بدأت سلسلة متاجر هارودز اللندنية المشهورة في عرض حذاء نسائي هو الأغلى ثمناً على مستوى العالم، للبيع وذلك بسعر يبلغ مليون جنيه استرليني حوالي 1,6 مليون دولار اميركي وبعد السماح للمصورين الصحافيين بالتقاط صور للحذاء النسائي تم وضعه في فاترينة عرض مصنوعة من الزجاج المضاد للرصاص حيث سيكون تحت حراسة أمنية على مدار الساعة ويتميز ذلك الحذاء بأنه منسوج من خيوط البلاتين ومرصع بحوالي ستمائة وخمسون من قطع الياقوت وهو من تصميم مصمم الأزياء المشهور ستيوارت ويتزمان,ومن المقرر ان يتم التبرع بمبلغ مائة ألف جنيه استرليني من ثمن الحذاء لصالح الهيئات الخيرية البريطانية المهتمة بالأطفال.الخبر إنتهي التعليق: أظن أن هذا الحذاء يجب أن يسمى تموت تخلي لأنو فعلاً مجرد التفكير في ثمنه بيموت الإنسان. يا ويل العزابة وسواد ليلهم لو دخل مثل هذا الحذاء في الشيلة لأنو حينها يكون من العسير على المغترب أن يشيل لوحده أو حتى بمساعدة. أحد الخبثاء أخذ خطيبته إلى لندن لشراء الحذاء إياه لزوم الشيلة وكده وطبعاً عروسته القالت ما عاوزه وغيرت رأيها وقالت ليهو يا باب شريف يا سعد قشرة ، تعرفوا ليه؟ لأنو مقاس رجلها كان حاجه كده مبالغ فيها فإعتذر لها المتجر وبتوقيع الفايد نفسه. --- بمناسبة النعلات وهي جمع نعال يقال أن أحد المغتربين رد الله غربته ذهب لشراء حذاء فقال له البائع ثمناً مبالغا فيه بإعتبار أن الحذاء إيطالي فما كان من صاحبنا إلا أن رد عليه بحنق شديد ليه حا أمشي بيهو وين أصلو إذا كان في الجامع بقلعو وفي بيوت الناس برضو بقلعو يعني فاكرني حا أنوم بيهو ولا أتصور جمبو.
بسم الله الرحمن الرحيم اخوي الملا عمر انت الشي دا بشيل الزول ولا مفروض الزول يشيلو النبي هسي اشتري لي شي متل دا واجي امشي بيهو في كترابة السودان دي؟؟؟ الدنيا حظوظ بس تحياتي
05-05-2003, 01:25 PM
almulaomar almulaomar
تاريخ التسجيل: 07-08-2002
مجموع المشاركات: 6485
أختى بت القبايل أهلنا بيقولو الفارغه يملاها الله ، وفي دعوة بقولنها الحبوبات زمان لمن الحبوبات كان مشلخات وذلك عند الغضب وهي يشغلوك في قده والقده مقدودة كثيراً ما كنت أتخيل تلك القدة بلستك عربية يضاهي في عدد ثقوبه توب أب قجيجه أو توب بين القصرين أو إحوالنا الإقتصادية والسياسية والدينية والصحية والتعليمية وكل ما نفخنا هذا اللستك ما يتحرك قيد أنملة لأن كمية الهواء الداخل ربما تقل أو تساوي كمية الهواء الخارج.
