سوي ،، سوي الشناة كخ كخ كخ كخ كخ كخ كخ (دي ضحكة) كدي تاني،، يا ولد ،، كدي تاني سوي الشناة ،، الشناة،، الشناة،، ايييييييييييوه إنننننغغغغغغغغغ وكخ كخ كخ كخ كخ كخ كخ (ضحك برضو) ----------------------- والحقيقة طالما لفتت نظري هذه الدعابة السودانية السمجة (لو صح تسميتها دعابة) فلا أدري ما السبب الذي دعا أحدهم ذات يوم ليناغي طفله أو طفلته داعياً لها بإصرار أن (تسوي الشناة) باعتبار أن الشناة حلوة وكده يعني..فاستمرت هذه العادة متداولة لكل الأطفال في مرحلة عمرية معينة (من ست شهور إلى سنة) فلا يوجد طفل سوداني (تقريباً) إلا ومر بمرحلة الشناة (باعتبار أنه في الأصل حلو ما شين) ------- مر في بالي هذا الخاطر وتلك الأم فخورة،، والله فخورة، بطفلها الذي تمكن أخيراً أن (يسوي الشناة) ، حدث طبيعي يعني، يعني كما تسعد إحدى أمهات الجنسيات الثانية مثلاً بأن (ابني صار يمشي) أو (طلعت للبنت سنة) أو غيرها من تغييرات فسيلوجية طبيعية تطرأ على مراحل الطفل العمرية المختلفة ، نجد أن سعادة الأم السودانية تتفتق وتثير فيها ضحك فخور جنوني بأن ( حلاتي يا ناس،، أممممممممممممممح،، سوي .. سوي الشناة... أمممممممح حلاتي يا اخواني كخ كخ كخ كخ كخ ) وتبدأ طبعاً في إعلام الجيران والأحباب بأن مرحلة (سوي الشناة) قد أخيراً مرت بطفلها، والمضحك المبكي أن لو كان هذا الطفل شين خلقة و (سوى الشناة) أمام الاغراب لتضايقت الأم وحاولت جاهدة أن تخبئ طفلها من عين الحسود التي فيها عود إن شاء الله كان سحرت ولدي يسحرها البعاتي يا بركة من صلى وقال يا الله !!! (غايتو لو كان ولدي كان أكيد خليتوا للنظار عسى واحد يطرقه عين في سوييي الشناة فيقلب يسوى حلاة ،،، يا ربي ينفع؟؟؟!!!) وعليه،، لو رزق الله إحداهن بطفل شين خلقة فيجب أن تداعبه بأن (سوي الحلاة، يا ود تعال سوي الحلا) ؟؟؟!!! - ما بال لطفنا زاتو شين و((سغغغغغغييل))؟؟؟!!! ---------- كل هذا فكرت فيه وأنا انتظر (سيدي الحسن) في بهو السوق السعودي الكبير بأن يتفضل عليا مشكوراً ليوصلني بيتنا.. السوق الحديث الافتتاح ،، الكبير النظييييييييييف، ذي الرائحة الفواحة الجميلة، ترى في جنباته مختلف الجنسيات، السعوديات بغطوتهن المميزة وحتى الكاشفة منهن بمشيتها المميزة (لاحظتوا النسوان السعوديات بمشن كيف بالله؟؟) السوريات ببياضهن الغياظ المستفز لكريمات الديانا (معليش ثقافتي ضعيفة وقديمة في الناحية دي) اللبنانيات بلبسهن العجيب وطرحتهن المرمية ونعومة كعوب أرجلهن (حاجة تحير حجر الخفاف زاتو) أجنبيات شقراوات شعثاوات مقلعات عيونهن الزرقاء مملصات (يشهد الله) متواجدات هنا وهناك بائعي (باريس جاليري)، طبعاً كلو كوم وبائعي باريس جاليري كوم تاني وتاني كدي واحد سوداني (حبذا لو خاتي سفة) يتشدق بجمال المذيعات ما ادري ومقارنتهن بالبطاحات التي هو منها متزوج، إلا كان قسمن بالله ارسله باريس جاليري سياحة شان اكضمه اقول (بائعي باريس جاليري) وما شابه من محال ،، تلكم البدل السوداء النظييييييييييييييييييييفة ، بلمعة الشعر الغيااااااااااااااااظة .. معاي في الصورة؟؟!! النوافير هنا وهناك،، اليافطات الواضحة