لما تشاهد طفل عمره 3 سنوات ومخاخيتو سلبه وعواويره كميات لما تلاقى الناس ماليه الحافلات ومطيرين الشكله فى البقى وكواريكم تجيب الضهبان لما تمشى فى الشارع وتشوف الفلاتيات فى كل مكان لما تمشى فى الاسواق وتشاهد النشالين والعواطليه والقلاعين منتشرين من حولك لما تلاقى الاماكن الترفيهية وغير الترفيهيةمليانه بالشباب والجكس وكلهم تحت العشرين وهاك ياحب واخر مسخره وملابس مجبصه ومقرفه لما تسال عن الانترنت تلقى الناس مسطحه وماعارفه انت بتقول فى شنو لما تراجع اى مكان عمل وتلقى اكثر من نصف العاملين غير موجودين لما تشوف اطفال وسخانين ومعهم امهم ممسحه وقاشره والحنه نقش لنص الكراع والتوب ربط وهلم جرا لما تمشى المدارس وتلاقى نص الطلبه داكين وقاعدين جنب سور المدرسه بره وهاك يا مشاغله وسف تمباك والله فترت لكن بجى صادى
04-15-2003, 06:59 AM
Habib_bldo
Habib_bldo
تاريخ التسجيل: 04-04-2002
مجموع المشاركات: 2350
الأخ البعيو كل الود والتقدير والاحترام لك ولكل أهلنا الطيبين عندما يقابلك الناس بالأحضان عند التلاقي تعرف إنك في السودان حين تشتم رائحة الجروف واللوبيا تعرف إنك في السودان عند سماعك أهلا حبابك مرحب بيك حبابك عشرة تعرف إنك في السودان عندما تجد الصغير والكبير حتى الذين لا تعرفهم يعرفونك وتجد منهم كل تقدير وإحترام تعرف إنك في السودان إذا وجدت الغريب يجد الترحيب والابتسامة وكل الود والتقدير تعرف إنك في السودان إذا وجدت نهراً أسمه النيل ينساب في سكينة يحمل الخير ويحمل كل معاني الحياة تعرف إنك في السودان
04-15-2003, 07:06 AM
garjah
garjah
تاريخ التسجيل: 05-04-2002
مجموع المشاركات: 4702
مع احترامي ليك عاوز تعرغ انت كيف في السودان اسمع دي وبتعرف يعني شنو السودان
بلادى أنا …. بلاد ناساً مواريثم في أول شي … كتاب الله وخيل مشدود … وسيف مسنون حداه درع . تقاقيهم تسرج الليل مع الحيران وشيخاً في الخلاوي ورع . وكم نخلات تهبهب فى جروف الساب وبقرة حلوبة تتضرع وليها ضرع . وساقية تصحى اليل مع الفجراوى .. يبكى الليل ويدلق فى جداولو دمع . يخدر فى بلادى سلام .. خدرة شاربي موية النيل .. تزرد في البوادى زرع . بلادي سهول .. بلادي حقول .. بلادي الجنة .. الشافوها أو للبره بيها سمع . بلادي أنا تكرم الضيف وحتى الطير يجيها جعان .. من أطرافها تقيها شبع . بلادى الصفقة والطمبور .. بلادى بلاد من التاريخ من ترهاقا لي عن ميسنا وناسا حنان .. يكفكفو دمعة المفجوع يبدو الغير على ذاتم .. يقسمو اللقمة بيناتم ويدو الزاد .. حتى إن كان مصيرم جوع . ديك أهلى .. عرب ممزوجة بي دم الزنوج الحارة .. ديل أهلي ديل أهلي لما أدور أفصل للبدور فصلي .. أقول بعضى .. ألاقيهم تسربوا فى مسارب الروح بقو كلي أسياد قلبي والإحساس . وسافر في بحار شوقم زمان عقلي . محل قبلت ألقاهم معاي معاي زي ضلى . لو ما جيت من زي ديل .. كان أسفاي .. وا مأساتي وا ذلي تصور كيف يكون الحال ؟ لو ما كنت سوداني .. وأهل الحارة ما أهلي ؟ تصـور كيف ؟