05-05-2003, 02:40 PM
shiry shiry
تاريخ التسجيل: 07-05-2002
مجموع المشاركات: 3511
اتخيل معاااي كده (الحذاء) دا بذاتو وشحمو وفاروصااااتو البترقش ديك جابوا لي (خطيبي) العدمان حق بنزين عربتو في الوقت دا بالذات مشينا لعمنا (الفايد) ذاتو ونضمنا معاهو اها فقعنا مرارتو وقام باعوا لينا اتخيل معااااي كده وطبعا معروف انو الشيلة بتوضع في نص(الاوضه) والنسوان الشماشرات يأيتنك من حيث تدري ولا تدري كلما تاخر العرس كلما زاد عدد زوار شيلتك وزادت تبعا لذلك عدد (التكات) اقصد عدد الهبيش على السايتس بتاع شيلتك واتخيل معااااي لمن شيلتي الفيها الحذاء المليوني دا اهلنا في عموم دار شايقي يجونا واهلنا في عموم دار الاغتراب في السعودية والامارات والكويت ولندن وامريكا وهولندا .. والارجنتين حيث ان اخو خطيبي يشتغل هناك شنو .؟ والله مابعرفوا ؟ بالطيارة وباللواري وبالرقشات والحافلات والقطارات حتى (النقل النهري) لن ينقصر في نقل مشاهدين _حذائي وعشان افقع مرارتم قررت انو الشوفه بس الف جنيه بس يعني مايساوي عشرة دينار وح اخلي شركات امريكيه وبريطانيه انها تحتكر الاعلان الرسمي في (غرفة) العرض المؤقت اتخيل معاي ، هذا المشروع الاستثماري الضخم في كم يوم بنطلع (ثمن)هذا الحذاء الرهيب الذي يدخلك عالم المليونيرات واتخيل معااااي بعد العرس لابساهو وماشا مع العريس المايغباني ذاتو وفي زيارة لي اهلنا في الاملاك وفجأة ينزل غبار وتنزل مطره .. وتقطع الكهرباء وصواعق وبرد وريح .. وهبووووب شديده شديده وتقومي يا المطره (تعطني) الواطه كلها وتقومي يا الركشه الي نحن راكبين فيها تغطس جوه الطين وذات )ملاواة )وغطسه تنقلب قلبت تغطس رجلي في الطين ومعها الحذاء الملاييني وبما انني لست ماهرة في التعامل مع هذه الاحذية فكان لابد ان ينقطع الحذاء حتة حتة ويتمعط كل ماحاولت ان امره من الطين الغاطس فيهو ياحسسسسسرةه
ياااااخي المشروع فااااشل اقول ليك يا مولاي انا رجعت في البيعه دي اخير لي الشبشب داااااك بتاع سوق البوادي رجع لينا دولاراتنا يا المولي عمر ولا نرفع فيك دعوة
05-05-2003, 03:41 PM
almulaomar almulaomar
تاريخ التسجيل: 07-08-2002
مجموع المشاركات: 6485
أختي شيري أفكار جميلة لكن أجد أن في الأمر بد وأنه لابد مما ليس منه بد ، أتخيل كيف يا شيري ملايين وأنا خيالاتي محدودة بحدود الصفر العشري وبالكاد تصل خانة المئات وكلو من الدنانير طبعاً لا الدولارات وعندها سوف تحتاجي فريق محاسبي ليعلن على الملأ تفليستي ، كيف لي أن أتخيل مليون دولار حتى يمسسني سوء أو أصاب بإنفصام شخصية وحمى الوادي المتصدع ، أتخيل كل هذا المبلغ المهول لماذا حتى أصاب بكساح وشلل أطفال وأنا في العقد الثالث – ليه بس دي الأبت تنزل من حلقوكم طيب خلوها الثالث بعد المائة - من العمر ، هذا خيال مساطيل وأنا بحمد الله لا أتعاطى ما يفسد عقلي لأن الزمان وأهله أشقاني مرة ومازال يمارس شقاواته معي . قلت في البدء أنها أفكار شيطانية – عفواً أختي شيري – أفكار رائعة بأن تقومي بإستغلال كل شبر من مساحة بيتكم وبيوت الجيران في الدعاية والإعلان وما تخلي حيطه ما يكون فيها دعاية كوكا كولا وبالضرورة يكون في الحيطة المقابلة بيبسي لغاية ما الواحد يتخلبط وما يعرف يشرب شنو بيبس ولا كوكا كولا ولا يشرب من البحر ونحن في الخرطوم طبعاً ما عندنا بحر لا أحمر لا أبيض لا أصفر وعشان نكون واقعيين نشرب حلو مر ويبقى مر في مر ، وكيف للحلو أن يكون مراً إلا في بلادي ، تصوري حتى الحلو يصبح مر. نرجع لي شبشبك العجيب ده ، وبالتأكيد ما حا تكوني شاطرة بإستغلال الدعاية والإعلان لأنو هنا مصاريف السواد والرماد المنتظراك ، وفي مقدمتها شركات التأمين وآه ثم آه من شركات التأمين والبتعملوا في الناس وبعدها فريق الحراسة الذي يسهر على شبشبكم المصون يعني إنتي مع الشبشب ده خسرانه خسرانه . خليني أحسن الظن وأقول إنو إنتي أشتريتي الشبشب ومشيتي الأملاك لي أهلك بالركشة والركشة إنقلبت بالملعقة الصيني ويا طالع الشجرة جيب لي معاك ركشة وإنو الشبشب وقع منك لسبب أو آخر ، وإنتي يا شيري يا أختي وكت فكرتي في كل ده غالبك تفكري في إنو شبشب بهذه المواصفات هو في الواقع شبشب ووتربروف وإستريتش وتيك أوي كمان.
