|
|
 الفـضائيات السودانية، جنـس برطـعة، وبـردبة، وجـقـلبة، ورهزي، ونـقـزي،وبـطـبطة
|
المتابع للقنوات الفضائية السودانية.. يلاحظ أن كل القنوات تلف حول حلقة واحدة.. وحتى التي حاولت أن تأتي بالجديد.لم تأت بشئ يحسن السكوت عليه
القاسم المشترك الأعظم بيناتهن
كل قناة كدة عزلت ليها بنيات سمحات..ختتن وش.. ويلا تعال يابرامج ومقابلات..وأشياء عجيبة..دوشونا بيها… ناس أصواتهم ما أنزل الله بها من سلطان.. وكل واحد جاب ليهو آلة بيانو.. أو عود أو طنبور.. ويلا.. وين لجنة النصوص والألحان الكانت متشددة زمان يا جماعة.. وين محمدية وأقرانه..الآن الحكاية بقت ساهلة.بس من بيتكم وللأستديو.. والمستمع المسكين دا يكبوا ليهو كب في راسو..
حتى البنات السمحات ديل الختوهن وش عشان يعملوا مقابلات.. الأسئلة ذاتا البيوجهوها للشخص المستضيفنو.. أسئلة عجيبة.. لاتنم عن أصالة صحفية.. أو بارقة إعلام. أو إشراق موهبة مؤصلة..
يا ناس الصحافة والإعلام دي موش مهم إنك تقول لي أنا إعلامي.. عندي دبلوم إعلام أو بكالريوس إعلام.. من جامعات السودان الكتيرة المسيخة دي..ناس حملة دبلوم إعلام ولايفقهون عنها شئ..
أيام التصفيات ديك في التلفزيون.شالو كتير من الإعلاميين المرموقين.. شالو ( يسرية محمد الحسن) لما سألت عنها. قالوا شالوها عشان عندها شهادة ثانوي بس.. ما عندها حتى دبلوم إعلام.. هسه يا جماعة الخير لو جينا للجد.. يسرية دي ممكن الزول يبدلا بي واحدة عندها دكتوراة إعلام.. مرأة متمكنة زكية.. لماحة..شجاعة.. صحفية وإعلامية بالسليقة.. والفطرة الأصيلة..لو تتذكروا زمن نميري.. موش جات طائرة كدة أنتنوف وضربت حي بيت المال بما فيهو الإذاعة والتلفزيون.. نميري قال دي جات من ليبيا.. ما عارف صاح والله غلط.. هو كان علاقاتو كانت الأيام ديك ما كويسة مع القذافي
المهم العايز أقولو شنو؟ لحظتها صادف إنو يسرية كانت تذيع في النشرة لمان خبتت الطيارة. يسرية مازحت من محلها ولا إتزعزعت ولا رجفت. ولاجرت ولا أشارت للحصل من بعيد أو قريب.. عشان ما ترهب وتخوف المستمع والمشاهد. لغاية ما تنقح الأخبار ويتعرف الحاصل شنو؟ يعني أذن أمنية على الوطن برضو.. حتى ناس الإذاعة والتلفزيون عملو ليها تكريم وأشادوا بشجاعتها وثباتها..
أها هسه صحفيات الزمن دا. وإعلاميات الزمن دا بيعملن كدة.. والله أول ما ضربت القنبلة الواحدة فيهن تلقاها في الحاج فللي..الحاج يوسف أول ماظهرت في خارطة العاصمة المثلثة كان يسموها الحاج فللي. لأنو أولاد الخرطوم القريبة كان بيشوفوها سفر.. سكة سفر..
أها زي يسرية محمد الحسن دي الزول بيفرط فيها..
هو الزمن الجابت فيهو يسرية دي شهادة الثانوي كان ساهل..؟ مافي جامعات.. بس جامعة الخرطوم والمعهد الفني.. ومعهد ود المقبول للحفريات.. وكلية الصحة.. ومعهد شمبات الزراعي.. يتنافس عليهم حوالي 40 ألف ممتحن.. وحتى يسرية بعدما إشتغلت مذيعة صحفية. مقدمة برامج.. كانت مشغولة بالمعايش وتدبير الواجب المباشر.. وأنا متأكد لو كان فاضية وجرت وراء موضوع الشهادات .كان الآن عندها دكتوراه..لكن كانت مشغولة بتجويد عملها في الخبرة العملية..ودا المهم…
موش يسرية محمد الحسن براها
هسع عمر الجزلي دا.. ما خريج ثانوي عالي زمان.. لكن نجيض وأظن قرا شوية في جامعة القاهرة الفرع و هو شوية شوية لقط من جاي لى جاي.هسه أظن عندو ماجستير في حاجة كدة دا لو ما بقت صارت دكتوراه. الناس النوعية دي نجاض يحمدو ربهم..
