|
|
|
طاب مساؤكم- إمرأة من الكركتى
|
عاشة . صباح النور. هذه العبارة كنت اسمعها فى بيت عاشة بت حسن ابنعوف . هذه المرأة الرجل. كريمة ومضيافة وبسيطة . ومدياها برطوش. البيت به صالون كبير جدا بناه شيخنا ود كرار صاحب الخلوة فى قرية المقل فى الخمسينات . مفسر ومعلم للقران . وتتلمذ على يده شيوخ كبار. كان اعمى اليصر نافذ البصيرة . له كرامات لا يعرفها احد. والصالون الكبير يليق بهامة الشيخ الجليل. يتوسطه (ارنيق) وهو عمود يقوم من الارض ليرتقى الى السقف.مثبتا له. وعادة ما يكون مأخوذ من ساق نخلة . ربما يكون ود كرار حصل عليه من نخلة روكنيه فى سنة من السنين. واذا اردنا التحديد اكثر هب انها سنة البحر. وعاشة صباح النور. اسمعها دائما اصحو عليها بعد سهرة جميلة على الرمال وتحت ضوء القمر. الناس فى القرى الشمالية يقابلون الليل بانفاس الفجر. يتسامرون فى حب ووسامة . لباسهم واحد وكلهم يفعل ما يضيف الروعة للجلسات. فلان يعزف الطمبور وعلان يغنى والكورس متواجد على الدوام. وفى الجلسة تجد الشاعر والمغنى وعازف الايقاع.وهل يعزف الايقاع؟. دعونى اقول مبدع الدليب. والكورس. وغواة الشعر والروعة. والسكون والليل . والقمر شاهد ملك . متورط فى الابداع والونسة. ومبرأ على كل حال. بيت عاشة بت حسن ابنعوف مثله مثل كثير من البيوت هناك. مطلى بجير ابيض والبنات هناك عليهن طلاء البيوت واحضار الماء من البئر ورثن السقيا منذ عهد قديم ولا زلن يمثلن الريم على القاع بين البان والعلم. ويحللن سفك الدم فى ليالى المدوقة واوتار الطمبور.وملوكية الشاهد القمر. وعاشة صباح النور. يقولها عبد الرحيم الملقب بالبرعى . كنت حائر لفترة طويلة كيف يلقب رجل بالشيخ البرعى وهو اكبر منه عمرا . ولكنى وجدت الاجابة هم لقبوه بالبرعى الكبير له الرحمة. الناس فى قريتى يهرعون الى الشيوخ ويعتقدون فيهم . ويقدمون لهم تمرات سيدى. يلقبونهم بالاسياد . ويحضرون منهم زرات الرمل والكركتى. ويطلبون منهم مساعدة العيال فى الدراسة. شىء فى تلك المناطق جميل . هناك اشياء كثيرة تشوهها الجغرافية. نعود الى البرعى وعاشة. يثابر الرجل الطيب على مزاورة الناس كل يوم يدخل بيوتهم من كل الابواب . والبيوت هناك لها بابين يسمى احدهما باب السر. فى المدينة يسمى باب الحريم. ولأن الناس هناك اهل يدخل الرجال والنسوة من كل الابواب . والبيوت واحدة. فى كل الاوقات . كانت محتارة كيف ترد التحية. الشىء الطبيعى ان يقول عاشة صباح الخير فترد هى بصباح النور . لكنه يعكس الاية فيبدأ بالرد. ذات يوم قالت له: عبدالرحيم؟ انت تقول لى صباح النور انا اقولك شنو؟ تفاجأ بالسؤال. لكنهم وجدوا نصف الحل . اصبحت ترد بصباح النور . وفى كل خير عاشة اليوم تسكن امدرمان ضريبة دخول الابناء للجامعات والخدمة المدنية. فقدت الاشراف على فطور البهائم وقص الواطة وسماع الصائح وصوت الشباب فى الرملة وغناويهم الجميلة .والكركتى. فقدت شهادة القمر على ابداع الناس الذين يعافون الشجار وزحام المواصلات وهجير الخرطوم. وفقدت صوت البرعى وحيرتها فى الرد على التحية الصباحية الحميمة. وعاشة صباح النور
(عدل بواسطة ود العجمى on 09-09-2003, 01:28 PM)
|
|
 
|
|
|
|
|
|
|
 Re: طاب مساؤكم- إمرأة من الكركتى (Re: ود العجمى)
|
ود العجمي
يديك العافية
لقد ابحرت بنا الي تلك الزكريات الدافئه والتي لن تتكرر مره اخري
احسست تماما بكل كلمه كتبتها في هذا البوست الرائع
واعدت الينا كل زكريات ايامنا الخوالي المفعمه بالحب والصدق
والخير
عائشه لاتشبه المدن الكبيره ؟؟؟ ولكن المعايش جباره
عاشه الف صباح نور عليك
ياسلام
دنيا
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ود العجمى)
|
صباح النور ود العجمي
رائـــــــــــــع
ما ابحرنا ساكت غرقنا عدييييل كدافى تلك الذكريات العذبة
