|
|
 كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر
|
قصيدة أم زين
[ كلام في الزّمة ..علي لسان السّرة بت محمود وحامد ود الطّفّح ]
تبدأ القصيدة بشكل عادي حيث تتطور في شكل أحداث ماساوية تعكس حالة إنسان السودان في
ظلّ الاوضاع البائسة . تنساب القصيدة في حوار تراجيدي في شكل رسائل متبادلة بين السّرة وحامد .
نسبة لطول القصيدة سوف أنزلها في صورة مقاطع حسب تسلسلها .
الشخصيات : ـــــ
السّرة بت محمود ... زوجة حامد ود الطّفّح .
حامد ود الطّفّح .. زوج السّرة الذي مات في أمريكا إثر صدمة عربة الجاغوار رمز الحضارة .
الضوء ود جبر الدّار .. رمز للمظلوم ... قطعت يده بحد السّرقة .
أم حقين .. إنتحرت غرقا في النيل بسبب الظلم .
حليمة الطرشة بت مسعود .. رمز الطيبة السودانية .
شيخ الخلوة .. رمز الخبث و الدهنسة .
صارقيل الطين ... صهر العمدة ، سبب موت أم حقين .
السّني ود النيل ... رمز للفقر ، مات تحت أنقاض بيت الطين .
العباس ... ود السّني ، رمز للرفض .
أم الحسن ... إمرأة كبيرة السن ماتت غرقا بسبب الإهمال .
تغريبة : ـــ
الدّرب الأضلم ليالي صباح
والاهو التعب في قلبو نام مرتاح
دقشنو المحن زادن جراحو جراح
في بدايتو الدموع اخر نهايتو نواح
.......................................
القصيدة :ـ
وشك ما للشينة
يا مطر العينة
السّقّ وهاد ..
الحزن الفينا
..............
درّ سحابك نقّع
شال نوارك فقّع
تقل سمرك وقّع
طافح خيرك فوق لي قيفنا
خريفنا وصيفنا بنكرم ضيفنا
إلا الزول وكتين ما يطمع
يفلت منو زمامو
ينسي الخير العايش فيهو
يخت الشّر قدّامو
يمد إد ينو لي حقى غيرو
غيرو يموت
يمد أدينو لي حق غيرو
غيرو يفوت ....
وفتنا عيونك ...
فتنا عيونك وين بنلاقي
زولا إشيلك في شريانو
وكتين تنزل في الأحداقي
وين بنلاقي ....
الشّمعة الّرّمت الدّمعة
وسالت في العراقي
وين بنلاقي ...
الأمل الشّدّ رحالو وسافر
خلّف دمع الحزن الباقي
وين بنلاقي ...
وين بنلاقي ..
...............
فتنا عيونك ما بالخاتر
إلا الظّلم الفات الحد
واتعدي السّاتر
سوّد وجه الشّمس الباكر
رمّد وجه أم زين السّمحا
بدّل فرح أم زين في لمحا
ودّر فهم أم زين ...
بعد أم زين ماعرفت تكتب وتمحا
...................
أم زين ما خابت يوم
أم زين ما عابت يوم
في الزّمن الشّوم
أصبح صوت أم زين مكتوم
أصبح صوت أم زين مكتوم
..............
صوت أم زين ....
ما صوتنا الفينا
لا تغشينا...
ولاتهشينا
ولا للشر قجينا
مسكنا دربنا
وسّدنا أم زين عينينا
أم زين في سمانا
رعدا داوي
أم زين في ليلنا
قصص وحكاوي
فجر صباحنا
فرح وغناوي
في خاترنا
النور الضّاوي .
ماتهنينا .....
وراها البتّا
كيف الروح
بتفارق الجتّا
فارقنا أم زين
في الزمن الشّين
وين اصبحنا
دمعنا فضحنا
كيف امسينا
علق الموت
والجوع الكافر
رحب بينا
نواصل ...
|
|
 
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
حكاية أم زين
لابتضارا ولا بتتغابا
أوّل بادي .....
جونا ضهابا
ساطوا الدّار
قلبوها خرابا
قاسوا ومتروا
دار أم زين
زرعوها حرابا
قسموا أم زين ..
كومين إتنين
واحد للزنج الفي الغابا
واحد للعرب العرّابا
ما بين اللون والدّين
دقوا الإسفين
في صدر أم زين
بقينا نشوف
الزّول زولين
بقينا نشوف
اللون لونين
بقينا نشيل
حربه وسكين
شان نكتل مين؟؟
شان نكتل مين؟؟
.....................