04-15-2003, 07:55 AM
ولياب
ولياب
تاريخ التسجيل: 02-14-2002
مجموع المشاركات: 3785
لمن أعاين من شباك الطيارة وأجد قرية كبيرة تغلبها المنازل الطينية لمن تلقى وجه أسمر بشوش يقول لك حمد الله على السلامة لمن تدخل صالة وصول اضواءها خافتة وبالكاد ترى من حولك . لمن تقيف في صف طويل عشان تعمل ختم الدخول في جوازك لمن تقيف في صف طويل عشان تدفع رسوم قدوم لبلدك لمن تنتظر سير العفش فترة أطول من اللازم لتأخذ حقائبك لمن يتفق معك عمال المطار على دفع مبلغ معين لتمريرك من الجمارك لمن تركب التاكسي من المطار لذويك ويشكى لك السائق أن الشغل تعبان لمن تصل حيكم أو بالتحديد شارعكم وتلقى نفسك في وادي وتارة فوق تل لعدم إستواء الشوارع في الأحياء لمن تنزل قدام البيت ويسلموا عليك بالأحضان لمن الناس يجتمعوا حولك ويساعدوك في شيل الشنط لمن تدخل البيت وتشرب كوز موية ولا أطعم موية في العالم لمن تطلع على طول من بيتكم ودون أن ترتاح من عناء السفر وذلك لتقديم واجب العزاء سواء للجيران أو الأهل لمن تطلع للمرة الثانية لتوزيع أمانات الناس لمن ترجع البيت وتأكل أكلة ليها طعم خاص لمن تلقى الناس هاشين وباشين ويسلموا عليك ويحمدوا سلامة العودة لمن تلقى الشفع الصغار جاريين في الحيشان الكبيرة لمن تلقى الأمان لأطفالك ولا تقول لهم لا تخرجوا من البيت لمن أمشى وأنا مطمئن ،،، ولن أجد من يتحقق من هويتي في قارعة الطريق لمن أنوم في الحوش بإطمئنان والهمبريب يقول يا ليل لمن أصحى الصباح زي الحصان ، لا كسيرة ضهر ولا وجع مفاصل بسبب المكيفات لمن أمشي السوق الشعبي وأقطع تذاكري لحلفا الجديدة لمن أصل القرية واسلم على أهلي لمن أنزع الكرفتة وأترك الأفندية على جنب وأحمل الطورية وأذهب للحواشات
04-15-2003, 08:04 AM
قرشـــو
قرشـــو
تاريخ التسجيل: 02-05-2002
مجموع المشاركات: 11385
حرم الاصالة الفى السودان ما بتلقاها وكل زول تيسر ليه يحوم فى بلاد الله واولها بلاد العرب بيعرف انه السودان ده خلق براه واهله خلقه براهم رغم التجاوزات ورغم التحفظات ورغم الممارسات التى لا تعجب ودعونا نراهن على شعبنا الابى وليس على حكوماته فهو شعب لم يتغير الا قليلا رغم الضيق ورغم الكبت ورغم كل شىء..
الاسبوع الماضى ذهبت ابحث عن شخص ما فى قهوة فى باب شريف وكان بعد صلاة العشاء وهذه القهوة يتجمع فيها عدد من السودانيين كمقيمين فيها فما هى الا دقائق حتى تم اعداد الفول الما خمج بالسلطات التعجبت وشوية ما تسمع الا يازول تعال العشاء .. على الطلاق تجى .. على الحرام تتعشى.. والله العظيم تجى .. لم يتركوا شخصيا ابدا سودانى او غير سودانى .. والله سالت دموعى وايقنت ان السودانى لن تهزمه الظروف والايام ابدا..
يازول هوى انقرع مع كل القلته وهو صاح لكن السودان ده اعزّ منه مافى ابدا..
