عزيزي الدوش طرف شاهد في مليون ميل

عزيزي الدوش
طرف شاهد في مليون ميل
من ديوان 1لغريب والبحر

عزيزي الدوش
طرف شاهِد
في مليون ميل
في مجري السيل
طرف سِدره
في قاع تُربه
مبلل بى مطر
غُربَة.

طرف وادى
رقد هادى
فى حُضن أُم دُر
طرف شارع
مولّع وحُر.

طرف عالَم
رجع سالَم
صوابع اليد
بعد كمّل
سنين العَد.
طَرَف وجعَه
بِقَت شمعه
طرف خاطِر
ومَضَ لَمَحه
في بال سمحَه

طرف حافِر
في دَرَب الخيل
طرف شاهد
في مليون ميل
زَمَان كُنا
وزَمَان ياحليل
نشيل الود
فرح مطلوق
همس الشوق
عمار السوق
دخول ومروق
على الشارع
وكان شارِع
طويل فارِع
وحسع كيف
غِشانا الصيف
صِبِح دخرى العُمُر
مسروق.

عزيزي الدوش
مساء الخير
صباح الخير
شدَرنا نِشف
بيوتنا قِبور
حِلم العافيه
بات مطمور
بلد بى حالها
صِبحَت سور
سقتنا الريح
غُبار عتمور
زَمنا كِضِب
جوع وكُجُور
شَرَقَنا الخوف
غَلبنا الشوف
فى عِزّ النور.

عزيزي الدوش
طرف شاهد
في مليون ميل
زمان يا زول
بلدنا جميل
نقول الحق
في عين الفيل
وحسع كيف
وسيف شرف الكلام
مَكسُور .
عزيزي الدوش
قريت يازول
حروف نعيك ؟!
قريت يازول ؟!
قريت يازول ؟!
جاك ورد الشُكُر
مفروش
وسيل الخُطَبَا
رَج الحوش .
بقيت يا دوش
أمير شُعرا
دحين يا خوى
- قبل الموت –
كان صوت الشِعِر
مقروش ؟؟!!
………..
أخير تضحك
هناك ياخى الضحك
بقروش ؟!

عزيزي الدوش
يا أغبر .. ويا أشعث
من الَحُرقه
وزمان الغَش.
زمن مجنون
وجِنّو فنون
حتى الضُل
يِدُخل القش
يقولك كَش .
بقَت أمثال
برّسم الحال
ده حال بطال .
نحُك الراس
وفوق الراس
نلاقى الفاس.
زمن دفّار
ملان بالعَار
صوت مكتوم
في بطن الغار
زمن مجزوم
كبارو … صُغَار
وغيظ مَحمُوم
وبارده النار .

آه يادوش
ده زمن البوش
وراس مدووش
اخير يازول
تنوم ترتاح .
دحين يا أخوى
فى وادي الموت
فى زول مظلوم
وحقاٌ راح ؟!
دحين يا أخوى
فى ناس ناعمين
جعاص وسمان
وناس ضامرين
تقول اشبَاح ؟؟
عزيزي الدوش
تشد الخيل
تفوت عدمان
وخيرنا حكر
على الكيمان
وفى الآخر
كمان بتشوف
مُرتب كم شهر
موقوف .
مسرح وين
بِحِل الدين ؟!
دراما شنو؟
شِعِر مردوم
ونقَحى الجوع
بِحاحى النوم
وكُل الخير
فى ايد الغير
وأسياد البلد
بالكوم.
يفوت كِسرَى
يجونا الروم
يفوتو الروم
يعود كسرَى
نبيت نحلم
صباح بُكره
يِبِل الريق
طَرَق كِسرَه
ويضيق الحال
خُرُم ابره
ومن حالنا
الأمير يبرا .
وشوف يا دوش
محبوس الجعَان
فى العيش
واسراب الصقور
حُرّه.
أخوى الدوش
اخط فقدك
اغمُس حرفو
جُوّه الدم
يَدَقدق في الرويس
يَنتَح
شقا المشوار
وقطر الهم .
أعاين في الزمن
لا فتات
حروفها كِضِب
ولونها عدم .
اشعار من الرماد
وسواد
جرايد للمديح والذم
بِنوك لِملوك
ناس صايمة
وناس بِتلوك
وتسهيل للقرِيب
والعم.
دحين يا دوش
قَبُل ما تموت
اكان فى البنك
حسابك كَم ؟؟!
هو مسرح وين
بحل الدين ؟!
دراما شنو
تحوق فى منو؟!
معاهد أيه ؟!
تَدخُل حاج
وتمرق بيه
شنو التلفاز
هو يا أستاذ
و مافيا الحوش
بِتطرُد ناس
وتدخل تووش ؟!
ده عصر المصر
منو البُحَتاج
دروس العَصر
عشان يفهم
فى ناس بتبيع
ذِمَم فى السوق
عشان تطلع
تنط فوق
شبك للحش
ومليون وش
وحبل المكر
صار مطلوق .
عُمَر ياخوى
متين عبده البلد
حيروق
متين دُنُيتنا
تبقى شروق؟!!
متين دُنُيتنا
تبقى شِروق ؟!!
20/1/1999م
هاشم صديق

(عدل بواسطة almohndis on 04-23-2003, 05:53 PM)