05-05-2003, 02:51 PM
AlRa7mabi AlRa7mabi
تاريخ التسجيل: 08-15-2002
مجموع المشاركات: 1343
ايميلدا ماركوس يبدو انها لم تسمع بهذا الحذاء ولو سمعت به ستطير من مانيلا الى لندن فهذه مريضة بولع ارتداء الأحذية لدرجة لايتصورها حتى مجانين الشكينيبة وقد قرات ان زوجها المعتوه فردناند ماركوس لم يكن يخاف من الشعب الفلبيني ولاجبهة مورو بقدر مايخاف من أحذية زوجته فقد كانت تضربه كلما شعرت أنه قد ابتعد عنها ياسيدي 00 لدينا سوق يسمى سوق المدينة عرب هنا تجد كل اصناف الأحذية ولاتوجد بالطبع داخل بترينات 00 ولايحرسها حراس كما يفعل عمو دودي ولكنها توجد في الهواء الطلق ومفروشة على الشوالات في هذا السوق كل شيء في الهواء الطلق اللحمة والفول والويكة والشطة والخرفان والحمير والبيض والحلاقة وحتى الحب هذا السوق أشبه بسوق أم دفسو !!!!! بالمناسبة أم دفسو دي شنو 00 هل هي قرية في السودان أذكر أن والدي وبعد الحاح شديد قرر ان يغير لي حذائي المتهالك ويومها شعرت كأنني أطير مع آرمسترونغ وأوصى والدي جارنا لشراء الحذاء والله ياملا يا عمر يومها لم أنام الا نوماً متقطعاً وأذكر تماماً أني سقطت مرتين من السرير وشعرت بأن مدني التي تأتينا منها الأشياء الجديدة شعرت بانها ابعد من كيب تاون وانتظرت ذلك الرجل 00 وأخبرت كل الناس والحمير والدجاج وحتى الكلاب المسعورة تصور بعد كل هذا التعب جاء هذا الرجل وقد نسي الحذاء ولم يشتريه اصلاً تعرف السبب شنو ؟؟ قال انشغل في شراء سرج للحمار يومها كرهت هذا الرجل وكرهت كل سروج العالم وأذكر انه يوم مات كنت أول من يحمله الى المقابر سبحان الله على هذه الدنيا سابقاً كانت طموحاتنا لاتتعدى سفنجة تطأ عليها أقدامنا واليوم نتتطلع لسفنجة بيدفورد تكون ملكنا ولا أدري كيف تكون طموحات ابنائنا في المستقبل ؟؟؟ كلمة أخيرة ؟؟ ما هو القاسم المشترك بين هارودز وام دفسو وقشرة والناقة والمدينة عرب ؟؟
05-06-2003, 07:44 AM
almulaomar almulaomar
تاريخ التسجيل: 07-08-2002
مجموع المشاركات: 6485
أخي أبو حراز الفلبينية المجنونه دي قالوا كان عندها كمية بتاعت أحذية محتاجة لي تريلا عشان تشيلها فيها بشرط يكون قاطره قندراني وأحذية إيميلدا والتي كان زوجها يحكم شعباً نصفه حافي والنصف الآخر كسيح أو معوق كانت من الكثرة بمكان وهي في أسوأ الأحوال أكتر من زاد المجاهد عندنا ، وقالوا برضو ما قلت أنا ، إنو كمية الأحذية عندها أكثر من شوالات البطاطس التي تصدرها