|
|
 كهرباء بالماجي
|
لدي بعض الأفكار الإيجابية حول كهرباء السودان،، لكل المناطق،، الفخمة منها واللا فخمة.
الغريب أن المناطق الفخمة في السودان،، والغير فخمة،،، تتشابه،،فكلمة (فخمة) هذه اصطلاحا،، فأي مكان فخم في السودان ابتداء من فندق قصر الصداقة السوداني الصيني،، وحتى الحلة الراحلة وكرتون (سان جوزيف) ، كلها مليئة بالكوش والباعوضة واللازي منو ،، الشئ الوحيد ذو الفرق الكبير،، أختلاف مذاهب بعوض المناطق الفخمة في السودان،، عن مذاهب بعوض المناطق اللافخمة في السودان،،مذاهب دي من ذهبت،،
المناطق الفخمة ملئية بالباعوض أكثر من المناطق اللافخمة ،، مما يدل على ذكاء الكائن الباعوض،،فهو ، الباعوض يعني، كائن مستذوق،، يعني يمشي ليه لي زول كلو ضعف ونقص سكر يمص منو شنو؟؟؟ موية بلاعة؟؟!!!
فكرت أنهم في المناطق الفخمة، يمكنهم الاستغناء عن الكهرباء واستبدالها بمقولة (نورك ضوا الكهارب)،، يجمعوا كم واحدة من فاتنات الديانا ولبن النيدو والراحات،، يختوهم جنب عواميد النور،، يبقوا الضو،، اليس الشاعر من قال (لما شفتك ليلي ضوا وبق نور؟؟ ) وبعدين قام قال (اضحكي،، ضحكك نور عواميد النور؟؟) هو شئ من هذا القبيل؟؟؟ لتعمل جميلاتنا عواميد نور،، فيها شنو يعني؟؟ جهاد نوري !
أما عواميد النور الأصلية،،فيا حبذا لو وضعت الدولة يافطات إعلانية في كل عامود نور تقول (مراحيض كلاب) وأظن بارجيت باردو ستنبسط وتنبشبك وتفخر أيما فخر لاعتناءنا القويم بالحيوان ورعاية الكلب المسكين.
وفي الأحياء اللافخمة،، اساسا ما ضروري كهربا،، فهذه البشر،، لا تملك تلفزيونا،، ولا غسالة،، ولا مكيف،، ولا حتى لمبات ذي الناس،، لتستهلك كهرباء،، ثم أنه لو كان الفحيص المحترم،، يكتشف داء الملاريا والدسنتاريا والإيدز بتلك اللمبة المصابة باليرقان،، والتي تتلولوح ذي العندها شلل اهتزازي،، إذا كان بنظره اليمامي،، من زرقاء اليمامة إذا استطاع استكشاف تلكم الجراثيم المنمنمة الصغيرة الحلاااااتها قدر ده صغيرونة،، فلا بد أن الطالب المسكين،، مثلاً،، في المناطق اللافخمة،، مثلاً،، لا بد له أن يستطيع تغيير فيزياء العين البشرية وكيمياؤها،، فيرى حروف الكتاب المدرسي ،، فيذاكر ،، ليدخل الثانوي،، ليمتحن الشهادة،، ليباري الكفلاء،،، اساسا الكهرباء دي ما ليها فايدة غير للمذاكرة،، بما أنه لا أجهزة كهربائية هناك،، وهذا اساسا بافتراض المستقبل،، حيث تستطيع الحكومة،، اداها الله الف عافية،، توفير كتاب مدرسي لكل طالب،، ليستطيع المذاكرة فيه،، عندما تقوم الكهرباء بالسلامة وتتولد.
وربما وجب لفت انظار حكومتنا الرشيدة،، إلى أن المستشفيات من الأشياء المستهلكة للكهرباء،، يعني ممكن تصرف الحكومة كتير وتخسرها،، ولكن ببعض التفكير،، يقفز تساؤل،، لزومو شنو؟؟ لا دواء ولا سراير ، لا نقالات ، لا أدوية ، لا اطباء،، ما لزوم الكهرباء؟؟ !! خصوصا أن الكدايس المستوطنة هناك حماها الله،، بتشوف في الضلمة ،، يعني لا تحتاج للمبات نيون من الأساس.
