
جيد لينا
لما تشوفي الغيم اتكتل بين الغربة وباب المنهل
ما نحن عطاشي نكوس الدلو والبير في دنيا هجير وسرابا ما بتحصل
ليش ما نعشم انو المطر التالاك بشت ورشت حلق اليابسة وسعن العرب الرحل ونقول جيد لينا
ويا مطيرة صبي لينا فوق عينينا وطهري رمدا ساكن طول
يا مطيرة يا مطيرة يا مطيرووووووو
نحن ننده والعطش نشف حلوقنا ومره نرفس جنبنا الواطا وشقوقنا
لي ترايا تبل عروقنا ونزحف نزحف لامن نصل الجدول
اتاري الجدول لي غيمك يتاوق والنخلاية الصنطة الفارعة الفارده ضفيرة الليل وتمشط في اغصانها مساير ودارعة الكوز في طريفها بترمي الودعة ترص الودع الحمد بالوسطاني يجينا كلامو بشارة ومنهل
ونقول جيدلينا
| |
|
|
|
|
|
|
Re: دندنة عاشقة ... من البلد (Re: nazar hussien)
|
انتو عطاشى؟ فى نص لجة بحر الغنا والسابلة وبرضو عطاشى؟ طيوب اللقا تتسربل ترقص يوم جيتكم وتمرق باشة؟ جروف النيل تتفتح تكسر موية خير، تروى الحواشة؟ عيونكم شايلة الحلم اللخدر، وتسكن فيها شجونا الطاشة؟ برضو عطاشى وانتو الرى بستسقى مطركم، عشان يتبلبل من رشراشه؟
عطشانة القطرة النامت جوة الموجه وريقها دقيق، عشقانة فراشة!!!!!
| |
|
|
|
|
|
|
Re: دندنة عاشقة ... من البلد (Re: Tumadir)
|
البحر؟؟؟؟
انفلق
انقسم النص واتبخر
يوم ما الغربة جاتو بتتبختر ودخل الهربه
من وين حا نسمع؟؟؟ ونشرب ونروي
سمعتيلك بي موجة تغني بلا نواته وحصل شفتيلك مركب في بحرا حاسي وحواته
ما المركب شالتكم وراحت شقت نيلنا وعينا تعاين والموج اتباقص واتاحت
وجروف النيل ما بتفرهد بالشوق غير ما نرجع وبي تيرابنا وماروقنا نسلك واطاطا
| |
|
|
|
|
|
|
Re: دندنة عاشقة ... من البلد (Re: Tumadir)
|
المدهشة
تماضر
ما امارسه هنا من شخبطات لا يتعدي التحريض لنشعل بارود الابداع المتوهج عند بت شيخ الدين
قريت ليك حاجات في البورد ده طويلة
فرح ورثاء وعشق وترقرت دموعي وفرحت في لحظة واحدة
فانسانة تملك المقدرة لتضع الرسن علي ارواحنا وتوجه زاملة القول وتحرضنا علي انفسنا قطعا هي ما بين الحقيقة والخرافة
كونك تقطرين ابداعا لا يحتاج هذا شهادتي فلديك ما هو رسمي ليثبت
لكني هنا امارس رسم سنة اولي ابتدائي الكتابة واعلم يقينا انك بريشتك الساحرة المحرضة سوف تضيفي ابداعا والقا وسحرا لذلك سوف اتمادي في تحريضي
وربنا يحفظك ويغتيك بركة الليل العقل جناح اللمة والطير زي ما بتقول حبوبتي
آخر الكلام
تعالي ولمي من كل البيوت عدة السفر الطويل شخبطي الفجر النهار اربطي الضحي والاصيل المغرب الفجر النجوم في صرة وارميها البحر خلينا فوق الشك نعوم
والحلة زي بلدا بعيييييييييييييييد زود بعادو قرب سعاد اتجمعت كل البيوت في راحتا زي بت لعاب
مجنونة تصرخ في الزوال ممزوجة في الدم واللعاب
بانت سعاد وقفت علي خصر الجبل فتحت مشارع للظنون والاسئلة رقدت علي شعر السهل ضفرت ملايين القبل
والجو صفا والنيل هدا وغاب الوتر الدوش سلام
| |
|
|
|
|
|
|
Re: دندنة عاشقة ... من البلد (Re: Tumadir)
|
مشيت اتتكى فى ساحات الودار اتمشى فى الضلمة وافتش فى عرى الكلمات، قصيداً جابتو النسمة واعاين فى النجوم اترقب الساطعالا بى حلمة
اكان ساى فى الضلام الشايل الهم دة، التلوح دُهمة اكان ساى فى الحروف الباكية من الضيم تسر كلمة واكان بس ساى، وزى ماكان زمان بحصل وفى نص لجتك ياليل تدق باب الوله... نجمة
وشن لى؟
| |
|
|
|
|
|
|
Re: دندنة عاشقة ... من البلد (Re: Tumadir)
|
بعد السنين البقت ممزوجة فى نبض التعب بتعود ويلاقيك زولا حفظ الوداد زمنا صعب الرائعة تماضر يا واحة ظليلة لما نتعب بنجيك وكلنا ويحدونا الامل نرتاح تحت ظل شدرتك ...يا ربى تفضل دائما خضرة بيك وبى كل النجوم الحواليك لكى ودى
| |
|
|
|
|
|
|
Re: دندنة عاشقة ... من البلد (Re: Tumadir)
|
هلا تماضر الشاعرة .. وهي "تجر على عربات الكلام بيادرها "فتخضر صحراء غربتنا .. لك محبتنا ولكل شاعرات السودان المجيدات .. عليك الله ياتماضر لو عند شي من شعر رقية انا في حاجة ماسة له فلا تبخلي.
