|
|
 المرأة القارورة
|
دعوني اكاوش على المايك شوية
اشمعنى انا لا؟؟
بوستي ده الحيدفق جردل الباندوُث؟؟؟
عندي سؤال
لماذا يظن الأغلبية أن حياء المرأة هذا عبارة عن قماش ساكوبيز إن مشى فيه أظفر مضروب منكير لانشرط وانبشك وعينه طلعت؟؟؟
لماذا كلما قرأ احدهم كلمة سخيفة من أحدهم قال (ياخي ما عندك اخوات ؟؟) وكأنه لو لم يكن لديه أخوات فلا بأس ان يفعل السبعة وزمتها
؟؟
وأنا طوال عمري اتمنى ان اعرف ما هي ذمة السبعة هذه؟؟؟
وهل يعني أنه لو كان عنده اخوات،، انه عايش في محمية أخلاقية؟؟؟
هل تلك ال(أخوات) اشياء هشه لهذه الدرجة تستوجب الشعور بالهلع والخوف؟؟؟
تماما كما نعتقد أن المرأة لو شافت خروف يذبح لانجرح معها شعور شعرها فوقف متطايرا كلو سبعة عاملين اتحاد مع انهم طايرين خلقة من الله كده خصوصا لو كانت تحمل دماء افريقية
وربما يأتي احدهم الآن ليقول،، ماذا تعني افريقية؟؟؟
اعترفي بجرمك يا زنديقة؟؟
فاقول
افريقية يعني افريقية هي دي دايرة ليها اعتراف؟؟؟
كنت اقول ، إذ1 ما كتب احدهم كلمات جارحة اتى اخو البنات ليطلب منهن أن لو سمحتن لا تنظرن هنا فهذه (الحتة) مش كويسة لجنسكن
ولبحلق هو حتى تكاد عيناه يطلع لها عينان تاني من كتر البحلقة والتيويق
التيويق دي من تاوق
وفي عالم الصحافة،، والإعلام،، كثيرا ما يمنعون نشر بعض الصور الدموية الحربية خوفا على شعور الأطفال والنساء
؟؟؟؟
هكذا يصرحون
ولو دخلت إحدى (الحريم) الانترنت،، وفتحت صفحة كتلك الصفحة التي تتحدث لنقل عن (الختان) مثلا ،،الموضوع الطلعتوا عين ابونا فيه،، لكورك فيها ومنعها من دخول مثل هذه المناطق المووبؤة خوفا عليها وعلى قاروريتها من الانخداش
قاروريتها دي من قارورة
في نفس الوقت،، يقود حملات توعية تقف مع المرأة وظلمها ووضعها في المجتمع الخ الخ الخ
يتحدث عن الختان كأنما المرأة في الأصل عبارة عن موضوع ختان قام ليه زول
يندد بالختان،، يندد دي صح؟؟
يندد بالختان لانه يحول المرأة لصورة جسدية بحته وهو بتركيزه على هذه النقطة إنما يدور في نفس المحور وهو التفكير في المرأة بصورة جسدية بحتة
يعني هي لو كانت مختونة أو مش مختونة،، هل هذا سيغير من كونها انسان بغض النظر عن اي تغيير فسيولجي فيها؟؟؟
انا قرأت هذه البوستات الموصومة بال(مسيئة) ولم افاجأ ولم يصب شعري الرغبة في الجلوس بما انه واقف خلقة
اعني،، لماذا نفترض ان المراة هذا الكائن الهش السريع الذوبان ككربونات إن رشها بعض الماء لهاجت وباشت في ساعتها ؟؟
مع انه المنطق يقول،، أن المرأة اقرب للدماء لو نظرنا لطبيعتها الفسيلوجية يعني
يعني غريب ان يثيرها منظر الدماء فيغمى عليها مثلا؟؟؟
وأنها بطبيعتها،، اقرب لعملية الولادة التي إن شاهدها اي رجل عادي (غير الأطباء) ربما لاغمى عليه هو من عظمة هذه العملية
