أيـن تـقـضـي شـهـر عـسـلـك هـذا الـمـسـاء

سلام يا حالمين

زمان قريت كتاب فرنسي مترجم اسمه فن الحياه ، مقسوم لفصول مثل فن الحب ، فن الشيخوخه ، فن الجمال ، فن الزعامه ، وحاجات كتيره يدعو لاتقانها في الحياة كفنون ، باستثناء فن الطبخ المهم الكتاب طلعت منه بعبرة واحده ، أني لا أنتظر الفرص أو الظروف ، بل أصنعها وبعد أن أصنعها أستغلها أو أستخدمها !! دا الطلعت بيهو
ولازم نطبق ، وللا خسارة وكتي القضيتو فيك

دلوقتي تلاقي الما اتزوجو لسه بخططو للعرس وشهر العسل والبعد دا
طيب تخطيط العرس عبارة عن لملمة قروش وشراء حاجات عشان كدا آوت أوف سبجكت
فرضا ما عندنا قروش ، ما نعرس يعني ؟ وللا ما نعيش ؟؟ ربنا ما قال الفقراء والمساكين يغنو ليهم : مغص مغص يالعزابه تموتو مغص يالعزابه

طيب نبدأ بالمدعو شهرالعسل ، ومحدد ليهو شهر بس جوا عيننا ، عشان القبلنا قالو كدا !! طيب رايكم شنو نحددو احنا ونسميهو زي ما دايرين ونخللي البعدنا يتبعونا ؟ وللا لازم نكون امعه حتى في رغباتنا الخاصه

وسبحان الله ، نحن بنتبع تقاليد ناس عاشوا زمان في ظروف مغايره تماما ونفسيات مختلفة وبيئات غريبه علينا شويه
يبقى دا زمننا نحن ، والبعدنا يتبعنا ، والماعاجبو يحلق حاجبو
بس البنمص والبتنمص ملعونون ، وأرمو الملقاط على جنبه
...

طيب
شهر التابه واليابه دا ، اقترحت على زولتي أنو نلغيهو ، عشان نحس دايما أنو نحن فاقدين حاجه حلوه ولازم نعملها ، فالشعور يتمدد على الأيام ويتوزع ، مجرد فلسفة حاولت أقنعها بيها عشان ما أحصر العسل في شهر واحد ! وعينك ما تشوف الا النور ، وما في داعي أكتب السمعتو لكن مختصرو أني غيرت رايي في سواني وقلت ليها حاضر ، ومالو ؟
خطوه نمره اتنين اقترحت نزور كينيا ، وبرضو سمعت العجب العجاب : ليه أنا بايره وللا عايره ، وعايز يقولو علي شنو ، وكينيا دي زاااتا شنو الأنا بزورا ، انتي مستهين بي كدا مالك بربربربربربر ، آخرتو قلت ليها حاضر ، ومالو !؟

- أنا ما عارف حأمسك جملة حاضر ومالو دي لمتين -
بس اتذكرت أبوي كان بقول لي : انت البت دي ممشياك زي ما دايرا ، وين كلمتك وشخصيتك الفي الشغل بربربربر قربت أقول ليهو حاضر ومالو ؟ للاكين كلامو غاظني ورجيت فيهو فرصه قبيل

كنا بنتناقش في موضوع أنو أمي جنها و جن سخانة السودان مع أنو رطوبة الخليج تعجبكم وتلينكم بدون كريمات ، وجنها وجن التعليقات الكتيره في السودان والسحر والحركات والأمور دي ، فماخدا موقف من السودان ليها كم سنه ما تمشي الا في المناسبات للعزاء ، قلت ليهو أسمع يا أبوي : الشفع ديل لازم نوديهم البلد كل سنه عشان نربطهم جوا عينهم بالبلد وعشان يكون عندهم كيان ، قال لي طبعا ودا موضوع مهم جدا ، قلت ليهو خلاس ، هسع بجو من البلد الهم زايرينو وتقول ليهم ماشين السودان ، قال لي لاكين أمك ما بتمشي ، قلت ليهو أسمع هنا تقول ليها نحن ماشين الاسبوع الجاي ومعانا الأولاد وتحجز وانتهى الأمر ، قال لي ما حتمشي ، رديت عليه بذهول مصطنع : معقول ما تسمع كلام زوجها ؟ وين طاعة المرأة لزوجها ؟
هنا رديت صاع بت الأحفاد ، وهو ما قصر رد علي رد أحتفظ بيهو للأبد
هيهيهي
لكن رد علي رد أشبه ب حاضر ، ومالو !؟ بس بطريقة حننتني يا ناسي

