|
بابا بيقرا في البورد........اللللللله
|
اشواقي وتحياتي والدنيا من غير البورد حقكم ده صعبه والله عذرا اختكم مزنوقة الايامات دي في برنامج قراية لاكن لا اقاوم ان اتصفح بوردنا العزيز من آن لآخر وماشاء الله اراه هادئا ورياحه ساكنة لاكن يا ربي ما يكون الهدوء الذي يسبق العاصفة
تعالوا اضحكم شوية بموقف ظريف عندي حاجات في الكمبيوتر حقي دايرة تصليح, ونظرا لانشغالي طلبت من الوالد متابعتها اعتقد انها اول مرة يشوف جهازي الخاص عن قرب , وصفحة البداية عندي طبعا هي البورد اها بس جاني ليك بعد يومين, انتي السايت ده سوداني, الماضيع الفيه دي بتقريها؟ طبعا مستغرب من زولة انها مهتمة كدة والوقت داك المواضيع المرفوعة كلها سياسة وكيزان وفنجانين, وخلطتنا العجيبة من الشخصيات من رؤساء لفنانين وخلافه وطلب العنوان , ومن ساعتها مشى على جهازه وعسكر في الصالون قريب ال4 ساعات وانا امر والقيه بيفتتح موضوع ورا موضوع وانا ابتسم بخبث للدرجة دي جرعة ادمان البورد بقت لمحة؟
طبعا مشيت نقيت ليه مواضيع قديمة مميزة في وسط طوفان المواضيع داك ومن ضمنهم موضوع قديم لي. اظرف حاجة انه ما عرف الصورة الخاتاها لووول بعد ما وريته معليش يا حنين فتنت عليكي. قلت ليه..... زاتها بتكتب هناك يعني بعد داك ختي بالك عمك بقرا ليكي
ده ما الموضوع , القصة وما فيها بمعدل قراءة بابا هذه لا استبعد ان يقدم على التسجيل في البورد, هنا اتذكر موضوع السنجك عن شقيقتك في البورد اها ده مش شقيقتك, بنتك عديييييل في البورد انا طبعا حانبسط, لاكن يا ربي هل حيأثر على طريقة كتابتي ولا حيأثر على تعليقات الناس على مواضيعي خصوصا ناس يا رايعة ويا مبدعة لووول انا باضحك بمجرد طرح الفكرة اها انتوا رأيكم شنو؟
تحياتي زولة123
|
|
|
|
|
|
|
|
Re: بابا بيقرا في البورد........اللللللله (Re: zola123)
|
زولة والله بت حلال قبل دقائق بس نزلت بوست بسأل عليك وانت وبقية البنات الحلوات ديل لوووول على بتك في البورد انا انا اخوي وراجلي الاثنين معسكرين لي لوووووول تاني حمد الله على السلامة جد وحشتينا عقبال الباقيات
| |
|
|
|
|
|
|
Re: بابا بيقرا في البورد........اللللللله (Re: zola123)
|
زوله قلت لي شنو عمو بيقرا البورد : الليله ما اتقمحنا يا اختي....الليله ما سجمنا وتاني نمشي عديل زي السوط لووووووووول انا تاني ما حانزل الا مواضيع عن كيفييه تاديه الصلاه ومناسك الحج وانت بالله خلي عنك فيروز والجماعه ديل عشان بيجيبو الهوا...وانا ارسل ليك شريط اولاد البرعي من هنا سلامي الشديد للجميع واتمنى ليك التوفيق يا غاليه شدي حيلك
| |
|
|
|
|
|
|
Re: بابا بيقرا في البورد........اللللللله (Re: Teeta)
|
الزوله
تحياتى
و الله البورد ده بقى لزيز شديد لدرجه أنه الواحد بقى بدون شعور طول اليوم بتكلم عنه و فجئه يكتشف أنه الشخص الآخر كمان فى نفس البورد و تحصل الكبكبه و الشقلبه
على العموم مرحب بالسيد الوالد ألف مرحب و أنا بشجع كل البنات يدخلو أبائهم فى البورد عشان يوفروا علينا المشوار وتبقى الخطوبه طوالى عن طريق البورد
| |
|
|
|
|
|
|
Re: بابا بيقرا في البورد........اللللللله (Re: Teeta)
|
الجندرية الحبيبة
يا ستي انت امورك سلكت خلاص , الدور والباقي علينا احنا الراجين الري (الري دي صحيحة؟) قلتي لي راجلك واخوك؟ المقعدك بعد ده شنو لوووول
حنين
اول حاجة طبعا فتحت ليه مذكرات واحدة سمينة والتعليق بجيك بعدين يا بت امي الحص حصل خلاص كان لبستي نملتك دي زاتها طرحة مافيش فايدة
الأخ قرجة
شفت أخ دي لزوم الرسميات وكدة انا حاتابع الموقف واشوف يمكن يزهج براه, لاكن كانت اتعلق بالبورد بعدين اعمل روحي بادعوهه , عشان اعمل فيها ظريفة لوووول
Teeta
يديكي العافية ده زي.. علمناهم.... ولا بلاش الزول يمسك خشمه بعد ده في البورد
| |
|
|
|
|
|
|
