|
|
 ماني كبيره بس كرعيني واجعاتني
|
حافله السودانيه هي نموذج مصغر للمجتمع السوداني طبعا ما اقدر اقول بكل شرائحه لانو في فئه من الحناكيش_وقبل ما ينط لي زول نافش ريشو يقول لي ليييييه...انا كنت بنتمى لتلك الفئه التى ترى ركوب المواصلات كدخول بطن الحوت...غير اني الان اصبحت بفضل الله شفته ومحكنه حنك شديد
طبعا المواصلات عالم صغير بدوره مليئه بكل الشرائح العمريه...الاطفال البنات الاولاد الرجال النسوان الحبوبين والحبوبات.....وعلى قدر ما الزول اخلاقو مرات كتيره بتكون في نخرتو وقرفان وزهجان بسبب ومن دون سبب وغالبا لو في سبب بيكون صعوبه الحصول على مقعد في الحافله الذي يكون مرات اصعب من الحصول على مقعد في الجامعات( على فكره وانا صغيره حكايه مقعد في الجامعه دي كلو كلو ما كانت راكبه لي عدلها...كنت بستغرب ليه ناس الجامعات ما ببنو مكان كبير يشيل مقاعد اكبر..او يخلو الزول الما عندو مقعد يجيب كرسي واللا بمبر معاو او يقيف مشمع حتى او يخمس مع صاحبو....اتزكرت الفكره دي لمن احدي الحبوبات المثقفات قالت وهي زعلانه على عدم قبول حفيدتها المسكينه في الكليه الهي دايراها....امشوا قولو ليهم البت دي صرتها مدفونها هناك وكان على المقعد انا بجيب ليها كبه ليها ولصحباتها)
المهم انو الزول لو لقى مقعد الحكايه لاتخلو من الشمس ودايما دايما لمن تجي راكب حافله تلقى الجهه البعيده من الشمس هي المليانه اولا ثم ياتي المساكين المتضطرين لاخدوا المقاعد البرونزيه
وطبعا ما اقدر انسى البتل (البطل) وهو الكمساري بصرتو المشهوره وهو اهم اداه لرفع الكثافه وفي عداء دائم وموضع اتهام سواء كان ظالما ام مظلوما من الناس وخاصه الطلبه اللي بدفعو نصف القيمه حسب القانون.....اتزكر مره كنا مجموعه كبيره مشرورين في الشمس ومافي مواصلات وبعد ادعيه وخراج روح جات احدى الحافلات وما ان ركب سادس زول حتى تحرك السواق وهتف بنا الكمساري كفايه طلبه خلو عندكم انسانيه.....ورغم الموقف الصعب لم نستطع التوقف عن الضحك لمده طويله....سبحان الله الانسانيه بتختلف من زول لزول
غير انك لو يوم قررت انك ما تصر وشك وترخي اضانك وترفع اريلك حتكتشف حاجات كتيره وتكتشف فعلا ثقافه المواصلات وهي علم يجب البدء بتاسيسو بعد كدا
البنات البنات نواره الحافلات نوع من يطلع ليك تنكش تنكش تنكش يقيف ويدي نظره عامه للحافله وعيونو تقول عليكم الله مش قيافه انا عاينولي يا اخوانا مش سكره...
والنوع دا بالزات لا خطر منو لانو عندو احساس داخلي انو احي احي مش حرام الحلاوه دي تركب مواصلات ...بالله الولد الفي المرسيدس داك مش اخير ليو انا من الككو القاعده جمبو....اها ولمن تجي نازله الطقطقه كيف كيف اما بسبب القلافز او يااااااااي.....وحينها يتطوع عشرات الشبان الشهمين للطقطقه بدلها ...لدرجه انو لو في زول سرحان يقول يبشر
اما النسوان يا اخوانا فهم اكتر ركاب المواصلات ظرافه وخاصه حبوباتنا الحلوين.... الونسه انشاء الله تسمع من السواق لكنبه شكرا( وكنبه شكرا للما عارفين دي الكنبه الاخيره لانو لو عندك زول ركب قدام اكيد حيدفع ليك وانت تقول شكرا )
في يوم حبوبتين صحبات اتقابلو في المواصلات طبعا بعد الونسه والسلام العشنا فصولو جميعا...جات واحده تنزل والمشي طبعا يعجبكم اها اها اها قام الكمساري استعجلها قامت صحبتها ديك زعلانه عيال اخر زمن المره قدر امك بدل ما تتكلها حته حته وتشيل ليها حاجاتها المره كبيره.....قامت التانيه النازله بصوت واطي قالت...والله ما ني كبير بس كيرعيني واجعاتني...
