في جلسة مع الأستاذ الفنان عبدالرحمن عبدالله ، ربنا ينعم عليه بالصحة والعافية ويعود سليماً معافى لمحبيه ومعجبيه ، حكى لي قصة هذه الأغنية الرائعة " جدي الريل " عندما كان شاعرها الأستاذ عبدالجبار في رحلة صيد والجو غيم والمطر رزاز حينها كان يقود عربته اللاندروفر فوجد غزال جالس على الأرض فهم بإطلاق النار عليه فوقف الغزال وكانت المفاجأة وجود صغيره معه فأقترب بعربته منه فما كان من الغزالة وصغيرها إلا أن يقفزا فوق عربته من الأمام في منظر جميل ورائع أوحى إليه بهذه الكلمات الرائعات . والبقية عند أخينا تبلدينا ..
03-29-2004, 10:49 AM
tmbis tmbis
تاريخ التسجيل: 10-19-2002
مجموع المشاركات: 24862
يا سلام عليك يا معتصم . يا سلام تعرف قبل يومين .. فتحت اذاعة امدرمان الصباح بدري . عن طريف الريسيفر برنامج الصباح الجميل داك .. ودقايق بس كان الاستاذ بيغني شقيش قوللي مروح .. قلت اجري علي الكمبيوتر افتحو علشان اسجل الاغنية .. سرحت معاها ومع حالة الاستاذ والمرض البيقاوم فيهو .. انتهت الاغنية .. وانا في حالة من الاحباط وحالة من حنين غريبه جدا .. وفي بالي صورة الاستاذ والحالة القاعد يمر بيها وين تبلدينا ده ياخ ..
بالمناسبة ومن بعد ازنك يامعتصم بهدي الاغنية دي .. لي ماما دوما .. بجي راجع بعمل ليها لنك للحفظ شان تسمعه كل مرة ومرة شكرا يامعتصم
03-29-2004, 11:13 AM
doma doma
تاريخ التسجيل: 02-04-2002
مجموع المشاركات: 15970
ابني الحبيب تمبس توووووشكر للاهداء وربنا ما يحرمني منكم والشكر الجزييييييل لابننا الرائع معتصم دفع الله والتحيه والاجلال للفنان المبدع عبدالرحمن عبد الله كم يؤلمني تقصيرنا فيك يا عبد الرحمن
(عدل بواسطة doma on 03-29-2004, 12:42 PM) (عدل بواسطة doma on 03-29-2004, 12:45 PM)
03-29-2004, 12:25 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
وبرضوا نحن بنهدي ليك هذه الأغنية الرائعة .. وربنا ياخد بيد مبدعنا الكبير عبدالرحمن عبدالله .. ويعود لمحبي فنه بكامل الصحة والعافية .. بلبلاً مغرداً في كل مكان ..
بارك الله فيك الاخ /معتصم والله يدى استاذنا عبدالرحمن عبدالله الفنان المرهف الصوت، الصحةو العافيه وامنياتنا من الشعب السودانى كله الوقوف معه فى محنته ونتمنى له الشفاء العاجل
03-29-2004, 12:36 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
خالص التحايا العزيز معتصم دفع الله شكر ليك يازميل على هذه الاغنيه بس كنت تعمل ليها لينك عشان ننزلهاوالله قطعته قلوبنا والواحد بكتب وبقاوم فى الدموع والحسره ..عليك الله دى بلد شوف حال مبدعينا والاستاذ عبد الرحمن عبدالله جزء من قليل .اسالك يارب السموات ان تنعم عليه بالعافيه اسالك يارب.. عزيزى ارجوك لو انت قريب منه ان تبلغه تحياتى انا انا فقط وساكون انانى جدا هنا ومن هنا احيى مدينه بارا واهدى الاغنيه الى الوالده الغاليه ربى يحفظها.. والتى ايضا من مدينة بارا ..
03-30-2004, 00:05 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
لك التحية والتقدير .. وربنا يدي الصحة والعافية لوالدتكم ويمد في عمرها ..