تدلك على مبتغاك معاي؟؟؟؟!!! الهواء بااااااااااااااارد كويس!!! دوووووووووووووول ، كككككككع ، يمر في نص المنظر الجميل هذا،، واحد عراقي سوداني وحبذا لو كان لابس برطوش بل طبعاً أكيد لابس برطوش !!!! كمتابعة مسلسل تركي في قناة سودانية وتوقفه لحظة لإعلان المحيميد للأثاث. كسندريلا تمتطي سيارة فيراري فاخرة فتصحو على كم فار جارين ليهم كارو. كأن (تغني للدينا وتقول معاها أنا سوداني لا لا لا لا لللل لالا لا أنا افريقي أنا سوداني لا لا لا لا للللل لا لا ) معليش ،، فصلت كهربائي ودخلت في موضوع تاني ما لينا بالعراقي والبرطوش إن الله حليم ستار.. ده ما موضوعي هسه. أقول كمنت المشكلة بتاعتي الحقيقية في هذا الجو في ثلاث أفراد عصابة أطفال سودانية ،، تطلع السلم الكهربائي،، فييييييييييييييييو ،، تنزل السلم الكهربائي،،، فيو فيو فيو فيو ،، تطلع السلم الكهربائي،،، فييييييييييو، تنزل السلم الكهربائي ،،، فيو فيو فيو فيو و يا عبد الرحمن،، تعال هنا أهو أمسك ده،، اركب في السير هنا والله ما تقدر شوف أنا اركب اليد كيف (يد السلم على فكرة) ،، تردد بعض أغاني سبيس تون بلكنة سودانية مميزة، و..فيييييييييييييييييييييو تطلع السلم الكهربائي،،، وفيييييييييييييييو تنزل السلم الكهربائي وهكذا ،، ولو كان الأمر كذلك فقط كنت على الأقل دقست ونعست ونمت،، لكن الهيجة الكانت حاصلة،، الأصوات العالية،،، الصريخ،، الخبيط هنا وهناك في عربات الناس المهذبة المتضايقة بشدة والتي (ما عايزة تعلق إكراماً لجالية لها وضعها) هؤلاء أطفال ومن المتوقع أن نتوقع من الأطفال كل العمايل دي انلس،، أعني فقط في حال،، أن لا آباء لهم شوفوا بقى الأم الباردة ماذا كانت تقول وكيف كانت توقل ( يا ود،، يا عبد الرحمن،، تنقص إن شاء قنب ساي) وتلتفت لا إرادياً لمحل ذهب هنا أو هناك ثم ( يا عبودي أحي أنا منك يشيلك الله إن شاء الله) وبعد هنيهة (يقصك الله يا عبد الرحمن ما تلم أخوانك ديل) وهنيهة بعد (يا أخوانك ديل بكلم ليكن ابوكم الله يحرقكم إن شاء الله) فيجئ أبوهم وفي نظراته شرر تحسب معه أن يلطش ده وتاح يكفت داك وفيووو شلوت لذاك فيعود للسوق هدوئه وللأخوة المشاهدين اقصد المشترين صفو البال فيقول ببرود أكثر (يا زفت،، ما تقعد ساي) وافتح فمي بفضول انتظر البقية ،، لازم في بقية،، ف،، هوووووووووس ،، لا شئ خلاص،، انتهت مهمة الأب،، وأدت الأم ما عليها من واجبات ما تفتكروا أن التربية عندنا مفهومها ناقص حبة وللأمانة حبتين تلاتة؟؟!!! -----------------
01-31-2009, 09:40 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
ذكرتيني نكتة الخليجي اللي متزوج واحدة قريبتو مش و لابد لكن إرهابية الراجل زاغ مشى لبنان و جاب ليه بت حور جابا معاه و جا لي قريبتو و هو خايف قال إهرش قال ليهاإتزوجت لبنانية حمرت ليه قال ليها يوم معاك و يوم مع اللبنانية ... شالت ليه السكين طير عيونو قال ليها أيش في؟؟؟ قالت ليه لألألألألألألألأ قال ليها يومين معاك و يوم مع اللبنانية قالت ليه لا قال ليها إيش تبغي طيب؟؟
قالت ليه أنا يوم معاك و يوم أنا مع اللبنانية!!!!!!!!!!!!!!!!!!!!!!!!!!!
