|
|
 من الأيميل
|
المشهد الاول : تلاجه في دكان برقاوي
التوقيت: الساعه 11:45 م
البيبسي: شنو يارندويه انتي نايمه وللا قايمه
ميرندا: انوم ليها شنو وانت مصاقرني كده الليل كلو وبعدين كلها ربع ساعه والبرقاوي
يقفل الدكان
البيبسي: هل لي بحوار جانبي معك
(شفتو الحنك والاسلوب الرقيق)
ميرندا: اها شمارك شنو ياده.. بالله عليك قولو بسرعه وخارجنا عشان انا ذاتي مافاضيه ليك
(طبعا حركات منا ساي)
البيبسي: والله ما في شمار كده يقولو عليو بس انا حبيت اسالك بتحبي ياتو نوع من
المواضيع
ميرندا: الظاهر عليك يااخوي انت ماعندك موضوع الليله وداير تفكها فيني و تفور غازاتي بي اسئلتك البايخه اللا ليها اول لا اخر
وثم تانيا انا ما عندي ليك اي اخلاق مش كفايه الخجه الاتخجيتا قبيل في اللوري
البيبسي: (خلاس لقى ليو موضوع) الليله تبري انتي وتستبري يايمه سلامتك مالك الكلام ده حصل متين وفي ياتو شارع ووو
ميرندا: اسمع يانكد يابرايه وفي البرايات النوع المصدي والمشترم الموضوع حصل
وخلاص فما توجع لي راسي براي مصدعه وبالعه رف بنادول كامل
البيبسي: انا برايه ياقزازه يافاضيه يابتاعت تخليل الفول ؟؟؟ هيييي ياانتي الظاهر انتي ما عارفه بتتكلمي مع منو يمين ياسجمانه يارمدانه انا لما اتكلم في المصنع السيد المدير بجلالة قدرو ذاتو بكضم زي الجاتو الجات لي حبوباتو انتي قايلاني هين وللا لين كمان
لا انا ما قصدي كده ميرندا: (احي انا فصلت) بس حبيت اقول ليك انا ما عندي موضوع معين او مواضيع معينه بحب اتكلم فيهم وشايفاك بس عايز تجرجرني في الكلام وفي ونستك وشمارك الخشن فشان كده لو ما سكت انا حاامشي ارقد بره في الصندوق واريحك
البيبسي: مكسب كبير يافرده 00 يلا غوري في ستين الف داهيه تسمم البشربك والبقربك ...غلطتي انا الفتحت بوزي واتكلمت معاك ياروح ماما
ميرندا: اغور انا...تمش تغور انت في لوري تجنيد ماشي الجنوب ياقزازة الكوش 00 ماما ماخاتيا عليك لمن حذرتني و نصحتني منك
البيبسي: اها امك السجمانه المانصيحه دي نطحتك بشنو
ميرندا: ماما نصحتني ياسيدي ما امشي الا مع الجكس النضيف اللمن تشوفو قلبك الجكس المرتاح اللمن تشوفو بالليل تقول الواطه صباح مش امشي معاك ياسود يالون حمار كلتوم ست اللبن
البيبسي: هي هي هي كركركركركر مش زمان قلت ليك امك دي ما نصيحه ومتخلفه وقاده عربي ودين كمان
ووعلى مايبدو ماسمعت بالحديث البقول لا فرق بين اعجمي وعربي الا بالتقوى
ميرندا: بس كتلتها ياها التقوى دي ذاااتا القاصداها ماما 8
البيبسي: اكان كده قولي لي امك المخستكه انني انا اسود والاسود قليلو ومن الليله انا ماعايز معاك اي كلام وسلام الله ماتديني ليو
ميرندا: مالك دمك فار كده يابسبوسي والله انا بحبك وبحب لونك الاسود العامل زي ليل بدون قمرا