كدى قول لى ربط كم سعفة عند ناس ود الفكى ابراهيم ؟؟؟
ومعقول ما جابت فائدة ؟؟
الجندرية سلام
لو مابتعرفى الكركتى حقك رائح ... واى وحمة اتوحميتها عيدها تاني
الكركتى هو طين البحر ... كثير من النساء يتوحمن عليه .... ورأيته فى مرات كثيرة يعبأ خصيصا ويحضر لهن ... وكما قال ابو يسرا برضو بستعمل كقناع للوجه
فعلا له مذاق رائع جدا كروعتكم تلك
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ود العجمى)
|
الله يديك العافية والصحة يا ود العجمي
خليتنا نعيش ايام حلوه وذكريات الماضي الجميل
يا ابويسرا كركتي مش طين الجروف
كركتي هو حجارة الطين البيكون موجود علي سطح الأرض بعد الحراته بالمحرات تعرف محرات البقر
أدنقر فوق تراب أهلي واشيل بي أيدي في رحلي
تراب فيه يسوى الكون
وكواريك شفع المغرب يقلبوا في الجمر قنقر
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ود العجمى)
|
شكرا ود العجمي
كلامك عن عاشه حسن ابنعوف رائع روعه هذه المراه
الموجوده في كل قريه من قري الشمال وهن من بقايا
الزمن الجميل زمن الحنان والشجن والكرم الاصيل والجود
بالموجود ... افلحت يا ود العجمي بتصويرك الرائع
هذا ان تجعل كل منا كأنما عرف عاشه هذه واكل من
قراصتها وشرب قهوه بعد الفطور معها وتناول الشربوت
بعد الشيه في صالونها ...
لك التحيه ولك عاشه في ربوع ريفنا الحبيب سلام
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ود العجمى)
|
ابو عثمان عودا حميد . وماكلمتنا عن زيارتك للبلد بعد الجية
يعنى كلما عن هلى منان كمال ابنعوف وعن بيت بنات عبد الحليل وسرورة بت ود جنى لسع تساسق قاطعة درب الجمل مندلى؟ ودكان دحمادى لسع فاتح ؟ ولا اتقفل ؟ اها والتمر كيف السنة دى انشا الله شايق كتير
الجندرية زمان كان عندنا خال لينا كان بيسألنا عن كلمات مثل الديو والللس والحمار والتشق والكشيق والأرتيق واللارميق . ولما نفشل فى اجابة بعض الكلمات يسأل بحيرة انتوا بيقروكم شنو فى المدارس؟ اها الراجل دا اسمو عبد العاطى ملقب بماعون هو والد ابويسرا . تعرفى خفت ابويسرا يقول ليك قروكم شنو فى المدارس. وبرضو امازحك على طريقة شيرى
ملكة سبأ
تعرقى عدم مشينا الكتير للأسياد سببوا نا ياسيكو ديل تخاف تطقها من المقل لخدى ناس شيخنا أحمد يقوموا يسرقوا حمارتك . وتجى المسافة دى كلها مشى. انا غايتو كنت بأسرق الحمير امشى بيها الحفلات فى الاراك والبخيت و
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ود العجمى)
|
والمناطق المجاور واول ما تصل ساقة السوق شق الصباح تنزل من الحمارة المسروقة وتديها سوط وتتم الباقى بى كرعيق وتانى يوم يتكرر نفس المشهد
حمزاوى يا عزيزى حلينا نساعد بعضنا بالتذكر والذكريات الجميلة واصلها اخرها كوم تراب والرجعة لى وراء بتساعد فى المشى لى قدام
ياسيكو
انت عارفه انو المطرطِش ود العجمي دا شنو غير عدم اعتقادو في الشيوخ
وبالمناسبة الجماعة ديل اهلي وكنا نمارس عادة فك الصفق المربوط
بعد ان يذهب الزائر المعتقد
مما ادى الى بورة البعض للآن
سمعنا بى غنية
جايين من محطة مورة يا سيدى كيف الشورة ؟
ان ما سمعتها اسأل شيخك ابويسرا
ابويسرا تعرف الللس ؟
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ود العجمى)
|
والمناطق المجاور واول ما تصل ساقة السوق شق الصباح تنزل من الحمارة المسروقة وتديها سوط وتتم الباقى بى كرعيق وتانى يوم يتكرر نفس المشهد
حمزاوى يا عزيزى حلينا نساعد بعضنا بالتذكر والذكريات الجميلة واصلها اخرها كوم تراب والرجعة لى وراء بتساعد فى المشى لى قدام
ياسيكو
انت عارفه انو المطرطِش ود العجمي دا شنو غير عدم اعتقادو في الشيوخ
وبالمناسبة الجماعة ديل اهلي وكنا نمارس عادة فك الصفق المربوط