تاني البادي
بعد الليل...
ما هوّد وسوّد ،،
الخدر الفينا بيسري
أولاد أم زين ما بتدري
النايم ما بدري الغدري
جونا جماعة ..
من العصر الحجري
سرقوا أم زين بالليل
صلبوها بين ويلين
ويل الموت
والجوع الفقري
هاصوا ولاصوا
في قلب أم زين
فركوا وعاسوا
تموا الناقصة
بعد الحمّي
يجينا الجدري ؟؟
بعد الحمّي
يجينا الجدري ؟؟
نواصل.......
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
تالت البادي ...
قعدنا جماعة
إتشاورنا ....
حسمنا أمرنا ....
لي فرح أم زين
حدّدنا الساعة
نظرنا بعيد
ختينا اللّيد في اللّيد
بعد الرّوح في الجتّه اتردّت
قلنا نعدي الشاطي اللاخر
زي ما لناس سبقتنا وعدّت
قلنا نعدي الشاطي اللاخر
شلنا فرحنا ....
زي ما الناس ببناتا تفاخر
نحنا كمان بأم زين نتفاخر
في وجه السّمحة سرحنا
في البت الشّربت موية النيل
الأزرق كحّل عينا
كساها سوّاد وسمارة لون
الأبيض بيّض قلبها
ذاب في الدّم
سكر وليمون
كيف ما يكون .....
البت الشّامخا
بين الناس
رحبة ومتسامحا
شلنا جمالك غنوة فال
غنّاك برقا دندن هطّال
غنّاك نخيل طربان
علي نيلك مال
أدّا الشّبال
غنّاك فجرا
شلناك موّال
شلنا فرحنا ...
إتلمّينا ...
إتحمّينا ....
بسم أم زين سمينا
نواصل ..
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
بعد الرّيح الهوج ما خفّ
نفضنا غبار الماضي الفينا
قلنا الناس تصافا وتصفا
كانت زفة
يوم الوقفه
للبنت الزّينه ، الرّوعه ، العفّه
.........................
بعد الرّوح في الجتّه اتردت
قلنا نعدي الشاطي اللاخر
زي ما الناس سبقتنا وعدّت
قلنا نعدي الشاطي اللاخر
جبنا المركب.!!!
درنا الدّفة .!!!
يا حسن اركب .. !!??
يا حسن اركب ..!!??
يا سجم اركب...!!??
يا سجم اركب...!!??
،،،،،،،
سجم الخاين صرّ وجيهو ونفّ
سجم الخاين جقلب وشكنب
مدّ لسانو فرق اسنانو
سجم الخاين قدّ المركب
سجم الخاين قدّ المركب
؟؟؟؟؟؟؟؟؟؟؟؟؟؟؟؟؟؟؟
تاني وقعنا علي دابرنا
وقعنا غرقنا
غرقنا حتلنا
يا بو مروّه... ؟؟؟
يا بو مروّه.... ؟؟؟
منو البنشلنا .؟؟؟
كان .. وكنّا
قال ...وقلنّا
فقدنا ضماير
بقينا عشاير
دمها فاير
كتل الرّوح
بيناتنا شعاير
زرع الناس بيناتنا خساسه
ناس للشّر واللّوم عوّاسه
كتل الزول سموهو سياسه
غدر الزّول سموهو فراسه
فن الزّيف سموهو كياسه
من ملاكي وخونة كاكي
قرود بتحاكي
ديوك بتكاكي
تجّار نخّاسه
وجهلة ساسه
بسم الدّين
باعونا بخاسه
قلبوا الحال بيناتنا خيانه
نفوس طغيانه
من الغش والزّيف تريانه
قلوب وسخانه
من الحق والخير عميانه
أطفال جوعانه
تبيت القوّي
من الجوع
تشكي وتتلوّي
من مغص الجّوع
بتشم مصرانا
جور ومهانه
جور ومهانه
نواصل ..
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
حكاية أم زين
مأساة اجيال
كبار وصغار /
الضّو... ود جبر الدّار ...