قريتنا في موسم الحصاد ، وهي على فكرة قريتنا مش إميلدا ، مشهورة جداً بزراعة البطاطس والبصل والموز وتربيةالمواشي ، ولا علاقة لنا بتصليح العناقريب أو بيع المساويك أو اللبان حتى. وبمناسبة بيع الأشياء الهايفه كما يقولون مر شيخ من شيوخ الرزيقات بسوق كبيرة ووجد الكثير من المهاجرين ناس البحر يعملون في تجارة الأمواس والأشياء الصغيرة تلك فخاطب أحدهم قائلاً له شيتكم ده فيهو ليكم فايده ولا فازين من عوينكم. وهي حكمه أحسب الآن أن الكثير من الرجال يفزون من عوينهم إلى غير رجعه حتى يصلح الحال وما أن ينصلح الحال إلا ويتنكر لزوجته ويفكر في زوجه موديل جديد آه يا رجال نوعكم عجيب. تخيلت سوق المدينة عرب هذا بوصفك الدقيق له وعندما أصله أكيد سوف لن أجد سوقاً وكل الذي سوف يكون هناك عرب في إنتظار السوق. عن حذاءك الذي لم تكتمل فرحتك به أجد أنك والسيد الوالد قد أخطأتم خطأ كبيراً فهل تم تمتير أو عمل مقاس إن شئت لكراعك ولن أفتري وأقول رجلك أو قدمك بواسطة خيط دباره أو حبل حلفا حتى يتمكن الرجل من إحضار المقاس المناسب لأنه ما زال في قريتنا تباع اللحمة بالكوم لا بالكيلو والبصل بالقفه والقماش بالضراع وقيل الذراع بمقايس ريختر أما الأراضي فبرمية العصا والطماطم بالصفيحة إلا أنني لاحظت ما يمارسه القرويون في قريتنامن غش بين ينطلي على ناس العاصمة ويتمثل ذلك في وضع كمية لا يستهان بها من القش أسفل صفيحة الطماطم ومن ثم يقومو بوضع طماطم درجة ثانية إن شئت وفي واجهة الصفيحة يتم وضع أفضل الثمار وهي العمليةالتي تعرف بالتوجيهة أى على المغطى تماما مثل البطيخة التي لا تشترط عند شرائك لها أن تكون على السكين.
05-06-2003, 07:04 AM
almulaomar almulaomar
تاريخ التسجيل: 07-08-2002
مجموع المشاركات: 6485
أخي الرحمابي الأموره صفوية الله يحفظها ليك النعال المتل دي أبداً ما كتيره عليها لكين يا أخوي كمان خلينا واقعيين يعني حا تجيب ليها قروش قدر دي من وين وهي بنيتك الله يحفظها وكت تلبس نعالات بي عشرة أو عشرين دولار أو مائة دولار قاعدة تعرج ولا بتمشي عديل. أها وكت بتمشي عديل القرضمه العليك شنو يا الرحمابي يا أخوي وخلي بدر الدين يشتريهو لي ربى والله بي قروشو وقروش الجامع في البلد والجمعيات الخيرية وهيئة الأغاثة الإسلامية والصليب الأحمر وأطباء بلا حدود ما يقدر يشتري فرده واحده وقول ليهو أصبر شوية يمكن الصينيين أو الهنود يعملوا واحد تقليد ورخيص يعني في حدود دنانيرك.
