انا مفرود في وش الموجه بعاند في القيف وطول النخلة و أعاندني أتساقط في معراج الجب .. أفتش لي ملامح تشبهبني غير مزيكة فراشة في حالة حب ما لقيت التكتح ( قيل أن فراشة أحبت فاتهمها الطير بالذندقة والقيت في النار بردا وسلاما ) جاني فاتح صوته رصاصتين ومدفع : يازول اقيف ... أي أنت : أنا واقف من صباح العتمة الفيك .. اقيف انت ... سرقت الشوف الفينا وبواقي العرس الاخضر مالك متضايق القدامك نار و وراك العسعس .. متضايق ( يقول الاعراب : سقط فلان ما بين المطرقة والسندان ) أي اتزنق في زقاق ضيق بين صبيان الكيزان يا زول أقيف : أقيف انت سندانك ما بوجع إلا المتوكل علي المافي من الأرض انا حيلتي ايه غير عشق الأرض تقول الاعراب (عشق فلان) أي أتكسر و اتدشش حتة حتة يازول اقيف : مالك معاي ... فرتق شوف ماذنتك بي وين ... صلي صلاتك أنا بفتح لي وللجاين من جوة الجب مأذن .. بغسل كل المنا ببعض صفاء الواطة واسبح بحمد الابنوسة الشالت أسمي مائتين وخمسين رمله و بفرش ضل غيمتين وأصلي لى الله يا زول اقيف : سجم خشم الغشوك بالتين و الزيتون .. منو القال ليك الجنة تحت أقدام العسكر ... و لا الصبح الجاي مرهون بدقن سيدك وشكلاته رضيت أمك ولا مسحت عربية سيدك دقيت المحلب و لاشلت القفة في مشوار الحلة وقعدات الأنس تقول الأعراب ( خدع فلان ) أي اتدقس دقيست السنين وتاني تقول لي يازول أقيف قطعت شرايين شمس النهار وانحنا وقوف وسكنا المنافي والماتم وأنت واقف أفوت الصوت .. رصاصة من ورا تفتح من الجب معراج عكاز بورا ..تتطلع طقوس البن المحروق من ستات الودع الماشايفين وعلي قول رفيقة الجنترة ( شيري ) زح كدة ها السنيح دا وتقول الأعراب ( أغرب عنـــــا ) أي شتت ...أقطع وشك ... شوف سيدك بي وين صباحكم نيلين والرقصة الاخري نودعها رحم الحزن المتأكل تجدد ايقاع القهوة والعتبي لمن غاب في خرق الفواصل ولم يدرك ( درب اللقيا
الوضاء فيني حد الفرح ... الخواض نفس الصوت بفتح ريحة الساكن فيك ما بطلع لا بالسندان و لا عكاز البدو الرحــــــــــل ابو أنور ... طلاتك نيلين ... الأول شكرا والتاني أربعة وعشرين ترمة ريد من عندي لي جواك الزولة جدا شيري : ممكن تكوني المزيكة أما الفراشة في علم الأنسرب الي البطين .. تاكي الباب لي جوا ...
06-17-2003, 03:09 PM
جدو جدو
تاريخ التسجيل: 03-19-2003
مجموع المشاركات: 731
ياجميل الحرف يانيق البيان يازوربا علمنا كيف الكلمة تبقى رصاصه فى صدر العدو أو ريشة فى ايد الحنان ما تخنع أو تركع مهما حاولو أو داورو دايما خليكا فى الصف الامام بشرى
06-19-2003, 09:57 AM
nazar hussien nazar hussien
تاريخ التسجيل: 09-04-2002
مجموع المشاركات: 10490
زوربا بترفع راسي كل يوم . ستكسر بهذه الطريقة رقبتي . لازالت نصوصك تصعب على قدرات ومعايير التصنيف ، أخشى ان تصيبنا بما ظل مبدعنا بشرى الفاضي يحذرنا منه ، ان نسمى النهر والبحر والبحيرة والمطر والجدول ماءً . تعجبنا ياعزيزي . واصل تحطيمك لكل ما نعهد ، فالمبدع كما يقول ادونيس لا يمكن ان يكون مبداعأً الا اذا كات تخريبياً .
06-20-2003, 02:15 PM
زوربا زوربا
تاريخ التسجيل: 06-08-2003
مجموع المشاركات: 733
أبلغني أحد الاصدقاء أن هناك ثمة تشابة مابين عنوان النص ونص أخر للاخ الفاضلابي هو تشابة غير متعمد أطلاقا وبكل الاحوال الأسبقية للاخ الفاضلابي مع فائق الاحترام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زوربا
shiry
جدو
bushra suleiman
nazar hussien
تراث
فيس بوك
تويتر
انستقرام
يوتيوب
بنتيريست