بسبوسي انت لونك دايما بذكرني بي شوال الفحم الفي الركن الراقد جمبو الكديس داك 00 كدي انساك من كلام امي وقول لي امك بتقول ليك شنو عني؟
البيبسي : دي اوهامات تجاريه منك ساكت ... واظن انحنا اسن ننهي علاقتنا دي هنا دا واصلها كانت قصة غرام بالشوق بدت ورحلة عذاب دابا انتهت... واندفنت احلامنا الصغيره قبال تفتح على الدنيا وتلقاها ملانه بالغدر الخيانه
والمآسي وبدل يكونو زي حاجه بارده في حفل ساخن يبقو زي كباية شاي مسيخه في بيت عزاء
(شافين الرومانسيه)
ميرندا: ليه بتقول الكلام المتشائم ده والله انا بريدك بحبك بعزك بموووووت فيك وانت لوخليتني تاني انا في الدنيا دي بلقى زول في اخلاصك تاني وين ياحبي ياسميري المكتوب في ضميري .. بصراحه انا بعتبر لونك الاسود ده احلى حاجه فيك يعني انت بالنسبه لي زي شوال الفحم ده للفول
البيبسي: احم احم في البدايه عايز اقول ليك اخجلتي ام تواضعي يارندويه بي بمدحك
شبه الذم ده 00
وكلامك ده اكد لي انك مشروب نفيس وكلام امي فيك كان كلو مغلوط لانو هي ماخده عنك انطباع كعب شويه
ميرندا: ووب علي سجمي يابنات امي 00 امك قالت فيني شنو؟
البيبسي: امي يا ستي بتقول الفانتا احلى من الميرندا ودمها خفيف ورايق وبت ذوات وحاجه موضه كده ومنقه هنديه في السودان 00
ميرندا: هسع العواليق دي لو كان فيها الاوصاف ماكانت تعرسا ليك وتريحيني انا في عمري ده
البيبسي : لا والله يارندويه انت لونك زي لون النقادي الساكن بهنا لمن يتشاكل مع مرتو
ميرندا : اسمع ده لوني وعاااااجبني كده والعاجبو عاجبو والماعاجبو يمعط حواجبو...ووانت ذاااتك لو ماعاجبك قول لي من هسي عشان اخلي ليك التلاجه دي ودواليبها وامشي ارقد في الصندوق
البيبسي: يازعولة اوعك تكوني زعلتي واتعقدتي من كلامي يمين انا كنت بهظر ساي
وفي اللحظة دي البرقاوي بتاع الدكان جا منقشط وفتح التلاجة ورص فيها كم قزازة فانتا كدا
البيبسي: ويييييينك يالفانتا لا كين الشوق ما بالصناديق00 وين الحي بيك من الحفلة بتاعت فرفور ديك وكبيتي الزوغه نورتي التلاجه وبالمره كمان اثلجتي صدورنا هي هي هي يا سلااام00 ايه السعد و الهنا اللي انا فيهم دول
ميرندا: كمان قدامي بتشاغل فيها يااسود يامحروق ياسجم الرماد
ولامن تشاغل ليك واحده قدامي تشاغل الدلقونه العامله زي الكربه دي
فانتا: اسمعي يهلفوته ياجداده يامزعوطه انتي الهبشك منو وحارقه رزك في شنو لو سالوك 00 بسبوسي عليك الرسول كان تنزلا في رف الجداد 00 لانو ان قعدنا نجاريها في الكلام حتودينا الكوشه
البيبسي: لا لا متزعلي جمالك وماعليك بيها يافانتويه البت ضاربه
سلوك(السلوك الاخلاقي) بس ماقلتي لاكين فستانك مارهيب يابت ... جسمك اي حاجه بتجي فيه ظبط
محاولا تغيير الموضوع)0)
ميرندا: انا ينزلوني في رف الجداد ياالجيتنا فجعه وبقيتي وجعه
انزل انا ياموية الحنفيه المصديه ياترباية الشوارع ... اجي اجي اجي ياكرتوب ياتمرجي
