|
|
 البت الساكاني وأنا راجي التانية القمرا
|
هاي ....نيلينك و الأبنوس والشوق الجاري عليك
أي تشابه في تفاصيل الأتي مع الواقع هو محض تعمد
كالعادة بعد المحاضرة الأولي تربعت وحيدا علي طاولتي الأثيرة في أقصي ركن من كافتيرا الجامعة .... أمامي علي الطاولة مبعثرة أشيائي ومنفضة السجائر وبعض الرسومات الهندسية .... في يدي جيتاري الصديق جدا يراودني
لوف مي أقين
واسمعه في الضواحي وطرف المداين
بدأت رحلة التلذذ بكوب النسكافية
لم أتلذذ بما فية الكفاية حتي جاءت برلومتي الغير سودانية وبأبتسامتها التي من الممكن تكسر من اركويت حتي الديوم الشرقية ....سالتني أذا كان بامكانها الجلوس قبلت علي مضض لاني أعلم مسبقا أي مجري سيأخذ الحديث ,,,, للأمانة سانقل الحديث بعد سودنته """ سالتني بعد أن توهطت في قعدتها : بتكتب ؟
في سري ( أكتوبك أن شاء الله في جناح غرابة تطير تفكك في خرابة ) غرابة هنا تانيث غراب .
اجبتها بابتسامة سمجة لالا عادي
هي : حاولت الأتصال بك اكتر من عشر مرات وين انت ؟
كنت نايم وما سمعت جرس التفلون
طيب اتصلت بيك في البيت قالوا انك ما موجود
مرة تانية في سري اسه اطلع الكضاب منو انا ولا ناس البيت
لاماهواهه شفت امم كنت اهه السينما وووو شريط وكان الانترنت مهامم
المهم انت كويسة؟
الحمد لله ممكن اعرف انت بعيد ليه ؟
بعيد كيف البينا اقل من متر
الغباوووووة مرات بتخارج
لا مش دا قصدي قصدي لية بتبعد مني
سكوووووووووووووووووووت
اسالك سوال انا ما حلوة ؟
في سري حلاتك دي بتخلع الما بتخلع
طيب انت مرتبط ؟
انا مرتبط بالسمرا الواضحة اللسه في علم الغيب
يعني المشكلة لوني الأبيض ؟
ولميت كل الممكن جواي وقلت ليها
المشكلة مش في الجمال ولا لونك الابيض زي اللمبة ما بترك فيهو ضبانة
و لا في عربيتك التجرح الشفتها أنا في الأفلام
المشكلة في طقوس الريد المختلفة عندي
الريد الببدا بالحكير في الشارع يارب تظهر ولمن تظهر كل الدنيا تغيب وتنسي الكلام الكنت عاوز تقولو وباقي الجوابات الفي جيبك
وتفوت بجنبك وتسلم تتلعثم ما تعرف أزيك من مساء الخير
روحك تتحرق وماتلقي حروف وتقيف قدامهافي وبباقي النفس الفيك تقول ليها
ياخ بتحبيني ؟
تنزل راسة في الارض وحمرة خفيفة في الخد الاسمر وتقول بهمسة أي ي ي
وتضحك كل الدنيا الفيك تضم كتبها علي الصدر الناهد وتفوت ما بين ماشية وطايرا
صباح اليوم الجاي ترجاها في نهاية الشارع مشوار الجامعة اليوماتي
الحافلة مليانة الحافلة التانية مليانة والتالتة نكابس بي جاي بي جاي تقعدوا
نمت كيف ؟
كويس وانت؟
طول الليل شاغلاني
وقبل ما تبريها تركب خالة كبيرة ما تلقي مقعد تعاين ليك جوا عيونك وانت بكل هاشميتك تقوم أتفضلي يا خالة.. تقيف انت والخالة تتوهط وتدعي ليك او تتدعي عليك لو كنت ازرق وشكلك عب ( يخلل ضروسك شوف العب كمان
)
والمغارب قاعد تحت العمود مع اولاد الحلة والحجة طاقة هلال مريخ والحكم الباعا
تجي فايتة من بعيد مع صاحباتاوانت تتضاري اللخبطة الفيك في الجنبك
يازول بتعاين مالك؟؟؟؟
تسلم مع صاحباتها وتفوتكم
تستاذن انت من القاعدين وهي تمشي بي مهلة صاحباتها يفوتوها ادوكم فرصة
تتلاقي الأيدين عينك في عيونها وعيونها في الأرض ترسم في السما
كنت وين واتاخرت ليه ؟؟
انا كنت في ::::::::::::: وباقي النقة دقاق ما تعرف بداية شكلة او طقوس الريد
أمها ترسل ليك تدق الباب وقلبك نوبة
خالتو ازيك خير ان شاء الله ؟؟
ماسورة الحوش أتكسرت
دقيقة بس تجيب اتنين من اولاد الحلة والتالت ضيف
(( يالمناسبة عمركم شفتوا سمكري في السودان )))
صلحناها يا خالتو في حاجة تانية؟؟
تسلم اقعدوا شاي المغرب جاي
فرشو سراير الحوش
