|
|
 أهدا: الى نصار حسين الصادق، أبكر ادم اسماعيل و بقية الركب
|
الحلم الجميل
على صوت أبيه المعتاد فى الصباح الباكر صحا من نومه شبه مزعورا. حيث كان ان يلامس اناملها حلما. جلس على سريره برهة يستمع الى ما يدور خارج قطيته الصغيرة. صيحات الديوك، شقشقة العصافير، ثقاء الماعز و نهيق الحمير تتداخل مع بعضها البعض فى سيفونية رائعة مخلوطة بعبير و عبيق الارض المبتلة و شذى النسيم الصافى تعبر و تعلق صراحة عن مولد صباح و امل جديد.
دار تفكيره حول نشاط ابيه المتكرر هذا. فى كل صباح ينهض من نومه مبكرا و مع موعد اذان الصبح يتوضأ و يخرج للصلاة فى المسجد المجاور(الزاوية) و قبيل خروجه من الدار يمر امام قطية ابنه طارقا باب القطية مناديا: ابراهيم... ابراهيم يا تورين... يا ود يا تورين... يا ود انت... يلة قوم...قوم يا ولد. الواطه اصبحت. قوم صلى. و ينطلق الى المسجد و صوت مسبحته تعانق همسات النسيم.
انزل تورين يده الايسر تحت العنقريب (السرير) مع الاحتفاظ بيده الايمن امام فمه المتثائب. و كانه يمنع سقوط لسانه. و هو نصف مغمض العينين. مرر كفه المقلوب فى حركات شبه دائرية و لربما اقرب للحلزونية فويق ارض و من على تحت العنقريب الى ان اصدم كفه يده بالفردة اليسرى للسفنجة المتهالكة المشدودة بقطعة بلاستيكية حمراء ليثبت بقية ما اكل الدهر منه و شرب.
كرر المحاولة لايجاد الفردة الثانية. الا ان الفردة الاخرى لم تظهر. فادخل قدمة الايمن على الفردة اليسرى. ثم وقف و تحرك صوب الباب المغلق و هو يتمايل كالسكران و ما هو بسكران. فلربما اسكره حرقة انقطاع الحلم او صوتها الطروب فى الحلم طالما شرب منه حتى الثمالة او لهذا الاوركسترا الصباحية.
فتح الباب و خرج بقدميه الحافى، و المنتعل. و على شمال الباب من الخارج كان الابريق الملئ بالماء فى انتظاره... انحنى... مد يده صوب الابريق. و فجأة سحب يده. انتصب و اقفا. صار يناجى نفسه فى صمت. لماذا كل هذا التعب؟ قوم فى الدغش(الصباح الباكر)...أ توضى... صلى... وووالخ. هههووى يا وليد... الشايب(الوالد) كم سمع كلامك دا، اليفكك منو الا الموت. و لو ما كتلك كمان يديك محاضرة فى الانسانية، الاخلاق و المعاملات الدنيوية و ما بعد الدنيوية احسن منو الموت عديل كدا. اه!!!... سيبك.
ياخى سيبك. الواحد من ما اتولد شايف الشايب دا قاعد بيكرر فى حاجه واحده. قوم الصباح أتوضى و امشى الجامع و تعال راجع... امشى و تعال.. تعال و امشى. و بعدين صلاتو دى ما غيرت فينا اى حاجة. الفقر مبارينا محل ما قبلنا. شيف حالة البيت دا كيف؟ الحوش عامل زى الغربال و بالعليهو دا كم قلت ليه اف يتهدا من اولو لاخره. و خليك من الراكوبه، لو حمرت ليها حميره واحدة بتجى واقعة.
يا زول... الصلاة دى مش عشان يشيل الفقر و بس... الصلاة كما الشايب و اصحابوا فى الجامع بيقولوا بينزل الرحمة و الطمأنينة فى القلوب و يوم القيامة ربنا بجازيك بحاجات جميلة... زى حور العين و الكوعب الاتراب و الكؤس الدهاق و حاجات زى كده...يا زول دا كلام ساكت. خليك من الحاجات الهناك ... الفى الدنيا البقولوا عليها الدايمة ديك... انا صلاتى فى الدنيا البيقولوا عليها فانية دى، ما جابت لى فيها حاجة. سفنجتى واحدة و مقطعة، و احيانا الحبل النربطو بيها ما لاقيهو. قمصانى اتنين و ثالتهم بدأ يتاكل من لياقتو و اطرافو. بناطلينى اتنين و الواحد الكوردلايت البنى الجابو لى خالى ابكراى ترتر معاه من السعودية لما كان جابوه ناس الكشه داك، قررت ان اعملو ردا بعد شويه لانى شايفو اتقدد فى ركبينو و ما بينفع للقشرة تانى... و لكن ممكن امشى بيه للدافورى او اقعد بيه فو البيت. .. مش فكرة جميلة برضو. و الاجمل من كده، و بعد شوية، الشباب يشوفونى لابسو و يفتكروه موضة و بكره تلقى كل الحلة لابسة اردية و بعد كده يكون مافى مشكلة و يمكن امشى بيه لاى مكان و بعين قوية.