| |
|
|
|
|
|
|
Re: دندنة عاشقة ... من البلد (Re: Tumadir)
|
الضي الوهج اتناثر في كم سنة ضوئية الباقي منه مية يكفي صبية في عمر الأشعار ولون الشفق الأحمر وضراوة النار في صدق العروة تمسك عروة وتشد أوتار تدندن بنصف الكلمات بالصوت العائد من اسفار من دنيا غريبة ومنسية
| |
|
|
|
|
|
|
Re: دندنة عاشقة ... من البلد (Re: Tumadir)
|
حـــلات كلامـــك يا تماضر
لك الإشادة والتحية
وشن لـــي في الدمع الكسا عيني وشن لـــي فــي الهم الكتيـر ما شــوي وشن لــي في الســـواد المغتـــي الضــي وشــن لـــي في البعادو جمــرا حي
ولك الود من صلحة
| |
|
|
|
|
|
|
Re: دندنة عاشقة ... من البلد (Re: نصار)
|
الحداء...الرمل...القوافل...اذن القوافل تساوى الحداء والرمل اذن الرمل مساو مشترك اذن القوافل متمهلة فى طرقات الرمل اذن الرمل مسامات بعيدة الأغوار آه...نسينا أغنية الحداء...ومقاطعها المجلجلة.. هل الاحتقان وارد عصر المياه ...أم التزلج على الجليد؟
السكون عاصفة الوطن والوطن وجهة القوافل تحياتى ودعزة
| |
|
|
|
|
|
|
Re: دندنة عاشقة ... من البلد (Re: Tumadir)
|
شن لي بعد ما قلتي للفانية وداع ما الفانية مسخت عليّ شن لي كت قايل نفسي كبرت خلاص وبقيت راجلا بشد الحيل وبدرج العاطلات في الحي ضرب السكلي والرفقات ردحن قالن ووب حي دمعاتي القراب ادافرن وما شالني كرعي ادردقت في الواطة زي شافعا حردان وزي .. وزي
شن لي يا يمه .. أنا صبحت يتيم وبعدك انتي ما بداويني الفقير ما بنفعني الكي شن لي وشن لي
| |
|
|
|
|
|
|
Re: دندنة عاشقة ... من البلد (Re: Tumadir)
|
اغمض عينى شان احلم
والّون فى الُحجُب اشكال
تجينى الضلمة تحجبنى
تقيف عايق ما بين حلمى والترحال
واتحسس ملامحك فى خيالى..خيال
ما بسلم، بعد ما جيت لحدى هنا، ما بسلم
وسفرى عليك، شعاع من سكة ، مد وطال...
يا موصلى منتظرين الالحان الوعد، حصل شنو؟؟؟؟
| |
|
|
|
|
|
|
Re: دندنة عاشقة ... من البلد (Re: Tumadir)
|
هنا يدندن العشاق………. وقوفا عند ضفة الحلم الأخضر وما بين شتات الحلم والضفة الأخرى يفور الدم من ضجة الأشواق.. أين غير هنا ؟؟ فأمام النهر المهيب أعلن توبتي وألقي في الزرقة قربان غربتي أزكي أوبتي لعلني أرسى … وأُعلن بقاء الروح في فوضى الإنعتاق هنا يرقص العشاق وتتصل العروق هنا عند هذا الجسر يحلو العبور هنا فقط… لا نستطيع أن نعبر عن عشقنا إلا ببدائية حرة لنطهر من رجسنا فندندن نحن الذائبون عشقا
لا يكبلنا الشعور
| |
|
|
|
|
|
|
Re: دندنة عاشقة ... من البلد (Re: Tumadir)
|
تماضر ليرجموني ويتهموني بالزندقة والتطبيل...لكني سأقولها...واقفة لي في حلقي انت موهوبة...ودمك خفيف...ومتواضعة...ومشهورة...واظنك حلوة...وصوتك جميل...حساسة وحقانية...متفتحة وبت ناس وطيبة وتحبي كل الخلق والبلد لك التجلة والاحترام يا طيبة
حفظك الله
| |
|
|
|
|
|
|
Re: دندنة عاشقة ... من البلد (Re: Tumadir)
|
الاخت تماضر بلغت من الكبر عطيه واشتعل الرأس شيبا أدمنت الغربة وأرعى الجنيات أقفل الباب يا ولد وافتحتي الكتاب يابنيه البنيه بقت جكس وتعزف كلارنيت ويا اميقو زح بعيد وتصالحت مع الاسنو وانته يا الابيض ضميرك صافي زي لبن الحليب وبنيت علاقات قويه مع اشارات المرور ومحلات الكافيه وامشي الهوينا لانو العمر مش بعزقه اسمع الكنتري والسماني أحمد عالم واولادحاج الماحي وأنوم مرتاح وهالي البال
| |
|
|
|
|
|
|
Re: دندنة عاشقة ... من البلد (Re: Tumadir)
|
شن قال انا من الفرح بالجي شن قال من مساسك فوق بلاد غربه تشيل البي ملامح تنعدم فينا وعذاباتنا التقول حي وي شن قال وكت الحزن طالق كلاب الحي شن قال من وطنا الصبح مضبوح بسكاكين تقول شو صي
| |
|
|
|
|
|
|
Re: دندنة عاشقة ... من البلد (Re: Tumadir)
|
ننتظر لقاء السحاب عندما شدت ام كلثوم انت عمرى من الحان الموسيقار محمد عبدالوهاب اطلق عليه اسم لقاء السحاب لاجتماع قمتى التلحين و الخامة الصوتية ننتظر لقاء السحاب السودانى بين الحرف و اللحن او الموصلى و تماضر بالله ما تتاخروا علينا
| |
|
|
|
|
|
|
|