الفي الزقاق مركون.... محجوب شريف ودعوة الى التبرع

الكبرت عليك
والفاض عن الحاجة
المنسي في الدولاب والجوا تلاجة
الفي الزقاق مركون فردا وأزواجا
الكرسي في الحمام..البمبر المكسور
أو باقي دراجة..
وال..بالهوام مسكون والأرضة وازعاجها
ما كان، غدا حيكون للصابر الممكون
يسدوا كم فرقة
ويسدوا كم حاجة
الناس اذن بالناس..ما تقيفوا فراجا
خوفي المدن تنداس ..لو دونما احساس
اتعلت ابراجا
كم من ولد..لا أم .. لا بيت.. ولا حاجة
يا حليلو ما بحلم..مدرسته قد فتحت
قدامو ادراجا
لا بحس بالعيد لو مر..أو ما جا
يتوسد الطرقات والحمى سهراجة
هوج الرياح في الليل..ساكيهو كرباجا
الجمرة تحت العين..ما بكرة نتفاجا
الغبن ذو حدين والفتنة مزواجة
الواحد يبقى اتنين والستة افواجا
طقس التسامح زين القمرة وضاحة والشمس وهاجة
فلتفتح الأديان بيناتنا نفاجا
نتدفى بالحسنى وبالسلم نتناجى
كل العشم يا ريت
ما يبقى زول محتاج..ما تبقى محتاجة