|
|
 صراع المرأة واللون.. أو السرطان الأبيض
|
كان يحكي لصديقه محرجاً: تصدق دخلت لي في موقف محرج جداً مع ابتهاج.. طبعا امس مشيت عرس اخوها.. اها دخلت الخيمة وبقيت اتلفت وين ابتهاج؟ تجيني واحدة وهاك يا سلام عرفة.. ياربي دي منو؟ انقر بعد دقيقة ما القاها ليك دي ابتهاج ذاتها.. اتحرجت وما عرفت اعتذر ليها كيف ؟ لكن يا أخي اتغيرت في ظرف 24 ساعة.. وجهها الوان عجيبة «ماتعرفها الا بي صورة اشعة» «ويضحكان»
ما هو الانموذج الذي تقيس عليه المرأة جمالها...دعنا نحصر حديثنا في تفاصيل اكثر .. ما هو اللون المثالي للمرأة الجميلة؟
سارة عبد اللطيف ـ طالبة جامعة السودان قالت انها لا تضع اي لون مكياج علي وجهها.. لماذا؟ يعني ما شايفة في داعي قلت : جميل يعني انت راضية ومبسوطة بهذا اللون؟قالت ممكن تقول كده وبعدين نحنا هسه في جو اكاديمي واهتمامنا كله متجه نحو الدراسة والامتحانات...
اذن سادتي عندما تتفرغ سارة وقريناتها من هموم الدراسة والتحصيل سيكون لديهن اهتمام آخر بجمالهن. وعندها سيبدأ تحصيل اهل البوتيكات ومراكز التجميل.
عوض طالب الكمبيوتر قال بسخرية، انه حتي الآن لا يستطيع تحديد ألوان وجه زميلاته. وواصل عشان كده بنقول فلانة لون يديها اسمر ودي لون يديها اسود وهكذا، لانهن يشتغلن معانا كمبيوتر وعلى الـ Key Board وضحك قائلا: لكن واحدات يلبسن جوارب في الايادي ديل بجهجهننا عديل كده .. تصدق لون الوش بقي يعملوا ليه مكياج زي لون اللبسة والجزمة.. وده انا بعتبرو تشويه..
فاصل ونعود..
يغني المغني :
اسمر جميل ساحرني لونو ـ الكاشف
في اللون الاسمر ذوبت شبابي ـ وردي
اسمر جميل فتان ـ محمد الامين
ولكن لماذا البحث عن لون بديل وتحديدا لون ابيض؟
نهلة فضل متخصصة في التجميل ومعالجة عيوب البشرة: طبعا انا مندهشة جدا لكثير من الحالات البتجيني دايره تغير لونها.. هي طبعا ما بقولوا تغيير لون لكن بقولوا تفتيح بشرة .. وهسه انا ماسكة لي عروس بعالجها من آثار كريمات حرق وشها، ده كله عشان دايرة تبقى بيضاء..
والله احتمال يكون ده الاعلام السبب في الموضة دي، يعني هسه كل بطلات المسلسلات بنات لونن ابيض حتي مذيعاتنا الما بيضاء فيهن بتعمل بدرة عشان تبدو بيضاء.
ü اذكر عندما حاورت د. حسين سلمان محمد اختصاصي الجلدية وتحدث لنا عن درجة حساسية الجلد، تطرقنا لهذه الكريمات وتأثيرها، فاذا بنا امام معلومات خطيرة وهي ان عددا من الكريمات التي تستعمل الآن لتبييض البشرة وتفتيح اللون ما هي الا علاجات لامراض يفترض تعاطيها بمقادير محددة يقررها الطبيب الاختصاصي وهي كلها لعلاج الحروق.
ü من جملة عدد من فتيات الجامعات قابلتهن اعترفت واحدة فقط باستخدام كريم للتجميل «تحفظت هي علي ذكر اسمه» بحجة انها تستخدمه لازالة نقط سوداء ظهرت في وجهها من آثار حب الشباب.
«ملحوظة: وجهها متموج ـ او متعدد الالوان» توترت ونحن نحاورها ورفعت دفتر على وجهها عدة مرات اثناء دقائق حوارنا معها».
فاصل ونعود:
يغني المغني : طبيعي خلقه ربك ما دايرة اي زيادة
لابدرة لا احمر ورد الخدود محمر
الوان محاسنك زي ما هي
السؤال لو نظرت حولك وقست ما ورد في هذا المقطع من الاغنية الشهيرة على وجوه من حولك من النساء هل ستجد من تستحقه؟
üاعتقد ان النسبة ستكون ضيئلة جدا. والدليل ان نهلة قالت قد جاءتها فتاة متزوجة وهي بيضاء الوجه تماما تبحث عن مزيد من البياض!!
قال الشاعر:
وان سواد العين لا شك نورها
وان بياض العين لا شئ فاعلم
الطريق الى السرطان:
لو توقفت امام فترينة في اي شارع في سوق ما وسألت البائع عن موفيت او لوكسيد او ريو سرعان ما تمتد يده لاقرب رف ويناولك اياه بعد دفع 5000 جنيه، فهأنت تشتري السرطان.