نميري.أب عاج لما جاء من مصر جابوه عملوا معاهو لقاء في التلفزيون في البرنامج على الهواء لقى عمر الجزلي قال ليهو( إنت لسه قاعد في التلفزيون؟ ها ها ها) قالها كدة نميري
برضو مقدم اللقاء كان واحد تاني غير عمر الجزلي.. هسه أظنو مافي في التلفزيون. قال لى نميري. إنت لطشتا يمين ولطشتا يسار ولطشتا وسط.. وكتلتا فلان.. وكتلتا فلان.. نميري قال أنا ما كتلتا زول.. ديل براهم هزوا هيبة حكمي..
نميري لما جاء من مصر أظنو كان عندو سلك عريان.. جاري نور طويل..مسيح كرونا...قام قال لمقدم البرنامج( ياخي إنت مزازيني كتلت فلان.. كتلت فلان.. إنت ماشايف شارع بورسودان دا اللي أنا عملتو..ليه ما أثنيت عليهو... ماشايف مشروع سكر كنانة؟.. إنت وجناتك لامعة كدة.. أكيد لاحس من سكر كنانة)
.........
الرهزي.. والنقزي.. والبطبطة.. والجقلبة..
القنوات الفضائية السودانية تبارت وتنافست في ابراز رقيص وأشياء مشت بلاد الواغ واغ في السودان ونكتت الحاجات دي وجابتا وأظهرتا للعالم...
كان نضمتا قلت ياخوانا الحكاية دي ما حضارية.. الرقصة دي مقززة.. اللعبة دي فيها تبرج من نوع غريب. الرقصة دي فيها استهجان للمرأة.. كان نضمتا يقوم واحد نظرو موش بعيد يقوم يقول ليك( لا لا لا دا تراثتنا.. التراث مافيهو كلام
الحقيقة:
الحقيقة كل العالم صار قرية واحدة صغيرة.. يسمع ويرى ويشاهد.. ويتفاعل... ويقيم..كل الناس أصبحوا أقرب من أي وقت مضى.. الشئ الجميل يهزهم.. والشئ القبيح يستفزهم.. في أصل الأشياء أن كل العالم والكرة الأرضية تتساوق ليكون تراثها واحداً.. وهمها واحداً.. ونهجها واحداً...
لذلك إنت ما مفروض تثبتني وتقول لى( دا تراث؟) هل التراث ما ممكن يقيم يعني والله شنو؟في تراث قبيح وفي تراث جميل . والعقل البشري في جميع بقاع الأرض صار قريب من قريب.. حتى لو إنت قلت دا ثراث.. الناس بتعرف قباحتو نابعة من وين..أنا افتكر البشرية راح تتقارب في هذه الأشياء..
ما إنت نكتا الناس ديل من ضواحي الواغ واغ وجبتهن في قناتك الفضائية لتحوز على قسب السبق؟
هو تراثهم دا نابع من وين؟ نابع من واقع مرير متخلف من مكابدة الحياة
يشربون من مياه آسنة
ويلتحفون السماء
ويمشون حفاة
وينامون بلا حواجز
يكون جميل إنت لو حاولت تغير واقعهم الي الأحسن وساعدت في ذلك ولو بشق تمرة وأقمت لهم المدن.. وعلمت أبناءهم وبناتهم.. موش تجيبهم على علاتهم في قناتك الفضائية وتقول( دا تراث) التراث ذاتو ماهو ( رهين الواقع) رهين تجارب هؤلاء الناس البسطاء.. مفروض التراث الجميل يبقى والتراث القبيح ينقرض.. هم الناس دول نفسهم ممكن بعد مرور زمن طويل إذا تثقفوا وعلموا.ممكن بعدين نفسهم بنفسهم يخجلوا من تراثهم دا.. وينقرض كشئ طبيعي.. البقاء للأحسن
....
ياخوانا وين الكيزان... زمان رقيص زي دا مافي..
في التلفزيون زمان إذا في لقطة تحتم على الممثلة إنها تكون نايمة.. تلقاها جات عليها الكمرة وهي قايمة من النوم مربطة خمارات للطيش.. معقولة دي بس يا جماعة( في ناس كدة)( كل الناس كدة)..
...........