عندو التومين
لسّع رضّع
منذر ونذّار ،،،
الله يعينو ../
حكم الظالمين
حكموا عليهو
وقطعوا يمينو /
المسكين حالو اترمّد /
قالوا سرقلو تلات كيلات
من التاجر شيخ أُمحمّد /
البلد اتملت أحقاد وحساد ،،
شهدوا عليهو تلاته جماعه ،
منهم احمد اب دُلّاعه
ود اب سجمه وخالو وداعه .،
شقيقو التّاي
تاجر الشّنطه
الكان بناي ،
عدم الفّله
ساب الحلّه
عشان بت بلّه
نقضت عهدو
خطبت واحد
من الملّه ،،،
أولاد الزين ..
نسيب التّوم ود حاج عبد الله
من الذّلّه ..
الحلق إنسلّ
شهرين جُلّ
قتاتم شيط
وبليلة حله ،،،
من الشّينه
بت محمود باعت البقرات
سدّت دينا ،،
بت بتّها تُوقل وتقدل
باريا العربات تطلع وتنزل
خسارا الزّول وكتين يرذل
خسارا الزّول وكتين يرذل
،،،،،،،،،،،،،،،،،،،،،،،
شيخ الخلوه
طالق دقنو
جاتو البلوه
دافن راسو مع التّجار
شغّال سمسار ،،
بي إسم الدّين
باع طين أم زين ،،
الممسوخ شهوتو فالته
عاوز اتمتّع
عرّس تاني بعد التّالته
عاوز اتمتّع
عاوز اتمتّع
تورا لاقي خريفو ويرتع
مادّي كريشتو
وكاتل حيلو
اتل واتفدع ،،
كيفن يا شيخنا
تشيل اللّوح
وتقري الشُّفّع
كيفن يا شيخنا
تشيل اللّوح
وتقري الشُّفّع
،،،،
جاتك امانه
يا شيخنا نسيت
كلّ السّويتو مع ام حقين
بت المسجون حسن المسكين
البت يا داب ..
زهرة ياسمين تحت العشرين ،،
مالقمرة بتمشي علي قدمين
جاها المسخوط صهر العمدة
صارقيل الطّين
فوق السّبعين زايد سنتين
وسط شيخنا
شيخ الضّالين
زفوا البت بي دمع العين
البت اتختّت بين موتين
في يوم بالليل
والناس نايمين
تركت دُنيا العمده
وحتلت في قاع النيل
حتلت في قاع النيل
نواصل..
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
أم حقين .......
الكلمة الماتت في الشّفتين
يا شرف الشُّرفا الميتين
الحزن دفين..........
ما غنّينا ليك فريع ياسمين
ولا دورتي للشّبّال شمال ويمين
أم حقين ..........
يا شرف الشّرفا الميتين
ماسي الدّنيا متابعين
رسالة السّرّة لي حامد
مع الغايبين بيان البين
يا حامد مدارك وين .....؟؟؟
يا حامد مدارك وين ....؟؟؟؟
أريتك يبقي حالك زين
نشيل ونسدّي في الأعوام
سنين إتردّمت في سنين
حالنا وراك حال ميتين
منتظرين دفنا يحين
كنّا زمن وراك صابرين
إلا الجرح فينا كِبر مع الأيام
وزاد الحسرة بلّة طين
لا خبراً يرد الرّوح
ولا شوفتن ترضي العين
اريتك يبقي حالك زين
كلّ الناس عليك سائلين ومشتاقين.
حليمة الطرشه بت مسعود...!?
تراك عارف قليبا حنين
كل يوم ....
داقا باب الدّار
عليك تنوح ،،
صوتا حزين
وتر مسفوح ،،
مع الحنيّه نبرو وجيع
تقول مجروح
وطالع من عذاب الرّوح !!!
تقول مجروح
وطالع من عذاب الرّوح !!!
المسكينة تتحسر
ويوت تسأل ..!!
توصف فيك باللّيدين
دموعا تسيل وتتوسل
.........
.........
لِس البشر طيبين ياحامد ...
لِس البشر طيبين يا حامد ....
لِس البشر طيبين ومتسامحين
بحر الطّيبة ما بكمل
حبل الخوّه ما بنحل
يا بو مروّه ما بتقل
درب الِعزّة ما بِقصر
إلاّ الجبين ُمنصر..!!?
من التّجره وكلاب البر
ترا العيشه البقت ملاله
زادت حر .،
ترا العيشه البقت ملاله
زادت حر.،
..........
الخبر الشّين يا حامد ..!!!
أمس شيّعنا ....