وبالنسبة لعيون الحور و الكؤس الدهاق، انا صلاتى دى ما خلتنى الم فى حوينين بت عم سعيد جلقوا الكل صباح و مساء اشوف فيها؛ ولا حتى كمان زاقيانى عصير القضيم ، و لا حتى عصير العرديب أو التبلدى القايم فى الخلا ساكت و الما عندو حارس ولا سيد دا.
يا زول هوى... فكر كويس و تعقل... الصلاة دى ما للماديات... الصلاة دى للروحانيات ... هى علاقات تجلى الى ما فوق الاجساد و المحسوس. وا... وطيب، اذا كان ما للماديات، و السرر المرفوعة، النمارق المصفوفة، الحور عين, كواعب اتراب, كؤس دهاق، لؤلؤ و المرجان، و فواكهه .... و الحجات الكتيرة البتكلمو عنها دى شنو و كمان بتقول لى ما للماديات؟
يا زول سيبك. انا من اتولدت قاعد اصلى و حتى تاريخ اليوم، ولا حاجة واحدة ما انحققت لى... و لا حتى امتنعت عن التفكبر و حتى اثناء الصلاة. و الاغرب من كدا، التفكير ما بيجينى الا وكت ما دابر اصلى... مره افكر فى الدافورى...مرات افكر فى البحث عن فرصة شغل، و لكن سرعان ما ازوغ لما تجى معاه مشكلة الجيش، او الخدمة الالزامية والدفاع الشعبى و الحاجات ديلك.. . ازوغ من تفكير الشغل و أتراجع من فكرة كيف اتسرع وأ تجوز حوايتين بت عم سعيد جلقوا الحارقه قلبى دا. و مرات اتهرب بالمرة من مسألة الزواج دا، و اختصر المشوار و افكر فى كيفية ملاقاتها اليوم مع العصارى وكفى.
هوي يا زول. انجر طرف. الشايب كم سمع كلامك دا يوديك فى مليون داهية. اه... سيبك... وضوء شنو و صلاة شنو... الصلعة المقابلة الحر... أخوك الليل داكى صلاة. و اتمرد على الشايب و الصلاة معاهو كمان. لكن... انت بتصلى للشايب؟ السؤال دا ما وقتو و ممكن تسيبو لوكت تانى... لا... لا... لا بعدين و لا حاجة نية. المفرض تكون منطقى، و كل شى تعملها، تعملها بقناعة تامة و ما تخلى اى حاجة لبعدين او قبلين. طيب. و بعدين الشايب زاتو ما اتمرد على ابوه... فاكر قصتو البيقول فيها كان ابوه دايما مجننوا بقيام الصباح و يحلف ليه بامهدى عليه السلام ان يصلى الصبح حاضر معاه فى الجامع و كمان يقرى الراتب معاه؟ يا بختك... يا بختك انت يا ود... يا تورين البخلوك تصلى براك و كمان فى البيت. اكيد ابوى انا ما زى ابوه(جدى). ابوى انا ما عندو سيد... ولا بيقول لاى واحد سيد او سيدى. علشان كدا ابوى انا نوعا ما ديمقراطى و بيراعى شعور اولادوا. لكن انت داير تترك الصلاة مره واحدة كدى... و هذا يعتبر تمرد على ابوك و تربيتو ليك و كمان دا يعتبر تمرد على المجتمع الحوالينك كلهم.
