زمان حكوا لينا عن ود عمي قالوا لمن جاء الخواجة يعمل معاينات معاهم في فندق هيلتون كانت إجابات ودعمي O.K - O.K - O.K عندي إتنين من أولاد أهلي النوع القرو الإنجليزي القديم داك ويطقطقوهو زي ما الله خلقو أها يوم جاهم خواجة زميلهم في الشغل وهم كانو ساكنين في الفتيحاب وأنا قاعد معاهم وكان عندي مشوار لغاية بانت قالوا لي خلاص أنتظر أمشي مع الخواجة دا أها ركبت معاهو ومشينا بس بعد أديناهم ضهرنا قعدوا يقولوا البدري لمن يصل بانت حايقول للخواجة Put me here أنا أعلم كتير من السودانين حتى العارفين لهذه اللغة لا يستخدمونها ولو حصل إتكلمت بالإنجليزي الناس يقولوا ياخي دا فقعنا بي إنجليزيهو القاطعو من راسو دا هسع الشايفو انا السودانين تنزل ليك بوست بالإنجليزي يردوا ليك وبي إنجليزي أسمح منو أو يردوهو لك وهسع أنا شغال مع خواجات والله أتونس معاهم ونحكي نكاة وفي أحيان كتيرة إنسى إنو ديل خواجات وكأنهم من حلتنا وهسع بتجيني رسائل من أخوة سودانيين كمبيوتراتهم ما فيها عربي والله تلقاهم راصيين ليك الإنجليزي دا رص فأنا أتساءل هل السودانيين ديل بعرفوا إنجليزي من كانو في السودان لكن ما بحبوا يتعاملوا بيهو ولا إتعلموهو في الغربة والشتات على حسب نظرية بلد ما بلدك طقطق فيهو الإنجليزي عريان؟؟؟
08-27-2003, 05:09 AM
bayan bayan
تاريخ التسجيل: 06-13-2003
مجموع المشاركات: 15417
لووووووووووووووووووووووول يا ابنكنبة تذكر الخواجية الكانت بتدرسنا انجليزى فى سنة تانية وانت كنت السبب انها تجى فصلنا سكرانة عشان تستحملك قصة مجهولة البطل
كان عندنا مدرسة انجليزية وكان من تدخل الفصل فى واحد كدا( غير معروف ) بيقول عايز يمشى ال W.C المهم مرة كدا جاب ليها العصبى قامت فرشت كل الشتائم العارفاها وقالت ليهفى الاخير Oh plzz grow Up المهم صاحبنا دا رجع قعد فى حتتو والخواجية مشت اشتكتو جا المسجل قاليهو يا فلان ياخى خفو عليها المرة دى والله تمشى تانى ما بنلقى ليكم واحدة قام صاحبنا قال للمسجل يا اخى دى قالوا لى ما خلت لى صفحة اتكى عليها المسجل بخلعة قاليهو هو انت طلعتا من الفصل؟!! قام صاحبنا المجهول قاليهو لا يا استاذ قاااعد ديل الناس الفهموها
08-27-2003, 11:46 AM
SAdo7 SAdo7
تاريخ التسجيل: 01-06-2003
مجموع المشاركات: 844
ود شنا سلامات يا زول يا لذيذ والله تعرف مرات زى مابقلوا المصريين المعايش جباره يعنى فى ناس الغه الانجليزيه دى فى المدراس كانو بكرهوها لكن لمان الظروف حكمت اضطروا اجيدو اللغه دى وكمان فى ناس بسبب المعايش جودو لغاة اصعب من الانجليزى رغم انو زمان كان زول سفتى فايف فى اللغه الانجليزيه والمعايش جباره لك كل الود
08-27-2003, 12:03 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22492
بدر الدين السلاااااااام ألوف إنت كويس الناس ديل بيراسلوك بالكمبيوتر. أنا معاى ناس دفعتي و قرينا سوا ، لما يتكلموا معاى جملة فيها عشرة كلمات ، تلقر سبعة منهن إنجليزى و الباقي لغتنا الجميلة. حسب نظرية بلد ما بلدك طقطق فيهو الإنجليزي عريان و في واحدين بيدوهو سوط و هو ..... تسلم أيها الشفيف
08-27-2003, 06:40 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
هي بالله كانت سكرانة؟؟؟ والله أنا قايل الخواجات أصلهن ريحتهم كدا والله عدم الشم مصيبة وبعدين عدم الفهم ما تقصير مننا إنما تقصير في فستانها اللابساهو هاهاهاهاهاهاهاهاها
