كتب الكاتب الفاتح جبرا المتوفرة بمعرض الدوحة
|
|
 قصة ظريفة جداً وواقعية خااااااالص
|
غشتني بي صوتا ... وضربتني بي سوطا
ياعمك مرة زمان في الزمان الغابر ، وانا راقد في نص الحوش زي
التمساح العشاري معاي الحجة نتجاذب اطراف الحديث ، والكهرباء ( كاطعة )
كعادتها و السخانة زي الشطة .
التلفون يقوم يرن ،،، ارفع السماعة يجيني ليك صوت زي الكمنجة :
العارض : منو معاي !!
هي : حسن موجود ؟؟
العارض : مافيش .... نقول لي منو ؟؟
هي : قول لي ندي ،،، طيب باي !!
انا ما لايووق مُخاطة بس :
باي نق تربيع !!
دقيقة و الحكاية شنو انا غفير ولا بتاع كبانية !!؟
هي : ليه في شنو؟؟
العارض : طيب ما تتكلمي معاي ، انا ليه البنات بضطهدوني كدة انا ما بنو آدم !؟!
ما كرهتونا البلي زاتو !!!
هي : انا آسفة ما قصدت شئ بس لانو ما بعرفك ، انت منو طيب ؟!؟!
انا : انا العارض اخو حسن ( علماً باني لا اعرف حسن ولا زول بهذا الإسم
الا حسن الترابي وده بذات بينو وبينو مافي اي عمار ) يعني معقول اقول
ليها النمرة غلط ومافي زول إسمو حسن ( انا جنيت ) !!
ونظريتي في الحياة :
ما اجرح مشاعر الصبايا ورفقاً بالقوارير والمثل الخالد بقول ( عدم العروض جفا ) !!
هي : خلاص ياعارض اتونس معاي وليه لا ، ده حتي باين عليك زول ( لتييف ) !!
المهم حنك شديد ، ساعة وانا بتراشق مع البت زي الفراشة ، رشاقة جد ، شئ نكات
وشئ شعر شئ غرويد عيون ، حكم وامثال و البت انكيفت لي شديد !!
هي : طيب باي ، هاك تلفوني وهات تلفونك وسلم علي ( حسن ) .
انا : ( في سري طبعاً ) حسن بتاع جنك ، حسن والصفارة !!
دقييقة ياخي ، ومال كنت ح احنكا كييف !!
لما خلصت المكالمة وجيت راجع للحجة :
سالتني :
ام العارض : انت يا ( عروضي ) ده منو البتنضم معاو ساعة ده !!
.... قلتا ادقس الحجة قلت ليها النمرة غلط .
الحجة : ساعة وتقول لي غلط الضارب ده هندي !!
انا : انت ياحجة في الامن ولا نكير خالك : مالك بتحكيها كدة .
الحجة : يحكك الجرب يامخوزق تلقاها واحدة من الغنم البضربو ليك ديك ...!!
العارض : انت ام رقيقة ولا ام فتفت ،،،،!!
_______________________________________________
..... نواصل : تابعونا ....
|
|
 
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
... المهم سادتي دورت التلفونات بيني والحبيبة الوطن ،،
وكل يوم تلفونين تلاتة وانا خلاص الصوت الناعم يزداد
رسوخاً في ذهني .. اتعذبتا عذاب شديد .
البت اقرأ ليها شعر ( يحي فضل الله ) اقول ليها
انا كتبتو ... مرة قريت ليها :
( ياضلنا ) قلتا ليها دي بذاات كاتبا فيك لانك
عندي زي ضُل الضحي المترامي بين مسارب روحي !!
بعد مدة سمعتا ليك في شريط لي ( مصطفي سيد احمد )
شاكلتني وقالت لي انت ماعندك مصداقية كييف تدقسني
وتقول لي كاتبا فيك !!
انا : ( مالئيم وما بتغالط ) .
العارض : انت ما سمعتي بي توارد الخواطر ،،،
اها ده توارد بيني والشاعر الإسمو / يحي فضل الله ده .
وبعدين هو زاتو متأثر بي و شعرو كلو
ضُل و شجر تقول ( مزارع ) .
