توفيق زميلي في الجامعة،، وقت الدنيا كانت سمحة وساهلة ،، والجامعه كانت جامعة ،، وكتين الداخليات حق مكتسب وكانو بجيبو لينا اللبن والبرتكان في العشاء ،، والغدا ملاح تكامل،، وكان عندنا بدل سفر للطلبة الجايين من الأقاليم/ مو متل هسي ده كلو مافي وبعد ده يشيلو حقك،،، نحمد الله ما حضرنا صندوق دعم الطلاب،، وبيني وبينكم الطلاب هم القاعدين يدعموه من دمهم وشقاهم وشقا ابواتهم في الحواشات والمصانع عشان يعلموهم ويبقو ليهم دخري في الزمن الصعب،، أها توفيق ده سوالو قصة ريدة مع واحدة من البنوت المكملات ديلك ويسألني ربي بت خاتيه القول،، ربنا يحفظمهم ويغتيهم،، والحمد لله ربنا سهل ليهم في شان نيتهم طيبة وبريدو بعض،، وتم زواجهم على احسن ما يكون،، وسارت الحياة بينهم بكل بشاشه وعشرة،، ويوم جاني توفيق في البيت المغيرب وساقني معاهو لي بيتهم،، قابلتني زوجتو بكل احترام باقي انا كنت في الجامعه بصالحهم وكتين يشكلو،، والبيني وبينها عامرة،،، وبعدها مشت تسوي لينا شيتاً نشربو،، بعد شوية من قعدتنا ديك وفي شراب شاينا داك،، خالها جا داخل وسلم علينا وقعد يشرب معانا بعد قامت جابتلو كباية فاضية وكبت ليهو من شاي المغرب البعدل الكيف داك،، وخالها ده زول بحبها شديد ،، ما قالو الخال والد،، وهي ذاتها بتعزو بالحيل،، وخالها ده من كسلا،، بعد شرب شايو داك قال ليها أنا خلاص قطعت التذاكر وبكره نمشي كسلا،، أصلو عندو عرس زولا بهمو وداير يسوقها تحضر معاهو العرس وتقعد ليها يوم يومين مع أهلها في كسلا،، قالت ليهو سمح يا خالي مافي مشكلة ،، أتاريهو توفيق فراق الزولة دي يوم يومين قاطع قلبو وما قادر يقول لي خالها ما بخليها تمشي،،، فشاورني وانا قلت ليهو ما بقدر اتدخل ده خالها وانت راجلها ،، أنا أقول شنو عاد،،، فقام قال ليها أنا بيني وبين نفسي قبيل حلفت طلاق ما تمشي (بالهزار ساكت) الزولة نططت عيونها وصدقت والكلام بقى ليها جد جد ،، فطوالي قالت ليهو انا ذاتي ما دايرة امشي ،، وقبلت على خالها وقالت ليهو يا خالي هوي تذاكرك دي بترجع،،، أنا البرجعني شنو؟ :: خالها مات من الضحك وعفاها من المشية بطيب خاطر.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
AZHERY KABBASHY
فيس بوك
تويتر
انستقرام
يوتيوب
بنتيريست