وهي الأقرب لأن تبتعد نفسيا عن |(القرف) فلا تصاب (بالطمام) بسهولة لو قرأت كلاما يسبب الطمام واساسا لا ادي كيف يسبب كلام طمام هو صرصار؟؟
وهي التي تعاني شهريا من تغيير نفسي عصبي جسدي اشك ان الرجل قادر على تحمله لو مر به،،
هو لو مديره ساي صرخ فيه يعيش في نفسيات شهور
هي التي جعلها الله سببا لدخول الجنة ليس محض صدفة لكن لقوتها العجيبة في تحمل عملية الولادة والحمل وايضا ما يصاحبها من تغيير نفسي عصبي فسيلوجي لمدة تسعة شهور كاملة
وهي التي إذا حملت لقب (إمرأة عاملة) لطلعت عينها في الشغل ،، وعملت في منزلها ايضا،، الرجل لا يستطيع لطبيعة جسدية فيه
من قال أن المرأة بالضرورة (ضعيفة) وان الرجل اقدر على حمايتها نفسيا
؟؟؟
بالمناسبة انابتكلم عن النفسيات تحديدا وليس القوة الجسدية
لا اعتقد أن الشهامة الرجولية المرتبطة بحماية المرأة تعني تسويرها كما الغنمة،، ربما من الأفضل تعليم الانسان فيها بغض النظر ما نوع جنسها،، لتستطيع تحمل العيش في مستقبل يبدو والله اعلم كده انه منيل
ليس تشاؤوما لنسمه استبصار
الم يحن الأوان بعد لفضح صورة ذات الرداء الأحمر الساذجة واستبدالها بانسان مثله مثل الرجل في التعامل ،، بغض النظر هي لابسة فستان واللا بنظلون؟؟؟
يعني هو احنا قوارير،، بس ما للدرجة دي يعني
|
|
 
|
|
|
|
|
|
|
|
Re: المرأة القارورة (Re: بت قضيم)
|
عندي أخوان
واحد منهم مثقف وقادينا نظريات
الله يديه العافية
ويديك
لما دخلت اقرا ردك لقيت كلامي كتير خلاص؟؟؟
كتبت ده كلو انا
؟؟؟
بعدين انا ما زعلانة لكن النوم طار ويا الله هوووووي تعب اللسان من الشكية
قلت يمكن زول يجي يتشاكل معاي لكن ما هببوا لي
وتسلم يا سحس
| |
|
|
|
|
|
|
|
|
|
Re: المرأة القارورة (Re: بت قضيم)
|
عـايزه الجــد ؟؟؟ كـــلامـك كتير علشان كـدا الناس بتهرب منك
يا بت قضيم إنتي براية شـديد علشان كـــدا خففي البري بتاعك
شوية علشان الناس ما تهرب منك.
طــــيـــــب ؟؟؟؟
| |
|
|
|
|
|
|
|
|
|
Re: المرأة القارورة (Re: بت قضيم)
|
قـومـتي نفسي الله إقوم نفسك
إنتي راكبة ليك رقشة و لا فا على البوستات ؟؟؟ إسي كنتي في بي هناك
قلت أفور دمك جيتي تاني بي جـاي ؟؟؟؟؟ أرسـل ليك نوم علشان نرتاح
و لا كـيـف
| |
|
|
|
|
|
|
|
|
|
Re: المرأة القارورة (Re: بت قضيم)
|
والله يا ابو حسين انا زاتي اتساءل
لماذا يعني انا دمي بارد كده وما بزعل تقول مهجنة مع قرادة بس
المشكلة ما البري
المشكلة التفكير
البحلني من التفكير شنو
ولووووووول على الرقشة
| |
|
|
|
|
|
|
|
|
|
Re: المرأة القارورة (Re: بت قضيم)
|
التـفـكـيـر ؟؟؟؟؟ يعني البت ذكـيـة و لا شـنـو ؟؟؟؟؟ حلوة دي
شكار نفسو إبليس
أعملي زي حكاية العالم الأمريكي !!!!!!!!!!!!!!!!!!!!!!!!!.