وياهو ده السودان
شكرا ابو فاطمة للقصيدة المعبرة تماما عن السودان وشكرا احبابنا على كل كلمة حلوة فى حق السودان الذى يستحق ان يكتب عنه مجلدات ومجلدات
وعن ابنائه فلن يكفى المداد ابدا
04-15-2003, 08:13 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
عندما تجد الجار ينام مع زوجة جاره من أجل ان يحرسها ويحمي عرضها فالتعلم أنك في السودان عندما تجد أناس يتقاسمون اللقمة والماء والمرض فأعلم أنك في السودان عندما تجد السائح الأجنبي وقد رجع بكل دولاراته التي أتى بها فأعلم أنه أتى من السودان عندما تجد رجالاً لايصدأوون فأعلم أن هؤلاء هم السودانيون وعندما تجد أناس يسرقون او يرتشون او يتوسلون اليك بأن تعطيهم من مالك فأعلم يا أخي انك في السودان ولكنهاحالة نادرة بينهم
04-15-2003, 08:14 AM
بت قضيم
بت قضيم
تاريخ التسجيل: 07-05-2002
مجموع المشاركات: 2048
شعب عاطفي طالما نظر للأمر بحساسية مفرطة وإصرار على دفن الرؤوس في الرمال يا البعيو لتصل انتقاداتك تجاه الشعب السوداني وجب عليك أن تذكر عريضة طووووويلة من المحاسن اللامنتهية ثم في الحاشية تقول،، لكن والله انا زعلان ان شفت لي عيل مرة واحدة فقط في حياتي ماشي ومخاخيتو سايلة وأنها ظاهرة دخيلة على المجتمع يا ريت ننتبه ليها لكي لا تنتشر لانها الحقيقة هي نادرة جداً جدا جدا جدا
منتهى العاطفية
04-15-2003, 10:12 AM
almulaomar
almulaomar
تاريخ التسجيل: 07-08-2002
مجموع المشاركات: 6485
من كترة الضبان نهاراً والبعوض ليلاً. من الغنم المطلقة في الشوارع والكلاب. من أمة حبتين حبه فوق وحبة تحت وربما تكون هناك حبة عند اللزوم لم تأتي بعد. من ظلم الإنسان لأخيه الإنسان ممثلاً في بيوت الصفيح في أطراف المدن. من وجود أكثر من دكان مكوجي في الشارع الواحد ومع ذلك غالبية سكان الشارع يرفلون في ملابس متسخة. من الزحام والتلوث والصراخ. من تردي الخدمات العامة. من بيع كل شئ الصعوت والضمائر وعضام البقر والهدوم القديمة والصحف. من إرتفاع أسوار بيوت المسئولين والمنتفعين والعاضين على عباءة السلطة بالنواجز ومع إرتفاع الأسوار هناك أسلاك شائكة وأكشاك حراسه ليل نهار أمام البوابات الفل أتوماتيك من تلك الوجوه الطيبة التي قست عليها الطبيعة مرة وقسا عليها الحكام آلاف المرات. عندما لا يكون هناك فرق بين أن تموت أو تعيش. من ألم وأمل بمساحة مليون ميل مربع ---- في أى مكان في العالم أكون: عندما يتم تركيب هاتف جديد بعد يومين من تاريخ تقديم الطلب. عندما يتم ردم أى حفرة في خلال يوم واحد من تاريخ الإبلاغ بوجودها. عندما تملأ الدولة الأرض بالعشب والأشجار. عندما تكون الرشوة مهما تضاءلت دعوة خاصة للسجن. عندما تكون نسبة الأمية صفراً. عندما يكون هناك تأميناً صحياً على جميع أفراج المجتمع. عندما تكون الأمة بلا فقر ولا جريمة ولا بطالة ولا متسولين. الهواء نظيف لا بطء في حركة السير حتى في أكثر ساعات الذروة إزدحاما لا قمامة في الشوارع لأن رمي عقب سيجارة أو بصق سفه في قارعة الطريق يعرض صاحبها للغرامة. مجانية التعليم وإلزاميته.
