عندي احساس غريب جدا بانه الناس البتكتب في المنبر دا كلهم كذابين بيحاولوا يتكلموا عن عالم مثالي ما موجود في ارض الواقع او بيحاولوا يعكسوا صورة مثالية عن نفسهم يعني الواحد بيديك احساس بانه ما بخطأ ابدا وما بيغلط واذا حسوا باقل هفوة لواحد في اي بوست تلاقي الجميع دخلوا يدوه درس في الاخلاق واداب السلوك مقولة سمعتها في فلم امريكي ما عارف اصلها شنو انه الجمهور غبي والفرد زكي حتقولوا لي الرابط شنو بين الكلام دا وكلامك حاقول لما تتكلم في بوست وتشرح وجهة نظرك تلقاالجميع يهاجموك في البوستات لكن اذا واحد من الناس الهاجموك ديل اتكلمت معاه في الماسنجر او باي طريقة فردية وشرحت وجهة نظرك تلقاهو مؤيد ليك احيانا عكس الكلام القاله ليك في المنبر العام دحين يا ناس انتو كضابين ولا انا مطشش واغير النظرة دي كيف
05-21-2003, 11:51 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
والله انا كضابين دى ما بقدر انفيها ولا اكدها ليك لكن بالجد مجامليين بصورة تثير الدهشة يعنى تمشى وتجى تلقى مدائح نبووية عديل كدا الناس تمدح فى بعض وتجامل بعض حد الملل خاصة مع ظهور شخصيات انبهارية انا ما عارف متين نتناول القضايا والنقاشات فى جوهرها وليس بغرض مجاملة شخص لمجرد المعرفة او الاعجاب او الصداقة
سلام تانى بالمناسبة انت قاعد تكضب ولا تجامل لا خيار ثالث
تعرف يا أساسي واحدة عندنا اتزوجت واحد مابتعرفو قبل كدا أها جنها وجن التمباك طبعاً جهزوا ليهم عشان شهر العسل صاحبك اول ما البكسي تحرك شوية قام فتح القزاز وبصق السفة طوالي العروس قعدت تبكي وقالت ليه ليه ما كلمتني انك بتسف قام قال ليها نحن أسرتنا كلها مشهورة بي تلاتة حاجات بنسف وبنكضب وبنطلق النسوان
دي ذاتها كضبة عامل خلقتك دي
05-21-2003, 12:13 PM
قرشـــو قرشـــو
تاريخ التسجيل: 02-05-2002
مجموع المشاركات: 11385
ياخوى والله استفدنا كان كضب ولا مثاليات ولا مجاملات
لكن انا بقول لو كان فى نقض ظريف ومقبول من الناس الكبار
للناس الصغار بكون احسن يعنى مثلا ابوقوتة عامل فيها شاعر
ايام الهند لان الطشاش فى بلد العمى شوف لكن لو وجدت واحد من الشعراء الفطاحلة وقام قال لى يابوقوتة شعرك دا قديم وبحرك ما تجريدى ولا حر بس بشبه صوت الباعة فى سوق ابوقوتة,بس انت بتهتم بالوزن والموسيقى وما بتعرف الشعر الحر كان بفرح وبحاول اتعلم اكتر لكن... اه...ياساسى ودا برضو كضب انا لا شاعر ولا حاجة
05-21-2003, 12:31 PM
HAMZA SULIMAN HAMZA SULIMAN
تاريخ التسجيل: 04-20-2002
مجموع المشاركات: 3278
الحبيب اساسى البورد جمهوريه افلاطون الفاضله ياريت نشد من ازر بعض ونحاول نعيش فى عالم وردى حرام علينا حتى ان نتوهم حتى الفضل لى بعض ؟ انا من معجبى اساسى ووالله ما كضاب
05-21-2003, 12:46 PM
Mayada Mayada
تاريخ التسجيل: 08-21-2002
مجموع المشاركات: 1817
المجاملة!!! أصبحت المجاملة -في وقتنا الحاضر لا يكاد يخلو أي كلام منها- فحتى في مجال العمل وحتى في المنزل ومع الأصدقاء فحياتنا اليومية لا تكاد تخلو من المجاملة فتجد كثير من الناس تطلب منه خدمة ولا يستطيع تنفيذها ويجاملك ويقول سوف أنفذها ولا ينفذها ويتهرب منك ويحصل حاجز نفسي بينك وبين صديقك بسبب هذه الموقف التافه مع انه لو قال لك لا أستطيع من البداية لأصبح الموضوع طبيعي..