الغالي صادوح سلااااااااااام وإحترام ياخي أنا رايح لي زول في أمريكا إسمو صداح ما لاقاك؟؟؟ والله فعلاً يا صدوح المعايش جبارة وأنا هسع قربت أتعلم كلام البدو لكن ما عارف اقشر بيهو وين؟؟؟
الأستاذ أبوجهينة سلااااااااااام مليارات طبعاً في ناس بدخلوا كلمات إنجليزية بين المفردات العربية ولكن بدون قصد أها زي ديل أنا بتكيف أتونس معاهم عشان القط لي منهم كلمة كلمتين أزيد بيهن (الفوكابلري) بتاعتي عليك الله رايك شنو في الفوكابلري دي ما بتملأ العين؟؟؟ لكن كمان في ناس الواحد تلقاهو عشان يدخل ليهو كلمة إنجليزية يلف ليها بالشنقيطي عديل لغاية ما يلقى ليها محل تسلم إنت وعيالك وأم عيالك
الف حمداً لله على سلامتك وسلامة العيال وأنتم عائدين من بلد الدينار بلد الخير والطيبة وهنيئاً لك برؤية صداح والله إني أشتاقه وياريت يكون أداك عنوان ولاّ رقم تلفون وكان رجعنا لي موضوع البوست طبعاً إنت وصدام عفواً صداح بتكونوا الإنجليزي دا جضمتوهو عديييييييييييل كدا عليك يا أنور (تيبار) بالإنجليزي شنو؟؟؟ الجزيرة عايزة جون قرنق؟؟؟ بري يا يمة إتحوينا النبي
الأخ الرائع بدر الدين شنا وأن أنبش كعهدي في دهاليز المنتدى وقفت عند هذا المقال مما لاشك فيه أننا كسودانيين شعب أقرب اللغات الثانية له هي لغة المستعمر الإنجليزي ، وكانت إلى عهد قريب لغة التعليم وهي على ما أعتقد ما أنفكت لغة الدولة بعد العربية. ربما يكون مستوى اللغة عندنا أصبح مثل مستوى كرة القدم لا قواعد ولا نطق ولا كتابة سليمة حتى أى أخبطها وتوكل. والتجني على أى لغة يكون عادة في الترجمة الحرفية للكلمة أو الجملة دون النظر إلى المعني فالذي جعلك تقول للخواجه put me here وأنت تعني دليني هنا يمكن أن يجعلك تنطق أم رقيقة Mother of thin أو House of Money لبيت المال وتكون في ورطة ما بعدها إذا ترجمت إسم مثل ست البنات Master of Ladies أو حمد النيل Thanks Nile
10-05-2003, 06:18 PM
توما توما
تاريخ التسجيل: 08-07-2003
مجموع المشاركات: 1466
لوووول لوووولين علي والله يا بدر اشتقنالك علي قولم و thanks للملا عمر علي الدفره الظريفه دي والترجمه الممتازه وبما انو الليله كان غدانا chicken tears ومعانا ود عما لينا استفاد ايمااستفاده من البوست لانو في الانجليزي my mother عديييييل ضحكتني يا الملاعمر ويجيبك بالسلامه يا شنا ياود اخوي توما
الاخ/ بدرالين فى بدايات التسعينيات كنت ادرس اللغة الانجليزية فى احدى الجامعات السودانية و كان من ضمن الاسئلةالتى و ضعتها فى مادة الترجمة الانجليزية ترجم الاتى : اكد الفريق عمر حسن البشير ان العلاقات ..... الخ احد الطلبة ترجمها team corner omer hassan elbasheer
10-05-2003, 08:01 PM
falcon falcon
تاريخ التسجيل: 03-12-2002
مجموع المشاركات: 282
اخي بدر اظنك سمعت بأنجليزي الموظفين و دا كان زمن الرفيرا و كازينو حماد و تلقي الجماعة بعد مرور ساعة من الجلسة حتي الطلبات بالانجليزي الوالدة الله يديها العافية كانت تردد بعض المفردات الانجليزية التي كانت تسمعها من الاخوان و الاخوات ايام الدراسة تسألها يا حاجة وين فلانة تقول ليك و الله قالت مدبرسة و جاية من لتشر تقصد ليكشر يديك العافية...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بدرالدين شنا
bayan
)
SAdo7
ابو جهينة
almulaomar
توما
abuarafa
falcon
فيس بوك
تويتر
انستقرام
يوتيوب
بنتيريست