|
|
 الى بت قضيم قبل ان تاخرك سودانير وتفوتي ابو دمام ورقصة القرد
|
سلام مربع
اول الحكي
بالله ياالطير قبل ماتشرب
تمر على بيت صغير
من بابو
من شباكو بيلمع الف نور
تلقى الحبيبه بتشتغل منديل حرير
لحبيب بعيد
تنزل لديها وتبوس يديها
وانقل وصايا ليها
وحب الاكيد
الكلام لصلاح احمد ابراهيم
الغناء وردي
______________________
وصايا واحده نفسها في ابو دمام
ينقصني الان ان اضع اصبعي على خشمي واطلقها . مدوية . تنوني وتنوني .. وليست مثل مناناة الباعوضة في ليلة سجمانه تشح فيها الكهرباء او تكاد تكون مافيشها خالص او مثل صفير حلة البريستو .
ومع كل هذه التفاسير التي ابت ان تفسر مقصدي .. اقول وبلاش فلسفه انني اردت ان ازغرد ايويوووي ..
فرحة جزلة بعرس بت خالتكم واقول في سري عقبالي يارب عسى ان ينفك عارضي واعرس ذاك المجنون .. لكني فجأة تذكرت انني حزينه .. وانتهرتني ..مستغربة
هي يا شيري السجم انت موش قلت حزينه ، لانو البدو جيرانكم لم يعملوا لك خاطر وطنشوا نداءاتك الانسانيه المتكررة ان لا يدخلوا الخرفان النيران بطولها .. لان ذلك يمنعنا من الاستمتاع بكرشتها وجميع ملاحقها الاخرى من الكرعين والجلد ابو دمام والمصران الاعور واللسان والراس .. والضنب ..
وحزني ليس لانني كنت عشمانه في شوية كمونيه انت نفسك بت قضيم تعرفين انني اكهرهها وانت زيي ايضا تكرهينها
شفتي الى اي مدى اوصلتني هترشتي ؟؟
قصدت من هترشتي انهم تجاهلوني ، وفعلوا بالخرفان ماخططوا له وجعلوها كبسه واستهلكوا مزرعة كامله من الارز لتنبطح فوقها اجساد تلك الخرفان المسكينه التي رأيتها تمشى الى حتوفها بارادتها .
اذ تاكد لي فعلا ان تلك النظرة السعيدة التي رمقتني بها وهي تستقبل سكينه الجزار الذي يخوف عديل كده
انها بالفعل كانت سعيدة ، حينما اشاحت بوشها هناك من مايا ومصطفى وبقية العيال وهم يتحلقون حولهم
وحينما توقف الجزار برهة لياخذ نفسه ويقول الله اكبر ..
رأيتها تستعجله وتستحثه ان يفعل ذلك بسراع بسراع .. وسمعتها وهي تفرفر برجولها
ياراجل ماتسرع سيب اللداحه دي خلينا نخلص ونفارق الوهم ديل!!
وهذا ما اراحني شويه .. وخفف من حزني ..
وفي الحقيقة انني لا ادعي حنيتي على الخرفان . لكن حزني كان سببه انهم ماانصاعوا الى نداءاتي المتكررة ان يجعلوننا نخمج في اللحم شويه ..ونتعلم في هذه الخرفان المسكينه شوية مهنة ربما تنفعنا مستقبلا في الزمن الاغبر هذا
جميل جدا منظر تلك الصواني الممتده في بيوتات المناسبات ، حيث انك ماضيه ياصديقتي ودعواتنا تصحبك ..
مفرح منظر هذه الصواني وهي تمتلئ باكوام من العضام واللحم . والحلل الكبيره وهي تدخل الرحمن في القلب والكوانين توازع ارض الحوش في حميميه وتواد وتالف مع الفحم وهو يتلهلب .. متناغمة اصوات النسوان مع اولاد بيت العرس وهم يجرجرون شوالات الخضار ..لا لا البطاطس دي جيبوها بي جاي .. العجور دا .. زحوهو كده من جنب النار..
الكوسه دي خلوها جمب ام الحسن ورقيه عشان يبدوا فيها (قرقير) للمحشي ..
هذا ماقصدته بت قضيم .. بيوت المناسبات .
فكل الذي قصدته بهذه المقدمه الهترشانه ان اقول يابختك يابت قضيم سوف تلمحي هذه المناظر الجميله
لمة البنوت وهن عاصبات رؤوسنهم وتحتها الرولات مقبره الى عنان السماء .. وجواطة اولاد الحله وهم يركبون صيوان الطباخين
وايييييييييك .. والضبان الذي ينوني والناموس الذي يصاحب الضبان في الهوا
والكلاب وهي ترقد مستكينه جمب الحيط وجوه موية الطين ..