فانتا: وووب علينا وكرعلينا دي شنو البلاعه التفتحت فينا دي
باين انتي بايره ليك سنين مافي زول عايز يشتريك
ميرندا: هخخخخ تعالي دغدغيني احسن .... بايره انا ياترترا ياشبه اللساتك الورا ...ياقرقريبه ياوسخ الزيبه يامطموسه يامغموسه يالمابتعرفي الفرنش فرايز من البسبوسه...... قاااادر الله غايتو... هسه يابت دي خلقه تقابلي بيها ربنا
فانتا: لا عاجباني خلقتك .. يعني شناتك دي لو شافا القرد يحمد ربنا بكرة وعشيه انو على الاقل طلع باقل الخساير
البيبسي: كدي ياحلوين روقوا المنقه شويه .. انا بفتكر انو كلواحده فيكم ليها مميزات وليها صفات مستقلة خلونا بس في المفيد
وحوالي الساعه 12 جا واحد اشترى 2 كيلو جبنه وعلبتين مربه ورطلين زيتون وواحد بيبسي وفانتا وميرندا
;
;
;
;
;
;
;
;
(فاصل اعلاني)
;
;
;
;
;
;
;
;
المشهد التاني: عربيه كامري 92 لونها مفروض يكون ازرق سماوي بس الشمس الظاهر ماكان عاجبا اللون داك ... كيسين جيلاني في المقعد الخلفي احداهم قد حوى المربه والجبنه والزيتون والاخر ضم البيبيسي والفانتا والميرنداوكانت الخلفيه الصوتيه شريط كاسيت لندى القلعه
وفي اثناء الطريق دار الحوار التالي
:البيبسي: ياسلام على الساعة الرومانسيه الحبكانيه التي جعلتنا وضمتنا التلاته في كيس واحد واخر انفراد وبشكه بالليمون
(والكلام ده ساعدو بي حبة زحزحه على الفانتا)
ميرندا: ياود ماتخلي عندك ادب شنو لاصق على البت كده اديها النفس شويه
( الغيرة بدت خلاس )
فراولة:0
هسه انتي السألك منو والقال بيك منو انا عايزه اشم نفس خليك في علبك لغاية مايجي طلبك اسمعي يادي
اهي الكامري اخر كندشه وترطيبه
(واخذت تردد مع ندى القلعه)
حبيبي تعال تعال نتلم ما دام الريد اختلط باالدم
ما دام الريد اختلط باالدم انا ذنبي ايه شيلوني
حبيبي المنقه والتفاح حبيبي عسل والناس مساخ
حبيبي عسل والناس مساخ
بسافر ليك عشان ارتاح
( صولا)
بهاجر ليك انا للبحر
محل الطير هاجر رحل
محل الطير هاجر رحل
انت من هنا وللا نت زحل
( صولا)
بستناك انا في الكبري
وبضحي ليك انا بي عمري
بضحي ليك انا بي عمري
عشان عماد سحبوا مني
ياناس عماد سحبوا مني
ياناس هناي سحبو مني
وجب جبجب سحبو مني
البيبسي : يسلم لي بوزك وما ينترم يا فانتا اديها على راسها
( قصدو على الفله يعني)
يلا يلا وسعي شويه يا ميرنضه يامرضنا انتي وخليني اخد لي عشرة ونسه دقاق دقاق مع الجديده الشديده فاتنتي وفتاتي ولب فؤادي
ميرندا: اوكي قلت كده موش؟؟ لا خلاس الفيك اتعرفت يا ده ... وبراك جبتو بلسانك.... وبعدين ماتقعد تنكر ... اسمعني عارف الراجل بمسكو من وين ولا اقول ليك خلي في حنانك (قالتها وهي تحاول ان تفسح له المجال لكي يتحدث الى الفانتا)0