فعلا الحسرة تملأ القلوب ونحن نرى الإهمال يطال مبدعينا .. في كل المجالات لا يلقون أي إهتمام ولا رعاية من أولي الأمر .. وحالة الفنان عبدالرحمن عبدالله خير مثال .. تحاياك وصلت للأستاذ وهو بخير وبيطمئن الجميع .. ولناس بارا كل التقدير والإحترام ..
03-29-2004, 03:03 PM
tariq tariq
تاريخ التسجيل: 05-18-2002
مجموع المشاركات: 1520
اخى معتصم وبقية الاخوة المشاركين ... قبل اكثر من 15 سنة جاء من الاغتراب احب خلاني إلى والى أمي أطال الله عمرها جاء خالي وكان حاملا معه شريط الفنان عبد الرحمن عبد الله ( ربنا ينعم عليه بالصحة والعافية وطول العمر) فأسمعني خالي أغنية جدى الريل واذكر بأني أعجبت بها وأخذت منه الشريط و أصبحت اسمعها يوميا ومعي أخي الأصغر الذي كان يشاركني الغرفة ... وعدت السنين وتغربنا نحن وغادر الخال الحنين الحبيب إلى ليبيا قبل اكثر من 10 سنين ولم نسمع له خبرا بعد ذلك وتقطعت معه كل سبل الاتصال به و لا ندرى أو تدرى الوالدة إذا ما كان حيا أو ميتا ..
تذكرتهم جميعا و أدمعت عيناي في هذه اللحظة وأنا استمع إلى هذا الرجل العظيم واسأل الله تعالى أن يرد غربتنا سريعا وان يجمعنا مع خالي في حضور والدتي ( إذا ما زال على قيد الحياة ) واسأل الله تعالى ان يشفي الفنان الرقيق وان يجمعنا معا كلنا في وطن سليم معافى .. والتحية لكم جميعا .... فأحتاج لوقت حتى تزول منى هذه الحالة ...
03-30-2004, 00:14 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
رد الله غربة خالك سالماً غانما ويتلم شمل الأسرة الكريمة .. وتعود العافية لمبدعنا الكبير عبدالرحمن عبدالله .. وتعود كل الطيور المهاجرة لأرض الوطن الحبيب ..
تسلم
03-29-2004, 07:25 PM
Tabaldina Tabaldina
تاريخ التسجيل: 02-12-2002
مجموع المشاركات: 11844
.. . جـّدي الريل أبو كزيمة تعال نتمشي فى الغيمة دى غيمة ريد تصب فى الرهيد روابينا الخضّر ديمه الكّزم او ( ام كزيمة) احد مميزات الجمال عند المراة فى القبائل ذات الاصول العربية كالمسيرية والرزيقات والحوازمة والكزم هى الانف الذى به انحناءة عند طرفه لا هو بالمعقوف ولا هو بالافطس ولا هو كالسيف ان لم يخنى التعبير وقد يكون اخى كبر واسماعيل هما ابرع منى فى شرح هذه البيئة وتلك الاوصاف ودوما تلقب المراة بهذا اللقب كسمة من سمات الجمال فى كردفان قاطبه او فى تلك القبائل خصوصا فكثيرا ما نجد فاطمة ام كزم او زينب ام كزيمة. وكلما اسمعها هذه الكلمات اعود واحن الى ديار الحوازمة ومراحيل المسيرية المردوم وضرب النقارة لا ادري كيف جمعت هذا الخليط واتذكر بيوت العرب و(الدرنقل ) لا اظنك تعرفه يا معتصم !! وكنا نستمتع بغناء الحكمات والخالات وهن يتغنين فى الاعراس ود الغالي عرسو ** سمن البارة ريسو ------ عريسنا وين نقيل بيه ** فى الطلحة ام كعكول كّي ----- الجنزير التقيل ** البقلا ياتو بعوقد نارها ** البدفاها اخو
