|
رأس الشيطان
|
رأس الشيكان دي مواصلاتا في بانت , خالد صاحبي إتخرج من الإسلامية دبلوم إعلام وعلافات عامة والآخيرة دي شغلتو سواق بوكسي في خط مواصلات راس الشيطان , وراس الشيطان ده زيو زي أنقولا وجبرونا وبانتيو كل معسكرات النازحين في العاصمة في هيئة الأذاعة البريطانية في واحدة من حلقات برنامج حوار مع المستقبل كانت من هناك , مقدم البرنامج بوصف في المكان قال الشارع مترين وفيهو الناس نايمة برة وما في زول قادر يقوم يتكلم معاهو عشان المريسة , بس في رأيي المذيع هنا كضاب , وزير المساحة بكون عامل الشارع مترين وربع عشان تقدر تنوم مرتاح لو فكرت تزور الرأس ده وما اظن ده يحصل لأنو في معسكر جبرونا ما بخلوك تدخل إلا يعرفوا ماشي تعمل شنو جوة وأكيد لو عرفوا إنك ماشي تخّت إيدك في الجرح ما بخلّوك لأنو الجرح ما بطّل نزيف خالد بخلص حق الفردة قبل ما يتحرك من الموقف لأنو لو ما خلص قروشو في النور معناتو الرماد كال حماد ودي المواسلات الوحيدة المافيها موقف يعني تركب وتنزل علي كيفك
الأهتمام بي تطوير العاصمة كواجهة حضارية ببدا في شارع أفريقيا وبنتهي في شارع النيل لكن مراعاة أهم الحقوق البسيطة لي سكان رأس الشيطان بتعتبر في ميزانية التنمية المستدامة المكونة ليها لجنة منبثقة منها عدة لجان أهمها لجنة التأصيل , ولجنة الخدمات الصحية بتأتي في المرتبة الخامسة بعد اللجنة الأعلامية ولجنة وضع حجر الأساس , وبالمناسبة حجر الأساس ده كان ممكن يساعد في سقف واحدة من البيوت هناك لأنو غالبيتها من غير سقف ,علي الله
طيب ديل الجابرهم علي كدة شنو ؟ ما شايفين غابة السنط في الخرطوم ؟ لا الوضع هنا بختلف لأنو تمرد في الخرطوم حيخلي محمد أحمد أستاذ العربي يشيل كلاشو ويشارك وما ننسى علوية الحرمتها لجنة المظهر العام من ممارسة مهنتا كبياعة شاي والقائمة تطول لحدي المغترب الفرضوا عليهو ضريبة ميرغني المأمون وأحمد حسن جمعة , كنانة والرهد يعني , وأكيد حتحصلني أنا العضاني كلب وما خلوني أعضيهو زي ما عضاني قال سلام قال
لو كنت الحكم؟
أبنوسي هسة تبلدي برة
|
|
|
|
|
|