بعدين مالو سوق النسوان؟؟؟ والقرض والكول والجعران؟؟؟ اقترح أن ترفع الدولة شعارا شبيها بشعار فلنأكل مما نزرع،، ويكون (فلنشفى مما نفرش) باعتبار سوق الملجة وفرش الخضار وكده يعني.
كما اني اشيد بمطار الخرطوم الدولي،، أن النبي فوقك كان ما استغنيت عن الكهرباء،، أو يمكننا تطبيق مبدأ التعاون العربي ،، وذلك بسحب سلك توصيلة من بيت الجيران ولنقل جدة مثلاً،، لاني ما شفت غيرها من الدول ،، ومده لبيتنا السودان،حتى نستطيع أن نكوي مرات لو اهلكت عضلاتنا مكاوي الفحم،، ومرات مرات نشغل الرادي، تماما كما فعلت جارتنا يوما،، فرمت توصيلة طووووويللة،، ونادت من الطاقة قائلة (بت بدور،، شدي السلك ده لامن امك تجي ادونا شوية كهرباء وقطعة ماجي) ، وذلك عندما قررت أمي التباهي ببعض الكهرباء،، فذهبت للإدارة المركزية،، ودفعت (كاااااش داوون) واشترت كروت كهرباء ممغنطة ومكبرتة،، من كمبيوتر،، واتت بها إلى منزلنا العامر،، وبعد محاولات عديدة،، شغلتها في الكانون،، لانها اكتشفت على غفلة،، أنه اساسا اساسا كهرباء بيتنا ليست مبرمجة،، لا شئ في بيتنا المتواضع مبرمج،، لو استثنينا الباعوض والذباب يعني،، فكلاً يؤدي ما عليه باتقان،، بطريقة دورية منظمة،، الذباب الصباح،، الباعوض بعد الضهر،، تبارك الله ما نسحرهم.
ثم أن جدة دي بالذات فيها كهرباء فارغة على وزن كلام فارغ،، فماذا يعني أن تركب الطائرة وتناظر من هناااااك الأنوار ملعلة تمد لك في لسانها في كل مكان،، وتذكرك بماضي المسلسلات البعيده؟
حتى الشجر اليومين ديل بنوروهو في جدة فيما يسمى بظاهرة النخل المضئ،، جنب شبرا،،وبهذه المناسبة،، انحكي ليكم ، حلمت يوما حلما لا منطقيا والشيخ عندما حكيت له قال بشراك الثروة ،، خير اللهم اجعله خير،، حلمت أني امتلكت نخلة مضيئة،، تبق،، وذهبت بها للسودان،، ومررت بها من لجمارك،،، بعد أن الهب لهيبها أعين ضابط الجمارك وهو بتوضى بالسفنجة في صالة كبار الزوار،، ذهبت بها لمنزلنا العامر،،، وتج،، وضعتها في قلب الحوش،، وسقيتها موية رغم أنها مكهربة،، فاتت الوالدة تزغرد وقالت، أيوي يوي يوي يوي أجي يا يمة نخلة السرور والخاطر المجبور،، ووضعت لها سوراً كالذي عادة نقيمه حول الغنم، مع أني للآن لا ادري السور ده حيحميها من شنو بي قلة أدبها دي،، وكتبت يافظة كبيرة وقالت،، هنا مزار الكهرباء،، ويوم الجمعة الصبااااح، بدري ، الناس بقت تجيب عيالها تزور نخلتي المضيئة ، فسحة وسياحة،،ورحلة تعليمية تعريفية للشفع.
ثم أنه يا ليت الحكومة الراشدة لو صدرت لنا من بعض الدول تلكم الحشرات المنيرة،، تكمل الناقصة،، لاني الحقيقة لاحظت في الفترة الأخيرة،، نضوب الذباب،، وتكاسله في العصريات،، إذ ييرد الهمة،، ويدوخه الحر،، فيتكاسل،،، ويطير كده ذي السكران،، ويتلصق في الوش،، ويتلاااازج،، فيقصر في أداء مهمة التايفود والدسنتاريا،، وهذا في رأي،، تسيب كبير.