ماهي وجهة نظركم عن المجاملة؟؟؟ ما مفهوم المجاملة عندكم هلي تعتمد على الصدق أم الكذب؟؟؟ إلى أي مدى تستخدمون المجاملة في حياتكم اليومية؟؟؟ ما هو الغرض من المجاملة؟؟؟
05-21-2003, 12:34 PM
Tabaldina Tabaldina
تاريخ التسجيل: 02-12-2002
مجموع المشاركات: 11844
.. . حبيبنا قرشو كيف حالك وازيك مشتاقيين دى ما مجاملة لانى بعرفك من 3 سنوات واكثر اسمعنى لا نكذب ولكن نتجمل وليس نجامل والله العظيم المجاملة فى الموضوعات بتكتل الموضوع وتحور المفهوم ولا تصل بالقضية الى بر النقاش يعنى بالواضح بتموت الجوهر الاساسي ما اساسي انت يا رومانسي يعنى شوف اخونا عطبراوى فى بوست الحجاب كلام الله والرسول عشان المجاملة يتزاوغ يمين وشمال وتانى شوف ناس الحزبية عشان رباح يقوا يتمايلو زى فريع البان بالله دى شنو كضب ولا مجاملة وما خفى كان اقبح وبالله ما تزعلوا نحن شخصيات وهمية
فاهم حاجة
05-21-2003, 12:58 PM
aboalkonfod aboalkonfod
تاريخ التسجيل: 05-04-2003
مجموع المشاركات: 534
أول كضبة بقولها إنك أساسي تاني كضبة إنك أسي يا آسي
شوف يا أخوي، كدي تعال أول حاجة نعرف الكضب، وهل الكلام البنكتب في دار بكري، ممكن نقيسو بمعيار الصدق والكذب.!! في البورد المواضيع بتطرح في ثوب أنيق، وكل يدلي برأيه، بمعيار الموافقة أو النقد وليس بمعيار الصدق والكذب. من الطبيعي الناس تتجمل وسط المجموعة، يقولون هنالك كلام يمكن أن تقوله وسط مجموعة، وكلام لا يقال إلا لثلاثة، وكلام لا يقال إلا لواحد، وكلام يجب ألا تقوله إلا لنفسك فقط.
أنا شخصيا بقول الكلام لوجه الله وللحقيقة، ولي أختي شيري الحلوة.
ويا أوسي (حلوة دي)، البتشبه البكسي، إن كنت راجل، ودورت المزيد، طالعني على خلاء المسنجر !!! عشان أترنش ليك أفكارك.
بالمناسبه أنا معجب بك أخي أسي .. ودة ما كضب، لكن كريمة صدق محلية بي شوية جوز كضب !! قليل من الكضب يكفي .
