|
ضــحــكــــة عــيـــــونــك
|
انتظرتك ...
الشوق جمر والريح مهب..
وانا في رجاك
شايل ازاميل الجوى
نقشت رسمك
في مسامات العصب
لا يئست من طول اتظار
لا ليك اضناني التعب
ليك بحتمل كل الوحيح
في سكة القول الصعب
شقيت مسارب الليل سهر
مديت اماني الوصل ليك
ما خفت ضيم
ما
أصلي شايلك في حشاي
ترياق امان
مهما الظروف اتبدلت
او الزمان لي انقلب
يا بنية نيل
اديتي من قيفك ضريرة
اهديتي من سعفك حريرة
وعمدت قلبي وطن هوى،
في اللحظة دي
جواي زغرد فيني ناي
عطر غناي
وكتبت ليك احلى الكلام
لما الشعور بيك التهب
واتدوزن الوتر الشجن
(ليك اتدلت الغيمة
وليك اتمايلت شيمة
وشهق نجم السعود دوبا
واداك القمر بوبا )
حسنك زها
فتق مواويلي وصدح
ما انكتم
شوقي المشبع بالحنين
ماح و انسكب
ماد وانتشى
وفرشت رشرش عيني ليك
مهجع امان
شوفيني كيفن بيك ما ليني الطرب
( عزة وخليل،
قدم المفارق ما بتميل،
فلق الصباح وطواه ليل،
يلاك نشوف
شفق الصباح
يلاك نمسح للجراح
يلاك نزيل لون الحزن
وعلي تميل
عشان نميل
سوا يا نبيل )
والقول رصين زي الدهب
وجريت عليك
دايس علي إبر السفر والحسكنيت
راجيه حضنك لي في عز الشتا
يمنح دفا
ينضح وفا
وتبقى بيناتنا المسافة
مرة تقصر
مرة بتطول
ويحتويني شعور عجب ..
حاجة زي طلة جبينك ،
لما بان،
منه القمر غار و احتجب.
حاجة زي ضحكة عيونك
لما تهمس لي عيوني
بين ستارات المسا
اروع غرام وكلام عجب .
|
|
|
|
|
|
|
|
|