ونزلت...واستمرت صاحبتها في النقه والنقه قام الكمساري قال ليها...يا حجه انت سمعتي قالت شنو..قالت ماها كبيره لكن كرعينها واجعاتنها..... قامت حبوبتنا قالت اججججججججي المره المن ما حفروا البحر ما بتختشي....ودخلنا في موال تاني
اها يا رجال نقبل عليكم واللا لا؟
|
|
 
|
|
|
|
|
|
|
 Re: ماني كبيره بس كرعيني واجعاتني (Re: حنين)
|
حـنـيـن ســـلام و إحـترام
ياأختي الرجال ما لاقين فـرصـة علشان إشتكوا النسوان ما مدنهم فرصة إشكن السنة كلها
ذكرتيني بي حكاية الطلبة دي و نص القيمة حكاية البنت اللي راكبة المواصلات و الكمساري
لم جاها دفعت ليهو نص القيمة قال ليها الباقي !!!! قالت ليهو طالبة قال ليها
و الله بتبالغي يا خالة . الطالبة كانت ما شاءالله قدري و قدرك
| |
|
|
|
|
|
|
|
|
|
Re: ماني كبيره بس كرعيني واجعاتني (Re: حنين)
|
العزيز ابو حسين
ما نشكي كان شكينا انتو دايرين تفقعو مرارتنا والكلام ما نتكلمو لوووووول
مره مره كبيره برضو قالت ليو طالبه لكن دي فعلا كانت طالبه والكمساري قال ليها طالبه قدر حالك دا....
طبعا الشكله قامت وانتهت بزعمطه الكمساري ...
| |
|
|
|
|
|
|
|
|
|
Re: ماني كبيره بس كرعيني واجعاتني (Re: حنين)
|
حنين يا فردتي ...
كيفك ؟
موضوعك حــلو و شكلك كاتباهو بي مزاج ألف ..
المواصلات و حسب حكاوي ناس زمان كانت ممتعه .. غير مزدحمه .. و الناس الفيها ظراف و أنيقين .. و مبتسمين .. و الخ
هسعدي لكن .. بقت عباره عن روايات متحركه ..
كيــف ؟
صاحبك طبعا بيصل من الامارات بي جاي .. بعد خمسه دقايق بكون راكب حافله ماشي مكان ما ..
لكن في قعدتي الأخيره في السودان .. لاحظت انو الحافلات بقت روايات متحركه .. يعني أول ما أركب الحافله .. و يكون جنبي في زول أو زوله .. بيفتح أو بتفتح معاي موضوع طوالــي .. كأني الأخصائي النفسي .. و مواضيع عباره عن مآسي متنكره في شكل ونسه ..
مواضيع عن الفلس .. و الحاله الصعبه .. و الحر .. و المشاكل الاقتصاديه و السياسيه .. وووو الخ ..
غايتو في الأول كنت بتعاطف شويه مع الناس .. لكن بعداك اتعلمت أسمع و أصر وشــي و بس ..
بالمناسبه ... أشكرك علي التهنئة جدا .. و أعذريني لو أنا ما رديت .. لكن بقيت بلقي الانترنت بالصدفه ســـاي ..
كثيف ودي ..
مـــودك
| |
|
|
|
|
|
|
|
|
|
Re: ماني كبيره بس كرعيني واجعاتني (Re: ود شاموق)
|
ود شاموق يا فرده ..
قايلني ما متابع و مواكب معاكم ؟
قريت قصايدك الأخيره كلها برغم قصر الوكت المتاح لي في النت ..