Re: بابا بيقرا في البورد........اللللللله (Re: zola123)
|
العزيزه زوله اولا مرحب بالوالد الكريم بيننا طبعا انا حصل لي الموقف دا قبلك طبعا والله كلو ما يجيني يلقاني فاتح ليك البورد و غاطس اها نفس الاسئله بعد داك مرتين رد بي اسمي و كتب تحت ا بو ايهاب اها لما مره رقد مستشفي و طلع بالسلامه قعد ليهو زي اسبوع نقاهه كدا في البيت و طبعا لقاها فرصه و غطس ليك هو كمان بقيت انا زاتي ما لاقي طريقه ادخل البورد و رجعتا اكوس ليك في الشباب و ين و البرنامج شنو الليله لغايه ما نزل شغل و هسه بقى يطلع على البرود من مكتبو و طبعا انا كنتا سعيد شديد انو اتعرف عليكم و هو كان اسعد بي وقفه اهل البورد جنبو في وكعتو و تمني السلامه ليهو و من ثم انضم لي البورد و اسعدو شديد ترحيبكم بيهو فاكيد انتي سعيده الان اما بالنسبه لي اسالتك فاعتقد انو وجوده حا ياثر شويه على كتاباتك لكن بعد شويه حا تتعودي مره تانيه مرحب بيهو و في انتظار انضمامو لي البورد تحياتي
| |
|
|
|
|
|
|
Re: بابا بيقرا في البورد........اللللللله (Re: zola123)
|
أنا طبعا يا زولا مشارك جديد في البورد دا ، لكن لي زمن مشترك في البورد التاني و ما مخلي ليييك زوول من البعرفم أو الحواليني إلا و قريتم مساهماتي بهناك بالقوة و العجب الأيام دي عامل فيها شاعر
لكن ما عارف هل حيجي اليوم أبوي يشوف أنا بهبب في شنو
ما أظن
و الله يكون في عونك يا زولة
| |
|
|
|
|
|
|
Re: بابا بيقرا في البورد........اللللللله (Re: zola123)
|
يا زولة 123 يا صديقة الكفاح المشترك والله دي مشكلة أساسية لكن أنا أكثر حاجة لفتت نظري إنه السيد الوالد ما عرف الصورة صدقي الحكاية دي مناسبة جداً لأبوي أظني كان ختيت صورتي حسه ما يعرفها لوووول بعدين أبوي بيخاف من الكمبيوتر ولما بدأ يتعرف عليه مشى دخل ليه كورس ليه؟ عشان ما نعمل ليه عشرة بقرش ونص ونسطّح بيه رأيك شنو؟
لكن قولي لي أنا فهمت صح ولا لا؟ حنين بت عمك وعزيز عمك وأيهاب أبوه شرنوبي؟ لووووووول
خلينا نشوفك في الراكوبة يا زوزو
| |
|
|
|
|
|
|
Re: بابا بيقرا في البورد........اللللللله (Re: zola123)
|
ايهاب فعلا سعيدة, وتتصورت انه ممكن يأثر, لاكن وجدتني اعود طوعا للكتابة بعد غياب نصحني بالفعل ان اكتب قصص قصيرة بعد ان قرأ حنكوشة الماكملت, قال عشان ما تزهجي القاري قمت كتبت لمودك في مطارحته القصصية
غدى والله تعتمد, كدي جربي وقولي لينا النتيجة
روز الروز نفتح ليهم صفحة براهم كان عايزين, لاكن شكلها ما حتنفع زي تقسيم البورد الزمان مستنية برضو والدك نتعرف بيه
ديما المكافحة لوووول حنين وعائلتها اصدقاء لعائلتي من قبل ولادتي حتى, ووالدي بمثابة عم لها فعلا وعزيز ومن ادعوهم عمو برضو بمثابة اعمام لي, مع انه عزيز ده شاكة في الحسبة حقته لووول
Arbab بعدين وين يا ارباب, خلاص مافي مفر لوووول
تحياتي زولة123
| |
|
|
|
|
|
|
Re: بابا بيقرا في البورد........اللللللله (Re: zola123)
|
في ما يلي نص رسالة من الوالد لكم كلفني بطبعاتها ................... البنات والابناء أعضاء البورد لكم جميعا تحياتي
يا ريت لو كنت في عمركم, كنت حاكون معاكم كل يوم في البورد تاني حاجة مشغول جدا ومهموم بالعمل وتحضير ظروف الحياة بعد التقاعد وجامعات الاولاد وبعدها الضرائب وما عارف امشي وين؟ للدردشة في الانترنت! لا اعتقد
أنا مبسوط جدا ومتفائل بوجود مثل هذه الشخصيات المرحة والذكية التي تكتب في البورد من جميع بلاد الاغتراب. أبناء وبنات ماشاء الله. اتمنى ان أرى السودان كله كذالك حينها فقط نقول انه بخير أشكر قرجة وود عزة وعزيز على الدعوة والابن كريم على ظرفه ويا حنين خدي راحتك ومافي داعي لأولاد البرعي, خلينا مع أولاد شمبات أو عشانك back street boys وخلاص شلت العنوان من كمبيوتري ومع السلامة
أبو زولة123
| |
|
|
|
|
|
|
|