ونحن يا معتصم لنا روابي وكثبان وخيران وقردود ورهود وتُرد وليس ترع فلا علم لنا بالشواطئ ولا البيتشات ونفشل فى اكل السمك وبنغرق فى نص متر مويه. ما اجمل كردفان فى الخريف وموسم الامطار وانت تستنشق الدعاش المعبق بنكهة الارض المرتوية من الامطار الغزيرة أن كانت ( سراية) او ( الشكشاكة) ما اجمل دياري فى ليل الخريف والسماء ملبدة بالغيوم الداكنة يتخللها البرق العبّادى ما اجملها وان تعبر فى الليل طريق ( مشاكل) من الخوي الى النهود.. وان كنت تعلم ما الخوي لكنت طويت الارض طّي
او انت تعبر جبال المقّرح الشاهقة السوداء فى طريقك الى الجبال الشرقية عابر خور ( العوايّ) وسميّ لذلك الصوت الذى تصدره المياه فى اندفاعها من الجبال الى ارض البطحاء الواسعة ( القردود) حيث ابوجبيهة ورشاد وجناين ( المنقة) فى تجملا وتاندق وتمورو وارمياو ووارض كونتانا1 ( اولاد حميد ) وتترنم زولاً سرب سربه .. الليموني خّت الجبال غربه .. الليموني ادونى لي شربه ..الليموني خلى النقص دربه .. الليموني
وقد تعود بك الذكري وانت تمر بجبل ( الدليب) بين الدلنج وكادوقلي وترى القردة ( الككو) وهى تتصايح وتملاء قمة الجبل وجداد الودادى والغزلان تتقافز عابرة الشارع وانت على سطح ذلك اللورى ( الابيض ضميرك) وانت تردد اللورى حّل بي .. دلاني فى الودّى حبيب سيد الناس ببقي لى وناس
وان حملتك الصدفة الى ارض الحّمر وجبال المجانين وديار الكبابيش وذكريات ال عكام فيا لها من ذكريات ..
درب الحبيب رمله .. نمشيهو فى القمره فراق الحبيب جمره .. كداب البحمله نقبل القبله .. نبكي بلا سبله الحكيم سيد الابره .. دوايه ما خبره
الاستاذ عبدالرحمن عبدالله اكن له كثرا من الود ودوما كانت ماساته وظروف مرضه هى من اسباب فشلنا فى دوراتنا المتعاقبة لرابطة ابناء الابيض هنا وتعتبر وصمة عار وفشل للجنتنا التنفيذية ولا زالت وهى فرصة اتقدم بالشكر لكل من ساهم مساهمة مباشرة او غير مباشرة مادية او معنوية فى السعي لعلاجه بدا من الموصلي ود. متوكل وصلاح غريبة والماما/ دومه ود.نجاة وبناديهاومن لم تسعفنى الذاكرة بذكرهم. نسأل الله له الشفاء ورد غربته وانا اطالع هذا البوست تذكرت تلك الوريقة الصغيرة من كراسة العربي التى ما زلت احتفظ بها بارض الوطنوالتى وقعها الاستاذ/ عبدالرحمن عبدالله كعقد اتفاق للحضور الى مدينة الابيض ومعه الاوركسترا لاحياء حفل زواج شقيقتى الكبري وكنت وقتها طالباً وكان ذلك ذلك عام 89م فى بداية عهد السنوات العجاف ، واظن ان استاذنا فضيلي جماع يذكر تلك الايام ان لم تخنى الذاكرة بمرور الايام. الطريف انك لن تتور كما كانت التكلفة لاحياء حفلتين متتاليتن وثالثه تبرع دح فيها عبدالرحمن عبدالله فى مسائيات وصباحيات تلك المدينة ولكن حتى ارضى فضولك فقد كانت بما يعادل 600 ريال شاملة تذاكر الاوركسترا بالطائرة من الخرطوم والعودة .. والله ايام يا سودان ،،،
والله يا معتصم يا دفاعي لقد اعدتنى الى ذكريات وايام لا تنسي فهما كتبت او كتب اخرون عن هذا المليون ميل مربع لن يوفوه حقه كم جميل سودان النكبات هذا كم رائع بقومه البسطاء وطبيعته الخلابه ولكن سيأتى يوما لنتمشى تحت الغيمة ..
