|
|
 في حياة الأستاذمحمودمحمد طه وسيرته بين الناس آية كبرى أخرى
|
بسم الله الرحمن الرحيم
أولاً
بعض البعض ممن قرأ مؤلفات الأستاذ محمودمحمد طه.. قد يظن أن هذا الفكر صفوي.. إشتراكية.. ديمقراطية.. مساواة إجتماعية.. حقوق المرأة.. العدالة الإجتماعية..الفرد والكون.. الفرد والمجتمع.. نشأة الإنسان..الحرية الفردية المطلقة.. التسيير والتخيير.. وغيرها من المواضيع الهامة جداً التي تهم كل شخص على هذه البسيطة..
قد يأتي بعض الظن من أن هذه الأفكار لاتلامس الإنسان السوداني البسيط الأغبش العادي..الذي حرت على مضجعه شمس الحياة..فحمل عصاه على عاتقه يبحث عن رزقه وقوته وحريته..ويبحث عن نفسه.
هذه هي الأفكار التي تطرح الإسلام بصورة معاصرة.. حية تمس كل فرد في حياته الخاصة.. فإن لامسها بفكره وحسه.. ووجد فيها ضالته، فهذا هو المقصود.
وإلا فإن في حياة الأستاذ محمود وسيرته بين من عرفه من زملائه وأصدقاء صباه.. ووقت دراسته.. ووقت عمله.. في السكة حديد.. وفي مشاريع النيل الأبيض. وفي فترة تآليفه.. وفترة وجوده في رفاعة..وفترة وجوده في عمارة ( ابنعوف) بالخرطوم.. حينما كان يدير عمله الهندسي من هنالك وعمله الفكري أيضاً الذي لن ينفك عن ذلك... ثم فترة وجوده في منزله الثورة الحارة الأولى..
وإلا فإن في سيرة الأستاذ محمود آية أخرى. لمن يتدبر..
فالأستاذ محمود محمد طه يطبق ما يقول في كل كتبه بصورة حرفية دقيقة جداً.. معاشة على أرض الواقع بصورة ملفتة..لكل من حوله..
هذا هو الشئ الذي لم يختلف فيه أثنان حتى من المعارضين حول سيرة الأستاذ محمود بين الناس..
............
لاهو بالصوفي المتجرد.. ولاهو بالهايم.. وإنما كان عدلاً موزوناً وبين ذلك قواما
كان يعطي كل ذي حق حقه.. دون مجاملة.. حتى ولو إنساناً.أبله.. أو أخرس.. أو حتى حيواناً..
كان لايضيق بأنماط السلوك المختلفه..يحترم فكر أي إنسان..مهما كان فكره..
له محبة للشعب السوداني غريبة.. وعجيبة.. وعميقة.. وثرة..لاتحدها حدود..
يأخذ الأشياء بنواصيها ويردها الي أصولها بدون أن ينزعج الشخص الذي يطرح السؤال عليه.. أو المستمع اليه..
له مقدرة عجيبة في الأصغاء والإستماع والإنصات للشخص الذي يتحدث اليه حتى ولو كان طفلاً ليس له أي موضوع..
الإلمام بثقافات العصر كلها صالحها وطالحها..
عنده طيف واسع للغاية في جميع مراحل تطورات ديننا الإسلامي. وعلومه وأحاديثه، فقهه وسنته، وحديثه، وسنده..ومذاهبه كلها..
كما شهدناه ما تحدث اليه عالم أو متخصص حديث مثلاً، إلا جاءه بما لا يعرفه فيه، فإن لجلج أو أنكر ذلك الشخص.ذكر له إسم المجلد وكاتبه وطبعته.. وكذلك في كل الصنوف الأخرى من العلوم..
أما حياته مع من يختلط بهم من عامة الناس فإن فيها العجب العجاب.. يلامس فيها قلوب الناس الغبش العاديين بصورة مباشرة
فعلى الجمهوريين جميعهم تقع إبراز صورة الأستاذ محمود وشخصه وفكره للناس وكل شئ فيه.. لأنه أي الأستاذ محمود هو ملك للبشرية جمعاء وليس لنا وحدنا نحن تلاميذه..ليتلقف كل ذي حق حقه من هذه المسيرة والسيرة العطرة..
|
|
 
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
عفيف القلب واليد واللسان..
لا في محاضراته
ولافي كتبه
ولافي حياته.حتى المعارضين له..
