تعرف عندي تيمان عمرهم حوالي سنتين الا شهرين كده، تاعبننا تعب شديد، سقد، اصلو ما بنوموا كلو كلو، يعني يوميا نحن للساعة 2 صباحا مع ياولد نوم ويابت ارقدي تعرف لما امشي الصباح المكتب بكون عين تفتح وعين وتغيب وعين تشكي للشيخ الطيب
امس قلت لأمهم اسمعي الليلة انا بجرب ليك فيهم نظرية جديدة ناموا ناموا ما ناموا ياني الجادعهم ليك في الشارع، تعرف بعد الساعة 11 ونص كده اديناهم بززهم وكل واحد رقد في سريره قمت شغلت ليهم محطة بتاعت ال FM بتجيب مقطوعات موسيقية مختلفة Pure Music بس شغلته ليهم وخليتهم وحياتك ضربواالبزة كلها لأول مرة وبعدها يازول قاموا يسكسكوا سكسكة خفيفة كده في حتتهم بدون ازعاج وبعدها ناموا نومة واحدة للصباح لما انا قلقت عليهم بقيت اصحى كل شوية واشوفهم الجماعة ديل ما لهم صانين ما من عادتهم، يعني زمان الواحد فيهم يصحى بالليل عشرة مرات
فالتجربة دي طوالي قادتني لي سؤال قلت اساله لأخوانا الموصلي وحمزة سليمان وبقية المختصين، عن تأثير الموسيقى في نمو الطفل عموما
الشئ التاني الخلاني اطرح الموضوع ده انه قبل يومين سامع باكستانين مسلمين معانا هنا يتكلموا مع واحدة اختهم باكستانية غير مسلمة عن انه الموسيقى في الاسلام حرام والغنا حرام وانه بس الدف هو المسموح به والغناء في حالة العرس او الانتصار في الحرب، في نفسي قلت بالنسبة للعرس ترىالمسلمين ما بقصروا لكن كان بقت علىالانتصار في الحرب ياهم الماداقين ليهم دف واحد
فبعد التجربة دي قعدت افكر هل ممكن الموسيقى تكون حرام؟ خصوصا اذا عرفنا ان الموسيقى والغناء كانوا معروفين منذ زمن قديم حتى قبل الاسلام فلماذا لم يحرمهم الاسلام صراحة اذا كان اصلا هم حرام،لأن كل الذين يعتمدون علىتحريم الغناء والموسيقى يعتمدون على تاويل بعض الايات، اذ ليس هناك تصريح، خصوصا اذا تذكرنا حديث السيدة عائشة عندما ارادت ان ترى رقيص الاحباش ولم ينهاها الرسول صلى الله عليه وسلم والحديث الاخر عند زفاف احد المسلمات عندما سالهم النبي صلوات الله وسلامه عليه، هلا ارسلتم معها من يقول اتيناكم اتيناكم او ما في معناه، بالاستناد على هذين الحادثتين هل يمكن ان يكون الغنا او الموسيقى حرام؟
وسؤالى هو ، المعروف ان الانسان يولد على الفطرة، والملاحظ ان الطفل الصغير يطرب لسماع الموسيقى حتىقبل ان يعرف ما هي، والمعروف ان التشريع حرم كل ما هو ضد الفطرة، فهل يمكن ان تكون الموسيقى حرام؟
افيدونا افادكم الله