لك الود وكل الحب اعود حتماً
03-30-2004, 00:29 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
يعني يا تبلدينا ما سمعت نداءات تمبس .. والله قربنا نقول ألحقــــــــــونا يا ناس .. ونحن كنا نتحرق شوقا لسماع هذا الكلام الجميل .. كردفان الغرة أم خيراً جوه وبره .. كردفان المردوم والجراري .. كردفان عبدالرحمن عبدالله .. كردفان أبوجبيهة وجنائن البان جديد .. كردفان الأبيض وبارا .. كردفان تبلدينا ومعاوية حدربي ومحمد الجعيلي ومحمد يوسف .. ومبارك باكو وكثيرون رائعون في ذاكرتي ..
حتماً سوف نعود معاك ..
03-30-2004, 00:39 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
في إتصال هاتفي تم اليوم مع الأستاذ عبدالرحمن عبدالله والحمد لله إطمانئنا على صحته .. وقد أخبرته بهذا البوست ودعوات الجميع له بالشفاء والعودة معافي بإذن الله .. فتوجه بالشكر الجزيل للقائمين على أمر هذا المنبر وكل المتداخلون في هذا البوست وتمنى لهم .. الصحة والعافية وأن يرد الله غربة الجميع ..
معتصم دفع الله
03-30-2004, 09:46 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
شكراً لهذا التواصل الحميم .. ونحن إن شاء الله بصدد القيام بهذا المشروع العظيم .. حتى يعود المبدع عبدالرحمن عبدالله سليماً معافى بإذن الله .. تحياتي لأهل كردفان جميعاُ .. لكل حي .. كل شارع .. كل بيت ..
يا سلام على بارا وناس بارا .. كثيراً ما كان يحدثني إبن عمي عامر حمد وهو فنان مشهور كان يقيم في الأبيض وبارا وكثيرون من أهل كردفان يعرفونه جيداُ عن تلكم البقعة من بلادي عن طيبة أهلها .. خضرتها .. جمالها .. لذلك ليس بغريب أن نعشقها وليس بغريب أن يكتب الشعراء كثيراً عنها ..
Quote: السلام يابارا ويامغر املى فيك راحة قلبى وفيك عزاز اهلى يابارا مابنساك حتى عشرة يوم سايقانى عودة اليكى وياشبيهة الحور هبت نسايم الساقيه وشتلة الرومان وانا فى عناق محبوبى ليا منه زمان طـاب المقام يابارا وليا فيك امان وفى ربوع واديك وياجنان رضوان
المعتصم كيفك أنا قلت الغنا بتاع زمان حق الناس العواجيز زينا ، طلعتوا إنتو الشباب برضكم مشاركيننا فيهو ،، يديك العافية ، والتحية للمبدع عبد الرحمن عبدالله ، مع تمنياتي له بعاجل الشفاء ،،
03-30-2004, 12:19 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
طارق .. ومعتصم معليش مرات كده قاعد اتجنصص مش كده؟؟ زي ما عارف يامعتصم اخوك مزنوق قدر كيف ؟؟ والمرة الجاية ان شاء الله معاكم للاستاذ عبد الرحمن .. في اي وقت تحددوه
يا سلام يا جماعه البوست ده حلو شديد فيه حنية و ريحة دعاش رويانه جايه من كردفان الغرة أم خيرا جوه و بره
و الأحلى من كده حاجتين:
أغنيات مبدعنا العظيم عبد الرحمن عبد الله العامره بالتصوير الغني لبيئة كردفان الضاجة بالخضرة و الزرع و الضرع.
و الحاجة التانية الاهداء الجميل الى العزيز محمد الجعيلي زوج أختي الحبيبة شذى و بدوري أهدى هذا البوست الجميل و اللحن الأجمل اليهما و الى الأمورات يارا، ريلا، و رواء. و يلا يا معتصم عليك الله كلمهم بالبوست ده و خليهم يفتحوا الصوت لأقصى حد للأمورات عشان يرقصوا أصلهم بحبوا الرقيص شديد.