_________
شكيتكم على الله يابوش وبلير وصدام
|
|
 
|
|
|
|
|
|
|
|
Re: الى بت قضيم قبل ان تاخرك سودانير وتفوتي ابو دمام ورقصة القرد (Re: shiry)
|
وصايا تانيه من اجل الضلعه والكباب
ياااااااه يابت قضيم
عليك الله حينما تشمري عن ساعدك ..وتمسكي ليك عضم كده وتقولي تكسريهو بي فرد ضربة الى سبعة قطع
ثم تقشري البطاطس وتنخري الطماطم لتحشيها بالرز مع اني لشد ما اكره هذه الطماطم التي يقرقروها ليحشونها بقيمه الرز واللحمه ليجعلونها محشي .. يااااه كم احب الفلفلايه الخضراء وهي محشيه بالرز
او حينما ادخل اصابعي التي تحاكي المفك عميقا جوه الضلعة واهبر لي هبره لها قيمتها من تلك الضلعة الهشه
ثم ادس قطعة من قرمه الرغيف في ملاح البطاطس ..او استأثر بصحن الكباب حيث انني واحدة نهازة فرص
والقطه كبدايه كبدايه وبسرعة سرعة حتى تسيل الدهون من بين يدي ذات العشره مفكات ..
توحشني حتى اسالة (اللعاب) هذه الشطة التي يسووونها ، لها طعم حاذق حاذق ينسيك ان الضبان والناموس
اللاتي كانت تتحاوم من فوقنا ومن جنبا ومن بين ايدينا .
وحينما تخترق حاجز ام رقيقه بعد جهاد ومجاهدة مع خيرة الاكالات النهمات الشرهات ذوات الخبرة في
تقطيع واقتحام حصون الضلعه ساعتها ستعرف كيف هي لذيذه هذه الهبره الضلعيه
وسوف تعطي لنفسك جائزة من لقمه سلطه بيضا لذيذه ..
اياك ان تقربي سلطة الاسود حيث انني ابعدها بعيدا مسافة خمسة صحون مني حتى لا تجلب لي سوء الحظ ..
كنت اقول سوف تكافئين نفسك بعد هذه الطلعة الجويه الناجحة التي دمرتي فيها حصون الضلعة الشرقيه واستطعت باصابعك المفكيه
تلك ان تطيري اكثر المقاتلين شراسة من فوق تلك الضلعة المنيعة الحصن ..
ارأيتي كم انت محاربة قديرة وتستحقين ماتكافئين به نفسك كأن ترجعي بظهرك الى الخلف لتاخذي نفسا عميقا عميقا وتشربي مويه شربة هنية لا تعطشي بعدها .. حيث ان القتال ضاري وفي اوجه حتى تعاودي الكرة من جديد ..
يا ايتها النسوان الغبيانات زحن كده يزحكن المرض ، خلوني انشيل لي قرمه اخيره من الضلعة قبل ان اتوجه هادئة البال مطمئنة للتفسح في ربوع ام رقيقه .. يالها من جولة تنفات لها بلاد ..
_________
شكيتكم على الله يابوش وبلير وصدام
| |
|
|
|
|
|
|
|
|
|
Re: الى بت قضيم قبل ان تاخرك سودانير وتفوتي ابو دمام ورقصة القرد (Re: shiry)
|
حزني انا ومايا على الخراف
ورقصة القرد
..
...
ارأيت بت قضيم ان حزني كان عظيما لان هؤلاء القوم اضاعوا بخرافهم السبعة وليمة عظيمة كان من الممكن ان تكفي سكان ولاية الخرطوم مجتمعين بشفعهم وكلابهم وضبانهم .. لكنهم اثروا ان يجعلوها وليمة لسبعة ضيوف ، قعدوا على سبعة صواني كل صينيه جلس عليها اربعة انفار
حتى انني حردت ان اكل راس الخراف الرابع الذي كان يعجبي فيه ابو دمام بتاعه ، وقلت في نفسي ياحسره على الخراف .
وجلسنا انا ومايا نواسي بعضنا البعض في ليلة الضبح الجماعية تلك .. وجعلنا انا وهي نعدد في ماثر الخرفان ..