يستقبلهم بابتسامة عريضة.. وعيون براقة مليئة حب.. ورحمة .. وعطف..
لم يأت شخص واحد يدعي أن الأستاذ محمود بادله.. ساقط قول. أو شتمه.. أو نهره.. أو نظر اليه نظرة إزدراء.. أو إستصغار.. أو تعابير وجه تدل على تصغير.. أو تحقير.. في شأن الدين أو العقيدة.. أو الجنس أو اللون أو الجهة..أبدا.. والكل يعلم ذلك.. وكل من يعرف الأستاذ محمود يعرف ذلك.. حتى الذين يعارضونه يعرفون ذلك...
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
لما زار أحد السودانيين مدينة فاس المغربية في مؤتمر أقامته جامعة فاس المغربية آنذاك. بات ليلة مع الدكتور عبد الله الطيب..وقد كان لوحده عازباً في سكنه.. وقد كان وقتها عميداً لإحدى كليات الجامعة..أو على ما أظن عميد الجامعة
فلما عرف منه أنه على دراية بالجمهوريين قال له في الصباح
( أنا طالع محاضرة وجاي.. عندي كل مؤلفات الأستاذ محمود..
وضع بعضها على طاولة أمامه
إذا كنت عايز.. الدقة في اللغة والعلم ومقارعة الخصوم في الفكر!
عليك بكتاب الأستاذ محمود( القرآن ومصطفى محمود والفهم العصري للقرآن)
وإذا كنت عايز تعرف تصلي كويس وتتعلم الصلاة من جديد عليك بكتاب الأستاذ محمود( تعلموا كيف تصلون)
وإذا عايز طرح فكري راقي ومتميز عليك بقراءة كتاب الأستاذ محمود( مشكلة الشرق الأوسط)..
قال الشخص المتحدث وهو من الثقاة المعروفين..
ذهب يعدد لى الدكتور في فضل الكتب
حتى ما عرفت أقرأ ياتو كتاب
...............
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
هؤلاء بعض من صفاة الفكر والعاطفة الجياشة. من عظماء شعبنا عبروا عن شعورهم وغيرهم الكثير.. الكثير الذي نعرفه والذي لم نعرفه والذي سوف نعرفه..
وإلا فكل شرفاء شعبنا هم مفجوعين حتى الآن.. وكل عام يتجدد جرح هذه الحادثة الفريدة الي أن يبريه الله
........
وإلا فتصح قولة أحد الكتاب الغربيين المعروفين وقتها.. لا أذكر اسمه الآن.. وهو موجود لدى في مكان آخر..
قال( أنا ككاتب ومفكر.. ومجرد إنسان.. بمجرد أن يعدم إنسان بسبب فكره المسالم.. لم يحمل سلاحاً ولا عنفاً.. بمجرد أن ينفذ حكم أعدام على إنسان في عصري.. بمجرد هذا الخطأ الفادح.. على يد أناس يعيشون معي في هذه البسيطة وهذا القرن.. بمجرد وجودي في هذا القرن.. وهذا الوقت أشعر بأن مروءتي قد نقصت.. وانسانيتي تلاشت..لأنني موجود بالمشاركة مع أناس أقدموا على مثل هذا العمل)
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
أما حياة الأستاذ محمود الخاصة.. فكانت كلها لله وللناس
........
كان يقول ويطبق ذلك..
كان يقول...
إذا بتقلب في موجة الراديو عايز قناة معينة.. وقبل ما تلقا القناة العايزه أو الموجة العايزة.. قبل ما تلقا موجتك.. ووقع مؤشر الراديو على قناة قرآن...!
أدباً وحباً وتعظيماً وبركة للقرآن..يجب فوراً أن تتوقف عن البحث وتستمع للقرآن.. وتترك خيارك..
وإلا ما حايكون عندك توقير للقرآن..
ثم يجب أن تصغي وتنصت للآيات التي تستمع اليها وهو رزق ساقه الله اليك.. ليرى حالك فيه..
..........
حتى ولو يجيك القرآن من وراء الحيطة من تلفزيون أو مذياع الجيران يجب أن تستمع اليه.. ولو على صورة متقطعة.. أو ضعيفه..
وكان يطبق ذلك.. ويوصى تلاميذه بذلك.. وهم ينفذون ذلك ما استطاعوا..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
ومن كلامه غير المكتوب..