01-31-2009, 11:38 PM
7abib_alkul 7abib_alkul
تاريخ التسجيل: 02-05-2002
مجموع المشاركات: 3757
اختنا بت قضيم اتخيلى انك عندك مواعيد هامة او غير هامة الساعة ٧مساء اجيك واحد ومعاه زوجته و سايق ليه ثلاث اطفال جايك زيارة(تركب وش بضحك) واصلى معاك المغرب و اضايف وكمان اشرب شاى المغرب كمان (تركب وش رضا)وتكتشف انه اولاده ما بشربوا الشاى الإ بعد ابرد كمان(تركب وش حنان ) وفى الأخر تكتشف انه مواعيدك طرشقت وكان بأمكانك ابتدأ تعتزر عن استقباله نسبة لا ارتباطك بموعد محدد مسبقا(امكن اكون ليه اسبوع محدد) ولكن الثقافة الموروثة تحتم عليك احترام الضيف واستقبال يدخل هذا فى باب الكرم على الرغم من هذا يجعلك فى زمرة من اوعد واخلف هكذا نحن لدينا قيم اجتماعية واخلاقية نسلم بى صحتها وان كانت بقليل من التفكر نستنتج عدم صحتها و الامثلة كثيرة(جانا ضيف اعمل معاه الواجب واجيك راجع للمواصلة)
01-31-2009, 11:57 PM
Tabaldina Tabaldina
تاريخ التسجيل: 02-12-2002
مجموع المشاركات: 11844
بت قضيم ازيك بت امى لكن يبدو لى الحركة بتاعة الشنا دى ما حقتنا وبس بشتغل فى دارحضانة جايز عندك ؟ هنا فى البلد الماهلة وبعيدة دى المهم يا بت امى الشافعة جا ابوها يضحك من الصباح قلنا ليهو خير قال للبنية اسمها "ميا" ميا سوى الشنا بالانجليزى يا مرسى والبنية تشيل وتعفص فى وشيها وضحكنا من الفكرة وتانى شى الشفع البتجارو ديل هنا برضو الام بتقول ليهم ـ حاكلم ابوكم بس خلاص كفاية دى حدود الام ، لانها ما بتقدر ترفع الا صوتها نعمنها القصة فيها "بو ليس كان زادت ، وقلع عديل كان لحقت ورفعت يدها" لكن شوف عينى "فى قتاته " تقول يا ليل عفيص تحت تحت شفتى كيف ؟ شفتى كيف ؟مش؟
02-01-2009, 10:25 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
والله يا ابو حسين لو ما لقيت ردك طوالي بعدي بالليل داك كان قلت في شي حاصل ليك وبافتراض إني الحرامية إنت ساري الليل؟؟!! وبعدين انا بكتب بالليل لأسباب نفسية باقي الظار بعيد عنك ما يجيني إلا بعد ما يلف على ناس كلتوم كلهم بعدين يجيني وتجي معاه الرغبة في الدردشة شفت كيف؟؟ كده أو أكون هاكرية :D :D :D وشكراً على النكتة ويسلموووووووووون