حاج السّني ود النّيل
كان الدّنيا مطراً شو
وطمباج سيل
سمعنا السّكلي والكوراك
هرعنا شمال
جرينا يمين
الله انعل بيوت الطين ومطر الليل !!!???
البيت إنهدّ في المسكين
كان يا حِليلو يُهذي يشيل
يغنّي علي بُنا الضّانقيل .
..........
عوج الدّنيا يا حامد..!!
ولدو العبّاس شيخ الجّغرافيه
بارم شنبو تجيهو العافيه
من التعليم جاهو التّعيين
بدل الجغرافيه يدرس دين
ساب التعليم في الحال
شغّال ترزي وماسك التّموين
شغّال ترزي وماسك التّموين .
نواصل ..
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
دنيا عجيبه يا حامد
دنيا عجيبه يا حامد
دنيا غريبه ....
ياتو صباح داهمانا مصيبه!!!
دنيا مطلوقة رسن ،،
معلوفه من قش الرّياح
تريانه من بحر المِحن ،،
أم الحسن ..شرف الزمن
برت المزارع والجروف
زمن الدّرت زمن الجِفوف
زمن المطر زمن الصّيوف
قدر السنين اللِنطون ،،
ناحت مع القمري الدّباس
شالت مع الشّدر اليباس
طردت مع السُّقد النّعاس
حال العوينات عمّشن ،،
البيت مغر طيناً قديم
وجر الضّباع لو إنسكن ،،
وناسا فد غنمايه
في ضهر الصّريف
مرات تضن ....
مرات تجود بي كاس لبن ،،
العِيشه زي فار المسيد
حترب عصيد.......
ترياقه من حب الدّخن ،،
الحال مكن ...
لا شاي لا قهوة صباح
لا كوم جميرات ينطفن ،،
أم الحسن ضاربا الفقُر حدّ الكفن ،،
خسرانا .....ربحانا الأسف
من القديم اللّنصرف
الباقي في قعر الزّمن ،،
الباقي في قعر الّزمن ،،
،،،،،،،،،،،،،،،،،،
في يوما داك ....
كان يوم خميس ,,
عقبال صباح عيد الفُطر ،،
سمعت صياح ديكاً بعيد
ظنّت أواخر الليل فجُر ،،
شالت عكيكيزا الرّفيق
سناده من وجع الضّهر ،،
مسكت دريب النيل تسك
زمناُ قريب وقت السّحر ،،
مرقت علي عرق الجرّوف
الدنيا كان زمن الخريف
النيل طفح غطا القيوف
النيل ملا اليابس غمر ،،
أم الحسن طِرت القِبيل
زمن السّمح زمن العديل
عقدت هِديمه علي الخِصِر ،،
مدّت عكيكيزا الطويل
تنخسبو في زبد البحر ،،
كان تلقي عوداً للبخور
لا فحاهو موجة من الجُّزر ،،
،،،،،،،،،،،،
العين رمد .....
الشّوف طشاش
مرض الكٌبُر ،،
راس العكيكيز في الزّبد
الهمهمات شيتاً كُتُر،،
(( ود اب كساوي عليك نويت
كان عود طلح كان عود كِليت
ود اب كساوي عليك دنيت
كان عود طلح كان عود كِليت
ود اب كساوي عليك حكيت
يا شيخي يا لحّاق بعيد
تلحقني في دربك مشيت
كان عود طلح كان عود كليت
ود اب كااااااااااااا.............))
أم الحسن خانا النّظر ،،
الشّوف غباش.. ...
الهمهمات .. ...
الإرتعاش ......
تابعا الرّهيف قايلاهو بر ،،
الموج دفر ...!!
الموج دلق
رجع انحسر ،،
الموج دفق ....
الموج هدر...... ،،
أم الحسن قدما انزلق ...
راس العكيكيز انكسر ،،
طاحت علي وش الزّبد
أم الحسن شالا البحر
أم الحسن بلعا البحر ،،
،،،،،،،،،،،،
مرّ الصّباح
الدنيا عيد
فرحة بشر ،،
عين الشمس ..
زلفت قريب كبد السّما
الضّل زحف
تحت الشّدر ،،
عيد سعيد
كل عام
وأنتم بخير
أم الحسن من غير خبر ،،
أم الحسن من غير خبر .،،
نواصل ..
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
في كون بعيد .....