طيب ، حنقفل اضنيننا بطين وعجين وكركار و ودك ، للحيقولو شهر عسل شنو بعد سنة أولى ؟ خلليكم واقعيين ! طيب خللينا واقعيين من البنشوفو قدامنا
...

طيب ، حنقفل اضنيننا بطين وعجين وكركار و ودك ، للحيقولو شهر عسل شنو بعد سنة أولى ؟ خلليكم واقعيين ! طيب خللينا واقعيين من البنشوفو قدامنا

بنشوف في دول الخليج مثلا عوايل بما فيها سودانيه كمان ، بتكون العايله فيها دزعطاشر شافع والأم والأب قاعدين في الجنينه أو في شاطي البحر ياكلو يشربو يتونسو يكوركو يضحكو ومستمتعين
ومن عدد الأولاد وعدد الشيب في راس الأب والأم باين عليهم متزوجين قبل عشرين سنه ، ديل ما واقعيين ؟

بنشوف في بريطانيا مثلا راجل ومرتو ماشين بالعكاكيز ونص خطوه نص خطوه ، وظهرهم محني كأنهم راكعين ، ولون الشعر زي التلج وحلاوه قطن البيضا
وبعد دا بتلاقيهم ماسكين ايدين بعض ، وواضح جدا أعمارهم فاتت السبعين زمااااااان ، ديل ما واقعيين ؟

شفت قدام عيني راجل ببوس مرتو المتزوجه قبل تلاتين سنه قدام أولادهم وبناتهم ، وقام حضنها وهي ما عارفه تطير وين ، دنقرت راسا في الواطه مبتسمه وخجوله تقول عذراء يادوب ماشاء الله عليهم ، ديل ما واقعيين ؟


شفت حبوبتي قبل شهر بتمسح على راس جدي وشعرو وهو قاعد زي الكديسه مستمتع بالمسح وهي كمان ، مافي داعي أورريكم عمرهم

شفت يوم تاني الشهر دا زاااتو جدي بعلق لحبوبتي في موضوع أنو وين يلاقي زيها ، وهي بترد عليو تسلم يا حاج وانته في زيك منو
ديل ما سودانيين زينا ؟ والقبلهم برضو ، والقبل قبلهم


وبنشوف في زمان قديم برضو ، رسولنا أعظم البشر ببوس مرتو وبطلع للجامع للصلاه ، شفتو الشوق البحر ؟
بنشوف رسولنا الكريم بشرب من القربه وللا الكبايه من الحته الشربت منها مرتو ، بعد ما يتأكد أنو شفايفها للمست الحته ديك ، ديل ما كانوا واقعيين وللا شنو ؟
وشفنا الرسول بيأكد لمرتو لما تسألو عن حبو ليها قدر كيف أنو زي العقده الما بتنفك ، وشفناهن بغيرو عليو كيف ، كانو خياليين وللا مستمتعين وفاهمين معنى الحياة الزوجية شنو ؟


طيب ليه نحصر الكلام عن عسل حياتنا في شهر أو سنه ؟ وليه نطمم بطن الناس المتفائلين ، عشان فشلنا نحنا في مواصلة الحب وابرازه للحبيب والحبيبه الأديناهم ترقيه وبقى اسمهم زوج و زوجه

مش قال لينا هن لباس لكم وأنتم لباس لهن ؟
لباس كيف ممكن نفكر ؟
العلاقة بين اللباس والجسد ، وبين الطرف الآخر والنفس

ومش قال لينا : وخلقنا لكم من أنفسكم أزواجا لتسكنوا اليها ؟ كييييف يعني نسكن في حاجه غير بيت الطابوق ؟ ربنا قال السكن والراحة الى الزوج أو الزوجه ، وليس في البيت المفروش المكيف ، وأنا ما حأغالط ربي

