|
|
 مــــن الـــذي.......قتــــل حمـــــزة؟
|
التعليم في السودان.... كان ارهاب عديل كدي...طابور الصباح..و الجلد فيهو.... تسميع جداول الضرب والجلد فيهن..... تسميع سور القران والجلد فيهن.....تسميع الامحفوظات والاناشيد والجلد فيهن.....و اكعب حاجة انك تكون بتدرس في مدرسة مزروعه فيها نيمة....معنى كدا ان كل الاسلحة موجودة....يشدوك اربعة من الناس القاعدين ورا... اتنين يرفعوك من كرعيك وتنين من ايديك.... وممكن خامس عشان يشد الجلابية زمن الجلاليب... واسوأ حاجة يرسلوك عشان تجيب السوط ويكونو عاوزين يدقوك بيهو... لحدي ما تجيبو وتجي... تكون في حالة تحنن الما يحن....انا شخصيا وبكل فخر كنت اكورك بطول حسي من اول جلدة...لعم الطيب الفراش... الحقني يا عم الطيب....والله كان بقى مافي.... اقعد ابكي واصرخ واحنس المدرس..واحلفو بالله وبالرسول وبسيدي الحسن والشيخ ود بدر.. وفي الجلدة السابعة اكون وصلت لحدي الحنيّس بامو الجابتو من بطنها.......ودايما كنا نسمع الجلد والصراخ من الفصول التانية..يعني المدرسة كانت عبارة عن معتقل يتم فيهو تعذيب الاطفال وترهيبهم وارهابهم.....
حكوا........ انو في مدرس من الخرطوم نقلوهو الاقاليم.....اول درس ليهو للطلبة كان سيرة سيدنا حمزة بن عبد المطلب..... جاء تاني يوم وبدا يسال في الطلبه.... من الذي قتل حمزة؟ الفصل صنننننننننن......مافي زول ردا.... تلاتة اربعة مرات كرر السؤال .....وابدا مافي زول فتح خشمو... زعل ومشى للناظر...مدير المدرسة...وكلمو واشتكى وبكى من غباء هؤلاء الطلبة الذين لم يتذكرو من الذي قتل حمزة وهو امبارح النهار كلو يحكي في القصة.... جاء المدير يزبد ويرعد ويبرطم .....ودخل الفصل وسأل الطلبة....من الذي قتل حمزة؟ يا اولاد القتل حمزة منو؟ الاولاد صننننننننن..... رسل جابو السوط ....وقفلو شبابيك الفصل...ومرة تانية سال المدير يا اولا القتل حمزة منو؟...برضو الحال في حالو...مافي ولا زول قال شئ..... في النهاية المدير دنقر فوق المدرس وبراحة سالو...... انت يا استاذ متأكد انو الزول القتل حمزة قاعد في الفصل دا؟
|
|
 
|
|
|
|
|
|
|
|
Re: مــــن الـــذي.......قتــــل حمـــــزة؟ (Re: سجيمان)
|
واحر حاجة يا سجمان ان تجلد بدون ذنب وفى طابور الصباح بجريمة ما ارتكبتها وده الحصل لى وان كنت فى الصف الثالث ابتدائى يعنى فى عمر مابين تسعة لعشرة سنوات واليك القصة ياسجيمان فى يوم بعد الغداء نادتنى حبوبتى رحهما الله
وقالت لى امشى دقق العيش دة علشان عيش الكسرة كمل
فقلت ليها لكن عم كردش بيفتح بعد صلاة العصر
عم كردش الله يرحمو هو جارنا وصاحب الطاحونة
قالت لى لا امشى هسع علشان تكون اول واحد
وترجع تلعب الكورة