خلف المحيطات والبحار
عالم جديد ،،،،
صحصح عصفير المدن
دلك عيونو من السّهر
عكل الدّخاخين والحزن
حاول يغني علي الصّباح
عشرقلو يلغم في الحلِق
صوتو اتركن
قحّ وسكن ،،،
طرّق خشيمو علي الحديد
فلفل جناحو من الضّجر،،
قلّب عويناتو الحمر
وسرح بعيد
في يوم جديد
قبّال نهار اليوم يمر ،،
ضربو الملل
صهدب فتر
جاتو إلتفاتة مع الحذر
بحلق نظر ،،
ضُل الشّدر
علي ضُل بشر
علي ضُل حجر
تحت العمارات انكسر ،،
شارع الظّلط ،،
غادي انشحط
سبّورة سودة
عليها خط
قاسم الوسط ،،
الدّنيا حر
يقلي الحجر ،،،
زفر المصانع في الشّوارع انفجر ،،
لا نسمه من قلب المطر ،،
لاريح موشوش من نهر
الدنيا حر يقلي الحجر
زي التّكنّو نزل قدر
قبل العصر
يفني البشر،،
،،،،،،،،،،،،،
كان يوم غريب
كان يوم كدر ،،
،،،،،،،،،،،،،
حامد نزل ...
شارعاً تقول خلية نحل ،،
ناس في عجل ناس في وجل
حديد يسابق في الأجل
الحالة هل.. كيفن.. وعل
الهم نزل في الرّاس عكل
ملك الفِكر شلاهو شل
الشّوق لفح ريش القلب
شالو ورحل :ـ
(( شوقاً طال
ودمعاً سال
ليك يا السّرة
كيف الحال
ما اخترناها يا السّرة
إلا الزّمن إختار ،،
ساقنا بعيد
رمانا هناك
مصير القشّة في التّيار !!!
وصلنا بلد
طوانا لحد
بلد يا السّرة فبريكا ،،
الشركات مفاريكا
تشيل منك وتديكا
تشيل منك معانيكا
تزيدك في ماسيكا ،،
تشوف نفسك تقول ضِدّك
تقرِّب منها تصدك
تبعد منها تردك
بلداً كتل فينا الأمل
كان للعمل ....
نار الجحيم كيف تُحتمل
نار الجحيم كيف تُحتمل ))
نواصل ...
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
كان للعمل ......
قولي علي يالسُّره
حكايتي الشّينه
تسخر مني تتبرا
شن الشّغله يا حامد.. ؟؟
مغصةً للقلب تقطع ،،
مساهر ليل نهار سقّاد
مصاقر مكنة في مصنع ،،
مكنة الجّن تقول لهضان
لا بتقنع ولا بتشبع ،،
أطمِّع فيها بالكرتون
أفر واجمع ...
أرُص واجدع ،،
الممسوخه زي تمساح
علي المِشرع
يشيل يبلع ،،
مره تزن
ترِت وتطِن
كِريشا تزيد وتتوسع ،،
مره تمور
تقول تطرش طراش الدّم
مره تصِن
أقول الرّوح بدت تطلع ،،
مره تزيد
تمور وتفور
تقول شبعان بيترّع ،،
ليها صرير مع الجّنزير
ترا الممغوص بيتوجّع ،،
حال سعران قبل تنطمّ بالكرتون
أريت احشاها تتقطّع ،،
يوم ورا يوم
مصاقر المكنة ليل وصباح
علي حالي الحجر يدمع ،،
سنين فوق السّنين عدّت
واللتعدّا كيف يرجع ،،
حكايا طويلة يالسُّره
اشكي علي الزّمن واسجع
لو الزّمن يرحم ولي يسمع
لو كان الزّمن يرجع يعيد
حال الدّرت ومطر الصّعيد
لو كان الحكم منصف رشيد
لو كان الأمل باللّيد
ما كُت فتّ دار السُّره بت أم زين
بقيت رحّال يا حامد
وعشت شريد
ما كت فتّ دار السُّرة بت أم زين
بقيت رحّال يا حامد
وعشت شريد ـ
،،،،،،،،،،،،،،،،
كيف يالسُّره بت أ م زين
شوق وتعب علي حالين
ما فارقتك عِنيا
إلاّ تفاهة ِدنيا
لُقُمة العيش
الصّبحت مُنيا
مره عساكر ومره جواكر
مره جواكر ومره عساكر
جور ومناكر
وجوعاً كافر
لي يوم باكر ،،
يفوت دجّال يجي المحتال
يفوت محتال يجي الدّجّال
سنين من خيبة الامال
ضاع العينو في المصنع
مساهر ليلو يتوجع
من الإهمال وسوء الحال
ضاع اللِّيدو في المِنجل
فكّ الرِّيق علي الواسوق
كرع من موية الجّدول
مسح من عينو عرقو السّال
ضاع العندو د يش أطفال
يكد يكدح
ليل وصباح
وعيشو وبا ل ،،
،،،،،،،،،،،،،
سرح حامد بعيد محتار !!!!!