طيب ما الشايب قال ترك الصلاة لفترة عشان حركات ابوه البسويه معاه دا... و بعد ما اتراجع و رجع للصلاة مش قال حلف ما بقرى الراتب تانى... و كمان ترك الانصارية بالمرة و بقى تجانى عديل الى يومنا هذا عشان ما فيها السيد او سيدى... أولا سيدى الفلانى ولا العلانى العلتكانى ...طيب دا شنو دا؟ مش هو برضو أ تمرد على تربية أبوه و المجتمع الحوالينو... مالاى شئ اخر، بس لانو كان ما مقتنع بكلام ابوه و لا بكلام الراتب بتاع الامام المهدى الما بودى ولا بيجيب دا... و برغم من دا كلو، معذب بقرايتو كل صباح و مساء؟
يا زول انت داير النصيحة. باختصار كدا، الشايب شاف طريقو براه بدون أبوه و لا السيد المهدى و راتبو. طيب و بنفس المفهوم انا برضو ممكن اشوف طريقى بدون ان اتبع ابوى و تجانيتو البخلينى أقوم كل صباح و اتوضى و أصلى و أفضل اكرر طول عمرى فى حاجة واحدة مثل القصة البتقول دخلت نملة و اخذت حبة و خرجت...دخلت نملة و اخذت حبة و خرجت...الخ.
هو يا وليد. كلامك دا بقى كبير شوية، و لو أستمريت فى نوعية التفكير دا، حتروح فى مليون الف داهية. شوية شنو و كتير شنو و داهيه شنو؟ و بعدين انا بنتكلم مع نفسى و كمان فى سرى و مافى زول سامعنى. و الظريفة كمان، االشايب لسع نايم على نغمات سبحتو فى الجامع بتاعوا، و الحاجة (الوالدة) ركعت بدرى... و كمان قاعدة بتولع فى نارها حقت شاى الصباح... قلبى عليكى يا الحاجة من التعب دا... لكن سامعكم بتقولوا مرت الفكى مجبورة على الصلاة ، فهذا نصيبك... و كمان سامع الناس بيقولوا ، الفكى بيلدى ذنوبو... و هذا نصيبى . انا المحظوظ، لا صلاة و لا... وأنت الضحية يا الحاجة، كل يوم... و لكن...لكن... هااااااح هممم. و كان ذلك على أثر نهيق حمار من على البعد. توالدت فى دواخله أمواج و شلالات من العطف و الوداد و العشق بانت فى ملامح وجهه فارتسمت على شفتيه أبتسامة. كل هذا لانه يعرف جيدا و يحفظ صمتا نهيق حمار عم سعيد جلقوا والد حوايتين التى لا تتركه حتى فى أحلامه. و التى كانت معه قبيل ثوان.
أنحنى ثانيا... أمسك الابريق. دلق كمية من محتواه على الارض تكفى و توحى بوضوء ثلاث أشخاص أو أكثر. ثم... و بنفس الانحناءة...ولج الى حيث العنقريب. و كانه على موعد لاستكمال الحلم.
احمد محمدين ضوالبيت
|
|
 
|
|
|
|
|
|
|
|
Re: أهدا: الى نصار حسين الصادق، أبكر ادم اسماعيل و بقية الركب (Re: Ahmedain)
|
محمدين
يا قريبي
أشكرك على الإهداء
قراية أولى
عجبني
الحلم
المنولوج
واستدعائك لأيامنا الزمان ومشاكلنا مع (الشياب) وصلاة الصبح والأسئلة والمضامين
فيما يختص بالسرد باللغة الفصحى، فهو جيد ولكن فيه مشكلتـ(نا) مع الفحصى ـ تذكير المؤنث وتأنيث المذكر أحيانا، وهذه المشكلة يمكن معالجتها بتحرير النص، أما ورود نفس الشيء في الدارجي، فليس فيه أي مشكلة حسب تقديري، بل أنا اعتبر ذلك من جماليات الأداء وجزء مما يمكن أن يسمي تعدد الأصوات اللغوية في السرد
هناك مشكلة أخرى، وهي حضور الكاتب في الراوي من خلال الشروحات، التي حتى لو كانت ضرورية لبعض الكلمات مثل (عنقريب=السرير)و(الدغش = الصباح الباكر) مثلا، فيمكن أن توضع في الهامش، حتى لا تشوش السرد بتدخلات الكاتب
وعلى كل حال أستأذنك في أن أقوم بتحرير القصة، حسب معرفتي المتواضعة بالتحرير، وإرسالهاإليك لأعادة نشرها، إن وافقت على ذلك؛
كما أرجو أن تهتم قليلا بالمسائل الإخراجية للنص، فهي مهمة، في رأيي
ولك كثير ودي
| |
|
|
|
|
|
|
| |
أبكر آدم إسماعيل
فيس بوك
تويتر
انستقرام
يوتيوب
بنتيريست