الأخ أساسي موضوع جدير حقا بالنقاش لأن إحساسك أن الناس تكذب هنا يعني أن ما يكتب ليس جوهر ما يعتقده الكاتب هل هو من باب ليس كل ما يعرف يقال: وليس كل ما يقال حضر أوانه او حضر رجاله أم من باب الكذب؟ وهل هو نوع التغيير في اللهجة الذي يتخذه الإنسان حفاظا على الذوق العام أم أنه اختلاف جوهري في الفكرة وتغيير لها؟ وتعليقي على أخ تبلدينا.. إذا كان هذا هو تمايلكم مثل فريع البان يا ناس البورد إذن لا أرانا الله الصبّار.. إن الحدة في عرض الآراء هنا هي فاجعة، وتحتاج لمران كبير حتى يتعود الإنسان أن يتقبل مثل هذه الحدة بدون انفعال
وإنني بعد من المتطلعات لمعرفة الجواب على هذا السؤال الهام الذي طرحته.. وهل أكون من بين الأسباب التي تجعل الناس يحيدون عن الحق الذي يعتقدون (من باب المجاملة) إن الاختلاف في الرأي لا يفسد على المرء التمتع بالاطلاع على أفكار الآخرين والإفادة منها- لا داعي للتمايل كالبان أبدا ولك شكري رباح
05-21-2003, 12:59 PM
Yassir7anna Yassir7anna
تاريخ التسجيل: 09-08-2002
مجموع المشاركات: 2634
لكن زي ماقال الحبيب قرشو اننا نحاول ان نتجمل، انا شخصيا اكتر واحد بتجمل وبتزوغ يعني لو واحد فيكم لاقني في الحقيقة ح ينخلع عديل كده
ده عني انا لكن الباقين ما بعرفهم احتمال كبير يكون فيهم الصادق، ويمكن يكون فيهم البتجمل، لكن كضابين عديل كده دي حاره شوية، ما بقدر اوافقك عليها (شفت عدم الكضب ده كيف؟) لكن موضوعك جميل ويستحق النقاش، لأن الواقع يؤكد اننا اكبر شعب مجامل في الحقيقة وليس كضاب
يعني تكون مارق يجئ زول ويلقاك لابس واي حاجة تحلف يمين انك ما مارق وتقعد معاهو واحتمال تكون مواعد ليك زول بهناك شاريه منتظرك، او يجيك زول يفتح معاك موضوع يقدك قده ويقول اوع اكون عطلتك ولا حاجة ونفس شئ تقعد تلحف ايمان مغلظ انه مافي اي شئ والموضوع عادي.... وهكذ دواليك
لكن المجاملة شئ جميل لكن يجب انها ما تفوت الحد لأن البفوت الحد بنقلب للضد
وكان الله في عون الجميع
05-21-2003, 01:02 PM
alsngaq alsngaq
تاريخ التسجيل: 04-27-2002
مجموع المشاركات: 2389
تعرف المشكلة انو كثير من الاخوان والاخوات فى البورد هنا فاهمين المجاملةغلط عديل والله. ياخ اجاملك ازورك فى مناسبة بتهمك وبتعني ليك شي ارسل ليك رسالة اهنيك فيها لنجاحك فى شي لكن اجاملك فى كلام غلط او تصرف غلط ده يبقى كضب ونفاق وببقى بضر فيك مش بنفعك. وده البخلينا نقول عدو عاقل خير من صديق مجامل
اعتقد باننا نفتقد الى الموضوعية فى نقدنا بعضنا البعض يعنى انا صح وكل البقية غلط واختلاف الرأى بيننا كثيرا ما يفسد كل الود لهذا نحاول ان نتجنب افساد المؤدة بيننا كل حسب طريقته كضب مجاملة تمايل تجمل
05-22-2003, 07:34 AM
اساسي اساسي
تاريخ التسجيل: 07-20-2002
مجموع المشاركات: 16468
شكرا لجميع الاخوة المشاركين وابداء وجهات نظرهم المختلفة
المنبر العام او منبر النقاش الحر هذا المجتمع الذي ما انفك لا يحافظ علي اسمه ان يكتب موضوع هو ان تعرض فكرة للنقاش ووتتجرد من ملكيتها الزاتية ويصبح في اطار العام بعد ان فقد الخصوصية بنشرك له للنقاش ولكنالبعض يتعامل مع النقاش علي انه موجه لذات الكاتب ويتناسون ان اي فكرة عرضت خاضعة للنقد كما هي خاضعة للاشادة استغرب جدا انه لما يفرح احدنا عند المدح علي الموضوع ويغضب جدا علي النقد ويتعامل معه من وجهته الشخصية وكان النقد وجه لذاته وليس للموضوع بالطبع عندما يطرح احدنا فكرة معينة للنقاش هو ليس بالضرورة يتنبي هذه الفكرة وكانها تمثله شخصيا ولكن هناك احيان كثيرة يكون الدافع انه الانسان يريد وجهات النظر المختلفة في الموضوع لتبين