|
|
 أم عطية اللانمطية .. عروس الألفية
|
سمحة العافية.
إبتدرتني أم عطية بهذه الجملة الجميلة المعبرة ، و وجهها بالفعل يشرق بنور العافية. قابلتها في مناسبة حفل صغير بمناسبة نجاح أحد أبناءنا المتفوقين و إستعداده للسفر للسودان للإلتحاق بالجامعة. و كعادتها تتوسط الشابات فقط ، لا تقبل أبدا الجلوس إلى من هم في سنها.
قلت لها ممازحا و ناكشا قريحتها : النسوان قالن إنك ما بتحبي تقعدي معاهم.
قالت و هي تتاوق حتى لا يسمعنها : ديل غير الفقر ما عندهن ، بالله تقعد معاهن إن شاء الله يوم كامل ، ما عندهن غير النقة ، طول اليوم نقنقنقنق. ما بتستفيد منهن شي تب. علا الفالحات ديل ، النصيحة كدى بستفيد منهن و من سعالاتن الكتيرة.
طيب يا أم عطية ، النسوان كمان أقعدي معاهن شوية.
قالت و هي تقطب ما بين حاجبيها : أنا البشتكي لى من وجع راسو ، أنا برضو بجيني زيو وجع راس ، و ديل ما عندهن غير الشكية من المرض يا كافي البلا. دي رطوبة في الركب، و ديك خمة نفس ، و ديك ما بتنوم الليل. أنا مالي و مال العيادة دي. . لاكين شوف الوشوش السمحة دي ، تذكرني بي شبابي الراح ، و يفتحن النفس ما شاء الله.
تقول هذا و هي تجضم هذه و تضرب تلك على ظهرها.
تمازحها إحدى الشابات : أم عطية صحي في راجل بيحبك ، مشى معاك السودان و رجع معاك الحجل بالرجل ؟
فإستشاطت أم عطية غضبا و قالت : حباهو برص إن شاء الله. و الله يا بتي أظن هو ذاتو بينقل الملاريا العامل زى إيد الفندق داك. أيام مرضي بالله واقف لي زى إبرة الدرب في الإيد ، كلما أشوفو الحمى تزيد على ، و لما ينضم ، وحاتكن كأنو البعوض قاعد ينوني فوق راسي.
تقول أخرى مستفزة إياها : لاكين قالوا أصلو ما شال إيدو من جبهتك من الخرطوم لغاية الرياض ، قالوا كان خايف عليك من الحمى.
قالت و هي تعدل من جلستها : الحمى يا يابا اليجسوها بالمقص ، بالله إيدو زى حجر الطاحونة ، تقيلة جنس تقل . هو الجاب لى وجع الراس الكعب داك.
و تتعالى ضحكات الفتيات ، فتناوشها أخرى : لاكين يا أم عطية إنت وكت ما دايراهو يقرب منك ، ليه ما قلت ليهو يزح من جنبك بعيد؟
فقالت أم عطية بلهجة مؤكدة : يا بتي كواريكي من شدة وجع الراس خلت الركاب القاعدين جنبي يزحوا من جنبي لي آخر الطيارة. لاكين بالله الغتيت دة لاصق فيني زى القراصة اللاصقة في قعر الدوكة الكعبة.
يقول إبنها كالعادة و هو يضحك : عندما أتينا بها من الخرطوم بعد مرضها بالملاريا ، أخذناها صباح اليوم التالي للمستشفى ، و في الطريق إستوقفتنا الشرطة في أكثر من محل للتفتيش كما هو الحاصل هذه الأيام ، فتضايقت من كثرة الوقوف و هي لا تزال تعاني من آثار الحمى و الصداع ، و تستعجلني متنرفزة للوصول للمستشفى، و عند إحدى نقاط التفتيش ، أخرجت رأسها من شباك العربية و نادت على العسكري السعودي بأعلى صوتها:
هوى يا جنا ، البلد الحاصل فيها شنو ؟ لعل ما عندكم إنقلاب ؟
ثم أدخلت رأسها و قالت لإبنها : عطية ، الظاهر في إنقلاب ، الحمد لله يا ولدي ، كفيلك السجمان داك أريتو يموت في نص الجوطة دي، إن شاء الله تعفصو دبابة ولا يهرسو قندران الجيش.
ثم تخرج رأسها مرة أخرى و تخاطب العسكري الواقف بين مندهش و حائر :
إنقلابكم دة الفي نصة نهار دة بذكرني إنقلاب الشعوعيين علي نميري. أنتو تتجازوا يايابا ، أي حاجة تقلدونا فيها.