فخطفت القفة وطيران على الطاحونة
وامام الطاحونة ختيت القفة
وبعد شوية كم ولد وبنت وصلوا
وكلنا فى نفس السن
كنا حوالى ثمانية
خمسة اولاد وثلاث بنات
البنات بنتو الحجلة فى البرندة
وابو الزفت اقترح لعب بلى قزاز
وطبعا زمان البلى والجلة فى الجيب دائما
فى ثلاث رفضو اللعب لانو ابوالزفت
بيطمطى الخامس وافق على اللعب
بسرعة رسما المثلث واللين
وقعدنا نلعب بلى لحدى ما عم كردش وصل
رجعت البيت سريع وكلو تمام
بكرة فى طابور الصباح وبعد صفاء انتباه
نادى استاذ ابو عبيدة الشيالة
فعرفا انو ف جلد شديد وابو الزفت
ولا هميهو
بداء استاذ ابو عبيدة خبطة عن الاخلاق
بصوت عالى وكان زعلان جدا من تعابير وشو
نبرة صوتو وبداء ينده اسماء الاولاد
الما مادبين وهم
فلان الفلانى
علان العلانى
فرنكان الفرتكانى
ابو الزفت الاخضرانى
شحمة الاحمرانى
قلبى وقع من الخوف
ومن الصف لحدى مكان الاستاذ
وصلت كيف ما عارف
المهم اشدينا فى الهوا
بواسطة الشيالة
وكل واحد اخد سبعة جلدات زى السم
والاستاذ كان بيجلد بعنف شديد
وبعد الجلد الشديد ده ما كنت
السبب شنو الخلانى اكون ما مأدب
واتجلد الجلد الشديد ده
وفى فسحة الفطور
قلت لى فلان انا وشحمة كنا
بنلعب بلى انتو عملتو شنو
قام فلان ضحك وقال لى
بعد صلاة العصر خرجت عربات
الباسطة من مصنع الباسطة
جوار الطاحونة قام علان
قال ليهم صوانى الباسطة
فى المصنع بتكون فيها بواقى
باسطة وعسل يلا ناكلها
وبعد مادخلو المصنع واكلو
بواقى الباسطة
لعبو عريس وعرس
ولحدى هسع انا ما عارف الموضوع ده
وصل كيف للمدرسة
| |
|
|
|
|
|
|
|
|
 Re: مــــن الـــذي.......قتــــل حمـــــزة؟ (Re: سجيمان)
|
إنت عارف يا سجيمان يا أخوي السؤال عن قاتل الصحابي الجليل حمزة بن عبد المطلب رضي الله عنه فيه الكثير من الدلالات في العملية التربوية أيام السلم التعليمي كان درجات وهسع طبعاً بقى زي سلم الطيانة - والطيانة هم في الواقع الذين يبنون بيوت الطين أيام كان في طين ويشتهرون بإحتساء ...... وسف التمباك والشاي الأحمر - وسلم الطيانة هذا يكنى بضم الياء في ديار أهل العوض المستعربة بالطلاعة أى التي يتم الطلوع عليها وهي عادة ما تتكون من ساقين خشبيين مكلوجين في الوضع الرأسي وبعض من الخشبات الأفقية وهي بالضرورة أشد كلوجة وتشبه تعرجات خط السكة حديد بعد سنار التقاطع أو شوارع أمبده وطلاعتنا هذه تحتاج إلى لاعب سيرك أو باليه للصعود عليها وإستخدامها وهي أقرب إلى المشي على حبل معلق في الهواء.
لكن من أشد غباء في رأيكم الطالب الذي لا يعرف من هو قاتل حمزة بن عبد المطلب رضي الله عنه أم الذي يقتل الطالب لجهله بقاتل همزة. ألا يمكن أن يكون همزة هذا قد قتلته الحكومة أوالمرض أو الفقر أو الجهل أو مات كمداً كما تموت العير.