وتاكد لي انا شخصيا ان للخرفان ماثر جمه لم اكن اعرف قيمتها الا حينما فقدتها ، حيث ان (مايا) قامت بعد ذلك وهي تغافلني ببعثرة كومبيوتري واعاثة الفساد في ماتبقى للطاولة من كتب ونظريات واشرطه لتغريد جبره ، وزبيدة الانقاذ ، وهاجر كباشي كنت اضعها بالقرب من مسجلى .. وبشتنت الشكل العام لغرفتي . حتى ستارة النافذة من تسلم من خزاها ومضرتها لها ..
ارأيتي بابت قضيم كيف انني مقروضه في مثل هذه العوازيم التي سايقاك ليها احدى (حسان) اسطولنا الوطني ادام الله عزه
وهي تتمخطر في الاجواء وتقول من ادي انا ..
لذلك احسدك حبيبة البي بت قضيم حيث انك ذاهبه الى هناك حيث اللمّه والزغاريد ، ولمة النسوان ثم الغناء بالدلوكة في تواصيف بريئة للهوي
والمستقبل الجاي .. ثم التحضر تكوفرا اي الذهاب من عصرا بدري للكوافير ،حيث هنالك كل واحدة تمني نفسها ان تجلس مثل هذه الجلسه الليلة على الكوشه وسط زغاريد الفرح وزفة الاحباب ..
يااااه بت قضيم سلمي لي كتير كتير على خيمة افراح الشماليه وشغالين ناس افراح الشماليه شغال شغال وهم يوزعون البيبسي البارد وعلى وجوههم تلك الابتسامه التي لا تعرف ان كانت قرفه ولا زهجه ولا حب ولا دغاله ولا حقد حينما يناولونك صحن العشاء .. كأنك تسمع بالسم الهاري .. او تفوت قعر اضانك تلك النبذات الفاهمات .. الشفع اولاد الحرام ديل التقول مااكلوا قبل كده .. انشاء الله ياكلوا السم الهاري ..
ديل شنو ديل الغنم ديل ماتصبروا ما خلاص قنا جاييين .. ديل شنو اليزهجوا ديل .. انا ماتعشيت انا ماتشعيت انا ماتعشيت .. نعمل ليكم شنو .. انشاء الله ماتاكلوا تاني ..
سلمي لي على لمبات الفرح وهي تتحلق في سمائنا مثل الثريا البعيده ، لانوا شغاله بجنريتر عشان الكهرباء اليوم قاطعه .
سلمي علي الساوند سيستم .. اانت تعرفي يابت قضيم انني اعشق هذا الساوند سيستم اذ احلامي فيه عظيمه . اذ به سوف احكم السودان قاطبه في يوم حتما سوف يأتي ..
وانت تبوسي العروس مباركة لها بوسيها بالنيابة عني وقول ليها شيري التي كانت سوف تفكك ضلعة خروفكم ضلعة ضلعة
منعها مانع من ان تجي وتبارك ليك ..
واذا ما عزموك او قمتي براااك حينما اشتدت وطأة الرقيص وطار عجاجها وملأ الجو رغم انهم يضعون بساط احمر واسع فوق الرمله الصفراء الباااااارده ، ان ترقصي لي معك رقصة القرد او المجنون .. اذا انا واحده مجنونه لذلك احب رقصة الاعرج.. انها قمة في الابداع
يقال ان الاعرج هو صديق المجنون وهما من قاما بتصميمها حديثا .. وبعد ده كله لا تنسي من حضور رقيص العروس بالنيابه عني
وهنا لا كلام للرجال ..فليشيحوا بوشوشهم بعيدا فهذا الكلام بيننا نحن البنات بس ...