تاه في غابه من أفكار
حال السُّره حال الدّار
حال البعيد والجار
كيف الناّس تعيش أحرار
بين السُّونكي والتِّجار ؟؟؟؟؟؟؟
حال أم زين صبح مقلوب
خداع ونفاق
وحق مسلوب
الظّالم يعيش ظالم
والمغلوب يعيش مغلوب!!!!!!!!!!!
،،،،،،
سرح حامد ورا الأفكار ،،
نسي العربات والشّارع
شال خطواتو ماش قاطع
ما قايل خطاهو قصار ،،،
ياحامد لا تقطع!!!! ؟؟؟
يا حامد لا تقطع !!!؟؟؟؟
ياحامد أقيف أرجع !!!؟؟؟؟
يا حامد اقيف ارجع!!! ؟؟؟؟
يا حامد لا تقطع!!! ؟؟؟
يا حااااااااااااااااااااا
!!!!!!!!!!?????????
بين الضّجّة والأنظار
وصوت صفارة الِأنذار
المسكين حقص في النُّص
يتلفت يمين ويسار
فجأة الفاس
وقع في الراس !!!!
فجأة الفأس
وقع في الراس !!!!
حامد طار...
فوق لي تندة الجاغوار
زي ورتابه شالا عُصار
وقع نشفان علي الأسفلت
وقع نشفان علي الاسفلت
،،،،،،،،،،
،،،،،،،،،
دنيا عجيبه يا حامد
دنيا غريبه
زمن غدّار
شقي الحال
يعيش رحّال
يفوت من نار
يقع في نار
كأنّك والزّمن خصمين
مصير أو تار
كأنّك والزمن ضدين
ضلام ونهار
،،،،،
،،،
أمطر سحاب العين
سال الدّم علي الخدّين
وقعت دمعه في الأسفلت
حرّ الدُّموع أسرار ،،
شاف السّرة بت محمود
فتحت باب ا داخله الدّار ،،
أم حقين ....
موشّحة بي حرير احمر
ولابسا سوار ،،
التّومين ...
وسط السّاحه والأنوار
سمع صوت مكنة الكرتون
حامد فارق ام دفّار
،،،،،،،،،
جا الإسعاف والشّرطه
فحصوا الحادثه والجّثّّه
طلع تقرير وبرقيّه
مات مجهول ..
دون اوراق ثبوتيّه
أملاكو رساله خطيّه
صورة صغيرة شمسيّه
بإسم السُّرة بت محمود
جنب الجّثة مرميّه
بإسم السُّرة بت محمود
جنب الجّثه مرميّه
جنب الجّثه مرميّه
إنتهي
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: awad hassan)
|
حكاية أم زين
لابتضارا ولا بتتغابا
أوّل بادي .....
جونا ضهابا
ساطوا الدّار
قلبوها خرابا
قاسوا ومتروا
دار أم زين
زرعوها حرابا
قسموا أم زين ..
كومين إتنين
واحد للزنج الفي الغابا
واحد للعرب العرّابا
ما بين اللون والدّين
دقوا الإسفين
في صدر أم زين
بقينا نشوف
الزّول زولين
بقينا نشوف
اللون لونين
بقينا نشيل
حربه وسكين
شان نكتل مين؟؟
شان نكتل مين؟؟
أستاذنا عوض حسن
أولا كنت أتمنى لو أنك اتبعت التاكتيك السائد هنا في التعامل مع مثل قصيدتك هذه
إذ يعمد الزملاء في حالات مماثلة لانزال العمل جزء فجزء حتى يمكن للبوست أن يظل
على الصفحة الأولى وقتا يسمح للقراء بالاطلاع عليه..