ليس هناك كبير حاجة للكهربا في السودان،، هو بس الشعب السوداني تعلم الضجر من كل كبيرة وصغيرة،، ليأخذ عبرة من حبوبتي،، حيث استيقظت يوما صباحا ، فوجدت أن الكهربا ضلت طريقها لبيتنا فقالت مخلوعة،، أجي،، بسم الله يا اخواني الليلة في انقلاب؟؟ الكهربا دي مالها؟؟)
كبر الله عقلك يا حبوبة وجعلك زخرا للدولة ودعماً... ماذا يعني أن تتشوشو بالحر بدرجة حرارة 45 درجة فما فوق؟؟
لازم يعني يشغل الشعب السوداني مكيف واللا يشرب موية باردة واللا ياكل بطيخ؟؟ ثم أن المزيرة لو وضعوا فيها شمامة،، لبردت وبقت سااااااااااااقطة،،، تبل الريق،،، واساسا كيلو الشمام يرهق الراتب الغلبان تاكلوا الأكلو جدي السمح ومات ماكلين ليها شنو؟؟
ما بال الشعب السوداني ينادي كل شوية والتانية،، التلج التلج التلج،، ما يسوي التلاجة دولاب،،، وبالنسبة للحمة،، فلا مشاكل،، قريباً سيتفتق ذهن سوداني حكومي اصيل،، عن تشغيل زير بالشمعة،، فتنقلب فيزياؤه هو كمان، ليصبح ببساطة تلاجة للحمة ،، وديب فريزكمان، بما ان التلفزيون خالف صانعيه و اشتغل يوما بالبطارية في السودان، ودقيقنا خالف اوامر الجاذبية وفتتتتتتت ،، تفتفت للمجاهدين من السماء يوما ما.
ليسعد الشعب السوداني البرطام،، فربما نحن الشعب الوحيد الذي يشحد كهرباء بالماجي من الجيران.
وجب على الشعب السوداني أن يتكاتف مع الدولة لا أن ينقنق كل شوية في راسها،، وليبارك خطواتها السديدة في إعادة مجرى الحياة للعشرينات من ا لقرن التاسع عشر ،، حيث الخيام والأفيال،، والجمال، والركشات، فإذ ربما لو عدنا إلى ذاك الوضع،، من يدري ،، قد تنبثق بئر بتروك،، تماما كما تنبثق الوزارات اليومين ديل ،،
قد تنبثق بئر بترول،، ونصبح في ليلة وضحاها،، المملكة العربية البشيرية،، قادر الله.
لذا اناشد الشعب السوداني الصبر،، على الحرارة،، وقطع الكهرباء،، والتعليم الفاسد،، والصحة المتدهورة،، والسوق السوداء،، وسوق سعد قشرة برضو،، وانحراف النساء،، وشذوذ الرجال،، وغلبة الدولة على الدين،، واللا سموها شنو ما بعرف،،، بسيطة يا شباب ،،ما في عوجة،، لمينا الثلاثة عجلات،، باقي لينا الرابعة،، ونكمل العربية.
وما همانا زيرنا معانا.
|
|
 
|
|
|
|
|
|
|
|
Re: كهرباء بالماجي (Re: Tabaldina)
|
سلام مربع
حبيبة البي بت قضيم
حلوة حكاية النخلة البضوي دي
حلم عبقري
حد التصوف
عارفه من دربي دا ، النقوم نحجز لي درب
لي سلك نجر
من جدة وحتى بحري
حيث يقبع بيتنا في انتظار (شوية) كهربا
انشاء الله تولع لمبة المطبخ
التلفزيون كهرونا فيهو
اهو الحمد الله كهربا ليهو مافي
ذاتو ، نرتاح من ابو راس
وابعمه
وابو جضوم
وابو عصايه
وام وش
وام توب ااصصصصصصصصفففر
ثلاجةةةةة؟؟؟؟
بري يايمه
نخط فيها شنو
التفاح ولا الكرز
ولا اللحمه التي يباريها ضبان اخضضضضضر
كرشو زي القزاز
اول مرة اشوف لي ضبان كرشو
ذو كرش زجاجي زبرجدي
تقول مصنوعة في اليابان
موش مخلوقه
؟؟
لغينا الثلاجة
طيب والتلج
ولا تلج
يعني لازم
نجيب تلج عشان نشرب مويه
هي ذاتها ويني المويه
اللي بنحطروها تلج