والونسة في حيطة ناس ست الجيل الهدتا المطرا
في عرس أحمد لحدي فنان الحفلة منو
في الحاصل يوماتي
اليوم الجاي الصباح ما ماشة الجامعة
ترجاك في باب الشارع وصوت امها يابت خشي
أي ياماما منتظرا سيد اللبن
تجي قدامك صباح الخير صباح النور
انا ما ماشة الليلة خلي بالك من نفسك
حا أشتاق ليك
في عرس أحمد في الحفلة
دي منو الكنت بترقص معاها دي
دي بت خالتي
(( بالمناسبة مرة في الجامعة زميلة قالت لي انت خالتك دي ارنب
كل ما تزورك واحدة تكون بت خالتك )))
طيب خليها التنفعك
والجرسة تبدا
لا والله هو ما كدا انت مافاهمة ماهي اصلا جات زيارة من الكلاكلة وبعدين يعني المسالة
وتتدخل بنات الجيران وجيران الجيران و كل الحلة و وحلة قدام
وتبدا مفاوضات علي اعلي مستوي بالمناسبة تاني
السودان المكان الوحيد في العالم المافيهو خصوصية الا في النوم
دا اذا ود الجيران ما ضايقك في سريرك
ولو ماحصل شمس السابعة صباحا تفرتق النومه الخاصة
وبعد النفوس ما تهدا تبدا مشاوير اليوم العادية
معاك في السوق تختار قمصانك وتحاجج سيد البوتيك في السعر تتطلع روحه وروحك وروح ناس السوق العربي
و تتزهج فيها
الحافلة في طريق البيت تنفخ دخان سجايرك وتعمل زعلان
وبداية الشارع تتكسر تاني وتسالها حاشوفك متين؟؟
انستي الغير سودانية
دي طقوس الريد البحلم بيها قبل اتولد
ما بفصلني عنك لون أو دين او عرق
السايقني بعيد منك
اني مخلوط بريحة الدعاش
مزروع في نيمة جيرانا
مرسوم بالموية المتدافقة من زير الشارع
مكتوب بين الهجير الكتاحة وستات الشاي في سور الجامعة
ويا ناس هوووووووووووووووووووي
انا مقتول في حوش السودان الجاي
(عدل بواسطة زوربا on 06-20-2003, 02:45 PM)
(عدل بواسطة زوربا on 06-20-2003, 02:53 PM)
(عدل بواسطة زوربا on 06-20-2003, 03:45 PM)
|
|
 
|
|
|
|
|
|
|
 Re: البت الساكاني وأنا راجي التانية القمرا (Re: زوربا)
|
وريها العلاقة بين الحلقة الآخيرة في المسلسلة وروايع قصص الحب
وريها عندنا نيل منشر في البلد شريان ومافيهو ما يستر همسنا وعشقنا
وريها البت البي طعم المنقة ولون الأبنوس تميل بانة ويميل قلبك لحد كرعيك
قول ليهاالبت المليانة حياوإيمانا عقيدة
قول ليها وقول ليها
قول ليها ياخي انا مسكون عشق في البت عزة المليناها كلام وشعر ورمز وقصيدة
قول ليها عن الأبنوس
| |
|
|
|
|
|
|
|
|
 Re: البت الساكاني وأنا راجي التانية القمرا (Re: Hozy)
|
هوزي
نيلينك و الابنوس والشوق الجاري عليك
عازة عازة عازة
شن القول غير النبقة النزلت سابع أرض تكوس لضي الحبيب
تاهت
مرقت
لقتو
مستنيها في صفقة شجرة أسمها
السوداااااااااااااان
أنا مقتول في حوش السودان الجاي
والريد نيلين
| |
|
|
|
|
|
|
|
|
|
Re: البت الساكاني وأنا راجي التانية القمرا (Re: زوربا)
|
زوربا يا ود اصيل
يا رائع يا كاتب
يا سوداني
ياود النيل
قول ليها
انا بموت في الحلوة
بنت الحلة
وبنت الروضه
وبنت الابتدائي
وبنت العام
والعالي
وبنت الجامعه
قول ليها
اللون الاسمر دوبتي شبابي
قول ليها
عشقتي الجنه وفي الجنه عزابي
قول ليها
صابر بتالم والمر ده شرابي
قول لها
بنحب من بلدنا ما بره البلد
سودانيه تهوي عاشق ود بلد
لك التحيه
يا رائع
| |
|
|
|
|
|
|
|
|
|
Re: البت الساكاني وأنا راجي التانية القمرا (Re: 3omda4)
|
صديقي القادم بقوة : عمدة
نيلينك والابنوس والشوق الجاري عليك
أنا عاشق حتي صرة وشها المابتفكها كل غنواي حليم
أنا عاشق السمرا الواضحة اللسه في رحم الجاي
والريد نيلين
وتاني يا عمدة صدقني البت دي غبياااااااااااااانة
| |
|
|
|
|
|
|
| |
زوربا
جدو
فيس بوك
تويتر
انستقرام
يوتيوب
بنتيريست