شكرا يا معتصم و شتات و تبلدينا و الجميع على كل هذا الوفاء و الجمال و تحياتي الى المبدع عبد الرحمن عبد الله و تمنياتي له بعاجل الشفاء.
03-30-2004, 11:48 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
شكراً على هذه الكلمات الرائعات .. وزي ما قلتي كردفان الخير .. الخضرة .. الزرع والضرع .. وبلدنا فعلاً جميلة نحتاج أن نغني لها ولأهلها ..
لقد إتصل علي محمد الجعيلي والسعادة تغمره فقد حدثني كثيراً .. عن هذا البوست وهو يبلغك تحياته وتحيات الأخت شذى والبنيات .. وأظنهن الآن يرقصن مع نغمات المبدع عبدالرحمن عبدالله ..
لك كل التحايا والود
03-30-2004, 06:51 PM
Raja Raja
تاريخ التسجيل: 05-19-2002
مجموع المشاركات: 16054
الاخ/معتصم لك التحية ولمداخلات الاخوان التى حركت فينا التفكير فى زيارة الابيض مع انى لم اكمل الاسبوع لسع جاى من هناك ولكن تبلدينا شوقنى للبلد وكانى لاكثر من عشرة سنين لم ازور كردفان وكانت لى زيارة مع الاولاد فى الخريف من شهر يوليو وحتى شهر سبتمبر للسودان عموما من الخرطوم الى دنقلا وبورتسودان وفى كردفان من الابيض غرباحتى النهود مرورا بابوحراز وجنوبا الى الحمادى وام الروص و الدبيبات وخشم الوادى (خور ابوحبل) حتى الدلنج المهم كانت زيارة حلوه وموفقة لكن شوقتونا للزيارة رغم اننى لم اكمل الاسبوع كما قلت، عموما ارجوا ان تهتموا بموضوع الفنان المبدع عبد الرحمن و فى انتظار اقتراحاتكم ونحن معاكم بل اولكم انشاء الله وتحياتى لبورداب السعودية عموما و لابناء كردفان خصوصا
03-30-2004, 11:32 PM
ASAAD IBRAHIM ASAAD IBRAHIM
تاريخ التسجيل: 11-26-2003
مجموع المشاركات: 3920
ربنا يرد غربة الجميع وتعود كل الطيور المهاجرة .. لارض الوطن الحبيب .. تشكر على هذا الإهتمام الكبير ونعدك بأننا سوف نعمل لإنجاح .. هذا العمل العظيم وهو علاج الأستاذ عبدالرحمن عبدالله .. وتحياتك وصلت للجميع ..
03-30-2004, 11:56 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
هذه الأرض تغنى لها كثير من الشعراء .. وهي فعلاً جميلة لدرجة العشق .. ولكن نقول شنو لأعداء الجمال .. خذوا كل حاجة بس سيبوا لينا طيبة أهلنا .. وجمال أرضنا .. بعدها تصدقي فلاً أنها الجنة ..
تسلمي
03-31-2004, 08:09 AM
tariq tariq
تاريخ التسجيل: 05-18-2002
مجموع المشاركات: 1520
العزيز معتصم لى الشرف ان اكون من مواليد الابيض واحب هذه الكوكبه من فنانى كردفان اتمنى الشفاء العاجل للرائع عبد الرحمن عبد الله والشئ بالشئ يذكر اعشق عبد القادر سالم
مدام شامى لى اهل من بارا عائله قريش والشعرانى اعتز بهن جدا واحبهن لهن كل التحايا
03-31-2004, 07:13 PM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
تحياتي ، كنت بتمشي في البورد الرحب و لقيت جديتك حايمة و من ما شفتها وسمعتها سلبت عقلي ، التحية ليك وللفنان الرائع صاحب الصوت الشجي عبد الحمن عبد الله و من هذا المنبر دعوانا ليه بالشفاء العاجل . وسلمت يا معتصم
الصادق خليفة
04-01-2004, 00:11 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
لك التحية والتقدير .. دائماً ما أحس أن كل بقعة أرض في بلادي هم أهلي .. والأبيض مدينة في الخاطر .. تشدك طبيعة المنطقة الجميلة وحنية أهلها .. وحقيقة عبدالقادر سالم رقم في خارطة الأغنية السودانية .. والكردفانية على وجه الخصوص صعب تجاوزه .. له من التحايا والتقدير ..