له اكثر عن غموض بعض الجهات التي قد تكون خافية في الفكرة المطروحة بمداخلة ناقدة او مادحة للموضوع اصبح احدنا يدخل هذا المنبر وهو يتمثل حالتين اما ان يطلع علي الموضوعات ويخرج بدون ابداء الراي في مواضيع قد تثير حفيظته النقدية ولكن خوفا من تصنيف قد يلصق به او معركة متوقعة النشوب لذا يكتفي باختيار عدة مواضيع ويطلع عليها ويخرج مثلما دخل او يدخل وفي يده ادوات القتال من كل الزخيرة الكلماتية التي تصيب يمنه ويسرة ويخرج من المعركة بعد ان يخسر ما وجهة وهو مدرك ان بدخوله المعرة الكلامية هو الخاسر في كلا الاحوال . لذا اعتقد انه ان الاوان ان يتعامل الاخوة بروح النقد الرياضية خاصة مع المواضيع ذات الحساسية النقاشية التي يطرحونها اي تقسم الناس الي قسمين بين مؤيد ومعارض للفكرة ودما ما ينتهي الحديث في مثل هذه الموضوعات الي عراك خارج تمام عن الموضوع الاساسي وكاننا نمارس توترنا في بعضنا البعض هذا بالنسبة للحالات التي لا تكون متفقا فيها مع كاتب الموضوع اما بعض الاحيان عندما يعجبك موضوعا مثلا فبامكانك الاشادة بالموضوع والاشادة بالكاتبة ولكن الحاصل ان المجاملة تتخطي حدود المعقول احيانا فتصل الي مرحلة النفاق البوردي وهو ما عرف قديما باستراتيجية شيلني واشيلك وايضا كما تطرق الاخ التبلدي الي موضوع الشخصيات الانبهارية التي تلج المنبر وتتبعها الزفة التي تعميها احيانا من رؤية الوجة الاخر للبورد اي الوجه النقدي وما ان تكتب وجهة نظرك في موضوع ادرجته شخصية ذات ثقل الا وانقلبت علي الاقلام رماح توخزك لكي تتادب في حضرة ذو الشأن ناسين انه طرح نفسه كعضو في البورد له حقوقي وعليه واجباتي ....اواصل
ملاحظتي ان معظم البورادب (ما عدا قلة امثالي) شعراء وفنانين ومعروف ان الجماعة اياهم مشاعرهم رقيقة فلو قلت ليهو الكباية مليانة حتى النصف بيرقص زي فريع البان واذا قلت ليهو الكباية فاضية لحدي النصف يبكي ويخليك تبكي معاه
عسل عديل كدة و انت أول الكدابين أتفق معاك انو الماسنجر خلي الوردي اسود و البمبي كحلي الواحد تشوفوا هنا تقول ابو العلم و الاخلاق بس اياك توصلوا الباب تلقي العجائب و اولها الحب الالكتروني علا سوال ماذا يفيد ذلك هل نوع من النقص و العقد النفسية بالمناسبة الكدب هنا حلال و لا حرام الكدابة رقم 2000 لوووووووووول
05-22-2003, 11:15 AM
SalahDirar SalahDirar
تاريخ التسجيل: 02-05-2002
مجموع المشاركات: 704
من الآخر،آخر مداخلتك، أقول : على سبيل المثال يمكنك أن تكتب لصديق ما عن رأيك فيه أو رأيك في سلوك ما سلكه بدون تردد أو تحفظ وتجد الكلمات تنساب انسياباً وتستطيع أن تقول ما لم يقله مالك في الخمر وتزد على ذلك ضارباً مثالاً حياً بقولك (كما يقول أهلنا أسمع كلام الببكيك وما تسمع كلام البضحكك) ولكن إن قدر لك أن تقابله وجهاً لوجه وطلب منك أن تعيد ما كتبته له .. أراهن بأنك ستشك إن كنت نفس الشخص الذي فعل ذلك أم شخصاً آخر. أظنني أبنت مقصدي هنا ، وهو باختصار أن الحياء يكبل عمومنا من مواجهة الشخص/الموقف حتى ولكن يظل الرأي كامناً يخرج حالما أتيحت له الفرصة للتعبير عن نفسه .. وفي هذا باعتقادي الخاص لا يمكن أن نقول أن ذلك كذباً وإنما أساساً موضوعياً ، لا أقل سليماً، لنشأة تقاربنا إن لم أقل تطابقنا جميعنا فيها، وهذه واحدة. أما الثانية فهي كالذي قمت بتعرية مسلك له أو تصرف أمام جمع من الناس، قطعاً فإن استجابته لك ستختلف عن إذا ما قمت بفعل نفس الشيء في وضع لم يكن فيه ثالث لكما غير الله .. أظنها تشبه الأخرى إلى حد ما ولكن معظمنا لا يود أن يعترف بالخطأ كبرياء منه وإن إعترف فيفضل أن يكون ذلك على انفراد.
