|
|
 كتابة علي جسد ضفة يفصلها عن الأخرى أنا
|
مدخل أول :
شوفك شوق
والشوق الكايسك بنده :
غيابك في مسالك الضو مخاض
نص :
يا مارقة مني ودافقة فيني سيرك بعد النضوج
جددي الليل مناخ للإنتباه
الغي حاجز العتمة البينا
بطلع من الغبن الفيك
أقدح تضار يسكِ نهار و أبقالك نجمه
لاخنت البينا ولا بعتك
شريتها عيونك لفرح الغيمة الجاية
طلقت أيدينك مجداف
شايل الصدى نكر قدام
رجع القيف
طاطيت علي الأرض فاضي
ختيتك في حس الشارع بيناتنا
ولا خنتِ البينا لا بخلتِ
مديتي أيديك و اديتي
قصيتها صوابعكِِ جنحان
فريت منك وطرتَ
نتف ريشي صقر الجديان ليك العتبى وما ترضي
ليك العتبى وما ترضي
جابتها عيونك بنية فال
شبّتَ
بقّتَ
مُر
ما ترضي
وأنا بين الريح ساساقك
لو همسة منك ناوشت شوفي الجريح
يبقي البينا
نيلي
وضفايرك خريف
ويتفتح الف باب
بابي اليباس بابك لقا
حاشاك الضهب حاشاني اللقا
حاشاك من حاشاي خوف
حقن تمر السما جوطة نفس مسموم
رشحت جلودي الطين
طينك
طيني
نتوسد مسام الرمل الراقص
يكسر لحن الألفة البينا نشاز مسدار
المسدار :
يا أبو العازة
قمنا دغش سن الحربة بطاعن في جراب السيف
وموية الأزرق طعم الغم
قعدنا بليلنا نجرح في جروف القيف
نكتب الأبيض لون الدم
ومرسال الشمس البيضا يا أبو العازه
طالق جنحاتو فوق الحله
قعد بي ليلو يدوبي يسوى فوق الهمه
فتح حيشانو قالد سيفو صلح شنبو خته العمه
صبح بي صبحو طق الصوت كايس اللمه
وقت الحارة رجع لدارو رقد أنجمه
جنس الحالة يا بو العازه شن الضو وشن العتمه
شن الدين وشن الذمه
.....................................................
وأرافقكِ في مسافات الفواصل
نشهد علي البسرق دعاشنا من رشة نفَس البيادر
أتلو عليك صورة الوعد العشانك
لو كتر التيه نشف ضراعك
أقلدى المنك فينا وإتعافي
أتوهطى رذاذ الروح
أسلكَ من ورثة الخلق
أمرقك من مجامر الدين
أدسك في بحر أبنوس
أكتب البينا لالوبه
و أحاوركِ في هوية الدم
في الأبيض مزجكِ بالسيف
في الصفق الأزرق بتساقط
والبذرة الفيكِ معوجة
تفوتي رؤاي تتمدى
أشاهدك في خطوط الطول تهاتي لمدن جايه
تكسري رحلة العقل المسطر من وراي
تبنيني نشيد أطفال
النشيد :
فاطمة وميري
نمة دوبيت / صفقة باباي / إيقاع تم تم
تعبت من حلق الغابة
مرقت في طرف الصحرا
لاقوها العرب الرحل
أدوها بواقي النخلة
ركزت راكوبه وقعدت
شربت كاكاو بالتمرة
....................................................
أعلن نشيدك ميلاد للخلق
أتحكر طقوس ريدكِ
الملم خرط الدروب الجايه منكِ
أقرا تاريخكِ في الوجوه
أتأمل تفاصيلك واندهش
لامن ألاقي ملامحي فيك
أشيل فهمك معراج للشوف
أغيب وعيي وبشوقك احلق
أيمم قبلتي عديلتك وزين
أسمع زغاريدك صلاة
وأتبارك بمطر عينيك
وأرجاك في الضو المنك
علي خاصرة حلم ما عرفتو من وين ببتدي
علي خارطة سفر ما عرفت فيها من وين الشروق
إلا يا حليوه زي ريحة المطر
سكتك إتجاة كل الدروب
ما مريتي في يومك علي زول
موغل في فرض الشوق وراجيك في الضو المنك
مدخل تاني :
شوفك شوق
والشوق الكايسك بنده :
غيابك في مسالك الضو ميلاد
|
|
 
|
|
|
|
|
|
|
|
Re: كتابة علي جسد ضفة يفصلها عن الأخرى أنا (Re: AlRa7mabi)
|
العزيز سمندل : أنا لا اطارد أحدا لكن بصراحة البوست كان تحت وحبيت ارفعه ... بالمناسبه أود أن اطاردك انت لكن صعب شديد
الرائعة جدا شيري : ممكن اقرطع الشاي واتاقي ورا الباب وما(أشتت ) أنتظر أشراقك بمعني الممكن من الفرح
العزيز رحمابي : كعبة كعبة منك برضو كويسة
لك منى هذا الود حتي عندك
| |
|
|
|
|
|
|
|
|
|
Re: كتابة علي جسد ضفة يفصلها عن الأخرى أنا (Re: Hozy)
|
هاي .. نيلينك والابنوسة والشوق الجاري عليك
هوزي السمحة ( حروفا )
أعاين في العين الواحدة وأندهش ... أفتش للتانية في الحرف الأنيق
واندهش أكتر
قلت ليك : اسمك نور خيام البدو الرحل بعد طول العتمة ونورني
شكرا لزيارتك الأولى وأن شئت كل بوستاتي مشرعة لحضورك الآخر
و الريد نيلين
| |
|
|
|
|
|
|
| |
زوربا
shiry
AlRa7mabi
altahir_2
فيس بوك
تويتر
انستقرام
يوتيوب
بنتيريست