يوميات فرنكش ود الحلة **تمبس

Quote: هزليـــــات فرنكش – ود الحلــه وين يا .... لزززيززززز يا عسوله ... وا حلاتي يا ناسي .. شنو فاتح لينا كده؟؟؟ هكذا تبدا هزليات احمد ( فرنكش ) من مكانه المعروف الذي أفترضه لنفسه .. ( لستك ) قديم مزروع علي الناصيه عند مدخل الحله .. بحيث يستطيع من مكانه مراقبة الماره وأصطياد عباس في تحركاته المريبة .. وبأمكانه زرع البهجه في نفوس الجميع من خلال تداخلاته .. دواخله المحتشدة بمسرح داخلي يستطيع وحده التحكم في العملية الإخراجيه وكل العمليات الفنيه .. حتي أدمن ( اللستك ) نسيج خيوط الرداء المهترية .. واعتادت أرضية المكان الصلبه علي خطوط حزائه ومخلفاته المزاجيه دون ملل – اصبح معلم بارز .. دليل للوصف .. أصحاب (الرقشات) يستغلون تواجد فرنكش في المنطقه المعنيه لإفتراس الزبائن المتسكعه حوالين فرنكش ( فرنكش ) يعرف كيف إرضاء معجبيه كلا حسب هواه .. نساء الحله عند مرورهن بالسوق يحرصن علي خدمات التوصيل المجاني التي يذودهم بها فرنكش دونما مقابل أطفال المدارس في علاقه حميمه معه لاينسي عملية توصيلهم إلي باب المدرسة حسب جدولة أسبوعيه أفترضها .. فرنكش دفع به المظروف (الكاكي) اللون إلي هذا المنفي الإختياري .. أصبح غير قادر علي العمل بأي مصلحة حكومية أخري . بكالريوس الجامعة أكتفي بأن يحتفظ بنفسه داخل الشنطة الحديدية المغلغة بأحكام .. الأعمال التجارية هو ليس من روادها .. الكثير من له علاقه بهم أختصروا المسافات – هاجروا بلا عودة .. أحتفظ بزكرياتهم الجميلة في دواخله العزيه دون التفكير ولو مرة باللحاق بهم .. سكرة : عليك الله كباية نص قهوة في نص شاي بس ما تحركي السكر. ....... فرنكش يا ولدي الله يباركك كان تلحقني علبة صلصة من دكان الفوراوي ............. سلامات يا فرنكش ... اهلين يا توحه .. وينك ما ظاهر ( بِسس ..) الكريه ده .. إنته غير العطالة وقاعد اللستك ده .. ومشاغلة البنات ماعندك شغله تقضاها .. عما اا.. - انتي غير شناتك .. ومساختك دي مافي حاجه حامياك العرس .. عامله راسك القاطعاهو من راسك ده. .................. - - يافرنتش التفر بتاعنا طار لينا في راس الدراش بتاع ناس عمي حسين ، والتلب بتاعم سعران .. تعال جيبو لينا .. - طيب تعال انا بدق ليك شنكل وانته اطلع جيبو .. ............ - يا ريكس ... يا جوكس ... شنو الفنايل العفنه دي .. ؟ !!! جنصصــــــــه ............ عباس في تحركاته داخل عوالمه الملئة بالنصب والإحتيال وفي التعامل مع ضحاياه من الشخصيات اللأمعه يستغل كل فرصة للكسب المادي ، كمية من الكروت الشخصية بأسماء والوان مختلفة دفاتر شيكات وهميه بناطلين وفنايل من آخر بيوتات الموضة لاتتوافق مع عمره المتقدم .. يتحول لون الشعر اسبوعيا إلي الأسود الداكن بفعل الأصباغ .. يتواجد عباس عند الأماكن الراقية وعند العودة يحرص أن لايمر عند ذلك اللستك متحاشيا فرنكش الذي أعتاد علي مزاحمته وكشف قناعه المستعار . عباس يعرف أن المرور عبر الشهرة وأرتفاع الأسهم لايمر الأ من خلال فرنكش .. عباس لا يغادر المنزل صباحا الأ عند التاكد من غياب فرنكش ، متعمدا مصادفة طالبات الثانوي عند المحطة الرئيسية وهو أكثر تشبسا بالحياة . صباح الخير يا شباب .. اهلين يا حبه ... شنو مضيقه كده يا منقه ؟؟؟ اهلا يا احمد كيف أخبار الوالد والوالده ( عباس اكتر جديه ) علي وين الليله كده يا وجيه .. كدي تعال جيب سجاره من البينسون بتاع المرتاحين ده وكان ساعدتها بي واحده تانيه تكون بالغته .. الليله القاعه فيها شنو؟؟؟ ما زي مشينا وكده .. جيبك كيف؟؟؟ عباس تمر دقائقه بصعوبه بالغه في مواجهة فرنكش المتلزز بتعزيب عباس .. فرنكش يستغل لحظه ضعف عباس وتوتره ويتمادي في قفشاته .. بنات الثانوي عند المحطة الرئيسية اكثر اعجابا بفرنكش .. هو يعرف ذلك .... حنــــــــــان هي كل العذاب وســــــــــــــــــــر الألم اذيك يا فرنكش ... اهلين يا حن...ا.ن كيفك كده ؟؟ كويسه والله الحمد لله انته كيف عامل قلته ليك .. د###### أقول ليك شنو...؟ عايني..انت أمير بسافر متين ؟؟؟ امير ؟؟؟!! امير يا فرنكش ليهو سنتين في الهند انته في الحفله بتاعتو ما كنته ماسك البيبسي والعشاء .. بتاع الفنانيين تسالني منو حسع دي ؟؟ مالك يا فرنكش بتتهوزز كده الحاصل ليك شنو؟؟؟؟ لالا بس الحاجات جاطت لي في راسي .. بس انا كنته د###### اقول ليك شنو ؟ خلاص يا فرنكش لانو انا ماشا المعهد .إتاخرته طيب اوصلك ؟؟ لالا انا ماشا مع هدي منتظراني .. اها اشوفك متين تاني حنان تلاحظ الربكه في مفردات فرنكش وتتعمد استعراض انوثتها بحقاره بالغه معتمده علي مكانتها المميزة داخله .. هي تخفي اعجابها به .. فرنكش لايقوي علي المواجهه عباس ركس لو عرف نقطة ضعفه ..... لكان ..... مساء شتوي كئيب .. تجمعت كل الرقشات حول البيت بعد رحلة بحث مضنيه .. الأعداد الهائله من البشر المتجمعه حوالين النيل لاتنسي من تضخيم الحدث ..بإضافات خياليه... اطفال الحي اعلنو عزوفهم عن الطعام .. وعن الطابور الصباحي في غياب فرنكش المفاجي .. امه لاتقوي علي شئ ... حنان اكتفت بالصمت ... الصمت .. الصمت . عباس اكثر الوانا ... واكثر احتيالا وخيلا ... يختلط صوته احيانا مع صوت ماكينات عد النقد .. مع اصوات الباعه المتجولين .. اصوات مكبرات الصوت في الحفلات .. عباس في سوق ليبيا امدرمان يمارس مهنته المعهوده تبديل العملات الأجنبيه .. عباس يدخل ويخرج .. رزمه من اوراق البنكنوت .. شنطه .. مسبحه .. جلابية سكروته .. وييييييييييين يا قندولـــي يا مرطب .. والله مشتاق ليك شوق .. انته قايل قدر كيف؟؟؟ منو ( فرنشك ) ؟؟ كرنشف ؟؟ فرنكش .. احمد ده شنو انته مش مته قبل كده؟؟؟؟؟؟؟؟؟؟ انا اموت وين يا حبه .. افوتك ... كده بس ... دي بتجي ... مشيت ناس عمتي في الأبيض .. خريف مبالغه .. مطر ألف .. رطبته لي شهرين .. كدي تعال حاسب خالتك دي ... وادينا سجاره .. وجيب حق الرقشه ... الليله القاعه فيها شنو؟؟؟؟ طيب يا فرنكش مافي مشكلة انا بعمل ليك الحاجات دي كلها بس عليك الله تاني لما تلاقيني ما تقول لي كلامك المقلبن ده لاني ما قاعد افهمو ... وكمان لما تلاقيني قدام بنات ما تقول لي عباس ريكس دي .. قول لي يا عباس ... يا سيد عباس .... انته ما بتعمل ليك حاجه .. وانا كمان بتريحني

Quote: *فرنكـــــش ...وود القوس الغرقــــان* هووووووووي يا عجوز انته ... في زول بلبس لي فنلة حمراء من الصباح يا وهم ؟؟؟ والسلسل ده شنو ؟؟حركات جديدة يعني ؟؟ عادة لا يشرك حواسه في تحديد الاتجاه ..عندما يقفز من البص فرنكش في طريقه إلي داخل الحله نهارا عند العودة ..عبر الطريق .. وفي داخله ما تبقي من نغم في شريط الكاسيت بالبص داهمته ذبابه مزعجه أربكت حاجز الشعيرات الدقيقه داخل أنفه ..أستنفر نشوته لعطسه ضخمه .. تخلي عنها مجبر عندما صدمته ضحكة " كشو " الاحتفالية من الاتجاه الآخر " كشو " عادة يحتفل بي فرنكش بضحكة ..ضحكت " كشو " عدلت عن فكرة العطسه .. أنتبه إلي حيث مصدر الصوت متداركا .... الله يااااااااخ ... " كشو "؟؟!! دس فرنكش يده حيث العملة الحديدية يحرص دائما علي تواجدها لاعتماده عليها ..وعند دخوله حدود " كشو " الافتراضية قزف بالعمله المعدنية إلي أعلي لتتمرجح ..تابعها فرنكش في الدوران " كشو " بسط كفه حيث استقرت باتجاه " الطرة " عندها أشار إلي فرنكش لينحاز اليوم إلي اتجاه الشمال .أن يسلك شارع المطاعم محازيا للسوق ..لتأكيد موافقته همس فرنكش في أزن " كشو " بعبارات ضحك لها " كشـــو " في نشوة .. ثم عاد إلي حيث حدوده . موسيقي فرقة " الإيغيلز " المنبعثه من مسجل( ماثيو) الناشيونال في آخر درجات مؤشر الصوت ..جزيت لها مجموعة من أبناء الطريق .. يشتد حماسهم عند تغيير شريط الكاسيت بآخر ..هندي ..حيث يعبر كل منهم حسب رغبته راقصا .. يراقص محبوبته الحبيسه بداخله ..يتوسطهم .." ود القوس الغرقان " محولا بكل طاقته ولياقته البدنيه ..أنغام " الباص جيتار " إلي إيقاع نوبة صاخبة يرقصها كما أتفق ... - وين يا ..ولدنــــا .. .... ؟؟؟ - أهليييييييين يا ...مكنيكي .... ..؟؟ "بابو" محاولا شد انتباه " فرنكش " إلي حيث مر عباس ركس من قليل ... أو جرجرته إلي عشرة ونسه ،..يفقد فيها كثيرا من تركيزه " بابو " يجيد الثرثرة في كل الاتجاهات أثناء فرمطته لأحدى الدراجات لا ينسي أن يسألك سؤاله التقليدي : " تقدر تقوم سداري وتفك يدينك الاتنين ؟؟؟ " " فرنكش " يعلم أن لقب مكنيكى ..يشبع غروره ..ويلامسه في مكان مـــا .. ويوثق" لمكنيكيته" بأن يتمدد علي الأرض أسفل الدراجة اثنا معالجته للجنزير " يا بنجوس .. مفتاح حداشر ..... بلدي ..