05-22-2003, 11:47 AM
فتحي البحيري فتحي البحيري
تاريخ التسجيل: 02-14-2003
مجموع المشاركات: 19109
أساسى ياخوي انت مطشش ... ماهو يا انت مطشش أو يكون الناس البتتعامل معاهم كضابين فعلا ... وفى الحالة التانية دى انت برضك مطشش لانك ما عرفت تختار الناس الكويسة ... يعنى يا صاحبى فى الحالتين انت مطشش ... شفت كيف ... لا انت مطشش اكيد مطشش ... لانك كمان بقيت تحكم كده بالجملة ... كلكم كضابين دى كضب كاضب منك ... قول لى اتعاملت مع كم زول من ناس البورد ...انا يا سيدى اصدرت عليك الحكم بالطششان
والحكم الاخير بعد المداولة
05-22-2003, 03:48 PM
zola123 zola123
تاريخ التسجيل: 08-22-2002
مجموع المشاركات: 7
هووووووووووووووي يا اخوانا مالكم جاريين من الكضب كدا ؟ مشكلة جيلنا دا انو قايم علي الكضب والمجاملة والوهم والفشخرة! وعايش علي الماضي اللي عمرو ما حيقدم زول .. يعني حياتنا بي الطريقة دي عبارة كضبة كبيرة..قول لي كيف.. 1.السودان بطل افريقيا ومؤسس الاتحاد الافريقي..ومن ديك وعيييك لي هسي 2.السودان ادخل التلفزيون الملون قبل مصر.. هسي وينو؟ 3. القرشي شهيدنا الاول؟!!.. والله السمعتو انو القرشي دا مات في بلكونة؟؟ 4. شوف النساويين قبل ما يخشو بيت البكا وبعد ما يخشو!!.. تقول المات ابوها.. 5.لاحظ لي المغتربين لمن يجو(سيارة و دوار ودرهم ووو) يقرب يلبس عقال.. 6.نحن اكثر الشعوب ثقافة ونسبة الامية في السودان مخيفة.. ياخ فكونا 7. الخرطوم عاصمة الثقافة العربية2005 و منتدي حميد يتلغي.. 8.الغاء حفل اصالة للتعاطف مع فلسطين، ونامل في تحسن العلاقات مع امريكا.. هاها يا 9.وزير المالية (عبد الرحيم حمدي)يعصرناوهو ساكن في جناح خاص في الهيلتون.. 10. ووو كدي ده شنو؟ وبعد كدا مستغرب يا اساسي اننا كضابين
ممكن نجملا شوية ونقول مجاملين..لكن مش ح نضيع نفسنا برانا..يعني نحنا المفروض النغير الوضع دة برانا باننا نتعامل بصراحة وبدون تغليف ووهم وفشخرة.. اي نعم ح تكون حارة لكن مافي حل غير كدا.. ولا رايكم شنو؟
05-23-2003, 06:06 PM
Shinteer Shinteer
تاريخ التسجيل: 09-04-2002
مجموع المشاركات: 2525
والحقيقه التانيه البورد اصبح كتل وشلليات كل كتله تجامل بعضها البعض حتي اصبح كل واحد يحمل دف مدحه ليدقه في وجه الاخر كل حين تتبع بتمعن مواضيع البورد والردود ليتبين لك صدق حديثي هنا يا سيدي المشاركات بالاسم فقط حتي وان لم تكتب شيئا علي البورد ستجد ردا مادحا ومهلالا
بعض المواضيع تشعرك بالغثيان وانت تقراؤها لضحالتها وسطحيه كاتبها ولكن تفاجأ بالردود اكبر واكثر مما كان يتوقع صاحب البوست نفسه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
اساسي
ابوحراز
قرشـــو
abuguta
HAMZA SULIMAN
Mayada
aboalkonfod
Yassir7anna
alsngaq
فتحي البحيري
zola123
Ahmed Poison
Shinteer
ABUHUSSEIN
فيس بوك
تويتر
انستقرام
يوتيوب
بنتيريست