و شايف ونستكم الحلوه الفايتاني ..
و المشكله اني عارف نفسي مقصر ..
لكن و الله مافي يدي ..
ما عندي نت تحت تصرفي المباشر ..
يعني لما ألاقي فرصة بقتنصها زي الهمباتي 
لك كل ودي يا عزيزي .. و أوعدك اني ما أطول الشرده حتي لو مشيت انترنت كافيه ..
مــــودك
| |
|
|
|
|
|
|
|
|
|
Re: ماني كبيره بس كرعيني واجعاتني (Re: حنين)
|
يا عزيزي معتز:
انت عارف انو في فئه من الركاب بيكون واحد من اهدافها البحث عن المشاكل وغالبا الفئه دي بتكون من الرجال البيلقو متعه كبيره في اغاظه الكمساري والسواق واحيانا باقي الركاب
وبعدين تعال هنا الملح دا ما قالو حق البنات حتى دا دايرين تسحبو مننا لووووووول
شكرا ليك يا سيدي
موووودك الغالي والله ليك وحشه ولبوستاتك المفقوده فراغ ينتظر المطر…
والله انت مغترب صغيروني نخيض _ لاحض دي بدلا عن قول حنكوش _ عارف مره واحد برلوم شهاده عربيه جديد لنج جا نازل طقطق كده للكمساري وكان قاعد في كرسي النص قام قفل كرسير وقبل لنهايه الحافله ماشي لورا وفجاءه قال ليو واحد سالتك با الله يا ولدي الباب قلبو ورا
يا ود شاموق مشتا قيييييييييين لكن شايفين اخبارك وعارفين اصحابنا الحلوين ديلاك خاتينك الايام دي لوووووووول
الله يخليك
| |
|
|
|
|
|
|
|
|
|
Re: ماني كبيره بس كرعيني واجعاتني (Re: حنين)
|
ما هي ميكانيزم الطقطقه في المواصلات؟
انا عايزه اعرف هل شعر الجميع بذلك الاحساس المضحك اول مره اضطروا للطقطقه اللكمساري عشان يقيف ليهم في المحطه.......
مع علمي التام انو كل عباد الله بيطقطقوا الا انو الحركه دي في البدايه ما كانت واقعه لي نهائي شعرور غريب بالاستهبال يغمرني وانا اضطر لادائها واحيانا كثيره يخذلني اصصبعي الكبيره ويرفض الكلام نظرا لانو الحركه دي كانت عامله لي عقده لمن كنا شفع فقد كنت اخر واحده في الشفع اللي اتعلمت طقطقه الصباع ونفخ اللبانه.....تفتكروا ايه ممكن تكون الطريقه البديله .... الصفقه مثلا...الزعاريد بالنسبه للنسوان حل مثالي لكن الخوف ان يتحول المواصلات لبيت عرس متحرك تجعلنا نستثنى هذه الفكره....
والسك سك سيييييييييك ذلك الصوت المتعارف عليه بين الكمساري والسواق اتخيلو يوم ركبت مع كمسار ي لا يستطيع نطق السين فكان المسكين كلما قال ثك ثك ثييييييييك انفجر ركاب الحافله من الضحك
زي دا لمن يخضع لامتحانالكمسرهمن جديد اي حرف بديل ممكن يستخدمو
| |
|
|
|
|
|
|
|
|
|
Re: ماني كبيره بس كرعيني واجعاتني (Re: حنين)
|
يا حنين ..
عندي اقتراح تاني بالنسبه للبنات ..
لما يجوا يقيفوا .. يقوموا يغمزوا للكمساري ..
بس عشان يرفعوا معنوياتو ..
و عشان ما يتعبوا نفسهم ..
أما النسوان الكبار اللي ما اتعلموا الغمز في فتره الشباب عشان مجتمعم كان صعب شديد .. فممكن يغمضوا عيونهم الاتنين و يفتحوها تاني ..