------------ تبلدينا ما تتفلسف نقراك مالها؟؟ :D :D :D اقول ليك حاجة ما ليها علاقة بالموضوع؟؟؟ يا ريت أنت وتمبس تقلبوا فيسكم في موضوع تراجي يا ريت يعني وتكونوا مشكورين واوعك ترد علي هنا وتود لي البوست شيكاجو ما عندي فيزا :) :) :) تسلم يا عزيز -------------
02-01-2009, 11:12 AM
tmbis tmbis
تاريخ التسجيل: 10-19-2002
مجموع المشاركات: 24862
الأخ حبيب الكل من اسوأ الأشياء أن الشعب السوداني فاهم فكرة الذوق بطريقة مغلوطة وأن الاتصال مع سهولته الآن وأخذ موعد للزيارة ده شغل حنكشة وفلهمة فاضية وان الابتسامة شي مفروض على الواحد.. لازم تبتسم طالما أن الضيف تكرم بزيارتك حتى لو كنت لابس هموم الدنيا كلها في راسك وأن ثلاجة منزلك لا بد أن تحوي بداخلها كل أصناف الطعام مجهزة لوجبات الفطور والغذاء والعشاء وفي رمضان سحور كمان الدنيا أول شهر آخر شهر فلسانين ما فلسانين دي ما مشكلة الضيوف الكرام بما انهم تعبوا نفسهم بالزيارة لو ماشي المستشفى عندك مواعيد مع دكتور الأسنان والألم حيطق من راسك برضو لازم تبتسم وتقابل الضيوف بدهشة فرحة بل وتلغي الموعد كمان!!! أنا لا اقول ان عادات الزيارة عندنا يجب أن تتوقف هي جميلة بلا شك وصلة الرحم والزيارات الطيبة من أسباب المحبة وكله مقبول، لكن فقط اتمنى أنها تقنن بصورة تناسب العصر المنيل اللي عايشين فيه الآن وبعدين أخذ الأمور بحساسية زايدة ده موضوع لحاله يستحق وقفة، فيها ايه لو استأذن الواحد بأن عندو الموعد الفلاني أو الارتباط العلاني وترك الضيوف كأصحاب دار طالما أن الحالة واحدة فعلاً ؟؟ اشمعني يعني تجي عند الحتة دي ويكون الضيوف ضيوف والحالة حالتين؟؟ والله يعينك على ضيوفك يا حبيب الكل وتسلم للمشاركة المهمة
02-01-2009, 11:29 AM
tmbis tmbis
تاريخ التسجيل: 10-19-2002
مجموع المشاركات: 24862
طبعا بدل الفيس بريسلي كنت عايز اكتب ليك الفيس بوك .. لكن اتذكرت إنك قاده تقنية لكن خبرتك في الشنا كويسه .. يعني ما بقصد إنك شينه .. بقصد أنو خبرتك كويسة .. بتعرفي الشين من الما شين ..
عايني .. في زول هنا أحتمال كبير كان جا داخل هنا يقول لينا ما تتونسو مع بعض .. بالجد والله .. علشان كدا انا ما ح اطول معاك .. قالب فيسي وطالع .. بلاي الزول دا كان جا قال اي حاجة .. انا ما معاك .. اتفقنـا..؟
بلاي تخيلي يا شنــا .. الواحد بقى يكتب ويطلع راسو بره البوست علشان يشوف قوات اليوناميد والمراغبين.