في المقطع السابق أرى أنك تحدثت عن أزمة الهوية و حالة التشظي التي تعيشها دار أم زين
أو السودان..من هم "الضهابا" الذين عنيتهم هنا..هل العرب أم المستعمرين ؟
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: سيف النصر محي الدين محمد أحمد)
|
Quote: أستاذنا عوض حسن
أولا كنت أتمنى لو أنك اتبعت التاكتيك السائد هنا في التعامل مع مثل قصيدتك هذه
إذ يعمد الزملاء في حالات مماثلة لانزال العمل جزء فجزء حتى يمكن للبوست أن يظل
على الصفحة الأولى وقتا يسمح للقراء بالاطلاع عليه..
في المقطع السابق أرى أنك تحدثت عن أزمة الهوية و حالة التشظي التي تعيشها دار أم زين
أو السودان..من هم "الضهابا" الذين عنيتهم هنا..هل العرب أم المستعمرين ؟ |
الاخ سيف النصر محي الدين
لك كل الود
أولا بخصوص التاكتيك اوافقك الرأي بيد أني اراي القصيدة هي حالة لأحداث
مستمرة متسلسلةخشيت ان انزلها في شكل اجزاء لكن اتفق معك تماما، بعدين انت من زمان وين ؟؟
لو كنت عرفت رأيك قبل ما انزلها لكنت عملت به .
أما بخصوص "الضهابا " في رأي هم السودانيين ورثة الاستعمار الذين كانت في يدهم السلطة
هم من ساهم في تكريس النظرة الاستعلائية العرقية وقسموا البلاد الي اثنيات متنافرة شمال وجنوب
شرق وغرب وهم كانوا جذوة الصراع الذي نعيشه الان .
اشكرك كثيرا علي الاهتمام
وسوف احاول انزالها مسموعة .
لك كل الحب .
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: سيف النصر محي الدين محمد أحمد)
|
Quote:
كلام واضح و دوغري ما فيهو لف و لا دوران..رغم أنو الحقيقة دي ساطعة سطوع الشمس في رابعة النهار
بس برضنا ما قادرين نشوفها...ليه تفتكر يا عوض حسن؟؟ |
الاخ سيف النصر
اشكر لك اهتمامك المتتابع لهذا الموضوع ، ،، ذلك يسعدني كثيرا
بعدين اسئلتك مالا حارة كدا زي ( من الذي سيقتل الناس في الشوارع اذا صدر قرار توقيف البشير؟ )
الاجابة علي سؤالك لي :ــــــ هناك ثلاثة مقاطع في القصيدة تبدأ ب :ـ أول باد ،تاني البادي ،تالت البادي
اعتقد ان لها علاقة بسؤالك . ثم ان هذه الحقيقة تندغم احيانا او تحور في شكل افكار وسلوكيات وممارسات في طبية حياتنا.
زيادة علي ذلك لي موضوع سوف انزله قريبا وهو عن( الاستلاب ) في نظر بعض الفلاسفة: يتعلق بسؤالك .
لك وافر الحب والتقدير
| |
|
|
|
|
|
|
|
|
|
Re: كلام في الزّمة .... علي لسان السّرة بت محمود وحامد ود الطّفّح ....[ أم زين ] ....شعر (Re: خضر حسين خليل)
|
Quote: يا سلام ...يا عوض حسن ....استمتعت جدا بسماعها
مافى كلمات تتناسب وهذه الملحمة المتكاملة
لى عودة عندما الملم ما بعثرته أو ربما عندما أتصالح مع الحقيقة التي فاجأتنا بها...ويديك العافية
(نهاية حامد ذكرتنا نهاية عم عبد الرحيم ..فبكينا لبرهة )
محبة واحترام |
شاعرتنا المتمردة روزمين
مع خالص الود والتقدير
اسعدني كثيرا مرورك وتعليقك علي هذا العمل المتواضع
ذلك ما يدلّ علي الروح الشاعرية التي تتميزين بها .
قد تؤدي المواقف الايديولوجية الي التشابه في النتاج الفني
هذا بخصوص حامدود الطّفّح وعم عبد الرحيم هذا العمل الرائع "عم عبد الرحيم " الذي احبه كثيرا .
اكرر ودي وتقديري
| |
|
|
|
|
|
|
| |
awad hassan
rosemen osman
Balla Musa
خضر حسين خليل
سلمى الشيخ سلامة
فيس بوك
تويتر
انستقرام
يوتيوب
بنتيريست