و الكمساري بيفهم طوالي ..
loool
مـــودك
| |
|
|
|
|
|
|
|
|
|
Re: ماني كبيره بس كرعيني واجعاتني (Re: Modic)
|
اللذيذة جدا حنين
نيلنك والابنوس والشو الجاري عليك
أصحكتني جدا والله
وعموما انا كنت أنزلت بوست بعنوان حنكوش جدا
اليك هذا المقطع منه
الأعزاء في المنتدي
رغم اني ولفترة ظللت مهجسا بالتداعيات الثقافية والاجتماعية لمفهوم مصطلح حنكـوش إلا اني هنا أود أن أحكي عن تجربتي الشخصية عن الكلمةالتي أطلقت علي شخصي المتواضع ثلاث مرات في مواقف فعلا مختلفة مما أربك محاولاتي لتعريف للمصطلح والبحث عن دلالاته وللذين لا
يعرفون معناها مثلي الاستنتاج من خلال ما سأحكية
المرة الأولي
كنت في زيارة لبعض الاصدقاء في جامعة السودان كلية الهندسة وخرجنا من الجامعة وفي نوايانا التوجه الي السوق العربي .. قررنا المشي حتي السوق الشعبي حتي نأخذ الموصلات من هناك ... عند وصولنا وجدنا الدور علي بص كبير يبدو عليه انه من تركة الاتراك عندما زارونا .. البص في حالة مهترئة جدا والكراسي حديد ... أقترحت علي الأصدقاء إنتظار الدور التالي(الحافله) إشفاقا مني علي الأنسات اللواتي كن برفقتنا .. سمعني الكمساري وسالني بحده لية دا مالوا
اجبت انا وبمنتهي البراء : الكراس حديد يعني القعدة حا تكون حارة
ابتسم بسغاله وقال لي :شوف الحنكشه سنـــــــــة يا حمادة مع العلم ان اسمي ليس حمادة ولا حتي أحمـد او محمد
والريد نيلين
| |
|
|
|
|
|
|
|
|
|
Re: ماني كبيره بس كرعيني واجعاتني (Re: حنين)
|
الكمساااااااااري:
اسد الحتفله المتوج....والناطق الرسمي باسم اصحاب الحافله....
انتو عارفين انو ذلك الكمساري يعكس روحه في كل ركاب الحافله....فاذا تبين من البدايه انو زول شراني ارتفع مؤشر الشر عند ركاب الحافله واستعدوا لما يلاقونه منه وحضر الطالب بطاقته وشكلته معا وبلع المفلس ريقه استعدادا للبشتنه....اما اذا كان مبتسما مدندنا مع فرفور او محمود عبد العزير تري شبح ابتسامه في وجه جميع الركاب دون ان يعرفوا سببا لذلك
واظرف نوع من الكماسره ما يكون قد ضبط مخه بفل هندي الليله السابقه..وجاي فاتح نص زرايرو عشان حرف الام بتاع اميره واللا حرف الاتش بتاع عزيزه يكون ظاهر....وفجاءه بدون سابق انزار تلقاو وقد تعلق في باب الحافله او الباص كالقرد فاردا زراعيه في الهواء ومقلدا ليوناردو دي كابريو في فيلم تيتانيك دا قبل ما ياتيه صوت السواق_ يا ولد ما قلنا ليك اقبل السجم دا حسه ناس المرور بقبل علينا
| |
|
|
|
|
|
|
|
|
|
Re: ماني كبيره بس كرعيني واجعاتني (Re: حنين)
|
سلام مربع
حنين ياعسل
وينك ياشاااابه
دي لزوم الاستفاح التكمسري
عارفه انا اكتر شيء بكيفني في الدنيا
ميدان ابو جنزير ومحلات المرطبات
وتاني شي الكمسارى
خاصة بتاعين الحافلات
اما بتاعين البص
والدفارات
فترتيبهم ياتي
في المرتبه الثانيه
من حيث الامكانيات
والحنفله والشتفنه
والحنفله هي من الحنفول