تسلمي
03-31-2004, 07:38 PM
صديق الموج صديق الموج
تاريخ التسجيل: 03-17-2004
مجموع المشاركات: 19433
.. . والله يا جماعة الدنيا دى ضيقة بشكل .. وعلى حسب لغة الاعلام العالم صار قرية صغيرة يعنى اكثر ما فاجانى معرفة شتات ومعتصم لمحمد الجعيلي ومش كداوبس الاخت / شذي حرمه تطلع اخت ندى امين وكمان خالة الزهرات الثلاثة روئ وريلا ويارا %
03-31-2004, 10:24 PM
Tabaldina Tabaldina
تاريخ التسجيل: 02-12-2002
مجموع المشاركات: 11844
.. . والله يا جماعة الدنيا دى ضيقة بشكل .. وعلى حسب لغة الاعلام العالم صار قرية صغيرة يعنى اكثر ما فاجانى معرفة شتات ومعتصم لمحمد الجعيلي ومش كداوبس الاخت / شذي حرمه تطلع اخت ندى امين وكمان خالة الزهرات الثلاثة روئ وريلا ويارا ، حفظهم الله من كل عين وسوء وشر ،، وشكرا ليك يا تامبا ،، ومعتصم وماما دومه الله يا ابو الدفاع بوستك دا جا مع الزحمة وما عارف المنبر بقي بطئ ولا الحاصل شنو .. ساعتين ما قادر اشارك لمن الكلام طار ... والتحايا لكل الذين دلفوا واندلقوا زى الرووب فى البوست دا ... وعلى اسماعيل انت مشيت اجازة ولا سياحة ووصلت كمان خور ابوحبل ان شاء الله شربت من المشيش ؟؟
القطار المّر فيهو مّر حبيبي والعلّي ما مّر ... كانت سويعات ملكت قلوبنا كم كنت بينا وكم نشتاق تزورنا ما أنت بدر الكون يا باهي نورنا ..
الشاعر عوض الكريم القرشي كانت له ذكريات رائعة كما كانت لنا ففى محطة القطار بالابيض .. تلك البقعة التى جمعت ابناء الوطن لقد كانت المحطة مجتمع قائم بحد زاته فقد جمعت الفرح والام الفراق والمشاعر الطيبة وجمال الاستقبال - رغم الزمان الذى جار عليها - الا ان ذكرياتها تظل باقية فى الاذهان وقد كانت ولا زالت مدينة عروس الرمال وشقيقاتها بارا والنهود وام روابه والرهد والدلنج قد جمعن خلاصة الشعراء والمفكرين منهم من قضي نحبه ومنهم من ينتظر ولم يتبدل عشقهم وحبهم لكردفان الغرة فالامنيات للفنان عبدالرحمن عبدالله بالشفاء والتحية لابناء تلك الارض المعطاء ..
بجيك صاادي تانى .ز بس دى فوق كدا ..
04-01-2004, 00:26 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
تبلدينا ياخي أنت وين نشفت روحنا .. ما قلنا ليك البوست دا منتظر منك الكثير عشان يكمل .. يعني مافي ليك أي عذر ..
أنا ما قلت ليك ياخي ناس الأبيض ديل كلهم أصحابي .. يعني كان بديت أكتب ليك في أسماءهم عايز لي بوست كامل .. أمشي أسال معاوية حدربي حا يوريك .. وأنت ماشي بعيد ليه محمد يوسف ما قاعد معاك في البيت ..
وبالله عرج لينا شوية على إبداعات ودالقرشي وحدائق البان جديد ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معتصم دفع الله
tmbis
doma
ابو جهينة
ود شندي
معتز تروتسكى
tariq
ودقاسم
شتات
Raja
ASAAD IBRAHIM
Rawia
إسماعيل وراق
الصادق خليفة
صديق الموج
فيس بوك
تويتر
انستقرام
يوتيوب
بنتيريست