ولا نامت أعين الجبناء
| |
|
|
|
|
|
|
|
|
|
Re: مــــن الـــذي.......قتــــل حمـــــزة؟ (Re: سجيمان)
|
سجيمان
يازول والله ذكرتنا ايام فظيعة ههههههههه يكه انا قريت في مدرسة شجر النيم اكتر من الكنب اها يازول مرة كنت من ضمن المهرجلين والالفه مطلعنا بره واقفين مع السبورة اها فصلنا كان قريب لي مكتب الاساتذة عشان كده كان الجلد شبه يومي اها يازول استاذ عباس جه ماشي وشافنا ليك قال لي واحد اسمو هاشم هههههههههه يكه امشي جيب لي سيطان اها وطلعنا ليك في برنده طويله اها شفنا ليك هاشم مشى طلع في اكبر شجرة وقرب يصل السطوح ههههههههههههه يكه وشايفين السيطان بتتوقع من فوق اها يازول مشى جمب برميل الوسخ ونظف ليك السيطان وجه شايل ليك قريب العشرة سيطان من النوع ابو كديس
اها الاستاذ شاف السيطان طويلة وتخينة قام قال ليهو ديل انا داير اجلد بيهم ولا اعرش بيهم هههههههههههههههههه يكه وخبتو ليك كف ههههههه يكه
لكن اخوك في المتوسط كان عندو رداء اي زول عندو تسميع كان بيجي يستلفو مني هههههههههههه يكه يعني بالعربي كده رداء مصفح
بعدين قاتل حمزة ( اسد الله ) هو الوحشي كان من امهر الرماة اها بعد داك اسلم وقتل واحد معروف من المشركين بس نسيت اسمو هههههههههه يكه
زاتووووووو
| |
|
|
|
|
|
|
|
|
|
Re: مــــن الـــذي.......قتــــل حمـــــزة؟ (Re: ALZOLZATOO)
|
دي زي قصة الحلفاوي الي سالوهو عن ما هي مناسبة الاجازة حقت الاسراء والمعراج؟؟ فقال ليهم دي مناسبة وفاة ابو هريرة عم الرسول ..فضحكوا من كلامة ومشو يحكوا لي واحد من اقرباهو باعتبار انها نكتة ... قام قريبو قال ليهم والله دي معلومة جديدة انا اول مرة اعرف انو ابو هريرة عم الرسول
| |
|
|
|
|
|
|
|
|
 Re: مــــن الـــذي.......قتــــل حمـــــزة؟ (Re: bayan)
|
سجيمان طبعا بوستك ده أنا ما حضرتو عشان كده برد بي أثر رجعي
كنا في المدرسة الإبتدائية وطبعا اللبس كان أردية وقمصان إلا أن بعض الطلاب كانوا يلبسون الجلاليب (الجمع ده صاح) والتفتيش مرتين في الأسبوع أضافرين وملابس داخلية ولو ماك نضيف ومغيير تنجلد جلدة حبيبك ، المهم جانا أستاذ شليق وعمل تفتيش في غير الأيام المحدده وهي عادة أربعاء وسبت وكان اليوم خميس أها بدا من أول الصف : إيدك أضافرينك قصهم طاخ طاخ ارفع الجلابية : ملابسك الداخلية دي غيرها كويس طاخ طاخ طاخ ووقف صاحبنا أمام واحد من الطلبة وكان صاحبنا من النوع الشنبو مخدر يعني (جلكين) يا زول أرفع الجلابية صاحبنا يهز راسو شمال ويمين (يعني بالعربي لا) وبعد محاولتين رفض تماما راح الأستاذ مديه سوط في ضهرو وبي طرف العصاية رفع الجلابية وكان صاحبنا سليقة ساكت ... أها الأستاذ سألو يا زول ده شنو وين باقي الهدوم : وكانت الإجابة البريئة جدا : يا أستاذ غسلتو للتفتيش يوم السبت
| |
|
|
|
|
|
|
|
|
|
Re: مــــن الـــذي.......قتــــل حمـــــزة؟ (Re: سجيمان)
|
سجيمان سلام ، رمضان كريم ،
والله طريتنا ايام المدرسة والشقاوة وطبعا دي ايام ما بتتنسي بالذات للعفاريت ، غايتو انا قربت اطلع من المدرسة بسبب الجلد ، جلد لاي سبب نسيت كراسك تنجلد ، طلعت تجيب فطور تنجلد ، ما مسرح او ملابسك متسخة كمان تنجلد ، حتى لو شك الاستاذ انك ضحكت تنجلد.زالخ
اتخيل حسي دي وانا بكتب ولدي قال كسروا المسطرة في صاحبو-حالتو الجلد ممنوع -
ما حضروا جلد صيتان النيم .