اهن الدامة كلما اقول ليها نتلاقي تقول لي خلينا
شوية نأخد علي بعض !!
انا ( متفائل ) قلت النص ده ح يكون مبالغة زي
صوتا ده اصبر عليها و طول بالك ياحبة بكرة تُفرج
وتكتحل عيونك برؤية البدر ليلة تمامه .
يا بت الناس ما نتلاقي خلاص ،، تقول لي اصبر
بطل شفقة انت مالك لايوووق كدة !!
انا اللايووق انا الويكة انا السرسيون .
واشيل واطمن في نفسي واقول البت دي بي صوتا
ده بالميت بتكون قريبة ناس المغربي ، وعيونا
بكونوا كبار وغلاد و حلوات زي عيون الحمار .
... اها مرة قُرحتي قايمة علي و عندي حرقان
وزهجان الف قامت ضربت لي تلفون في المكتب .
العارض : هووي انا حركات المراهقين دي ما
بتنفع معاي ،،، نحن لازم نتلاقي يا كل قرد
يطلع شجرتو شنو شغالين خيال علمي !!
هي : ما تخلينا شوية مالك الليلة !!
خلينا نخلق مساحات للشوق !!
العارض : مساحات شنو دي الاراضي يا نتلاقي
يا شتات تاكلي نارك .
كرهتينا التلفونات بقيت عامل زي رأفت
الهجان كدة !!
هي : خلاص بكرة نتلاقي في نادي الاسرة ،،
بس انت خليك ( ريلاكس ) !!
_______________________________________
... و نواصل :
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
... وقد كان اليوم الموعود .
الحلة كلها عارفة انو العارض جادع زمن وح يلاقي الحبيبة
( ستات الشاي نسوان الكسرة بتاع الدكان
عوض الترزي حتي عايدة شمار ) .
ياعمك خشيت ليك في المحشي من العصر ونجيب الريحاني
( اباطي اتهرد من الريحة ) قربت اعمل الفاتح الصباغ
لي شعري بس خفت من شيلة الحس ، اها وشتات لي نادي الاسرة !!
مشيت قبل ساعة من المواعيد
( الخفة الكتلت اب تفة والرشاقة الكتلت إشراقة ) .
وقلتا اعمل كاسحة ألغام وده ما مهرجان فرح كرنفال عشق !!
اها الدنيا مغربت كدة ، جات ليك بت زي الليل زي السم
انا بي خفتي المعهودة جريت عليها :
العارض : انت ندي !!
هي : لا ابداً وقبلت علي الجهة الثانية
( بس ،، الله يكسر حنكك عامل وشك العريض ده ) .
العارض : هووي يا العولاق اصبري علي بس تجي
القطعة النضيفة دي وجاهتك دي الا اطيرا ليك من راسك .
.. بس بعد شوية تجي ليك بت زي ( السحلية )
لا زي الدبيب لا دبيب شنو زي الصارقيلة الصايمة !!
وانا خلاص من الضحك داير اقع علي وشي ،،،
وهي طواااالي جات ليك علي !!
الصارقيلة الصايمة : انت العارض ؟!
انا : آي انا العارض عارض السجم والرماد .
وفي سري قلتا دي بتكون مرسال الشوق الحبيبة
رسلتا ( للإعتذار وكدة ) انت منو يختي !!
الصارقية الصايمة : انا ما ندي ندوية قلبك
يا قلب ، يخسي عليك ياعروضي ما عرفتني !!
... انا خلاص بقيت مخدر وكداري ما شايلاتني
وقلت ياعمك دي الكاميرا الخفية ولا شنو ؟!
اواصل الفيلم للنهاية و الشباب في الحلة
راجينك ح تقول ليهم شنو؟!
ده ماآكشن الآكشن ، المهم لملمت اطرافي وقلتا
( خربانة ام بناية قش ) !!
وهاك ياضحك وغرويد عيون وشعر ،، اي نعم كنت
داير اطرش وانا بقرا الشعر لكن اهو نمشي الحال .
... وقلتا لازم امتص الصدمة و اعمل فيها روحي رياضية .
وهي دايرة تطير من الفرح ،، وتعطش ليك في ( الجيم )
انا قايل الجيم صايمة اليوم داك !!