| |
|
|
|
|
|
|
|
|
|
Re: المرأة القارورة (Re: بت قضيم)
|
والله ما انوم قبل ما اتماسخ عليك
ايوه مرات مرات بفكر
مع انه راسي مصدي من أثر سوء الاستخدام
العالم الأمريكي عمل شنو؟؟
هسه بالله البراي منو؟
بعدين انت انصرافي،، اقعد ساي برضو
ما شايف بوستي افكاره عميقة كيف وكلها سمك وحيتان؟؟
هيا
تصبح على وطن
| |
|
|
|
|
|
|
|
|
|
Re: المرأة القارورة (Re: ايهاب)
|
إيـهـاب العـريس
إنـت المصحيك لغاية أسـى شنو ؟؟؟ إنت المفروض تكون شربت اللبن
و نمت من بـدري صــحـــتك يا خــوي .
| |
|
|
|
|
|
|
|
|
|
Re: المرأة القارورة (Re: بت قضيم)
|
العالم الأمريكي قال تعب من كترة الذكاء عايز ليهو حاجة تنقص الذكاء
علشان إرتاح من كترة التفكير زيك كدا قام مشى ليهو لي واحد قال ليهو
تعال عندي غرفة تدخلها تنقص الذكاء و تنقص حسب قعادك فيها قالم ليهو
كويس لو عايز أبقى مخي زي الصعايدة ؟ دي عايزه ليها كم ساعة ؟ قال ليهو
ساعتين بس قام الراجل دخل الغرفة و قال ليهو ساعتين و طلعني
الراجل دخل من هنا و صاحب الغرفة مشى نام صحى بعد خمسة ساعات إتذكر
الراجل جـري على الغرفة فتح باب الغرفة و طلع العالم قال ليهو
معليش يا خي و الله تعبان شالتني نومة قام العالم قال ليهو
و لا إهمك طال عمرك ما قصرت نومي بعد كدا
| |
|
|
|
|
|
|
|
|
 Re: المرأة القارورة (Re: بت قضيم)
|
تسلمى يا بت قضيم
السماحة والعفة والتعامل الراقى من صفات الرسالة المحمدية
يعنى لو زول مسك لسانو عليهو مش احسن من الاساءة ؟
بعدين كلمة ما عندك اخوات .. دة كلام اقبح من الذنب ,تبريرات
واهية وباهتة , يعنى القوارير الجاية من قارورة ديل مفروض
نحترمهن اكان عندنا اخوات ولا مافى , وحات المكاشفى الحلف بيهو
سجيمان ... النسوان ديل امنع منهن مافى امنع دى جاية من مناعة
وزى ما قلت انو انتو قوارير بس ما للدرجة دى يعنى لدرجة شنو ؟
القوارير ديل نحنا نشيلهن فى رقيتنا وسكاكينا فوق للذين يحاولون
خدش حيائهن < سكاكين ليسانية > و ويجب علينا ان نترفع عن صغائر
الكلام يا بنى جنسى ونرتقى به الى الاعلى ان شاء الله يصل مركز التجارة
الدولى فى طوله .... نسيت انو المركز بقى اقصر حاجة ويا رب لسانا
يكون قدر المركز فى استنطاقه عند الهروب
فضفضى يا بت قوقو وورينا عيوبنا عسى ان نجتهد فى ازالة الشوائب
التى تعترينا
تعترينا ... ما تعتر لينا
| |
|
|
|
|
|
|
|
|
|
Re: المرأة القارورة (Re: alfatih)
|
بت قضيم : لك التحية و التقدير و سلام كبير
أعتقد غير جازما أن قوارير زمان و قوارير الآن في إختلاف كبير. عندما أقول لإمرأة زمان يا قارورة ، فهي بالفعل كانت كذلك ، هشة قابلة للكسر و الشرخ عند أول إصطدام أو حرارة زائدة.
أما قواريرنا الآن و لله الحمد ، قوارير ضد الكسر ، قوارير كريستال و فايبر قلاس.
التعليم و الثقافة و تجارب الشعوب أضافوا لهذه القوارير مواد صلبة جعلتها قواريرية الشكل و المظهر ، و لكن فولاذية الخواص. ( كانوا فين و دلوقت فين ؟ ).
