بت قضـيم - أنا لو منك - اطرقش

يعني بعد المجهود الخرافي البذلتيه في ترحيل باب شريف إلى الخرطوم والوفاء بكل المجاملات والافراح والبكيات والخالات وبنات الخالات .. والخروج في المظاهرات في النطار والنهار الحار ، ثم العودة . مافي واحد سألك عن كم عدد ساعات تأخير سودانير ، أو كيف قدمت لكم المضيفة الرشيقة شراب البرتقال الطازج ولذيذ بابتسامة الكرم السوداني المعروف ، ولا كيف أككولك العودة (أككولك دي تسألي عنها تماضر) ، ثم جئت ووصلت جدة والاشارات التي تقذفك لإشارات ثم رئيسك وشعره الماخمج وتكشيرته والعمل المردم ومنتظرت ، ثم تتركي كل ذلك لتمزمزي بهترشة شيري التي طولها خمسين حلة كمونية .. كل هذه التضحيات ولا واحد (بما فيهم العبد الفقير) سألك عن كيف ولماذا ولم وبم ومتى .. ولا قلنا ليك حمدلة ع السلامة ، وسلمى يا سلامة البت رجعت بالسلامة .

أي نعم الجندرية كتبتك في دفتر الغياب ، لاكن النصيحة دين النبي ، ما قالت ليك حمدلة بالشوفة - ولا جابت عمود ولا شالت مقوت

أنا لو منك أعمل لي سودانيز أونلاين براااااي وأخت عكازي حداي .

(عدل بواسطة Ahlalawad on 05-10-2003, 01:58 PM)

جينا متأخرين كالعادة .. ولولا رد سلام بت قضيم لكنت قلت إن سلام تماضر كانا ناقصاً ، إذ إنها اقتصرت فقط على كيف حالك وإزيك . والمعروف سلاميا أن تبدأ بـ لا يسلمك لا يبارك فيك لا يسلمك لا يبارك فيك ، شديدة ، لا يسلمك لحدي ما يزهج المسلم عليه ، وفي هذه الحالة حاتكون بت قضيم لسة ما زهجت لذلك كان مفروض تكون نفس العبارة مستمرة في التكرار لحد الآن ولحين إشعار آخر . بالنسبة لسلامنا نحن معشر الرجالة ، تبدأ بـ أووووووو ، وكل ما كانت الذاكرة خربة كل ما كانت الأوووو طويلة ، لحد ما تسعفك الذاكرة وتتذكر اسم المسلم عليه . ولو خلاااااص يعني تقوم تديه واحدة من صفاتو يا بتاع الفسيخ بتاع يوم داك ، امش كدا ما اديناكم اسنة في بيت ناس فلان

ويا البدري ، باكر تجينا بدري

غايتو يا بت قضيم ويا بدر الدين الظاهر عليكم حا تضطرونا نغير المهنة في الاقامة . الواطا فللت دي أنا قايل من فصيلة ، بتكلم ساكت ، و الليلة ما فطرتا والعشر القام ليه شوك . أمس كانو بيتكلمو عن النباتات التي لها أزهار جميلة ، فذكروا منها هذا العشر ؟ ثم تبرع آخر وقال العوير. سبحان الله ، لله في خلقه شؤون والله انا براي كدا قلت ومالو لو اتذكرو البودة . ما زهرة وجميييلة وظريفة ولا عشانشجرتها قصيرة يعني؟.

بالمناسبة بودابست دي تصلح اسم ريحة والله .. طيب عشان ما نطلع من الموضوع بودابست دي بركبوا ليها من السوق الشعبي الخرطوم ولا الحصاحيصا ، حقوا تودوا ليها ياسر حنا عشان يمثل بالبورد خير تمثيل . رايك شنو؟ وبعدين نصيحتي ليك يا البدري ، الناس ديل ما تشاورهم ، بس تجيهو ام غمتي وتقول ليه بكرة على بوركينا فاسو ، وانت بكرة على راولبندي . وانت على واحات سيوة والفرافرة وانتي على حلة عمر وهاك قفة الخدار دي