الطبيب الصيدلي اسامة قال لي انه ابعد كل الكريمات او التي تظنها البنات كريمات من فترينة صيدليته ولا يصرفها من الرفوف الا بالروشتة..
سألت نهلة كيف لها تغيير الوان النساء وقد خلق الله اختلاف الالوان والالسن بقصد وحكمة؟ نفت بشدة فعل ذلك. واكدت انها تتعامل مع خلطات طبيعية «بل تصدرها للخليج الآن» وهي بلا اضرار بل عكس ذلك تماما لها فوائدها. وكل ما هنالك هو ازالة اية خلايا ميتة مما يؤدي الى اشراق اللون الطبيعي ولا تعطي الناس لوناً آخر.قلت لمنتصر.. بائع عطور وكريمات وسط السوق العربي ما قاله لي اسامة الصيدلي: ان هذه الكريمات قد تعطي لوناً جميلاً في البداية ثم يتحول الي الوان اخري غير مطلوبة. ولامتصاص الجسم لها تؤدي لاحقا الي اضرار قد تصل في بعض الاحيان الى السرطان. صمت منتصر لحظات ثم عاد ترتيب الكريمات بعد ان اخذها من يدي وقال:
يعني هن ما عارفات؟
سالته: منو؟
البنات البجن يشترن مننا. والله كلهن بنات جامعة واحدة بشيلن في يدهن اللبسة بتاعة الطب.
هذه جولة اولى في عالم المرأة واللون.. وتلاحظون اننا لم نتحدث عن اللون السياسي لدى المرأة. ومعظمهن مشغولات بألوان الوجه عن كل الوان الحياة الاخرى، ولعلنا سنواصل.
|
|
 
|
|
|
|
|
|
|
 Re: صراع المرأة واللون.. أو السرطان الأبيض (Re: abuarafa)
|
ابو عرفة
تحياتى وشكرا على هذا الموضوع
على ايامنا لا تضع المكياج الا المتزوجة
وكان عبارة عن الكحل فقط
والحمدلله ان مرضت الكريمات ادركتنا ونحن فى نهاية سنوات الطلب
وفى مدينتى ينظر شذرا للبنات الممكياجات
هذا على ايامنا
ولذلك ارتبط تلوين الوجه عندى
بنوعية معينة من النساء
والان اعيش صراع اجيال حقيقى مع بناتى
الاتى يردن ان يعشن عصرهن
وانا مازلت انظر للمكياج شذرا
وعندما زيارتى لاحد الجامعات فى الخرطوم شفتا المكياج مع لون الجزمة او لون الايشارب
وبعينى دى شفتا احمر الشفايف بقى ازرق شفايف
و ارمد شفايف و ابيض شفايف
واذكر انه فى عهدنا ظهرت ذلك الشئ الذى يسمى لا بلو
وهو يعطى الشفايف شكلا مذيتا
حتى سأل الاستاذ اللديح : الله يا بنات انتوا كلكم ماكلين زلابية
الصباح
وفى الاجيال القبلنا كان هناك دق الشلوفة
ولا يحدث الا بعد الزواج
والمشكلة فى الناس العايزة تبقى مايكل جاكسون دى
| |
|
|
|
|
|
|
|
|
|
Re: صراع المرأة واللون.. أو السرطان الأبيض (Re: abuarafa)
|
الاستاذة/ بيان
شكرا لهذه السياحة المعاصرة فى فنون الميك اب عبر الاجيال
واصدقينى القول قبل سنة اتيت عائدا الى المنزل و لقيت بتين فى حوش النسوان و سلمت عليهم بخجل و ذهبت للوالدة و عندما خرجت قالت لى (سجمى يا ولدى ديل اخواتك كمان ما عرفتهم ولا الضحب ليك شنو)
و دقى يا مزيكا
| |
|
|
|
|
|
|
|
|
 Re: صراع المرأة واللون.. أو السرطان الأبيض (Re: abuarafa)
|
يا ابو عرفه فعلا الموضوع جمميل لكن رايك شنو دايرن نسمع راى جميلات البورد وبعدين بنرد شايف الجندرية رأس السوط وصلها
وبمناسبة اللون بقول ليك نكته للراحل المقيم الفنان ابو دؤود عن اللون وعزرا بس الهدف نكته وخارج الموضوع قالوا ابو دؤود يوم راكب عربية الاديب الراحل على لمك ولمن وصلو سوق الموردة وقفوا العربية لانو فى خرفان قاطعة الشارع امامم وفيهم خروف بنى اللون عاين ليه ابو دؤاود وقال خروف كموش
| |
|
|
|
|
|
|
| |
abuarafa
bayan
الجندرية
بلدى يا حبوب
فيس بوك
تويتر
انستقرام
يوتيوب
بنتيريست