أما المقولة ( إنت ما عندك أخوات ؟ ) فلا ندري بالطبع متى دخلت معجم مفرداتنا ، و لكنها جملة تدخل في نطاق التذكير بالوازع الأخلاقي و الدرع الواقي ، أنا شخصيا أعتقد أن الإنسان بدون وازع الضمير و منزوع الأخلاق لو عندو دستة أخوات برضو ما حيذكرنو بالواجب قوله أو فعله. إذن أظنه يا بت قضيم يا أختي أنها كحلف الطلاق بالتلاتة و حرم و يحرم علي الحرام كان تاكل ، و هلم جرا و سحبا.
تسلمي
| |
|
|
|
|
|
|
|
|
|
Re: المرأة القارورة (Re: ابو جهينة)
|
بت قضيم اهديك هذه القصة القوية المعبرة جدا في نظري
بعد حفلة عرس عامرة في أحد فنادق الخمسة نجوم، اصطحب فارس الأحلام فتاة أحلامه إلى غرفة حالمة في ذلك الفندق لقضاء بعض ليالي العسل، بعد ليالي البصل الكثيرة في حياته، قضيا تلك الليلة وهما يشعران بأنهما أسعد مخلوقين على هذه الأرض، لا يتحمل تغيبها عن عينيه لحظة، وتبادله هي ذات الشعور
في صباح اليوم الثاني، وفي الساعة الثامنة جاءت أمه وإخواته، يزرنه في غرفته، ويطمئنن عليه، قرعن جرس الغرفة والسعادة تحفهن، خاصة الأم التي كان فرحها أكبر من فرحته هو بزواجه. استيقظ المعرس على صوت رنين الجرس متسائلا: من يمكن أن يكون في مثل هذه الساعة؟
قامت حبيبة الفؤاد واقتربت من العين السحرية، وهي تقول: إنها أمك وأخواتك، لقد جئن مبكرا جدا. لا ترد عليهن ودعنا في متعتنا. أعاد الحبيب الغطاء على رأسه واستمرا في نومهما، بعد ساعة واحدة، قرع الجرس مرة أخرى، قامت وهي تتمتم.. لعلها أمك عادت مرة أخرى، وما أن اقتربت من العين السحرية حتى صاحت: إنها أمي مع أخواتي، قم بسرعة، فقد آن أوان الاستيقاظ والساعة تقترب الآن من العاشرة فكفانا نوما.. قفز من الفراش مسرعا، وغسل وجهه، وطلب منها فتح الباب لاستقبال عمته
انتهى شهر العسل، وكم كانت فرحته عظيمة عند سماعه خبر حملها، وزادت فرحته، ولم تسعه الدنيا عندما رزق بمولودة جميلة من حبيبة العمر، وطار بها من شدة الفرح، ولم يفارق زوجته لحظة، بل ولم يتركها تتحرك حركة واحدة، خوفا عليها، وأغدق عليها الهدايا تلو الهدايا، وأغرق ابنته بأجمل وأغلى الفساتين، وكلما ألبسها فستانا ضمها إلى صدره وشمها، وقبلها من كل مكان، حامدا ربه على هذه النعمة.. وزاد حبه وقربه لزوجته.. بعد مجيء صغيرته لهذه الدنيا.. وبعد ما يقارب الأعوام الثلاثة رزق بمولود، وفرح الجميع بهذا الخبر، وتوقع أهل العروس أن يتضاعف فرحه هذه المرة عن المرة الأولى، فالقادم ذكر. وحلاوته عند الكثيرين أضعاف حلاوة الفتاة.. ولكن الجميع فوجئوا بأن الزوج استقبل الخبر ببرود شديد، بل واختفى عن الأنظار، وابتعد عن زوجته وأصبح يلبي حاجاتها بالهاتف خلال فترة النفاس.. بينما كان بالأمس لا يفارقها لحظة واحدة
جاء لزوجته يوما من الأيام فسألته عن هذا التغير الغريب، ورجته أن يخبرها بسبب لا مبالاته، وحزنه للخبر، بينما كان يفترض العكس
فقال لها: البنت ترحب بأهلها إذا جاؤوها ولا تفضل عليهم زوجها، والولد يضحي بأمه وأهله من أجل زوجته
فالبنت أكثر وفاء من الولد
قولوا رايكم
| |
|
|
|
|
|
|
|
|
|
Re: المرأة القارورة (Re: بت قضيم)
|
صديقتى
لك التحيه
نعم
رفقا بالقوارير
المراه كائن له خصوصيته000العذوبه والرقه