أتناول معاك علبة الشحم دي .. " .... يصيح بكل جديه .. " مكنيكـــي عجــــلات " كتبها " بابو " علي أللافته بخط عريض مؤكدا سخريته اللاذعة .. وجودة ما يتعاطاه من صنف لتسخير المزاج ... عنب ..عنب ... عنب .. صيحات " بله " الجزار من زنك اللحمه .." بله " يروج لبضاعته لحظة مرور أي حسناء .. حاجه " مريومه " الهوساوية تفترش الفول المدمس " والدكوة " وحنيتها معا .. مهمومة بصر" المرس " وبودرة الكول والشطة الحمراء في أكياس النايلون .. تلطف جوها بتحريك هبابة السعف الملونة .. عندما يأتيها عنب " بله " تفيق من "دقسه " نومه نهاريه ..تضحك بشدة .: والله أنت يا " بله " ( أفن ..أفانه .. هقار مرتين ) هي تعلم أن " بله " الجزار " عينو طايرة " وأنه لا يبيع الفاكهة ...ازدادت ضحكتها حاجه " مريومه " عند ظهور " ود القوس الغرقان " مع فرنكش .. في جدلهم الحميم ..عندما تضحك حاجه مريومه تكشف عن فلجه بالغة الدهشة ..تمسح بكفها علي وجهها ..ثم لتستغفر الله في خشوع ..ويمكن أن تلاحظ تناثر حبات " القورو " في لونه الأحمر محولا شكل الضحكه إلي اللون الأحمر ..الغرقان يصر أن يرفع فرنكش إلي أعلي باصبعه السبابه ..وأنه لقادر . الأسبوع الماضي غافل : دقشه " الضخم أمام دهشة الجميع رفعه إلي أعلي مستوي كتفه دار به تلات دورات ثم طرحه أرضا ..نحافة بدنه لا تغري علي الشجار .. قليل الكلام .. يغادر جلبابه الدموريه بآخر جديد أول كل شهر ميلادي ..يمكن أن تلاحظ بقع الزيت مكان الجيوب جرا تخزين الزلابية ..ولحمة الفته .. عندما يصرخ صرخته المميزة يستدعي الموت صرخته يطلقها عند إحساسه بالموت ، ثم يتجه غربا تجاه المقابر ..وينتظر ..لا يرجع إلا بعد تشييع صرخته ..ويمكن أن تصادفه في بيوت الأفراح ..يرقص ، أو حفلات الظار ...يرقص .. إلا أنه يوم الجمعه ..لا يفارق حلقة الذكر ..يصيح درويشه الداخلي ..ويتمتم بعباراته السرياليه .. يدور ..يدور ..يدور يستقر علي أصبعه البكر في قدمه اليمني بكل ثقله .. كلاعبي الباليه. عندما يصرخ ود القوس – يتحسس عبد القيوم " الترزي " مخزونه من معاول وآليات الحفر ، يستنفر مجموعته استعدادا .. عم عبد القيوم مسكون بالبشاشة حتى وهو يواري أي جثمان إلي مثواه لا ينسى أن يصنع النكتة .. ذات مرة والجميع منهمك في الحفر ناوش عم عبد القيوم ود القوس : - " اها يا ود القوس .. متفرشخ لي كده في الواطه ..داير تكتل لينا منو تاني ؟؟؟ " ود القوس : " مريومة " بعد تلاتة أيام بتتلحس !!! ثم أشار باصابعه " الخنصر والبنصر والوسطي ..ضحك الجميع حتى ود القوس إلا فرنكش ..مسته رعشه داخليه ارتعدت لها أوصاله. اللون الأحمر وحده لم يكن سبب في ازدياد جنون كشو في ذاك الصباح ..وإنما غيظه أيضا من عباس ركس ..كشو أفترض لنفسه مساحة صغيرة عند المحطة الرئيسية بعد أن فارق عقله الحياة وجن جنونه.. يحرص علي جمع أكبر عدد من أكياس النايلون وتربيطها مع بعضها البعض لا يتجرأ أحد بدخول حدوده باستثناء فرنكش " يمكن أن تلاحظ نظافة المساحة الأرضية حتى من صفق شجر النيم المتساقط في لونه الأصفر .