________________
شكيتكم على الله يابوش وبلير وصدام
| |
|
|
|
|
|
|
|
|
|
Re: واحد قلبو محروق علي السودان (Re: shiry)
|
سلام مربع
حوده
اتخيل !! ولسعه ماجاني العدل
معقوله لسع ماشفت رقصة القرد
ولا الاعرج
ولاا المجنون
رقصة قمه في الروعة
فعلا تعبر عن الواقع الذي يعيشه الشباب
دي حقيقيه واسال ناس السودان
الله يديهم العافيه
سلمت ياسيدي للطله
________
شكيتكم على الله يابوش وبلير والقرد الذي اهدي الشباب رقصته وشتت
| |
|
|
|
|
|
|
|
|
|
Re: واحد قلبو محروق علي السودان (Re: benyya)
|
سلام مربع
بنيه السكريه
سلمت ياستي لعسل لسانك
الذي ينقط
في ذكرى اضاءتها لليوم الرابع
للبلد العزيز السودان
ووحشة المكان الذي تركته بغيابها
عنه
نرسل تحياتنا الحلوه
الى الاموره بت قضيم
وعساها بالف خير هناااك بين الاهل والاحباب
________
شكيتكم على الله ياناس بوش وبلير
| |
|
|
|
|
|
|
|
|
|
Re: واحد قلبو محروق علي السودان (Re: shiry)
|
يا حسرة عليكي أختي شيري
قاعدة راجية الري
مثل محلي عندنا في الشمالية وما علي إذا ما فهمتي المقصود منه
المهم ذنبك على جنبك
وألحقي بالركب قبل فوات الاوان
وتقعدي تتحسري زي حالتنا
لا لقينا بلح الشام ولا عنب اليمن
وكم من الخراف وكم من الظيطة والظمبليطة وكم وكم راحت علينا
وكل مناسبة ترفوتنا نقعد نتحسر عليها ونسمعها حكاوي
| |
|
|
|
|
|
|
|
|
|
Re (Re: ba7ar)
|
متى يكون الابداع ؟
من بوست فى غايه العفويه من بت قضيم
تعلن انها ذاهبه السودان لزواج قريبتها
كان رد فعل الابداع من شيرى
اى ملكه هذه واى خيال هذا ؟
علينا ان نستوقف الفكر هنا فى شيرى
كيف ان موهبتها فى الكتابه ملتهبه وانها مكسب حقيقى
لى ابداع البورد
لك منى الاعجاب شيرى
يا من ارجعتى روح الفنان
يا من اثبتى ان حواء السودان ولودا
الله يحفظك
حمزة
| |
|
|
|
|
|
|
|
|
|
Re: Re (Re: HAMZA SULIMAN)
|
سلام مربع
حبيب بلدو
من ناحية اني متحسرة
دي مافيها كلام
ومن ناحية اني راجية
قاعدة وحات نظري منتظرة
شيتا اكعب من الانت قلتو دا
مع انني لم افهم ايه المقصود بالضبط
لكنه الانتظار والمعني واضح
سلمت ياسيدي للطله
بحـــر
اتخيل انا ذاتي مشتهياهو
ايه رايك نرسل يجيبوهو لينا
برسل ليك منو على الاي ميل حته شوية
قدر قرمه كده
سلمت ياسيدي للطله
الفنان حمزه سليمان
انا ياستاذي كما قلت ومازلت اقولها
انا بعض من فنك الاصيل وصوتك الذي ينداح
مع الشهيق يؤكسد دماؤنا
سلمت ياسيدي للاطراء
سلمت كثير جدا خالص
لحماسك لحروفي رغم تواضعها
لان التواضع منك له معاني كثيرة
سلمت ياسيدي للطله
| |
|
|
|
|
|
|
|
|
|
Re: Re (Re: shiry)
|
خلاص اتفقنا يا شيري
انت عليك تجيبي كم اب دمامات كدة
ان شاء الله تلطشيهن من خرفان البدو قبال تبقي كبسة
وانا علي منقد الفحم والهبابة بجيبن من الحراج
خلاص
لكن اقيفي دقيقة
البصل الاخضر والليمون منو البجيبن
اااااااخ
..............................
الله يجازيكم يا ناس شيري وبت قضيم
| |
|
|
|
|
|
|
|
|
|
Re: Re (Re: shiry)
|
اولا بالتبادى
ازيك
وتانى مره ماتجيبى لينا سيرة ابدمام ده؟
برانا خرمانين عندنا وجع عيون وقريفة تمباك ؟
والله انا غبت كتير خلاس من المنتدى
ولما رجعت امس قربت امشى للحكيم النفساوى من الشفتو فى المنتدى ؟
لكن بوستك ده والله حلو جنس حلاوه؟
وناس العرس ديل لو ضبحو تور بالله قولى ليهم عرنون الكرشه ده
للناس الاقفين ديل عليك الله
شكرا يا شيرى
والله افرج كربنا جميعا
انور
| |
|
|
|
|
|
|
|
|
|
Re: Re (Re: anwar abu gaidaa)
|
شيري
والله انا كنت بهبش في المواضيع القديمه
وجذبني ابدمام
وانشاء الله تكون بت قضيم
جابت ابدمام مع الشطه المدنكله
مع تحياتي
ومبروك للعروس
| |
|
|
|
|
|
|
| |
shiry
benyya
Habib_bldo
HAMZA SULIMAN
بت قضيم
فيس بوك
تويتر
انستقرام
يوتيوب
بنتيريست