او الحنفولي وهو الزول الاعلي مستوي
اي المريش
اي العندو ضحاكات او ذو المستوي المتفرد
ماعلينا
المهم
اجمل برنامج هو برنامج ركوب الحافلة نفسه
وصف شكرا
او ما اصطلح عليها بكنبة شكرا
هو كنبة
او خط مية غرب وعلى فكره
هذه التسميه وكل التسميات من الكمساري
ويمكنك بوضوح ان تعرف الكمساري الجديد
من المتمرس
من الفقري والبقوم بدري
ومن اللديح السنيح
ومن العندو احساس الحنفولي
خاصة اذا كانت حافلته جديده كرت
وعلى فكره كل ثقافات الشارع
او ثلاقح الارصفة يكون ابطالها الكمساري
وهم الذين يتسنطقون المعاني
ويولدونها
فهم خبراء في الدعاية المضاده
للمركبات الاخري التي تنافسهم
فمثلا امجاد كادت ان تخرب بيوت الحافلات
وهم يخشون جدا على فكره العمل على امجاد
لانو اصلا امجاد مافيها كمساري
فمثلا يسمون الكراسي الاماميه
كرسي الشهــيد ، لانو جليس هذا الكرسي
سرعان مايذهب الى الاخره بمجرد اي تتش لامجاد
اما الدفار فهوي ثقيل وهو الذي خرب بيتهم بالفعل
لكنهم سراعان ماتراجع امام دعايتهم المضادة
فيسمون الجلوس في الدفار
بالتلفزيون
لان الناس يقابلون بعضهم وينظرون مباشرة في عيون بعض
امتعني هذا الموضوع ياحنين
سلمت ياستي
لهذا الالق
| |
|
|
|
|
|
|
|
|
 Re: ماني كبيره بس كرعيني واجعاتني (Re: حنين)
|
حنين
تتخيلى احلى مواصلات فى الدنيا هى العندنا فى السودان. احكي ليك موقف.
مرة راكبين حافلة والدنيا كالعادة مسخنة نص النهار. واحد ركب من محطة فى الطريق لابس دقن بتاعت كوز. قعد بعد شوية الكسارى طقطق ليه .. بزعل رد على الكمسارى ياخى ما تخلينا نقعد زى الناس اول يا شيخنا. رد الكسارى انا ما شيخك ياخى ما تقول لى شيخنا. نط واحد من الركاب ، ياخ ديل كرهونا السودان عاملين فيها مجاهدين... هسى البموتو فى الجنوب ديل شهداء. ودور النقاش... ديل فطايس ساى ... واحدين يقولو جها واحدين يقولو حرب سياسية. صاحبنا فعلا طلع كوز ما عرف يمشى وين. ركب واحد تانى من محطة وسمع الناس دى كلها بتكورك قال فى شنو. واحد كلمو قال ليه البموتو فى الجنوب ديل شهداء ولا لا? نط صاحبنا زى القارصاه عقرب فطايس فطايس حرم فطايس ساااى.
| |
|
|
|
|
|
|
|
|
|
Re: ماني كبيره بس كرعيني واجعاتني (Re: sentimental)
|
اللذيذة حنين
نيلينك والابنوس
شكرا جدا علي الإضافة علي أرقام الحنكشة المنسوبة الي قسرا
عموما قال احد المفكرين ذوي الاسماء البتخلع انك إذا اردت ان تعرف نبض الشعوب عليك بالموصلات والخربشات علي الجدران فهي ايقاع الشارع الحقيقي
ومنذ أيام ومع استاذي الكبير تراث والجندرية طرحت سوالا
كيف لهؤلاء الكماسرية والشماسة أن يستحدثو مفردات جديدة لتصبح لغة الخطاب اليومي وعلي كافة المستويات
مثلا
شتت
لم تعد حكرا علي الكماسرية فقط
والكثير من المفرادت
هذه الفئة لها ثقافتها المميزة جدا
وستات الشاي
والريد نيلين
| |
|
|
|
|
|
|
| |
ABUHUSSEIN
motaz
Modic
ود شاموق
زوربا
shiry
فيس بوك
تويتر
انستقرام
يوتيوب
بنتيريست