بعد ان يذهب الزائر المعتقد
مما ادى الى بورة البعض للآن
سمعنا بى غنية
جايين من محطة مورة يا سيدى كيف الشورة ؟
ان ما سمعتها اسأل شيخك ابويسرا
ابويسرا تعرف الللس ؟
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ملكة سبأ)
|
شخن احمد ود ابراهيم يلحقنا وينجدنا
الغريب ان اهل الحجير وهو من مجاوري الشيخ احمد ود ابراهيم(الاراك) غالبيتهم مساخيط ومنهم ود العجمي وللعلم عندما زار ابناء واتباع الشيخ دفع الله صايم ديمة شيخنا احمد في الاراك لبناء مسجد بهاطلبوا من ناس شيخنا ان يدعو لشيخهم الصايم ديمة بانجاب ولد لان كل ذرية الشيخ دفع الله كانت بنات وهنا استجاب شيخنا احمد ودعا ربه ان يرزق الشيخ دفع الله بابن ذكر وقد كان واختار الشيخ دفع الله اسم احمد لابنه تقديراً لشيخنا احمد ود ابراهيم
ملكة سبأ عندنا شيخ ظهر جديد في الحجير قرية ود العجمي اسمه كمال حسن محمد وهو شيخ شاطر في امور الزواج والطلاق وهو يساعد النساء في القري في التغلب على ازواجهن وكمان عندوا محايات استجلاب العريس
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: yasiko)
|
هلا ابو جمانة
يازول مالك مال الاندراوة؟ نحن كنا مع البركاوي والقنديل والشيوخ
تعرف ياياسيكو عندي عمي على منان الشهير بالجوكر الراجل دة العاصمة واستقر في الحجير لقد ادخل لناس البلد نظام جديد هل تصدق انه باع محصول هذا العام قبل الحش؟؟
اصبح يتفق مع التجار والتمر في امه وناس كثيرة اصبحت تبيع مثله ولايعرف حق العربي والا العجمي البيحش هو ياخذ حق التمر بعد ان تتفق معه انت قبل الحش باسبوعين واصبح التجار يقبلون على نظامه الجديد
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ابو يسرا)
|
يا الجوكر عند الشدائد
ان شاء الله ما باع تمر ناس سيدي بس
اصلو ناسكم ديل منكرين
زي ود العجمي دا
بالله شوف الوليه البيحكي عنها دي
وشوفو هو
رماد من نار
لك الود يا ود العجمي
وحصل الجوكر واترك
انتهازية الجبهة القاعد تعمل فيها دي
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ود العجمى)
|
عليكم الله خلونا فى الكركتى وناس سيدي
الدينا موسم يعنى افراح
خلونا نعرفهم بالتراث والموروث البتكلمو عنو بالعمل
اتفضلوا لجوا الشاى مارق
ابوى راجيكم بغادي
وبعدين نمرق على حس الطنبور دا
وخلو كلام ناس فايتاهن دا
البجن الحفلة جاهزات بغتاهن
يحجزن البروش قدام براهن
لايرقصن لايزحن للوراهن
يعنى خلونا فى ابراز جمال بلدنا وناس بلدنا والدايرنا حبابو الف
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: aba)
|
شن طعم الدروس مادام مكانة مشي قطر
كبف ذاتا ترتاح النفوس تقبل قرايتاً في سفر
الكلمات لمحمد الحسن سالم حميد في بداياته الشعرية
عاشة بت حسن ابنعوف تسكت بجوار الفنان محمد جبارة وابنها فنان معروف في المتطقة وهو أمير عثمان وياريت ياود العجمي تجر لينا امير للمنبر الحر خاصة انه زولاً كَتاب خلاص
| |
|
|
|
|
|
|
|
|
|
Re: طاب مساؤكم- إمرأة من الكركتى (Re: ود العجمى)
|
ابويسرا ما ذكرته عن دعوة شيخنا احمد ود ابراهيم حقيقى جدا ود الحصل بالضبط
أمير ود عاشة هو فنان بمعنى الكلمة يكفى انه اول من سجل أغنية زينوبة فى الربوع وعندها كان طفلا صغيرا. جاء به الاستاذ محجوب كرار الى الازاعة ومحجوب كرار الله يرحمو هو ابن اخ الشيخ محمد عبد الرحيم كرار صاحب الصالون المذكور اعلاه. يا ريت مارد يكلمنا عنه
أمير ترك الغناء وكتابة الشعر وصدقنى لو كان استمر كان أضاف للأغنية الشايقية كثيرا . احيانا يعنى فى الجلسات الاسرية
له عدة اغانى من كلماته والحانه وغنائه تركها تذهب فى مهب الريح
| |
|
|
|
|
|
|
| |
ود العجمى
ابو يسرا
الجندرية
ابو عثمان
ملكة سبأ
yasiko
kamalabas
الزنجي
aba
فيس بوك
تويتر
انستقرام
يوتيوب
بنتيريست