وهاك ياغرويد عيون و تتلولح وتتمايص زي الياي !!
وماسكاني من يديني انا قايل نفسي ( هاني شاكر )
و لو جاء زول فيكم بهناك ما حا يعرف الجكساية منو فينا ..
... لكن النصيحة البت ما مبالغة حنضل بس !!
ياخ دي وشها زي اللين ( مثلث ) وخاتة ليها
قطعة كرتونة في صدرها زي المريلة ،، ح تقولوا لي ليه :
ما عشان صدرا ما يتقدّ لو نزلت حنكا ودنقرت
لي تحت ،،، مش قلنا حنكا سنين ولا شنو !!
وبعدبن مجلطا ليك شعرا تقول بي ( مخاطة ) ،،،
وكمان لابسة ليها 15 قطعة قماش ده مسلسل
الجوارح ولا شنو !!
طبعاً دايرة تسمن وكدة : في سري
( لن يصلح العطار ما افسده الدهر يا حبة ) !!
المهم سادتي اليوم داك مرّ بي خيره وبي شره !!
بعدما طمنتها انو البينا سوف يستمر ونحن كيان واحد ..
ولازم نواصل المشوار ولا نامت اعين الجبناء ، وانت
إمرأة حلوة ومستنيرة وروحك حلوة !!
____________________________________
... و نواصل :
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
... ولما رجعتا الحلة فكيتا ليك في الشباب
قلتا ليهم : البت طلعت زي الليل زي اللبلب ،
هم صدقوني لكن بإرتياب عارفين حظي !!
اهن هي بقت تضرب في المكتب وانا عامل
( حظر عاطفي ) إستنفار شديد اي بت تضرب لي
ان شاء الله بت لعاب : انا مافيش انا في الجنوب
مشيت العمليات جاني قبول من سرايفوو
اي حاجة بس جلوني منها !!
انا ما شليق يوم جيت المكتب بدري التلفون يرن ،
رفعتا السماعة القاها ليك دي ( حبيبة قساي )
ومين قسا قلبي !!
هي : وييين اتا وشنو الحكاية من ديك وعيك !!
انا قايل ده يوم القيامة ،، لساني الطويل داك
بقي زي حق الطيرة وخشمي بقي ناااشف و حلقي مُر ،،
جاني طُمام بتاع الملاريا داك و كلما ابلع ريقي
احس كأنو في حلقي في علبة ( صلصة مصدية )
ولا لستق عربية محروق ماعارف بالضبط شنو !؟!؟
وهي مواصلة في الاسئلة زي نكير :
الصارقيلة الصايمة : مالك ما باين ويا حليلك
وياحليل ايامك وشنو ما بضرب ليك طوالي ما بكلموك
سكرتيرتكم العاملة زي الورل دي ما بتكلمك !!
ورل انت كمان بتتكلمي في الشكل ( في سري طبعاً ) .
لما خلاص زهجت مني وانا زي الابكم !!
الصارقيلة الصايمة : ماعشان كدة قلنا
ما نتلاقي ،،، رجال ماعندهم نظر ، و المراة
عندكم بس جسد .... وكركرب قفلت السماعة !!!
_______________________________________
نصيحة :
... تاني مافي واحد فيكم يرد علي التلفون
لو في ناس تانين في البيت !!
همسة :
انا لو بقدر علي الحمام الميت ده ووجع
القلب ده كان مشيت الدفاع الشعبي !!
حاشية :
لا تثق في الصوت عبر الهاتف ان بعض الجكس يؤذي !!
حاشية الحاشية :
... لو في زول فيكم وهو حايم في الخرطوم
و شاف لي بت زي الحربوية خاتة كرتونة
في صدرا (قطع شك ) دي الحبيبة الوطن ...
ولازم يقطع فيها كف علي مسؤليتي انا ،،،،،،!!!!
... وبرضو تقولوا لي سموك : ( العارض ) ليه !!
إنتهت ..