والاحتمال
احتمال كل هذه التغيرات التى اشرتى لها
فالنظر لها من خلال ثقوب الخوف والحذر والعطف ما هى الا دواعى تربويه
فى الفهم العام لها وليس حصارا فكريا
الا توافقينى يا بت قضيم
انو المراه بتنظر لى نفسها بحساسيه شديده
ودائما تود ان تثبت وجودها فى مواقف لا تستدعى
اثبات الوجود لان من الطبيعى تعاملها فى المجتمع عامه دون ان تذكر
بكيان وجودها
دمتى
اكثر روعه وتالقا
| |
|
|
|
|
|
|
|
|
|
Re: المرأة القارورة (Re: بت قضيم)
|
بت قيم .. أزيك
لما شفت عنوان بوستيك دا .. قلبي قال شححح
قلت يا ربي بت قضيم دي جات تكوش بي حلتنا بي هنا
تجرجر في توبا قامت ( لفحت ) ليها قارورة من قواريري دي ولا شنو
ولا يكون يا ربي قواريري دي هبشت بي قضيم في طرف
لكن الحمد لله .. جات سليمة
كمشاركة بسيطة وحذرة .. هذه الإحراجات التي تقع تمس القوارير
وتمس الشوالات في وقت واحد .. فالمشاعر تلمس كل قلب رطب
والعبارات ( الشترا ) تخدش حياء الجميع سواسية
ولكن ربما بدرجة أكثر ..القوارير
والدليل على ذلك أن هناك أكثر من قارورة فردت بوست بي حالو
وقالت ودعتكم الله مشتتا ..أو ربما احداهن قال لها ( باباها ) ما تدخلي الحوش دا تاني
لكن الفهمتو من كلامك دا .. أنو الحاجة العيبة بتمس الجميع
وارجو جميعا أن نراعي مشاعر الآخر ..
مع خالص احترامي
رحمابي
| |
|
|
|
|
|
|
|
|
|
Re: المرأة القارورة (Re: بت قضيم)
|
لا يسعني الصبر شوية حتى افضي واتي لاعلق براحتي
لا بد لي من التعليق على مدى سعادتي بهذه المشاركات القيمة
الرحمابي
حذرة ؟؟؟
بالله عليك صحي شكلي يخوف؟؟؟
مع اني بطلت اعض من فترة
لووووووول
امزح
كل الود والشكر على هذه المشاركات القيمة
ولدي تعقيبات كثيرة
إن شاء الله تسلموا
| |
|
|
|
|
|
|
|
|
|
Re: المرأة القارورة (Re: بت قضيم)
|
أختي بت قضيم
وحات الله الحذر ما منك اتي
بس من الشوت الضفاري الواقع في البورد اليومين دول
لأني اشرت اشارات ربما أتي اصحابها
وقالوا لي .. كيت وكيت
واصلي.. بس أوعك من قواريري
الرحمابي
| |
|
|
|
|
|
|
|
|
|
Re: المرأة القارورة (Re: ABUHUSSEIN)
|
هو لاقيين بت قضيم وين
وبعدين هي ما محتاجة يا ابو حسين
وتمعن البوست جيدا ستجد بت قضيم دي ادتكم بطريقة ذكية وانا رديت عليها بقصة اتمني ان تعرف مغذي كلامي
| |
|
|
|
|
|
|
|
|
|
Re: المرأة القارورة (Re: ABUHUSSEIN)
|
هو لاقيين بت قضيم وين
وبعدين هي ما محتاجة يا ابو حسين
وتمعن البوست جيدا ستجد بت قضيم دي ادتكم بطريقة ذكية وانا رديت عليها بقصة اتمني ان تعرف مغذي كلامي
| |
|
|
|
|
|
|
|
|
|
Re: المرأة القارورة (Re: بت قضيم)
|
والله يا ابو حسين انت ثقيل ثقاااااالة
!!!وعكليت عكلتة
بس طبعا ما اكتر مني
مهاجر
تسلم
ابو حسين كان بكاوي ولا ادري اي زمن أو متى كان هذا الكلام
حقو الواحد يواصل غيظة فيه كده
| |
|
|
|
|
|
|
|
|
|
Re: المرأة القارورة (Re: بت قضيم)
|
العزيزة بت قضيم
بركة الجيتي
وكيف الاجازة يعني نقول عملت حاجة كبيرة منعتك من النت ولا مشيتي الشمالية
والله مشتاقين
وعرفنا انك غير متواجدة
ابوحسين دا خليهوا لي
انا بعرف ليهوا كويس
| |
|
|
|
|
|
|
|
|
|
Re: المرأة القارورة (Re: بت قضيم)
|
يا بت قضيــــم ...