مش نبينا قال : الدنيا متاع وخير متاع الدنيا المرأة الصالحة
اتخيلوا أن خير متاع الدنيا دي كلللها الزوجة الصالحه - بس تكون فاهمه معنى الصلاح في الزواج كمان شنو - يعني كلو ، وزي دي ما حتستمتع بيها الا تكون انت برضو زي أبو الدرداء


والنبي قال خيركم خيركم لأهله وأنا خيركم لأهلي
عليك الله المانعك شنو تبقى أخير ما تكون مع مرتك ؟ والأهل مقصود بيهم هنا المرا ، البحميك شنو ، كان في حاجه حامياك يبقى اتكلم معاها قول ليها تعالي يا فلانه أقول ليك حاجه ، والله عايز أبقى ليك أحسن وأخير ما يكون ، بس الحامين وواقف في طريقي أنك كذا و كذا ، فبالله عليك ساعديني عشان نستمتع بالباقي لينا في الدنيا سوا

والنبي قال لينا رفقا بالقوارير
رفقا ياخوي ، صحي هي قد تكون حكايه زفته جدا ولا قاروره ولا حاجه ، وتناقرك وتكسرك وتكسر ليك القوارير زاتها فوق راسك ، وتطير ليك الأحاديث من راسك
بس كدي نجرب وندعو الله أنو يعيننا أنو نعرف نتعامل مع بعض وأنو الأمور تمشي زي الحلاوه ، وتقدر تزبط فرسك وتقوم على أمرها بما يسعدكما


وانتي ما سمعتي النبي قال شنو ؟ قال : ما استفاد المؤمن بعد تقوى
الله خيرا له من زوجة صالحة إن أمرها أطاعته
هسع بيني بينك أكان طعتيهو ، دا معناو أنو شخصيتك اتمرغت في التراب ؟ وأنك حطمت كبرياء أهلك الجيتي منهم ؟ بالله فكينا كدا ولا كدا ، كبرياء شنو ؟ انتي ما عارفه أنك بتقعدي عريانه قدامو يعمل الدايرو وما بتقدري على دا قدام أهلك البتنضمي عنهم ؟ طيب ما تحترمي اللحظات البيناتكم دي ؟ القال عنها النبي : يفضي اليها وتفضي اليه
طيعيو عليك الله ، الله خلق النفسيات حسب الفطره السليمه بالطريقه دي ، أنك تطيعيو مادام ما أمرك بمنكر ، جربي وشوفي النتيجه
برضو أرفعي نخرتك ووريهو أنو انتي ما بتقبلي بالكلام دا وأنك انتي وانتي وانتي ، وشوفي النتيجه
بس بالرواقه ياخواننا

ونسأل الله لكم كل الخير العسل والقشطه


وأختم بعودة الى عنوان الموضوع ، كدي نفكر كيف نختزل شهر العسل في ليلة واحده أو حتى ساعتين تلاته آخر الأسبوع

أحسن من عدمها ، والحيقول نحنا خياليين ، نقول ليو أرجع أقرا الموضوع تاني
يا خيالي يا وهم يا عاجز انته نسمع صوتكم
ورايكم

الأخ حسن الجزولي
لسع شويه ان شاء الله وبصلكم الخبر قبلها طبعا ، بس كلامي موجه لبعض الآخرين الغايظينني والبزيد غيظي الكلام البنسمعو في الصوالين من الرجال ، شكاوي شكاوي طوالي من النسوان ، قمت مرا قلت ليهم أسمعو هنا ، انتو في رايكم النسوان بشكن منكم برضو في مجالسهن وللا لأ ، قاموا بتريقه قالوا أكيييد ! وديل يخللن النقنقه ليه ؟ وديل لازم يشكو و ينقنقن مهما تعمل ، قمت قلت ليهم طيب لو انتو الاتنين بتشكو ، يبقى الغلط في الزواج أساسا ، قاموا كأن على رؤوسهم الطير ، أظن كلو واحد يقول في سرو الشويفع دا مدكن لينا شنو ، ضحكت وقلت ليهم مالكم سكتوا ؟ المشكله في الزواج يعني وهل هو حاجه أحسن نلغيها ؟ وقلت ليهم فيكم العررس عمرو عواحد وعشرين وفيكم من كان عمره أربعين ، وكنت أعرف ذلك عنهم ، فخلليتهم على كدا وأحرجتهم قلت ليهم أمشو أحسن شوفو السبب الحقيقي شنو ، لأنو الزواج حاجه مدحها الله ورسوله وبشجعونا عليها ، وبطلوا النقه في النسوان من وراهن