كل قناة فضائية جابت ليها مذيعات كدة بنيات سمحات واجهة.. ويلا هاك يا لقاءات وهاك يا سهرات..يقعدن يفاصلن في المستضيفنهن.. يقطعن وارد الكلام المسلسل للمتحدث في غير موقعه، ويقاطعن المتحدثين دونما أي وجهة نظر للمقاطعة..يقاطعن العلماء والدكاترة والمهندسين مقاطعات جافة ..مافيها أدنى حس صحفي ولاذوق عام.. هو الحكاية متروكة سدى كدة؟ كل من هب ودب قال أنا صحفي، خلاص يحق ليهو يقابل قامات العلم والأدب والفن بدون حواجز؟
الصحافة فن زي أي فن
الصحافة علم ذوق
الصحافة ممارسة
الصحافة محاماة
الصحافة لباقة
الصحافة كياسة
الصحافة أدب
الصحافة شرف مهنة
الصحافة تعرف من أين تؤكل الكتف
الصحافة لمسات حضارية
...........
قطعاً الصحافة موش كليات تخرج من جامعات اليوم الكتيرة المسيخة تخرج بدون أدنى مؤهلات.
الولد وين؟ الولد ماشي كلية الصحافة والإعلام
البت وين البت ماشة كلية الصحافة والإعلام
قراية مافي
سمستر هباب
اسبوطنق حفظ يمرر الزول في الإمتحان فقط
موبايل في اليد
وزقة
خبرة عملية مافي
مشروع تخرج أي كلام
خليك من المسائل التانية في البلطجة؟
حتى معظم دكاترة اليوم ماهم الدكاترة الزمان، وهنالك تفاصيل كثيرة تقع تحت هذا المنعطف الخطير
.......
هسه في العالم المتحضر.. أصلاً ما بيسألوك شهادتك شنو؟
في الأول يسألوك إنت تعرف شنو؟
يلا هاك البرهان بالعمل
بعد ما يلقوك تعرف
بعد كدة شهاداتك على عينهم وراسهم.. تجي في الآخر ولا تكون سبب أساسي في المهنة؟
...............
هارموني:-
فيها برطعة..
وساهور:-
فيها جقلبة.. ورهزي ونقزي
والشروق:-
تفننت جابت لينا مذيعات من غير بني جلدتنا سمحات ماشاء الله، يذيعن لينا أخبارنا وناسنا ديك في الواغ واغ.. وأشكالهم كيف؟ يغلطن كتير في أسماء المناطق السودانية بالرغم من إنو بيكونوا قروا عليهم النشرة والأسماء قبل التلفزة.. المهم بختنا جابوا لينا ديل يذيعن لينا..مهمين نحنا..حتى ساقوهن السودان. عزموهن وقعدن شوية في البلد البي يذيعن ليها أخبارا عشان الممارسة..قالوا اتكيفن من اللحمة الناشفة السودانية.. بيحمرنها السودانيات قالن بطريقة مذهلة.. فيها نقاع كدة في آخر الصحن.. العصيدة ما عجبتن.. المرارة النية.لمان جابوا سيراتا سكتن؟.. ناسنا ذاتهم بيبالغوا..مقدمن ليهن المرارة ليه؟.. لمان انتهن من الزيارة جوا عملوا معاهن لقاء في الشروق نفسها يسألوهن عن انطباعاتن عن الزيارة..
وزول:-
شعارا زول أسود بلاك شديد.. هل الزول لازم يكون اسود يعني؟ والزول ممكن يكون أسمر وابيض عديل من الموجودين في العالم العربي..
وجاتنا
قناة ( ابوني) لسه ما افتتحت تراها تلفح شمال ويمين.. الحمد لله العملوا ليهم قناة نحنا هينين.. تمخضت اتفاقية السلام فولدت قناة...
وقناة طيبة تراها قالت أنا متخصصة. لكن ما أتت بجديد..
..............
شايف ناس تشاد كمان عملوا ليهم قناة؟
الناس قايلنها سودانية؟
أصلو كل شئ كدة كدة العرب ديل ينسبوهوا للسودان ما عارف ليه.. هل نبقا شجعان زي القذافي نخليهم؟
............
بعد كدة هل القنوات دي مافيها جديد؟
نعم فيها
هل مافيها ابداع؟
نعم فيها
لكن موش الشئ الطاغي على العمل؟
بعد إزالة الغث
سوف يكون كل شئ موزون
والنقد البناء يساعد على تجويد العمل
والنقد الغير ملون بلون ساسي يساعد على تجويد العمل
واسمع كلام البيبكيك
ما تسمع كلام البيضححك
مثل سوداني
ونحنا ما بكينا قناة
هبشنا هبشات خفيفة
ضرورية
بدون إشارات محددة شديد
فيها تورية
ومداراه
وتشبيه
وتحوير هادف
ومن ينشد القمة
يطوى الصعاب
|
|
 
|
|
|
|
منصوري
فيس بوك
تويتر
انستقرام
يوتيوب
بنتيريست