بالمناسبة يا قطامه : أنا طبعا ما فاضي ليك عندي فيسات بقلب فيها في اماكن أخرى من البورد .. لكن بس استفزتني مسالة شناتك دي وقلت اجي ادلو بدلوي
02-01-2009, 11:39 AM
tmbis tmbis
تاريخ التسجيل: 10-19-2002
مجموع المشاركات: 24862
سلمى سلام والله اتخيلت بت الناس اللبنانية دي شعرها ناعم وعيونها ملونة ولونها أبيض زهري وامنقشي دي تسوي أبو الشناة زاتو ما تسويها ليه يعني؟؟؟
لا لا بهزر والمعلومة جديدة عليا الصراحة ما اعرف ان ثقافة (سوي الشناة) هذه تمتد جذورها لأعمق من الدولة السودانية العظيمة وطبعا ًلو طبقوا قانون الشرطة ده عندنا هنا أكيد نصف الشعب السوداني في السجن والباقي بيتحاكم لسة
أما بالنسبة للشفع البتجارو (وانا عندي معنى مختلف لكلمة شفع دي) فطبعاً الطفولة طفولة وين ما كانت بس اتحدى (وبإصرار) لو في طفولة ذي طفولتنا نحن على الأقل على الأقل الأطفال الذين اعرفهم جيداً ذي جوع بطني (أطفال السودانيين في السعودية) اتحدى لو كان ليهم مثيل
وبجيك صادة ماش آآآآآآآآآآكل سلمتي بت الشيخ على المشاركة الحلوة
02-01-2009, 12:42 PM
Habib_bldo Habib_bldo
تاريخ التسجيل: 04-04-2002
مجموع المشاركات: 2350
رغم كمية الهترشة ولكن موضوع في الصميم بسبب السلم الكهربائي كاد إبن أختي من فصيلة من ذكرتيهم يروح في شربة موية وقع من ارتفاع طابقين في موول واتكسر حتة حتة وانشلت حركة المول وتعطلت لمدة تقرب من نصف ساعة حتى تم اسعافه وبسببه دقيت مشوار من الرياض للهفوف والعودة في نفس الليلة لإرتباطي بالعمل. وكلو بسبب الاهمال واللا مبالاة.
تشكري على الموضوع القيم اقعدي عافية
02-01-2009, 02:46 PM
Hussein Mallasi Hussein Mallasi
تاريخ التسجيل: 09-28-2003
مجموع المشاركات: 26230
Quote: بائعي (باريس جاليري)، طبعاً كلو كوم وبائعي باريس جاليري كوم تاني وتاني كدي واحد سوداني (حبذا لو خاتي سفة) يتشدق بجمال المذيعات ما ادري ومقارنتهن بالبطاحات التي هو منها متزوج، إلا كان قسمن بالله ارسله باريس جاليري سياحة شان اكضمه
في واحد اسمو " مهند" فيهم ؟ انتو مهند دا منو ؟ قديتونا و كرمشتوا مشاعرنا ذاتو !!! ( وش ساوي الشنا خلقة )
صحباً لينا - عايش زهو تمتع بجماليات المجتمع البطريركي - حالف يمين بالتلاتة يعرس ليهو مرأ تبقى سمينة و تجيب ليهو شفع قليلين أدب زي شفع السعودية ديل الا يدق خروج نهائي و يسلمهم الجوازات - وزارة الداخلية ( السعودية ) - مع الاقامة كملكية ( لا فكرية ) لبلد المنشأ . . .
طالب كنت بدرسو قدر ما اجتهدت معاه بسوي لي الشنا ما بوشوا شاهد الله بي الخلف الوش ، دي شناة مكدبة من جوة و دايرالا حجر حك عديل ، ياخ اكتب ليهو 20 يستهجاها لي ( يبدأ من 1 ،2 ، 3 ، لما يصل 7 يتلخبط يرجع تاني من 1 ) حليلو قبلو ! . طيب ابوه شغال طباخ و ما قرأ . . . اقترحت ليهو ليه امك ما تراجع معاك ؟ ، الشنا بفتشو ليها طوالي جاني ردوا : هي فاضية من المسلسلات ؟!!
غايتو العارفو انو الشفع اكثر التقاط لثقافات البيئة و المجموعات المساكنة او المساكننها بالاصح . صحبة لينا التحقت بزوجها في احد بلاد العم سام و معاها ولدا . مرة بتشتكي لزوجها انو الانجليزي الدراب البرميهو ولدا دا هي ما فاهمهو ! . . . شناتو جاتا : مالكم ما جيتو في طيارة واحدة ؟!!
بالجد يا اخوانا الغلط فينا و لا فيهم ؟ و لا نلعن الزمن و الغربة ساي . . .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بت قضيم
ABUHUSSEIN
7abib_alkul
سلمى الشيخ سلامة
tmbis
Habib_bldo
Hussein Mallasi
قيقراوي
فيس بوك
تويتر
انستقرام
يوتيوب
بنتيريست