04-15-2003, 11:14 AM
Habib_bldo
Habib_bldo
تاريخ التسجيل: 04-04-2002
مجموع المشاركات: 2350
الاخ الملا عمر لك تحياتي وودي كل ما ذكرته نتناقله ولا ندري إن كانت معلومات صحيحة أم لا وربما نكتبها في إستمارة الطلب التي نقدمها للدول الأوربية وأمريكا ليمنحونا حق اللجوء السياسي أو الإقامة في بلادهم وربما كانت هناك حالات من الذي ذكرته ولكنك تستطيع أن تقول ما تشاء ولا يسألك أحد سوف أحكي لك طرفة حدثت معي قبل سنوات كنت في إجازة وكنت في الخرطوم وعلي أن أطوف على كل الاهل في الخرطوم وإلا تعرضت للوم من القريب والصديق وأستأجرت سيارة أجرة تاكسي ومررت على معظم الاقارب المنتشرين في أحياء العاصمة المختلفة والسائق منذ أن صعدت في سيارته وهو يحكي عن ظلم النظام وضيق الحال وصعوبة المعيشة وكيف النظام عملها كلها حراسات وأمن وترك الشعب المغلوب على أمره في الأمرين وحكى لي طرائف كثيرة عن النظام وممارساته الوحشية الحاصل من ضمن الذين كنت أنوي زيارته أحد الوزراء وقد حكى لي عنه سائق التاكسي أشياء عجيبة وغريبة عن فساده وعن ممارساته القمعية وعدد حراسه الشخصيين الحاصل لم أقل له بأننا ذاهبون لمنزل ذلك الوحش الوزير ووقف أمام الباب وفتح لنا الباب أحد أبنائه ولم نجد حرساً في الباب وطلبت من السائق أن يدخل معي ودلفنا في الداخل وجاء الوزير يحمل صينية المرطبات عبارة عن عصير ليمون وأخذناالحديث إلى وقت متأخر من الليل وجاءوا بالعشاء عبارة عن فتة عدس ودكوة بالشطة والليمون وخرجنا من عنده وفي الخارج سألت السائق هل تعرفت على شخصية صاحب البيت الذي تعشينا معاه بفتة عدس قال نعم وقال لي أن كنت في نص هدومي وأفتكرتك أحد رجال الامن وسألته عن إنطباعه قال بنسمع الناس بيتكلموا ولكن لا تدري أين الحقيقة الحاصل كل الكلام القلته ليس دفاعاً عن أحد ولكن للإستيضاح طيبة أهل السودان حتى السيئين والذين نعتبرهم جلادي أمة السودان فهم كذلك فكيف يكون حال أهلنا الطيبين
أخي حبيب بلدو ونحن جميعا إن شاء الله حبايب بلدنا وبلدنا حبيبنا روايتك صادقة إن شاء الله بس هناك الكثير من النماذج التي تطغى على مثل هذا النموذج فكثير من الحقائق التي ذكرتها أخي هي واقعة وما قالوهو لي يعني شفتها عياناً بياناً وأنا لا أقصد إساءة الأدب وعقوق الوطن بقدر ما أتمني تلك الدولة الفاضلة والمدينة الفاضلة والحكومة الفاضلة لبلادنا الحبيبة. لك الود ولك التقدير ولك الإحترام وللوطن العزة والرفعة والمجد
04-15-2003, 12:44 PM
abas
abas
تاريخ التسجيل: 07-27-2002
مجموع المشاركات: 6255
ولمن تسأل أي شخص الطريق لمكان معين ويقول قبل الوصف .. كديه حرم تنزل مكانك ملحوق ..
لمن سيارتك تتعطل وتطلب دفعة للسيارة ويجوك بدل واحد خمسون ..
لمن تعتر في الطريق وتسمع واحد وراك .. يا ساتر .. أنا أخوك إت ..
لمن تدخل بيت فرح وما تعرف سيد الفرح منو .. الناس كلها فرحانة ..
لمن لمن تدخل محل عزاء .. ما بتعرف تعزي منو وتخلي منو ما الناس كلها لحزن بعض حزنانة ..