اكتر ما يؤرقه مرور مجموعات من النمل الصغير..،، اثنا أحدي نوبات نظافته .. تمكن من فرخ خنفساء .. لامه بشده .. "هيييييي يا ... أبو الدقيق.. الجابك البلد دي شنو ؟؟؟" " فرنكش وحده مسؤول من عملية تغيير ملابس كشو واصطحابه للاستحمام وقص أظافره حيث تتكرر العملية مرتين في الشهر كما أتفق فرنكش وكشو . - - يا عجوز أنته ... أحسن تشتت من هنا قبلما أقوم عليك ... عباس ركس ينسحب راسما ابتسامة مبهمة عندما انفجرت مجموعة من طالبات الثانوي ضاحكة من أسلوب كشو التهديدى .. فرنكش تابع الموقف من موقعه عند اللستك ..ركس متحاشيا كشو .. إذا لا بد من المرور بجحيم لستك فرنكش .. اصطاده فرنكش لمتعته الصباحية . - تعال لي يا ننو .. تعال لي .. دمار لكن فنلتك الحمراء دي .. ما عزاب عديل كـده ... مبـــــالغه - - إنته تاني رجعته لي عطالتك واللستك ده يا ..كريه شهر كامل مرتاحين منك .. - هوي يا " مظعمطه " إنتى.. حسع كان طلعته في اضانك بحصل شعرك ؟؟ !! أنتي ما تعرسي ركس ده ..مالو ما حلاتوووو ) إخلاص "قلاصه" مرت بفرنكش عند مشوارها الصباحي للمكتب. - يا أحمد ياخ ما ممكن ..نحنا ما أتفقنا ياخ .. فرنكش لاحظ بخبرته في متابعة عباس ..لاحظ " حرفنت " عباس في الزوغان وتحاشي مقابلت ود القوس ..في أي اتجاه خوفا من صرخته ... عباس ..يحب الحياة كثيرا ..ويستمتع بأناقته.. - تعرف يا منقه .. حقك راح .. قالوا " لطفي " الوجيه جاتو جلطه صحوهو من النوم لقوهو اتلحس .. وود القوس الليلة من الصباح شايفو بتحاوم قدام بيتكم .." اشار فرنكش إلي حيث لطفي الوجيه في الصورة الفوتوغرافية التي تجمعه هو وعباس وبعض الأصدقاء لطفي آخر من توفي في الشلة ..عباس هو الوحيد علي قيد الحياة .. - سجمي ..سجمي يــــا حليلك يا عباس ..شايفه ود القوس من قبيل بتحاوم بي شارعكم .. ( سكرة . مؤكده حديث فرنكش بعد أن قزفها " بغمزة " من عينه اليسرى متفق عليها ) - يا الله يا فرنكش .. مالك داير تلعب بي مشاعرنا ... والله دي كارثة . عباس ريكس يختفي ثلاتة أيام يصارع فيها الحمي .. . عندما قفز فرنكش ..لم يكن في استقباله كشو كالعادة ، مسجل ماثيو تخلي عن أنغامه .. بابو العجلاتي .. أغلق ورشته .. كانت قد مرت تلاته أيام .. الحلة اليوم استيقظت علي صرخة ود القوس عند الساعات الأولي من الصباح .. كثيرين لاحظوا ود القوس في اتجاهه نحو الجهة الغربية .. بلة الجزار كان يرسل انينه في آلم ..مريومة الهوساوية .. نامت نومتها الظهرية . وفشلت أن تعود منها .. حملوها ..علي الأكتاف ..كشو توسطهم ود القوس كان في انتظارهم ..في انتظار صرخته ...حتى يعود إلي الحلة ..عندما حملوها هتفوا بها ... لا إله إلا الله ... ما في الملك إلا الله .. لا إله إلا الله .. ما في الملك إلا الله