|
شــاي ((حلـــيوه)) المنعنع!!
|
رجعت الي الخرطوم العاصمه في اجازه سنوية ,, وزدت عليها حال المغتربين المتأخرين , والتي سميت ب((الغربه النيّــه)) ، التي لاتجدي ولا تذر.. وكأنها(( لواحة للبشره))!. والجموع تتقاطر نحو الخرطوم شرق، كل مساء..تقاطع شارع المك نمر ((الجرابو))!مع شارع التجاني الماحي علي ما اعتقد .. الشوارع بقت كتيره.. بائعة شاي سبعه نجوم .. مثل برج العرب الوحيد في العالم الذي حصل علي هذا التميّز. شاي ((مظبّط)) ..وكباية ((مـق)) .. ولقيمات ..عليها سكر ناعم مثل السكر المنثور علي خبز ((البتي فور)) .. هذا اذا لم يظهر نوع جديد من (الخبيز).. ..؟.. ..... .... عندك زول رايح منك .. تلقاهو ..بيشرب شاي عند (حليوه) .... .... .... والجدير بالذكر ، ان قناة الجزيرة الفضائية التي تبث من الدوه .. وليس تلفزيون الجزيره الريفي من واد مدني _ قد أجري مقابلة معهابواسطة المذيع جمال ريان ..في فقرة ((عين علي السودان )) في العام الماضي .. ... .. تعالوا الي ((حليوه)) .. ولاحظوا الفرق..
|
|
|
|
|
|
|
|
Re: شــاي ((حلـــيوه)) المنعنع!! (Re: mustafa bashar)
|
شوفو حليوة ست الشاى
شايك ما بدورو براى
كم مليون بدورو معاى
شايا ليهو خرمانين
سيد الركشة
سيد الكارة
الطيانى
المكانيكى
الكل قال تعال بى جاي
...
قايمى حليوة نص الليل
عشان رزقا حلال وعديل
رزقا ما بيدورلو دليل
وان فد يوم جاتا "الكشة"
بتتبهدل جنس بهديل
...
تشيل الهم
هما عاد يهد الحيل
داكا يتيم بدور مصروف
داكا مرضان وغالبو الشوف
ديكا بنيي عيانى
وترجف من كترت الخوف
...
وصوتا جاها من قاطوع
مهدهد بى كترت الجوع
حليوة... يا بتى
قشى دميعتك النازلى
وأسألى ربك الرزاق
يسهل ليكى كل ممنوع
...
تسوى الشاى
تبيعى حلال
تجيبى الكسرى للأطفال
تجيبى الدكوة للأطفال
و السكر بدل رطلين
منو تجيبى كم شوال
وصندوك شاى بدل تمنة
عاد مو حايقى فى الأطفال
....
صوت الوالدة باقى حنين
بتسمع فيهو ليها سنين
بتندهليها كل الفقرا و الصالحين
يغتوها ويضاروها من الجايرين
البيقطعو الأرزاق ومو خايفين
...
ديل حكامنا مو خايفين
عيونن ديمة مفتوحات على المسكين
الفارشلو كوم عجور
و البيطرق السكين
القايمات نصوص الليل
ست الشاى
ست الكسرى
القالاها نار الدوكى
و البتسوى فى التركين
...
ديلا يربو فى الأيتام
فى اطراف البلد ساكنين
بيوتن من بروش وصفيح
لا اسمنتى لا من طين
ورقادن ديمه فى الواطه
حتى ان كانو مرضانين
...
يا حكامنا قولو عديل
زى ناس ديل
يدوهم زكاة الله
و الله "الكشة" و البهديل
...
ابراهيم الكرسنى
| |
|
|
|
|
|
|
Re: شــاي ((حلـــيوه)) المنعنع!! (Re: mustafa bashar)
|
يتأخر الطالب يومياً عن الحضور للمدرسه صباحاً ويغيب عن الحصه الأولى فسأله زميله الطالب لماذا تأتي متاخراً أكيد بتكون نايم ومابتقدر تصح الصباح فكان رد التلميذ مايلي :ـــ
هل باعت امك يوما شاى ؟ بل هل صنعته لباباك ؟ ام ان بخار البراد سيضر ظوافر ماماك ؟؟ هل تعلم يا مترف انى انسان ؟؟ تاخيرى يوميا عن اول حصه .. استاذى ما زال يظن بانى كسلان .. لكنى احضر يوميا للسوق الشعبى قبل الفجر .. اجمع كاسات الشاى واوزع اخرى .. فامى ساقية فى ساقية للرزق .. تدورتدور بين الرزق .. ودفع الجزية .. اجمع كاسات الشاى واقش الارض ثم ارش .. وقديما درّسنا الاستاذ بان سعاد ترش الارض ثم تقش .. لكن سعادا لا تحضر للسوق الشعبى قبل الفجر …
_______________________
وهي محاوله شعريه لشخص يدعى..... عبده عبده عبده
| |
|
|
|
|
|
|
Re: شــاي ((حلـــيوه)) المنعنع!! (Re: mustafa bashar)
|
وبعدين الونسه أنواع ونســــه دقاقــــــــــــــــه.. ونســـه عامـــــــــــه.. .. ...وبعدين طبعا نوع هذا الشاي بجيب الكلام من وين وين .... المهم تشرب ساكت .. .. وبعدين كان عندك مسألة رياضيه غالباك ممكن تقدر تحل فيها حاجه .. ... عندك رسمه ماقادر ترسمها تشكيليين راقدين بالكوم ... ...
| |
|
|
|
|
|
|
|