ازيك .. ظهر الخير ..
منو القال انو البنات كده ؟
ما شفتي المارينز الأمريكيات ؟
المشكلة انو المرأة السودانية بتستخدم قوتها دي كلها في الصبر و بس ..
يعني الواحدة تصبر علي الشغل .. و علي الزهج .. و علي الوجع .. و علي الاحباط .. و علي الآلام الجسدية اللي انتي ذكرتيها ..
و ما بتظهر لي زول انها قوية قدر كم !
ظهروا انكم قويات قدر كم عشان مافي زول تاني يخاف عليكم ..
و وجهوا طاقاتكم لي شيئ تاني غير الصبر ..
و أنا عارفكم ما أقل مننا في حاجة ..
كثف ودي ..
مــودك
| |
|
|
|
|
|
|
|
|
|
Re: المرأة القارورة (Re: Modic)
|
الموضوع شيق
وأعجبتني قصة الراجل الفتح باب الفندق
غايتو دا زول أضينة سااااااااكت
وأكيد اول ماحايطلع من الفندق حاينضم لرابطة مغسلي العدة والملايات
بعدين لو كنت في مكانه وفي شهر العسل
لو جات أم المدام ما حا افتح ليها
ولو جات أمي ما حا افتح ليها
دا وقت زيارة وللا وقت زيارة
دا خمج بس
وغير كنت ناوي بعد ما اتزوج أعمل فيهم عملية ابليس ماعملها
حا اقول ليهم شهر العسل في كسلا 00 طبعاً بتكون نشفت من الموية للوقت داك لكن حا امشي اقضي شهر العسل في نيالا
انشاء الله نخت لينا عنقريب وسط سوق أم دفسو
والله نفسي ازور السوق دا
ولو كان في واحد من بورداب نيالا عاوز منو يقدم لي دعوة عديل كدا
قالوا كل شيء بيتباع هناك
حتى زمان قالوا واحد عندو سباته كبيييييييييييييرة
عارفين ببيع فيها شنو
قالوا فارش ليهو فيها كبسولات مضادات حيوية
والبيع بالكيلة والربع
ما أظرف هذا السوق
قال قوارير قال
دا كان زمان يابت قضيم
الواحدة لمن تنهرها تجري هي وصاحباتها
هسي كان نهرتها تتنفخ قدامك زي ابو القدح
وتتحول ليك من قارورة رقيقة الى اسطوانة غاز
كان اتفجرت فيك تلحقك جدي والمقابر طوالي
وكان اتسربت فيك تكتم نفسك
وكان بقت فاضية وحبيت تعبيها تقد جيبك
وكان مليتها وجيت شايلها تكسر ضهرك
| |
|
|
|
|
|
|
|
|
|
Re: المرأة القارورة (Re: بت قضيم)
|
بت قضيم لكي كل التحايا
كلامك فيه شئ من المنطق وخاصه حكاية
انو القاروره دي بتمر بي مراحل في حياته
ارجل راجل ما يتحمله خصوصا حكاية الحمل دي
تعرفي انا تحديدا ولدي ما بشيله عشره دقايق في كتفي
خلي اشيل لي زول وجوه بطني و كمان تسعه شهور يا هو الطلع من اول تسعه يوم
بس كمان ربنا قادر وواهب كل شئ نادر
فاداكم يا قضاضيمو مقدره على تحمل الاشياء دي
بس برضو انتوا قوارير وستين قوارير
بالله شوفينا لينا معاك حكاية الرقم ستين ده
الواحد لو جاء بي خبر موت فلان مات
ووووووب علي والسكاليب تقع
سكاليب دي من سكلب  حلوه مش كده
