|
|
|
 Re: روح (Re: عثمان البشرى)
|
يابت مساء البوح.
صبح الشتا المجروح.
خلاني فيني أروح
ما تكتري الجفوة.
خلي الحرابة تفوح.
في الغفوة والصحوة اصلو العمر ممنوح.
ومن حقنا الفحوة فيما يخص الروح +
- *
قبال شويتين بس ، دخلت علي سيرتك .
كان لابسا ليها دعاش ، صابغاهو حنيتك .
يا منتهي الانعاش.
مهما أعترني طشاش ، تبيض علي نيتك
_________
"YourAttitudeDetermineYourAltitude"
| |
 
|
|
|
|
|
|
|
|
Re: روح (Re: عثمان البشرى)
|
الكائن الخلوي (عثمان بشري او عثمان العودة) اهلا بعودتك
اقترح ان تجمع قصائدك المنثورة علي هذا المنبر في بوست واحد
| |
|
|
|
|
|
|
|
|
|
Re: روح (Re: عبداللطيف حسن علي)
|
دي واحد وهناك روابط للبقية
عنوان القصيدة لوح السراب
النص:
لوح السراب نقع محاية الشوق
لا تجينى يا نجالة الخاطر
سبيب من طيف
وقع الصقر او هان
كتر البتابت عيب
لا تجينى هان فى الغربة
مسدولا جيف
تعردى فى يمنى ويسرى
اسئلة تعبر السيف
دحن ودرنى
شن خدرنى
غير حيلا غشاهو الكيف
يا تركة حشاى
عنت المساسقة والهبر والجيف
وضم حساك كشنة بال
متنخشن ضراى تربال
جكاك المتنة رهيف
وشن تبقى الرهيفة المايلة
ضلمة بلاكى
شايلة هلاكى
والميتة الفطيس كيكيف
صوت من نجم مقهور ومتورط علاقة مع السما
او غابة فى وردة مريض بلدى
معصلج فى الحكيم والاستبالية
مجنونة من غبشت زقاقات البيوت اليابسة
ماكلة ولابسة احلام فى الحضر
ثمود او عاد وبياتن حجر انحل
غنوة بعيدة من ميقات الهبوب
والقرى المطرية
او طورية تفتق صرة فى شهوة بذور
والضل كديب ماجور على حقو
ومزنق فى سماية
شمس المخاليق البتجبد جوا ميزان الطحين
سب دين وزغرودات صبايا
عشم المسارقة والمجابيد الهوين
المفاتيح البلاش والكيف مستف احتشاد
كلاكى جيد
جيدن يجود حالكى
يا هبر القنيص الفضى
والخلا سم بهار
عفيض الشوق قميص ودران
من الصبر المحمد تار
اجيك مسك بدراوى
فى ساعة نفاس بكر
اجيك عكر
اجيك من حتة الوطن المعتب ضل
ومتريق على فى نعسة مبلولة
ومعطنة بالخلو الذهنى
من كدب الدهم والكشة المركشة
بالمرابيط واللحام البشرى
ابنوسة فى فد مرقة وقعدت للريح
والهتش عريان
من وين اختلف عنك
يطيب ظنك
ادخلى من المغارب ما ختاك النيل
محل قبلت اتمحن واشوفك
فى حداهو توسوسو
شن بتقولو يا كاشفات جرفنا عروض
شن بتقولو يا تمك الهجير والمستحى
ابنوسة طفر من براطيشى السؤال
عذبنى قصر الاجوبة
ساسقت بين امشى وتعال
عفرت هدومى الاتربة
وحل المقادير اختلال
فى تكنلوجيا الافئدة
تمشينى من اقصى التلال للروح
الى اشهى العذابات فى الحبال
ينشل صوت الاقربة
ابنوسة جيتك برة صوت الاجتماع واللجنة
والعرق الرهيف
طلقانة بنوت النميمة الهشة
سماك ما بتنفضح للليل
ولا بربح نجومك صوت
مبشر فى السهل عفريت
وكل ما اسقطك فى الدم عنت
اجلبط هلاويس وانشتر
مين يقدر بلاك فى العكرة
من شبق الطنين والفكرة
يبرد اضانى من قعدة ونسة
الموية والخمج المكركع
مين يقدر يحت احساسى بغربال
يفرز كومو
يسند نومو
بالارث البتصحى من الصباح
دكان وراكوبة ونعال
تنشال على كيفك
على كيفك
تتحدث عن الكوليرا
ونهاية السباق الاجنبى
ولا هماك مناكف فى الغلط والصاح