كان عندنا معلمة اسمها ست التاية ، دي ما علمتنا اي حرف وما طالبانا اي تبجيل ولا احترام ، بس مهمتها الجلد في الطابور خاصة يوم التفتيش دا يوم صعب خلاس وبفتشوا كل محيط ومخيط ، ويوم في طالبة اسمها التاية وكانت مقملة اها وقعت مع ست التاية
طلبت طشت وخرتوش وصابون مغلي في التدبير مع الفراشة وحمموا ليك البت المسكينة وسط الطابور انا لا انسى هذا اليوم لان هذه الطالبة مسكينة وفقيرة ، وكانت تصيح باعلى صوت وست التاية تضرب فيها ما بالنيم صوت عنج عدييل ، والعذاب الاكبر لهذه الطالبة من الطالبات
اشقيات ، اذ الصقن بها اسم التاية ام قملاية - وللاسف لم تصمد ، عدة ايام واختفت من المدرسة بسبب هذه المعلمة الشرسة ، ، طبعا انا وفي نفس السنة 3وقعت مع هذه التاية بحكاية اخرى كان جابوا لينا معلمة طويلة والغريبة كانت ظريفة وبتحبني جدابس كانت تشبه جارتنا الاسمها حواالجمل نسبة لطولها ، فناديت عليها يوم في الفسحة حواء الجمل فما كان منها الا ان اخذتني للمذكورة اعلا وا ويلي ، جلدتني وطلبت منى ان اعتزر للمعلمة طبعا رفضت وضربتي ست التاية ذاك البوم حتىخرج الدم من ارجلى وجسمى فهذه الشرشة تضرب في كل الجسم ، الحاجة المستغربة ليها الى اليوم موجود ودرست اولادي ومازالت تجلد
بس طورت اساليبها ،.
| |
|
|
|
|
|
|
|
|
|
Re: مــــن الـــذي.......قتــــل حمـــــزة؟ (Re: سجيمان)
|
سجيمان
لك الود وانت تعود بنا الى ايام كانت فعلا مرعبة
وانا اقرأ مشاركات الاخوة والاخوات سالت من على عينى دمعات من كثر الضحك وشر البلية ما يضحك
احكي ليكم اكعب موقف
كان عندنا استاذة اسمها ست سهير
كانت من النوع الذي اتى عليه الزمان وفاتها قطار الزواج
وكانت معقدة جدا .. وكانت وللاسف ام الفصل من سنة اولى لسنة خامسة ابتدائي
المهم
كان عندها حساسية وحبوب قايمة ليها في كرعينى فكانت تنادي علي البنات من ضمنهم انا عشان تحك ليها الكرعين
والله كانت تقعد تتونس مع المعلمات وانا قاعدة تحت احك في كرعينا
والله عمري ما بنسى الموقف المتكرر دا ابدا
الله يسامحهم ورمضان كريم
سماح
| |
|
|
|
|
|
|
|
|
|
Re: مــــن الـــذي.......قتــــل حمـــــزة؟ (Re: سجيمان)
|
سجيمان
سلام ورمضان كريم
غايتو أنا أخير المدرس يكتلني هسع ولا يكتب لي (قابلني) غداً لأنو بإختصار ما باكل ولا بشرب وببول في اللحاف من الخوف
المدرس شايل السوط ولافي بين الطلبة وشغال فيهم ضرب قوم إنت إقعد إنت وطاخ طاخ أطلع برة جيب ولي أمرك .. يازول رعب شديد في المنهاية سأل أكتر طالب خواف في الفصل وقال ليهو قوم إتكلم عن أي موضوع إنشاء والشافع يرجف ويتكلم أقول شنو يا استاذ
قول أي حاجة قوم
الشافع
كان في واحد ماشي في الغابة بعدين لقى ليهو أسد
المدرس طاخ طاخ وبعدين
الشافع بعدين الأسد قال للولد السلام عليكم
الأستاذ طاخ طاخ أيوة وبعدين
الشافع (وهو يرجف وحالتو حالة) بعدين الولد قال ليهو وعليكم السلام يا أمير المؤمنين (المقصود ملك الغابة)
تحياتي
| |
|
|
|
|
|
|
| |
سجيمان
أبكر آدم إسماعيل
فتحي البحيري
doma
أبوالزفت
almulaomar
ALZOLZATOO
bayan
aba
عشة بت فاطنة
sama7-au
HAMZA SULIMAN
بدرالدين شنا
فيس بوك
تويتر
انستقرام
يوتيوب
بنتيريست