فاتخيل لي رغم الحقائق عن قوة القاروره
الا انكم برضو تظلوا قوارير ومرات قوارير فاضيه كمان
هي ده كله كتبته انا؟؟
دي ياها زاته من عاشر قواريرا 40 ساعة صار كبايه لوووووول
الى لقاء في طله اخرى
ــــــ......ــــــ......ــــــ
في كل عام
كانت الاحلام
بستان يزين مقلتي
| |
|
|
|
|
|
|
|
|
|
Re: المرأة القارورة (Re: بت قضيم)
|
اخي عماد
تحية ود طيبة
تسلم للمشاركة (الغياظة)
علميا الرجل لا يمكن أن يتحمل عملية الحمل والولادة والرضاعة
هو لم يخلق لهذا الشأن بالتالي هو ليس مهيئأ لهذه العملية،، لا جسديا وبالطبع لا نفسياً ايضاً
شوفوا يا جماعة
في رأي المتواضع ان الشعوب كلها تبدأ بأسرة،، وأن من اعمدة الأسرة الأساسية ،، المرأة فيها،، بل تكاد تكون المرأة القاعدة الأساسية للأسرة
إن فسدت (اتحدث عن نفسيتها وليس اخلاقها) فسدت الأسرة وان استقامت استقامت الأسرة وبالتالي الشعب
وبما اننا شعب لا مستقيم،، نعاني الخسارات الواحدة تلو الأخرى،، كما نعاني من حالة لا ثقة دائمة في جميع حكوماتنا ،، وحكوماتنا نفسها متنيلة على عينها (كل الحكومات التي عاصرت) بالتالي نركن لنتيجة مفادها أن الرجل السوداني على وجه الخصوص لا يفهم المرأة،، مما يؤثر على أداؤها سلبا،، عليهما معا،، فتطلع عينه بتفاهات الأمور علها تشغلها عن نفسيتها المحطمة،، فيلتهي هو بصغائر الحياة ويتناسى الله وحياة السؤدد،،فتكون النتيجة هذه الحياة المتذبذة بين إحساس المرارة والغبن والضيق و (حرم عليا الطلاق)
وبالنسبة لها(يحلني الحل بله منو يا رب)
لما قال الرسول صلى الله عليه وسلم فيما معناه أن المرأة خلقت من ضلع أعوج
لا أظنه عنى انها لا مستقيمة على الدوام ومعوجة
الضلع الحقيقي فعلا اعوج،، واعوج ما فيه انك إن حاولت تقويمه،، لانكسر لهشاشته،، ولو تركته لبقى بالطبع اعوج
والمقصود هنا (والله اعلم) أنه ضلع أعوج بالنسبة للرجل ،، مقارنة معه،، يعني ما بتشبهه وعلى خلاف خلقه
وربما هي نصيحة من افضل خلق الله عنى بها أن لا يحاول الرجل تعديل خلق الله،، حيث خلقت هي بنفسية مختلفة تماما و (معووجة) عن الطريق الذي خلق به الرجل
فاقبلوها كما هي،، كائن ذو خصوصية لا يشبه إلا نفسه
بالتالي المراة القارورة لا يعني انها زجاجة هشة قابلة للكسر،، مع ان اي انسان قابل للكسر،، بل هي شئ ذو هيئة معينة وجب صيانتها كما هي لا محاولة تغيير كنهها وتغيير نفسيتها
ولا علاقة البتة لهذا بذاك التفسير أنها ضعيفة يااااي قد تجرحها الريشة
وطبعا انا بلت وبعجن كيتا في ابو حسين مع انه ما جا وفشاني شوية