اول مرة اشوف لي موية لها شكل الطين ورائحة السمك
اذن لاحاجة لنا لكهربا
عشان عرس ام بالينا
شرط يعني تقعد في الكوشه عشان الناس تعاين ليها
ما ينتطروها لمن تبدا زيارات مع العريس
اوهو اليوم داك ياحلات الفرجة فيها
من توكة شعرها الى منكير اخمص كرعينها
حتى اللون الاشتر الذي تطقم به مع شنطته سوف نشنفه وهي اصلا تخاف كثيرا ان تمشي بالليل لذلك سوف تجينا زايره غصبا عنها بالنهارات
وساعتها لن تفلت منا
اذا لما نحتاج الكهربا
عشان نشوف الريس ابو طراررريم داك
ولا الزول الارزقاني داك العامل باب الحديد الذي صبت فيهو مطرة قبل ان يضربه اسياده بوهيه
فلا يمكنك ابدا ان تعرف ان هذا باب ولا فجوة ظلاميه
كذلك هو ذاك الوزير الذي كل الوقت مكوضم
قاتله الله اكان جايب لي الجلا
خليت نشرة الاخبار عشانو
اذن قولوا لماذا نحتاج الكهربا
خلاص نحتاجها في
في الشارع بس ، عشان لمن عربية الريس
تجي بشارعنا تقوم تشوفهم غنم ناس ام بالينا
وكلاب ناس ست البنات
ويقوموا الكلاب يسكوهو
والغنم يجرن وراهو
ونعرف ان هذه السيرة
تشابهة اقدارها ونياتها في كل شيء
| |
|
|
|
|
|
|
|
|
|
Re: كهرباء بالماجي (Re: بت قضيم)
|
| Quote: فيرى حروف الكتاب المدرسي ،، فيذاكر ،، ليدخل الثانوي،، ليمتحن الشهادة،، ليباري الكفلاء،،، |
لووووووووووول
| Quote: جمعوا كم واحدة من فاتنات الديانا ولبن النيدو والراحات،، |
الليلة في السفارة مشيت اجدد
شفتا لي اربعين كيلو واط ..اربيعن كيلو واط ممتحن
امتحنت
ودخلتنا كلنا في امتحان
نور على نور
يا ربي الجامعة دي ياتا؟؟
| |
|
|
|
|
|
|
|
|
|
Re: كهرباء بالماجي (Re: بت قضيم)
|
شيري صديقتي
الآن فقط انبثقت لي فكرة جديدة
الناس المهمة لما النور يقطع ليها،،، تقوم تركب ليها جنريتر في راسها على الأقل كلام الشماسة ينطبق عليها تماما
ثم ليستقدموا لنا فلبينيات،، كل واحدة تمسك مروحة صغيرة تركبها في راس الزول المهم،،، شان الحر والإجتماعات والزحمة وكده
تسلمي للحضور
معتز يا ذوق
لووووووووول على ثلاثة وواحدة مجانا
اتقطعت فيها
بعدين انا عندي حل ممتاز لموضوع الفرش على قارعة الطريق دي
يشيلوا الطريق
بس
انتهى الموضوع ببساطة
سلمت للحضور
دكين ابو وش
دي الجامعة الأتخرجت منها انت
| |
|
|
|
|
|
|
|
|
|
Re: كهرباء بالماجي (Re: ايهاب)
|
بت قضيم
كيفنك
كويس انكم الكهرباء بتشحدوها بالماجي
نحن بالقدحة ما لاقينها
هسع غايتو شيري كتر خيرها
قالت دايرة توصل لينا من القصر الجمهوري
| |
|
|
|
|
|
|
|
|
|
Re: كهرباء بالماجي (Re: بت قضيم)
|
ايهاب
والله ناس السودان عينم طلعت
بس كلو كوم وكروت الكهربا وامي كوم
ثم أن عليك بالبارد
تخيل رغم التانج الواحد بشتهي كوز ليمون بارد من اكشاك المواقف؟؟
ودي زاتها قالوا كشوها
والله بعين
جدو
الحمد لله
انت كيفك؟؟؟
وبعدين اخالفك
القدحة أجدع من الماجي مية مرة وحبة
ومد لينا من السلك ده وصلة زيادة
بس امي تبطل الكروت دي
وتسلم
| |
|
|
|
|
|
|
| |
بت قضيم
shiry
motaz
ايهاب
جدو
فيس بوك
تويتر
انستقرام
يوتيوب
بنتيريست