كتب الكاتب الفاتح جبرا المتوفرة بمعرض الدوحة
|
مرات .. مرات
|
(1)
مرة نهار و جهار عاينت تجاهك قايل بطلع منها سالم دقت نص القلب النوبة و روحي لثانية لفحت توبها و كانت ماشة..
(2)
مرة في راسي و نص الوحشة جمب الغنية الفيها كمنجة بتحلب روحي حضنتك يا الله!
كانت ريحتك مالية الدنيا.
(3)
مرة في غنية كتبتك جوة كلامها لمعت جوه حروفها سورة و فجأة للحظة اتقالدنا كأنوا الموت ما حق و حقيقة كأنوا فراشة الضو جوانا طليقة كأنوا الحب ممكن و مشروع لامن.. روحك نقط ضووها جوه الأوضة و كنت براي دايما لمن تحصل حاجة عجيبة و ما بتتصدق لمن أفتش شاهد يشهد ما بلقاه أسكت ساي و العن خاش الوحدة و اطنطن دايما لمن أكون محتاج لروح جمب روحي ما بلقاها دايما لمن أخطط حاجة بلقى الحاجة مخططة حاجة براها ..
|
|
|
|
|
|
|
|
Re: مرات .. مرات (Re: fadlabi)
|
Quote: دايما لمن أكون محتاج لروح جمب روحي ما بلقاها دايما لمن أخطط حاجة بلقى الحاجة مخططة حاجة براها |
يافاض لابى فاضت روح الشعر عليك واضفت كلمة كبيرة قالت انك شاعر وانك ساحر وما هاميك كم من زولا حظو العاثر يعتر فى كلماتك لا بعرف اجامل ولا بعرف الا الشعر الحلو العابق وعاطر يلعن خاش الشعر معاك اجمل كلمة قريتا "بلقى الحاجة مخططة حاجة براها" ياخ امشى ياخ وكان مارديت على برضو ما شغالة بيك لانه ايقاع القصيدة كفاية على
| |
|
|
|
|
|
|
Re: مرات .. مرات (Re: سلمى الشيخ سلامة)
|
أستاذة سلمى
و الله ما عارف أقول ليك شنو؟
هسي أنا أمشي ليك وين؟
و الله فرحت بمداخلتك دي لمن ما عارف أرد عليك كيف.
يا زولة أقول ليك .. ما برد عليك ذاتو ..
خلي الإيقاع ينفعك.. أصلكم من زمان كلكم علي.
| |
|
|
|
|
|
|
Re: مرات .. مرات (Re: fadlabi)
|
Quote: دايما لمن أكون محتاج لروح جمب روحي ما بلقاها |
القصة دي كلها ما مرات مرات دي دايماً دايماً يا فاضل شئ عجيب يافاضلابي لامن تلقي الحاجات البتحصل ليك مكتوبة ومسهلة قدامك ما عارف لكن الانت قلتو في مرات مراتك أنا بحصل لي طوالي وياما فتشنا أرواح صاحية ومافيشة ياصاحب عليه
الله عليك ياخ أهو قدرت تنعش جوانا الأمور !
أقول قولي هذا وإستغفر الله العظيم قوموا الي محبتكم يرحكم الله فإستقيمو يا عشاق
| |
|
|
|
|
|
|
Re: مرات .. مرات (Re: naeem ali)
|
Quote: مرة في راسي و نص الوحشة جمب الغنية الفيها كمنجة بتحلب روحي حضنتك يا الله!
كانت ريحتك مالية الدنيا |
الله الله شوف بحاول أتذكر لو في مرة سمحت ليك تكتب عني الجواي يا ربي !!
عموماً وبعد الشفتو منك بسمح ليك تواصل ياخ ده إستنهاض عجيب خلاص !!!
ديني أنا!!
| |
|
|
|
|
|
|
Re: مرات .. مرات (Re: tarig almakki)
|
Quote: و روحي لثانية لفحت توبها |
يخرب بيتكم: إنتَ وسلمى وود عبد الله اقعدوا ساكت، ياخي، عليكمْ الله ...... ...... ......