Hopeless الأخ
انته زول مستهبل ساااكت أنا عارفك بتمهد لشنو ، عرسي لسه ، ونحنا منتظرينك في مدينة ..... لاتمام عرسك خلال شهرين ان شاء الله ! حتجي وللا حتوكلني ؟


بالمناسبه أنا لقيت في صفحه فتحت براها موضوع مختصر عن أفضل عشرة أماكن رومانسيه تزورها ، وكللو زول حسب جيبو ، وعزلت ليك المعقولات منهن ، بس ديل مااختياري أبدا ، الا موريشيوس دي ممكن لأني زرت جزر سيشلز القريبه منها لما كنت ممثل السودان في بطولة شباب أفريقيا للشطرنج ، وقربت أقعد هناك للأبد ، بس الله قادر

Ten Top Romantic Destinations

If your partner’s definition of romance is a night in front of the telly with a plate of chips and a can of lager, frankly – you’re in trouble and you have our deepest sympathies. But don’t despair!

Two weeks in Skegness is not going to be the holiday waiting for you this year; broaden his horizons by persuading him (drag him if you have to!) to take you to any of the ten gorgeous destinations highlighted below. And if that doesn’t work, tell him you’ve booked it anyway!
طبعا النصيحة الأخيره دي بتجيب المشاكل
2. MAURITIUS
Now we’re talking dream destination - now we’re talking paradise! Mauritius is an island country in the Indian Ocean and if you want an idea of what to expect, think sub-tropical forests, coral reefs, mountain ranges, huge waterfalls, white sands and blue seas. Best known for its endless beaches and one of the world's largest coral reefs, scuba diving and big-game fishing are popular activities but for a truly memorable day, charter a private yacht and sunbathe on deck as the crew prepares a mouth-watering, sumptuous meal for you. True romance!

3. ZAKYNTHOS, GREECE
The popular, gorgeous island of Zakynthos (or Zante - as it’s also known) is famous for its golden seashores, crystal clear waters, beautiful pine-covered mountains, orthodox churches, romantic sunsets and picturesque towns. But what Zakynthos also has going for it is a great variety of bars and nightclubs. Most are located in the famous beach resorts and with English being a widely spoken language – how can you resist?

6. BAHAMAS
Let’s face it, when it comes to romance you can’t beat the setting of a Caribbean tropical island; especially The Bahamas - the country of 700 islands. The jewel in the crown is the most visited, Nassau/Paradise Island. But no matter which island you finally settle upon, you’re guaranteed sun, waters ranging from astonishingly clear blues to transparent greens and breathtakingly beautiful white sandy beaches.

10. THE MALDIVES
The Maldives – some 1,200 coral islands - lie Southwest of Sri Lanka in the Indian Ocean and are as stark a contrast as you will find to the hectic pace of concrete cities. This aquamarine paradise is ideal for lovers - that probably explains why so many couples honeymoon here. The powdery white beaches are the perfect spot for a romantic rendezvous and night diving as the sun sets is a fantastic way to see marine life.

بس موضوعي أنو في أي لحظه نحدد أننا دايرين العسل ، نقوم نعملو برانا ، وفي أي زمن دايرينو ، وأي مكان ، انتو عارفين أنو مرات بنستمتع جدا بالرقده في السرير مع أنو السرير صغير مترين في متر بس

وموضوعي أننا ما محتاجين لقروش عشان نقضي شهر العسل
ان كان برا البلد أو جوا البلد ، أو حتى جوا البيت
ونقطتي هي جوا البيت ويمكن حوالينو في المدينه زاتها قول

الله يهنيكم جميعا