05-06-2003, 08:08 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
يا أبو حراز يا أخوي شوية شوية علينا العلاقة بين أم دفسو وأب دفسو هي تماماً مثل العلاقة بين طيور النورس وود أبرق ، أما تلك العلاقة المزعومة بين هارودز والتانية القلتها ديك وأبت تتكتب لي وبين أم دفسو هي أن جميعها مولات وهي جمع مول بالمصري طبعاً وأم دفسو هي سوق رائجة ما تسألني وين هي وأخالها سوق أسبوعية مثل سوق الثلاثاء أو الأربعاء أو الأحد ومن إسمها يبدو أنها أكثر زحاماً من دفارات الثورة بالنص أو سينما الوحدة ببحري ، وطالما أن بالمنبر فطالحة وجهابزة لهم القدح المعلى في الشرح والإيضاح في مثل هذه الأمور أستغل هذه الفرصة الطيبة وأسأل بدوري عن أم تكشو وأحسب أنها أكلة فقط أريد من الشيف طوني أن يتفضل علينا بطريقة تحضيرها ومكوناتها وأم تكشو تلك ورد ذكرها في الأمثال السودانية على لسان الحبوبة أم حجول والحجول هي الخلخال عند العرب وهي جمع حجل وقد تغني له الشعراء في السودان الحجل في الرجل يا حلاة الحجل ولا أجد فرق في أن تكون تلك الرجل شمالاً أو يميناً نعود للمثل الذي يقول أكلوا أم تكشوا وقاموا إتنتشواوأحسب أن أم تكشو هذه إسبايسي والدليل الشكل والمشاحنة بعد أكلها.
05-06-2003, 11:05 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
ام تكشو دي انا عارفها وأكلتها مليون مرة وهي الوجبة الوحيدة التي لاتحتاج لفتح الثلاجة وقفلها ملوخية ناشفة وبعد ان تقعد في الشمس اسبوع على الأقل يؤتى بها للحلة مباشرة وهي في اعتقادي تتكون من ملوخية وموية وملح ولو خلاص الجماعة معاهم ضيوف ممكن يزيدوها شوية شمار وشطة
أخي أب حراز أشكر لكم تفضلكم بهذا الشرح الضافي يعني في النهاية الحكاية طلعت ملوخية بلحم بقر أو أرانب سيان طيب سؤال لابد منه هل هي ملوخيه فرك ولا طبيخ وطالما الموضوع طلع بينا من الجزم والشباشب إلى المطبخ أسأل عن موسى ذلك الرجل الذي جاءت فيه كلمات وما بيأكل الملاح أخضر ، وما بشرب الخمر يسكر حليل موسى يوم ركب دفر حليل موسي ....... المناحة فمن هو موسى هذا وهل لو وجد ملاح ورق من النوع الكارب أو حتى ملوخية مطبوخة على طريقة حاجه النعمه يستطيع أن يقاوم ويصمد وهل هذا يعني أنه لن يشجع منتخابات أستكوتلندا وايرلندا ونيجيريا والسعودية لإردتدائها اللون الأخضر ، ولماذا عادة ما تتسخ الثياب عند أكل الملوخية ويقال أن أهل العوض المستعربة تتركب جلاليبها شرق النيل للتناول الملوخية غرب النيل وبعد كل هذا يجدون أن هناك شئ من الخضرة في جلاليبهم. على العموم أجد أن لديك ثقافة أكثر من رائعة في المطبخ فهلا فتحت لنا بوستاً على ناصية المنتدى والزبائن على مسئوليتي.
05-06-2003, 04:04 PM
Rakoba Rakoba
تاريخ التسجيل: 02-05-2002
مجموع المشاركات: 5814
A luxury sandals "Maharai", priced 1.35 million yen (11,440 USD), a replica to produce for an Indian princess by Salvatore Ferragamo in 1938, is displayed at the newly opened flagship shop in Tokyo's fashion street Ginza 06 May 2003. The Italian fashion house will open a flagship shop in Japan to the company's lragest market 07 May.