أنا غلطان البقراليكم
| |
|
|
|
|
|
|
Re: مرات .. مرات (Re: خضر حسين خليل)
|
خضر قريبي بالدي ان أي و قريبي العقلي
مشتاقين يا فردة
الحاجات كان مكتوبة ما كان كويس يا قريبي المشكلة إنها معصلجة كدة ساكت بس منها و ليها
| |
|
|
|
|
|
|
Re: مرات .. مرات (Re: Ahmed Elmardi)
|
و نص الوحشة جمب الغنية الفيها كمنجة بتحلب روحي
... تعرف التعبير ده يا فاضلابي.. زي شيء يتخلل أوصال الواحد.. أتخيل لحن عميق يتسرب إلى أعماقك بهدوء وسكينة.. هذا لا يحدث كثيراً.. يحدث عندما تكون في قمة النشوة.. أو اللوعة.. أو الحنين. رائع للغاية
| |
|
|
|
|
|
|
Re: مرات .. مرات (Re: مبارك السروجي)
|
فاضلابى سلام
بوستك ده من امبارح حلف ما يفتح معاى لامن ظنيت انه مهكر
كلامك سمح والله
تخريمه(السؤال لطارق المكى ) صورتو الفيها الكراع دى انا بسأله سيد الكراع واقع بى وين ؟؟؟
تسلموا
ام الاء
| |
|
|
|
|
|
|
Re: مرات .. مرات (Re: وليد محمد المبارك)
|
الود فاضلابي جهجه شوق الشوف بي كم كلمه يهابي
قال الفينا
مطلع زيتنا و كاتل حيلنا
غربه لئيمة وحشة عقيمة وحده سقيمه
و عشق يوتوبي ... ما موجود وهم و خيال ... سراب مفقود
ياخى يا فضله مرات مرات
لمن "اقدر" اقعد افكر
ليه احلامنا كلها فاضيه ليه امالنا صارت باليه و ليه و ليه في الاخر اقرر ياخ ما تفكر
مرات مرات
و تانى افكر وتانى اقرر
و نفس الساقية فينا تدور
و يا فاضلابي
ياخى بريدك
لمن تكتب و ترسم و تضحك تهرج و تسخر
(لقيتنى كيف؟)
يا صاحب و الله حركت فينى شجون
سلام القلب الصباحى لك
| |
|
|
|
|
|
|
Re: مرات .. مرات (Re: esam gabralla)
|
Quote: و روحي لثانية لفحت توبها و كانت ماشة.. |
ومرة..
لامن عيوني في عيونك تغرق..
وادوب في لمسة يدك وريحة روحك..
يالله.. تسلم يا فاضلابي.. ويسلم قلمك...
| |
|
|
|
|
|
|
الحوت لايموت ... (Re: اينانا)
|
تعرف ، في الخرطوم هنا صاحبك محمود عبدالعزيز ده عندو جمهور بضارب عديل ، فبعدين فترة كده دخل في مشاكل وصوتو تعب ومرض وبطل غُنى ، لمن رجع يغني تاني ، في نادي الضباط ، الحفلة كُلها بتكورك وتهتف ، الحوت لايموت .
اسه انا ذاتي اتاكدت بعد ريحة روحك دي إنوالحوت لايموت يا صاحبي ، لايموت
| |
|
|
|
|
|
|
Re: الحوت لايموت ... (Re: قيقراوي)
|
يا سلام عليك .. كلام زي شراب الموية الساقطة بعد .. العطش ...بللت الجوف يا فاضلابي ..وحركت سكون النفس ... بالله لو عندك مزيد من المحفزات دي .. ما تبخل ... وياني قطع شك ...جاييك بي محاولة .. نجر على كلامك السمح ده ..محاولة تلبس .. مع سبق الإصرار والترصد ..بس خلي المعني ينجض.. قرية قريتين ...وهاك يا زول ...
الشكر .. ليك .. والوداد ... مفرود
| |
|
|
|
|
|
|
Re: الحوت لايموت ... (Re: مدثر محمد ادم)
|
مرة... وانا بتجول... في شوارع روحي لقيتني وصدفه غريبه.. كنت بجابد الشوق الطول... اتشربك عصب الروح بي اول طله وفرهد ميسم عطرك نــزا... وكانت...جلطه لما دخلت مدن عينيك... من غير خرطه.. واتحيرت..اغيب واتلاشي... وزي العطر الجاي مواسم فحت عشانك واتبخرت شكرا فاظلابي للجمال بجيك
| |
|
|
|
|
|
|
|