وتتقب براح
مين يطلع مع الضى من تحت فركة
وعصير نسمة هفيف الليل
ينقط فى المسام
والهم برش
الهم برش
تتمدد على كيفك
تتمدد قدر فرشك
وحت لو كان اذا نعشك
زنق احلامك البكرة
ومين يقدر يصنك فى حدث عابر
ولد فى ثرثرة بنوت من الدهشة
ويصنك فى حلوقن ريق
مدبرة فى الخفايا قدر
بلاك ما دافقت جواى روح نطفة
ولا بلغت جواى بلد
ولا ناطح عرق فى الروح
بكيمياء العلاقة ولد
يا شقنبة كل القوانين
وارتفاع صقر الممارسة
فى ازيز الايدلوجيا
احبك
احبك
احر من البدرة الملح
(انتى بايوتك) الكلامات المهترشة
حينما يصطدم المدى بالليل
الان لا تتفرعى من نار نسمتك السليقة
انا وين من العالم
اذا كل البراهين ركزت طايوقة فينى
ومركزت جواى كون
ولا هامش يكون فى الواطة غير اتنين
ونسمة من الدقش تمرق على التاريخ
سلام عودين
مشبكة فى هدب
وتترتب صفوف الديش
انا وين
وتقعدى فى الهبايب
ثرثرة ونتيش
محننة بالسليقة
ا مهبوشة قومى
قومى من الزلط
دهستنى فى اترك سموم اللهفة
احى عليك... قومى من العباية
الفار لعب فينى الضلمة
امرقى يا جاموسة من تحت الاكمة
اسكتى يا قرقير ضحاوى البال
ها ..يمة
سرق العمر مخلوقو
منك انسيك اسمى
واتنبر ضهارى الغربة
حتة بطاقات واشتباهات فى الهوية
ما بفوتك
حدثى الجايين والرقراق على سهلة بيوتك
ما بفوتك
بين زناد الفكرة والغلط المبيت
ما بفوتك
جف الدبر او شيد
ما بفوتك
اطلقى البيبان تفك ريقة من بنابرا
الواطة صبحت فى الفريق
واللحافات فى الشمس جريها
بكان خت الزول فتر
وامطاك فجر ضحوية
ما كلت حوافر القوت
تحاحى من الفقر
ما بفوتك
انا مين يفضل بابى
غير قفة غناك الفنجرى
انا منك ادليت على
وجيت عليك... وغشيت يمينى
ياشقنبة كل القوانين
وارتفاع صقر الممارسة
فى ازيز الابدلوجيا
احبك
الان لا ابكى ولكننى احدد قدرتى فى
الاتساع على مدى عينيك
رب طريقة اخرى تحملنى الامانة وفق ايمانى بها
وفظاعتى فى العشق ابان الهزيمة
فيما يخص البحر
للبحر الذى فيما يخص
انتهى..........
| |
|
|
|
|
|
|
|
|
|
Re: روح (Re: عثمان البشرى)
|
Quote: انا شاعر ، نعم ، ولكنني اتفه نفسي فيما يخص الواقع السوداني
، الواقع الذي علم ابنائنا الهجرة التي لم تكن يوما ما من شأنهم
إلا فيما يخص القضايا المجتمعية.
وعلي هذا الاساس ارفض التعامل مع أي مؤسسة وهذا بياني.. |
يا عثمان يا فنان
اعجبني النص (كعادة نصوصكـ) الباهيات
و ايضا اعجبني بيانكـ اعلاة
انا لسه معجب بيكـ و لسه بحب شِعركـ بالمناسبة
و انت لسه صاحبي وانا مبسوط اسه
يُمة ..
واحدين سموكـ بت ابوكـ
و واحدين سموكـ مره ابوي
اسميكـ نبية جات حفيانة شان تلبس شوارع الناس معاي
و تكسي ركاب الحنين تكسي
طرحتكـ يمة قميص يوسف و كضابين خياتنا
البير البلعت يوسف ما الذئاب
شِعر عثمان البشري
__
تحب تسمع ؟
| |
|
|
|
|
|
|
|
|
|
عثمان البشرى سلام (Re: عثمان البشرى)
|
إزيك يا عثمان
أحب شعرك جدا والله
غريب وفيهو إيقاعات
حارة.
بيانك دا إن درت نوقع معاك
ما في مانع لأنه بياني برضو!
وينك إنت في الدنيا دي؟
مصطفى مدثر
| |
|
|
|
|
|
|
| |
عثمان البشرى
عبداللطيف حسن علي
خدر
mustafa mudathir
فيس بوك
تويتر
انستقرام
يوتيوب
بنتيريست