| |
|
|
|
|
|
|
|
|
 Re: المرأة القارورة (Re: Ahlalawad)
|
الاخت الرائعة دوما بت قضيم
انتن قوارير الحب والسعادة والهناء والشق الذي بدونه الحياة سراب او لا حياة
توهم من ظن انكن لستم شجعات او قويات
من بنات جنسكم الناعم من اذهل بشجاعته الجنس الخشن
هم يريدون بكم التخلف والتحكم وتهميشكم لكن دون جدوي
لك كل الود
الشيخ ابو حراز
اضحكتني حد الهيستيريا وفقدان التحكم في نفسي
انت قارورا مملؤا بالفكاهة الغير عادية
لك كل الود
degna
| |
|
|
|
|
|
|
|
|
|
Re: المرأة القارورة (Re: بت قضيم)
|
يا تلك الباكورة القارورة
غاليتي الحبيبة ست البنات
لكي خالص حبي واشواقي على امتداد القوارير والقوافي
اشتقت اليك كثيرا
وافتقدتك كلمات تتناثر في عبئ البورد فتحيله الى إرتياح مريح
وصى نبينا صلوات الله وسلامه عليه بالقوارير
وهو لا ينطق عن الهوى
والغريب ان للمرأة قوة لإمتصاص كمية فوق مستوى فهم الرجل من الألم والتعب والتقلبات النفسية .. ولها القوة على الصبر ... كل شئ يهون لو سمعت كلمات من شريك حياتها يرفع بها معنوياتها المكسورة او ما شابه ذاك .. حتى ولو كانت تعلم انه يتجمل ويكذب احيانا
لكي كل الحب يا قاروة القوارير
سماح
| |
|
|
|
|
|
|
|
|
|
Re: المرأة القارورة (Re: بت قضيم)
|
مودك الصغير الكبير
مرتان تكفي
مرة أجرب
ومرة أختار
التالتة اعمل بيها شنو؟؟؟
أهل العوض أخوي
لله قساوتك
دي على وزن لله درك
هسه الجاب سيرة البورة منو؟؟؟
الموضوع فتاوي مالك علينا ياخي؟؟
التاني ده منو؟؟
العزيز دقنة
أبوحراز ده من أصحاب الفيل برضو
بالله ده كلام ناس عاقلين؟؟
المرأة شجاعة في بعض المواقف وجبانة في الأخرى ليس لأنها امرأة،، أو أن الرجل لا يخاف،، بل لأنها انسانة وهكذا خلق الإنسان
خواف
والله اعلم
سلمت (كميات) للمشاركة
سماح البعيدة القريبة
اشتقت ليك كتييييييييير
عبرونا لو بكلمة
ده في الأول
في التاني،، كلامك صحيح،، ولن يستطع الرجل أن يتخيل إمكانية امتصاص المرأة لألم كان أو حزن أو ،، لنسمها امكانيتها في الاحتمال،، حتى للصدمات
بس لو خلت عوارة الكواريك عند كل كبيرة وصغيرة تبقى ما قصرت
بالله عندي سؤال
لماذا لو كتب رجل شيئا لنقل قصيدة أو قصة،، كانت مجرد قصة؟؟
وإذا كتبت المرأة قصيدة أو قصة كانت قصة حياتها؟؟
سينفتح رأسي غيظا من هذه الفكرة
سلمت يا حبيبة
منتظرة الرسالة
| |
|
|
|
|
|
|
| |
بت قضيم
ABUHUSSEIN
ايهاب
alfatih
ابو جهينة
مهاجر
HAMZA SULIMAN
AlRa7mabi
أبوالزفت
Modic
ابوحراز
Ahlalawad
degna
sama7-au
فيس بوك
تويتر
انستقرام
يوتيوب
بنتيريست