وقبال ما الميرندا تتحرك من مكانا قام سيد العربيه نزل يشيل حاجاتو الاشتراها ومد يدو على الكيس واتناولو لاكين لسؤ حظو انو الفاتتا الكانت حاتو قرض وبترقص مبتهجه مع الاغنية اتملصت من كيس الجيلاني وجات
خابطه الواطه على راسها واتكسرت حته حته
( الله يرحمها)
:البيبسي: اوووووووووف الحمدو لله الوقعت واتدشدشت البرايه وربك رب الخير فكانا منها 00 دي فقر ولايوقه بشكل؟ تعرفي يارندويه البت دي قدتني جنس قد وبرتني جنس بري لغاية مارفعت لي نسبة السكر والصودا في دمي... عليك الله جيبي يديك الناعمات ديل وختيهم في راسي وشوفي الفانتا دي كانت رفعت كثافتي كيف
(شفتو المسلط ابن الذين)
... ميرندا: الحراره التفقع مرارتك بالله العب غيرا الحنان ده كان وين قبيل ؟؟ يعني ياداب انا بقيت ليك غاليه يامفتري
البيبسي: مالك يامرمر انا سويت ليك شنو عشان تقول علي مفتري ؟؟؟؟
يمين بالله كنت بهظر ساي..... انتي صدقتي بي جدك كده؟؟
ميرندا: اسمع يا ود انتا بطل حركات بيبسي العلب دي وقفل على كده .. ما عايزه معاك كلام خالص ...انا خلاص قلبي تعب من الاعيبك دي ..... لاكين برضو عشان انا بحبك حاديك فرصة اخيرة تثبت لي فيها انك جادي في علاقتك معاي
البيبسي: انا جادي في علاقتي معاك ... الله يعدم شبابي يارندويه انا
وقبال مايتمها كان سيد العربيه ناولو لي واحد من ضيوفو وكرطعك كرطعك كرطعك
( ترروعك إترع)
0الضيف لي سيد العربيه: تصدق ياعثمان يااخوي غير ببسيكم البارد ده شيتن بجيبني الخرتوم دي مافي...
|
|
 
|
|
|
|
|
|
|
 Re: من الأيميل (Re: Malaz_Afkarna)
|
..
.
شايفه البيبسي..
غرور و جراه و عدم زوق وعين زايغه و خلي البنوت واداهم فرصه عشان اتشاكلو مع بعضم...اها و النتيجه و ضحت بس المريندا حالتا صعبه كانت
Malaz_Aشكرا يا
وبالجد استمتعت...
تحياتي
| |
|
|
|
|
|
|
|
|
|
Re: من الأيميل (Re: Abd-Elrhman sorkati)
|
ملاذ افكارنا
سلام
تعرفى من العنوان قلت سيبك ده بوست حايكون منقول زى بوستاتى وحايكون بايخ لكن قلبى اكلنى قلت كده النشوف امكن يدينى فرصة انقل واحد جواه كمان..
تعرفى لما دخلت وقريت مصارينى اتقطعت بالضحك
يا بت ده من راسك ولا من كراسك
بالله ادينا من الحاجات الجديدة ده دائما فاول مرة انا اقرأ حاجات زى دى وسودانية مية المية والله
تسلمى لينا
بصراحة روعة
وكلام زول راكب فيل كبير
لك تحياتى
| |
|
|
|
|
|
|
|
|
|
Re: من الأيميل (Re: Malaz_Afkarna)
|
سوركتي: العفو وتسلم
قرشو: انا ذاتى قلته كان اكتبوا بعنوان البيبسي والميرندا لكن خفته اشبوا لى فى حلقى واقولوا لى منقول باقى الأيامات دى قاعدين على الهبشه..
5نأسف للرد المتأخر بس ما شفته الا الليله وجبتوا من بيج
مع انوا الأخ سمبتيكو برضو رفعوا من خلال بوست آخرمشكور
واهو رفعناهو تانى للداير اقرا
وتسلموا
| |
|
|
|
|
|
|
| |
Abd-Elrhman sorkati
قرشـــو
فيس بوك
تويتر
انستقرام
يوتيوب
بنتيريست