05-06-2003, 08:03 PM
woroorrook woroorrook
تاريخ التسجيل: 10-19-2002
مجموع المشاركات: 342
أخي السفير أول حاجه يا أخوي النعال الفي الصورة دي نعال يابانية وهي ليست المعنية ودي يا دوب ثمنها حوالي أحد عشر ألف دولار ، يعني نوع دي ناس الرحمابي وخالو الشين بيقدروا يشتروها ، لكين النعال التانية دي المشكلة وتباع في سوق ليبيا، غرب أمدرمان.
05-07-2003, 06:59 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
يا بدر الدين يا أخوي دي لو نعالي انا ينعلني الله يا أخوي خبر وقريتو في حته يقوم يبقى حقي أنا ده ما ووتر بروف يا بدر الدين ولا قطع جنينه ده وترمان وقطع حديقة. أها تبرعاتكم وصلت كم؟ أكيد لي هسع ما جبتوا حق الكعب.
واحد من ناس البورد كان زعلان لأنه واحد/واحدة نعتته بـيا (جزمة)..يا ربي المسألة دي بتخفف في مثل هذه الحالات .. والله موضوع النعلات دا متشعب فالمثل الإنجليزي الذي يقول "لا أحد يعرف كيف يؤلمني حذائي" اتخيل يوم الوقفة وانت لابس نعال السنة الفاتت الضيق ولافي في السوق عشان يشتروا ليك حذاء جديدوالدنيا حر ؛ حقيقة لا يعرف هذه المسألة إلا من جربها... والانجليز برضو هم مخترعي أن شخصية الرجل تظهر من حذائه ... (يعني معفره ولا مهندمة)!!..
05-07-2003, 08:56 AM
almulaomar almulaomar
تاريخ التسجيل: 07-08-2002
مجموع المشاركات: 6485
هي أكيد ما بتختلف لكين لو أنا حا يضربوني بيهو على رأسي أى هذا الحذاء بشرط يدوني بكل ضربه مليون دولار فلا مانع وفي ناس بينضربو بالجزمة القديمة زي ما بنسمع في الأفلام والمسلسلات ، أما حكاية ان نقول لي شخص يا جزمه فهي تعتمد على نوع الجزمة هل هي قديمه أم جديدة مغبرة أم مضروبة ورنيش سوداء أو براون هاي هيل ولا عادية ، فمثلاً لو تم إختطاف مواطن أمريكي أو أي سائح أمريكي صعلوك لابس رداء كاكي وتي شيرت بي خمسة دولارات وفي جيبه مائتين دولار وعلبة سجاير ونستون أو كاميل أكيد أن امريكا سوف تقيم الدنيا ولا تقعدها حتى بعد تحرير الرهينة وسوف تحرك بوارجها وطائراتها وأجهزة إستخباراتها من أجل هذا الأمريكي الهلفوت ، أما إن كان مكان الرهينة هذا مئات الرهائن من أناس مثلنا يأكلون الطعام إن وجدوه ويمشون في الأسواق فلن يأخذ خبرهم أحد لا من دولنا أو من الدول المحبة للسلام. لنا زميل يعتبر أن مقاس قدمه واحد واربعين وهي في الواقع ثلاثة وأربعين أو يزيد يقوم يدفس كراعو الشينة في الجزمة عشان يقنع الديك نحاول ويحاول حتى صاحب المحل بأن هذا المقاس غير مناسب ولا فائدة أها التسوي كريت في الجزمة بقت عليهو وهو مصاب الآن بعيد عنكم بمسامير في أصابع القدم كما أن ظفره غرز نشابو في لحم الأصبع الكبير وأضطر إلى إجراء عملية جراحية. أجد أن المثل الإنجليزي هذا فيه شئ من التمييز بين الجنسين فهلا عدلوه ليقرأ كالتالي: أن شخصية المرء تظهر من حذائه لأنو برضو في نوع نسوان الواحدة التقول كانت بتلعب دافوري قبل ما تركب الدفار.
05-07-2003, 08:45 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
almulaomar
shiry
AlRa7mabi
ابوحراز
بدرالدين شنا
Rakoba
woroorrook
فيس بوك
تويتر
انستقرام
يوتيوب
بنتيريست