فقال العسكري : ويش قلت يا حجية ؟ إنت ويش تبغين ؟
فقالت و كأنها لم تسمع سؤاله : و الله إنقلابكم دة ما ينجح بي جنس تفتيشكم دة ، ظباطنا هناك ظباط السرور ، إنقلاباتم منجضة و مستفة يا يمة. بالله إنتو هيبة العساكر ما عندكم ، بالله هسع بي كروشكم الماكنة دي بتقدروا تسكوا ليكم زول كان قام جاري؟ أنا جاية من السودان و عندي ملاريا و حمى ، كلم العساكر ديل يزحوا لينا عشان نصل بي سرعة يا عشاى قبال ما تسووا حظر التجول.
يقول عطية ، و هو يغالب ضحكه ،: تملكني خوف و ذعر شديدين ، فالوقت لا يسمح بهذا حتى على سبيل المزاح ، طلبت منها السكوت و أنا أتصبب عرقا و متوقعا أن يطلبوا منا النزول من السيارة في أي لحظة.، و لكنها واصلت كلامها مع العسكري بطريقة يبدو أن آثار الحمى ما زالت تتحكم فيها، و لحسن الحظ لم يفهم منها العسكري كلمة واحدة و هو ينظر إليها بإستغراب .
قال لي العسكري : ويش فيها الحجية ؟
معليش يا طويل العمر، أصل الوالدة تعبانة شوية و موديها الدكتور.
قلت لعطية : أظنك طول اليوم تضحك من عمايل الوالدة في البيت و برة البيت.
قال : الغريبة لما تكون معي لا أستطيع الضحك ، فأنا أراقبها و هي تتصرف أحيانا بحكمة و أحيانا ببراءة و أحيانا أخرى بطيش شباب ، و لكن عندما أقابلك و أحكي لك ، أضحك و أنا أسترجع حكاويها.
زولنا الذي ذهب معها للسودان و رجع معها بالصدفة ، تسميه أم عطية ( نص متر ) و أحيانا يد الفندق ،. فاجأ الجميع بأن حضر و معه كمية من شوكولاتة إسنكرز التي تعشقها أم عطية و معها علبة حلاوة ماكنتوش ضخمة و كمية من الآيس كريم.
يقول إبنها و هو يهتز من الضحك : ما أن دخل الرجل و سلم عليها حتى طنطنت أمي و قالت من بين أسنانها : سيد الملاريا جانا ، يا سيد الحسن أبو جلابية .
و ما أن علمت أنه أتى بأشياء محببة إليها ، حتى أخذتها بين يديها و هرولت إليه و هو بالصالون ، و قالت وسط دهشتي و دهشة زوجتي :
إنت يا راجل ماتقول لي إنت داير شنو ؟ بس بالأول قول لي ، منو القال ليك أنا بحب جنس الحاجات دي ؟ و الله كان ما قلت لي ما أخليك.
يقول عطية : حاولت تهدئتها و لكنها كانت في حالة من الهياج جعلتني ألوذ بالصمت.
فقال الرجل و هو يغوص في الكرسي :
إنتي بتحبي الحاجات ، و أنا عارف و الناس كلها عارفة.
قالت أم عطية و هي تضع حاجياته أمامه : تصدق و تآمن بالله ، أنا من الليلة بغير الصنف. و زول يعرف تاني مافي. خسوسا إنت.
و قالت و هي تخرج كالعاصفة : حركات عجايز آخر الزمن.
|
|
 
|
|
|
|
|
|
|
 Re: أم عطية اللانمطية .. عروس الألفية (Re: ابو جهينة)
|
استاذنا الرائع ابوجهينه
سلام محبة وتقدير
طبعاً ام عطيه مواكبه لموضة حريمنا
الواحده تموت وتدفن مشاعره
وتحاول تظهر ليك وش القباحه لراجله
بس النصيحه ليك يا الله
ام عطيه دي
راجله بيخش الجنه ببابه
قلت قالت حركات عجايز اخر زمن؟
ههههههههههههههههاي يكه
والله ام عطيه دي الدهر زاتو بعد دا بيتبرأ منها مدام اتبرأت منو
سلام يا شفيف
| |
|
|
|
|
|
|
|
|
|
Re: أم عطية اللانمطية .. عروس الألفية (Re: maia)
|
مايا : التحية و التقدير و كل الإحترام
كنت أتمنى أن نكون قادرين على إخراج فيلم لها ، فقلمي أعجز من نقل شخصيتها كما هي.
و الرجل يبدو أنه ناوي ، و لكن قرنا الإستشعار عندها أكدا لها بأنه طمعان في حاجات تانية على حد فهمها ، و بيني و بينك ، لو الرجل فعلا ناوي ، يكون بالغ ، لأنها في سن لا تستطيع أن تعطيه شيئا ، فهي في سن تريد أن ترتاح بعد طول عناء ، و ما طرطشة كلامها إلا تعبير عن ما نفسها من حزن قديم و حياة لا نفهم كيف كانت تعيشها.
تسلمي مايا.
| |
|
|
|
|
|
|
| |
ابو جهينة
سجيمان
فيس بوك
تويتر
انستقرام
يوتيوب
بنتيريست