______________________________________
القصة وصلتني بالإيميل وهي للكاتب الساخر الساحر
ود بحري شهاب شكوكو الشهير بالعارض
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
سلنارتي
مسكاقمي
والله انت خطير تقدر تتونس بالعربي ومع البنات كمان
تعرف يا ابن اختي اكتر حاجة بيخلني اعرق وبلساني كمان
اني اتكلم عربي وبالذات مع بنات الخرطوم
| Quote: الحجة : يحكك الجرب يامخوزق تلقاها واحدة من الغنم البضربو ليك ديك ...!! |
الحجة ناقشة كل شئ
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: طارق ميرغني)
|
حمزاوي
يا قريبي
مسكاقمي
Quote: سلنارتي
مسكاقمي
والله انت خطير تقدر تتونس بالعربي ومع البنات كمان
تعرف يا ابن اختي اكتر حاجة بيخلني اعرق وبلساني كمان
اني اتكلم عربي وبالذات مع بنات الخرطوم
|
نحنا ما محس كالفورنيا ساااااي
وكم مرة قلنا ليكم علمونا اللغة
لكن فتحتوا لينا
Quote: Quote: الحجة : يحكك الجرب يامخوزق تلقاها
واحدة من الغنم البضربو ليك ديك ...!!
الحجة ناقشة كل شئ |
والله الحجات الزمن ده بقوا ما يدقسوا بي سهولة
بعدين ديل بقوا يتابعوا المسلسلات مش المصرية
والله المكسيكية عديييل كدة
______________________________________
تخريمة: صاحب القصة قريبي ود سلنارتي برضو
شهاب شكوكو الشهير بالعارض
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
صديقي وأخي الوريف
الباشمهندس طارق
لك التحايا
Quote: والله يا دكتور دي ضحكتني جنس ضحك !!!!!
لكين حظك .... ما تقول لي.!!! |
أضحك الله سنك يا زعيم
ونحنا سعيدين جداً بمرورك
وطبعا القصة صاحبها
أخي وقريبي شهاب شكوكو
الشهير بالعارض
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
والله قصة حقيقى واقعية
واظرف سيناريو وصل اليه خيالك
الطامح ياشكوكو ........
وبحكاية الطامحين دى يادكتور ابراهيم
واحدين خيالهم طامح كتييييير شوية
بيتمنوا انه ياريت لو علماء الجينات
وصلوا لاستنباط جينات تخلى العساكر والضباط
وناس الجمارك والجوازات والاحتياطى اكثر ظرف ولطافة
عشان لما ضابط يمر باستعراض صف لعساكره
يقول ليهم
(عساكر من فضلكم بليز جنبا سلاح ) هههه
شكرا ياشباب على هذه الاستراحة التحايا عبرك
لاخونا زميل البورد صلاح شكوكو
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
Quote: وهي دايرة تطير من الفرح ،، وتعطش ليك في ( الجيم )
انا قايل الجيم صايمة اليوم داك !! |
you made my day
والله أنا الليله ضحكت لم دموعي نزلت
ياخي شهاب شكوكو ده روعه عديييل كده
ده لازم بكري ده يديه باسوورد يرسلو ليه لغاية عندو
وكمان يرسل معاه الأجاويد
ولو مارضى نحن الخسرانين
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: كمال حسن)
|
(Quote: حظر عاطفي ) إستنفار شديد اي بت تضرب لي
ان شاء الله بت لعاب : انا مافيش انا في الجنوب
مشيت العمليات جاني قبول من سرايفوو
اي حاجة بس جلوني منها !! |
يا دكتور ماقلتو نوبه!!! نصيحتي ليكم دائماً (ليس من رأى كمن سمع).
قصة حلوة شديد..
تحياتي لكما أنت وقريبك شكوكو.
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: Mohammed Haroun)
|
أخ قناوي
سلامات
مباااالغة
ياخي خليتنا عشنا مع جو حلو وجميل مع شكوكو
ولعله من الاسم شقيق لاعب الموردة الشهير صلاح شكوكو
سيناريو جميل
وكلمات ومصطلحات ولغة راندوك عجيبة
الفاتح الصباغ - نجيب الريحاني - محشي
وغيرها
تحياتي وشكري على هذا الاتحاف
شكرا
جزل
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: خالد حامد الجزولي)
|
Quote: والله قصة حقيقى واقعية
واظرف سيناريو وصل اليه خيالك
الطامح ياشكوكو ........