لمن تموت يا البعيو (بعد طول عمر إن شاء الله ) ويشيلوك ألفان ويتبعوك ألفان ويبكي عليك الجيران قبل الحبان بتعرف أنك في السودان .. ولكن بعد فوات الفوان ..
أعرف السودان الآن .. والله بلد السكران فيها بتلقاه شهم وكريم ..
الشعور بحب الوطن و الانتماء إليه شعور إنساني فطري ، فكل إنسان يجد لوطنه مكاناً عزيزاً مقرباً في قلبه ، يرجو له الرقي و الرفعة و النماء ، و يسعى في سبيل نصرته و عزته ، يدافع عنه و يحميه و يفديه بالنفس و المال .. فكرامة الوطن من كرامة الإنسان ذاته ، و أمنه أمن لأهله ، و كل ما ينسب لهذه الأرض التي تحيا عليها من صفات هي أيضاً منسوبة إليك ، و لن تستطيع التجرد منها .
04-15-2003, 03:25 PM
ود عقاب
ود عقاب
تاريخ التسجيل: 03-10-2003
مجموع المشاركات: 869
الاخ البعيو ان توقد شمعه خير من تلعن الظلام كان حاولت ان تحس بالشافع او تعرف سبب حوامه الفلاته كان عرفت دا السودان سودان فوق زحل مرفوع وخيراتوتفيض نوع نوع وسط هؤلاء الناس عيشنا وعيشين حتى اليوم ودعقاب
04-15-2003, 03:38 PM
ebrahim_ali
ebrahim_ali
تاريخ التسجيل: 02-05-2002
مجموع المشاركات: 2968
البعيو تحياتي لك، وانت تحاول بقدر المستطاع ان تظهر لنا بعض الجوانب والظواهر السالبة في وطننا ولكن أغلب من رد كانت اجاباتهم تتسم بالعاطفية والحنين للوطن وعدم المساس بمقدرات شعبه وطباعه وهذه لمحمدة للجميع ولكل بأن الجميع يتفقون في حب الوطن مهما أختلفوا، وأزيدك من الشعر بيتاً عندما تهبط بك الطائرة ويستقبلك رجال الأمن في المطار فأعلم بأنك في السودان دون سبب سوى انه مشتبه بك عندما تركب حافلة وتتنشل أعلم أنك في الشهداء عندما يتزوج شخص وتجد من يجلس بالقرب من مخرج الدعوة وهو جالس وبجنبه شطنة ودفتر فأعلم أنك في السودان عندما يطقطق لك الكمساري فأعلم انك في مواصلات الكلاكلة عندما يصيحك صياح الديك في الصباح فأعلم أنك في السودان عندما وعندما وعندما كل الصفات الحلوة الجميلة هنالك وايضا لا ننسى بعض المسالب
04-15-2003, 04:34 PM
abcde
abcde
تاريخ التسجيل: 07-04-2002
مجموع المشاركات: 975
عندما تقف عند اشارة المرور وتضئ الأشارة برتغالى وتسمع منوراك مليون بورى فحتما انت فى السودان وعندما ترى الأغنـام سـارحة فى الشوارع قاضية على الأخضر واليابس فبالتأكيد انت فى السودان وعندما ترحل لبيت جديد ملك كان ام ايجار وجاتك الصوانى والعواميد والترامس تطاقش بدون سابق معرفة فأنت حتما وحتما فى السودان وما اى مكان غير السودان
اخوكم قـلقـو
04-16-2003, 12:01 PM
mo
mo
تاريخ التسجيل: 03-11-2002
مجموع المشاركات: 1187
عندما تري شبابا يجرون من زقاق الي زقاق وخلفهم عسكري ببندقية منشنة تعرف انهم مطلوبين للدفاع الشعبي وانك في السودان ...لمان تشوف واحد بيعرض في التلفزيون وشائل عصايةتعرف انو دا رئيس السودان...لمان تلقي واحد بيقرص لعسكري المرور ويسمح ليه بالمرور لازم تعرف انك بتسوق في السودان ... ليه وطنا جنة الله في الارض واواطان غيرنا جهنم ورغم ذلك كلنا نكتب من تلك الجهنم .......
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة