|
يا بقة عسل توتيل، يالضواية فوق النيل، طيفك في أم لهيب قنديل، نحاسك فيني
|
بريدك ديمة
علاء الدين شاموق
قدر ما قلتا عنَّك أميل وأنساك يا جديَّ الريل أعود من تاني ليكِ ذليل لأنو الكون بلاكِ عدم
بريدك في هواكْ معلول وفي شانكْ أبيت محمول بريدِك يا غزال ممهول وريدك للعداكِ هدم
جمالِك فات جمال النيل ووصفكْ بالجمال تقليل منو الفي الدنيا ليكِ بديل بنات الحور عشانو خدم
عشانك فتَّا للمجهول وحاربتا القدر مذهول عشان الريدة ليكِ تطول ذليت نفسي قلتَ نعم
حسنِك ما في ليهو مثيل وطيفِك كم حماني مقيل وحتى الليل بلاكِ طويل زدتي الحسرة فيني ندم
يا نوار خريف محصول يا المُقد الصبي المجدول فيكِ قليبي صار مكتول من عينيكِ صابو سهم
وجع الريد عليَّ تقيل مكتول في هواكِ عليل ما بقدر أقولا عديل مكانك في مجارى الدم
بريدك ديمة ما معقول في قلبك بقيتْ مقفول من ريدك كفاني قبول كم ضحيت عشانِك كم
من طاريكِ دمعي هميل شوفتك لي همومي تزيلْ أقول أشعاري فيكِ قليلْ قليل إن سقتا برضو النم
يا بقةْ لهيج معسول ليكَ أوصافي ما بتطول حتى إن قلتا فيكِ فصول منو البيقراها أو يهتم
غصين البان فريعو نحيل محل ما يميل معاهو أميل وكيف إن قالوا ما هو جميل تعصف فوقي ريح الهم
قدام ربنا المسؤول بشهد إني فيكْ مكتول وحتى إن قالوا ما حتطول شان خاطرِك قبلتا الذم
يا بقة عسل توتيل يالضواية فوق النيلْ طيفك في أم لهيب قنديلْ نحاسك فيني جوه رزم
12/03/2003
.
(عدل بواسطة ود شاموق on 10-21-2003, 04:56 PM)
|
|
|
|
|
|
|
|
Re: يا بقة عسل توتيل، يالضواية فوق النيل، طيفك في أم لهيب قنديل، نحاسك فيني (Re: Hozy)
|
تسلمي يا هوزي
أما قصة رأيي دي فقصة جميلة
طبعاً معروفين اننا شعب فقري جداً جداً، الواحد يكتب قصيدة لازم ما يغنوها إلا بعدما يرجعوا ليهو، والتاني يكتب مقال لازم ما يتنشر إلا بعدما يقولوا ليهو لو سمحتا،
أنا ما مشيت استأذنتا من الزول الكتبتا فيهو القصيدة، ولا استأذنتا من وادي عبقر، ولا حتى استأذنتا من الجمال عشان أكتب فيهو، يبقى ما في زول يستأذني، القصيدة حقت الجميع.
.
| |
|
|
|
|
|
|
|