وبحكاية الطامحين دى يادكتور ابراهيم
واحدين خيالهم طامح كتييييير شوية
بيتمنوا انه ياريت لو علماء الجينات
وصلوا لاستنباط جينات تخلى العساكر والضباط
وناس الجمارك والجوازات والاحتياطى اكثر ظرف ولطافة
عشان لما ضابط يمر باستعراض صف لعساكره
يقول ليهم
(عساكر من فضلكم بليز جنبا سلاح ) هههه
شكرا ياشباب على هذه الاستراحة التحايا عبرك
لاخونا زميل البورد صلاح شكوكو |
وشكرا ليك يا قريبتي
والله شهاب شكوكو ده روعة
لحد الإدهاش
شاكر مرورك الجميل
يا نخلة بلادي
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
Quote: you made my day
والله أنا الليله ضحكت لم دموعي نزلت
ياخي شهاب شكوكو ده روعه عديييل كده
ده لازم بكري ده يديه باسوورد يرسلو ليه لغاية عندو
وكمان يرسل معاه الأجاويد
ولو مارضى نحن الخسرانين |
شكرا لك أخي كمال حسن
ووالله تصدق شهاب ده قدم لجواز بكري
وبكري شخت ليهو
ونحنا اتجرسنا وبكينا
ويا بكري عليك الله
وياخي وأصلو الزول وفي الواقع ووووو عييييييييييييك
والله ما قال لينا إنتو بتسووا في شنو؟؟؟
المهم بعد كدة لو أدانا باسويرد
لي شهاب العارض ده يكون ما قصر
وده بمثابة نداء نرجو رفعه لبكري
وشكرا ليك تاني
على مرورك يا راقي
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
Quote: أخ قناوي
سلامات
مباااالغة
ياخي خليتنا عشنا مع جو حلو وجميل مع شكوكو
ولعله من الاسم شقيق لاعب الموردة الشهير صلاح شكوكو
سيناريو جميل
وكلمات ومصطلحات ولغة راندوك عجيبة
الفاتح الصباغ - نجيب الريحاني - محشي
وغيرها
تحياتي وشكري على هذا الاتحاف
شكرا
جزل |
شهاب شكوكو
الشقيق الأصغر لصلاح شكوكو لاعب الموردة
وعضو البورد
وشهاب شكوكو صاحب نكهة خاصة في لغة الرندوك
وصاحب سبق في صناعة المصطلحات الجديدة في الرندوك
وتحياتي لك اخي الكريم
خالد الجزولي
وشكرا لك على مرورك الكريم
وتسلموا جميعا
مارين ومعلقين
واعضاء وضيوف
ويسعدني أن اسعدتكم
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: حاتم محمود الجاك)
|
Quote: يا قوم اذني لبعض الحي عاشقه .. والاذن تعشق قبل العين احيانا
انا برضو قلت قصة عشق الاذن دي توريطه
الواحد تاني مع الكريمات المنتشره دي عينو ذاتها ما يصدقها
سلامات ابراهيم |
التحايا لك أخي نوفل
وشاكر لك مرورك الكريم
وحقيقي الأذن تعشق قبل العين أحيانا لكن المقلب ببقى
زي حق العارض ده
والتضليل البقى باستعمال أسلحة التخفي المسماة مجازاً بالكريمات
مشكلة كبيرة ومقالبها مالية الساحة العاطفية
لك الود كله يا راقي
| |
|
|
|
|
|
|
|
|
|
Re: قصة ظريفة جداً وواقعية خااااااالص (Re: ابراهيم قناوي)
|
Quote: غشتني بي صوتا ... وضربتني بي سوطا
العارض فعلا مبدع في الحكي
وانت يا دكتور مبدع في الاختيار
تحياتي يااجمل جار |
حاتم يا وريف
سلامات ياخي
ومنورنا والله
وباقي نورك واصلنا بالشباك
وحامينا النوم زاتو ياخ
تحياتي ليك يا غالي
| |
|
|
|
|
|
|
| |
ابراهيم قناوي
ناهد بشير الطيب
كمال حسن
Mohammed Haroun
خالد حامد الجزولي
نوفل عبد الرحيم حسن
فيس بوك
تويتر
انستقرام
يوتيوب
بنتيريست