في الصلاة ما تقروا القرآن.. قراءة الشديد المتعجرف الذي يمطمط الآيات وينتر في الصلاة ويتحذلق في القراءة...
اقرأ القرآن قراية الضعيف المسكين المحتاج.. استطعم الآيات.. تقمصها وعيشها واتلبسها.. على حالك. وإختار من السور والآيات حسب حالتك.. وأحفظ الجديد كل مرة .جدد آياتك التي تقرأ بيها.. كدة تجد فضل القرآن وتجد بركة القرآن. وفائدته وروحه وشفاءه.. تعال لى الله في الصلاة منكسر خجلان من ذنبك ومن عملك وعايز الرحمة والقبول..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
وفي الكلام المكتوب قال
القرآن في الصلاة تقراهو بحضور.. لأنو القدر المسجل ليك.. القدر البيكتب ليك هو ما حضرتا فيهو فقط..والباقي سهو..( رب مصل لم يقم الصلاة)( لم مصل لم تزده صلاته من الله إلا بعداً)
الحضور مهم في الصلاة والحضور في القرآن مهم.. والحضور أمام وبين يدي الله مهم..
.........
إذا انت جاي البلدية عايز تقابل ضابط البلدية.. وشايل ورقك.. عايزو مثلاً يسجل ليك كشك..
وانت داخل مكتب مدير البلدية وهو يتحدث معاك.. انت غفلت عن الضابط وبقيت تتلاعب بالورق القدامك.. ولاتصغي للضابط وهو يتكلم وتتثاءب مثلا
ماذا يعمل لك الضابط؟
أقلاه يطردك من مكتبو
ولايسجل لك الكشك
وقد يشتمك ويكلمك كلام تستاهلو ويجدع ليك أوراقك في وشك..!
طيب وانت جاي أمام ملك الملوك
وتقول الله أكبر وهو موش أكبر في قلبك
وتقرأ القرآن في الصلاة وتغفل عنو
وتتثاءب
وتتشاغل..
يكون شنو في هذه الحالة
قصاراه تطلع من صلاتك
صفر
لولا ربنا رؤوف رحيم..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
قال
الزهد موش غاية في ذاتو
الناس العباد المجودين بيقللوا حاجياتهم من الدنيا
عشان ما يكون عندهم حاجات كتيرة تشغلهم وتوزعهم في صلاتهم
يكون قدر الحضور عندهم كبير
لأنو ما عندو حاجيات كثيرة وكبيرة تخليهو ينصرف قهراً عن الصلاة ولا خواطر داخلية كثيرة ولا ثرثرة داخلية أثناء الصلاة..
الناس الزاهدين بيزهدوا عشان خاطرهم ما يتغير في الصلاة بمطامع الدنيا.زفتكثر الخواطر تضيع قيمة وبركة الصلاة.. اصلو الصلاة دي إذا الزول حصنا وتوخى الدقة فيها والحضور فيها والإستعداد ليها والوضوء ليها قبل دخول وقتها. أول ما يأذن الوقت إنت تكون جاهز وحاضر وفرحان بقدوم الوقت.ز عشان تحت أوزارك وأثقالك..( أرحنا بها يا بلال)
..........
اللقمة الحلال
مهمة جداً في موضوع الصلاة دا
( إذا أكل ابن آدم حلالاً أطاع الله أراد أم لم يرد)( وإذا أكل ابن آدم حراماَ عصى الله أراد أم لم يرد)
..........
الحضور في الوضوء
عدم الثرثرة في الوضوء
تنقل النية بين الأعضاء
استحضار ما فعلت الأعضاء خلال اليوم أو من الصلاة الفائتة وحتى المقبلة؟
محاسبة
مراقبة
أها كل الحاجات دي. تزيد عندك نسبة الحضور في الصلاة شوية شوية..
مفروض تجي الصلاة كأنك جاي عيادة دكتور عايز تتعالج
عشان كدة الصلاة كانت أهم عمل العبد
..................
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
قال
الزهد موش غاية في ذاتو
الناس العباد المجودين بيقللوا حاجياتهم من الدنيا
عشان ما يكون عندهم حاجات كتيرة تشغلهم وتوزعهم في صلاتهم
يكون قدر الحضور عندهم كبير
لأنو ما عندو حاجيات كثيرة وكبيرة تخليهو ينصرف قهراً عن الصلاة ولا خواطر داخلية كثيرة ولا ثرثرة داخلية أثناء الصلاة..
الناس الزاهدين بيزهدوا عشان خاطرهم ما يتغير في الصلاة بمطامع الدنيا.زفتكثر الخواطر تضيع قيمة وبركة الصلاة.. اصلو الصلاة دي إذا الزول حصنا وتوخى الدقة فيها والحضور فيها والإستعداد ليها والوضوء ليها قبل دخول وقتها. أول ما يأذن الوقت إنت تكون جاهز وحاضر وفرحان بقدوم الوقت.ز عشان تحت أوزارك وأثقالك..( أرحنا بها يا بلال)
..........
اللقمة الحلال
مهمة جداً في موضوع الصلاة دا
( إذا أكل ابن آدم حلالاً أطاع الله أراد أم لم يرد)( وإذا أكل ابن آدم حراماَ عصى الله أراد أم لم يرد)
..........
الحضور في الوضوء
عدم الثرثرة في الوضوء
تنقل النية بين الأعضاء
استحضار ما فعلت الأعضاء خلال اليوم أو من الصلاة الفائتة وحتى المقبلة؟
محاسبة
مراقبة
أها كل الحاجات دي. تزيد عندك نسبة الحضور في الصلاة شوية شوية..
مفروض تجي الصلاة كأنك جاي عيادة دكتور عايز تتعالج
عشان كدة الصلاة كانت أهم عمل العبد
..................
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
مع الغبش
عندما زاره أحد أصدقائه المهندسين زملاء الدراسة بعد طول غيبة وقد كان رجلاً رأسمالياً
وقال: ليه يا أستاذ محمود بيتك ما فيهو تلاجة؟ بس زيرين وقلتين؟ وإنت مهندس قدر الدنيا.طول وعرض..
قال ليهو الأستاذ...على أقل تقدير لما يكون في العاصمة أي واحد في بيتو تلاجة.. بعد كدة ممكن أعمل تلاجة.. دا إذا ما بقى في السودان كلو.. اي واحد عندو تلاجة؟
قال ليهو صديقو.. ماحا اقل ليك حا أجيب ليك تلاجة. لأنك لو عايزا. كان جبتها
الأستاذ يضحك.. ويتبسم.. ويقول له شكراً..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
حياة خاصة:
معروف عن الأستاذ محمود ( لايستخدم دش موية في الحمام)
ويستحم بالجردل فقط..
وهو المهندس من أدق المهندسين.. بيتو مافيهو توصيلة لدش حمام..
shower
ليه..
الإسراف مذموم
ليه الإسراف ينزع البركة
ليه
شكر لنعمة الماء
ليه
كل حمام بالنسبة له معاه غسل، والغسل يتطلب وضوء.. والوضوء لايليق بالدش
ليه
تبذير الماء هو تبذير النعمة وعدم شكر لله..
ليه
إقتصاد في الثروة القومية
ليه؟
في ناس في السودان ماعندهم دش حمام في بيوتهم!
ليه هو يستأثر بدش حمام للإستمتاع
ليه؟
في ناس في السودان ولاماسورة موية في بيتهم مافي خليك من دش
ليش؟
في ناس عشان يحصلوا على الموية
لازم
يسيروا للبير ضحوية
ولازم ( سلبة.. ودلو)
ولازم عجل أو جمل يجر السلبة.. السلبة طويلة بني آدم ما بيقدر يجرها.. عمق البير واحد كيلو في بادية الكبابيش أو صحراء العتمور
ليه
ليه هو يتنعم بدش ومعاهو ناس سودانيين يستوي معهم في السودانية.. لايزيد عنهم بشئ..كيف تستوي إنسانيته وهو يتميز عليهم
ليش
تطبيقاً حرفياً لمبادئه التي يقولها على الكتب
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
مع الغبش
........
مرات معتاد يجي درويش طرقات.. يفطر في بيت الأستاذ وهذا الدرويش مرات يرافقه كلب.. مرة جاء داخل
الكلب دخل معاهو..
واحد قال ليهو يا أستاذ هو راجي الفطور لكن كلبو دخل معاهو.. والكلب نجس
قال الأستاذ.طيب موش أنتو قبلتوهو يفطر في بيتنا.. ليش ما تقبلوا كلبو.. كلبو من ممتلكاتو وخصوصايتو.. كلها دقايق ويفطر ويطلع كلبو معاهو..( لايزدري اي مخلوق... ولا يتضايق من أي شئ)
............
مرة كان يستمع لنشرة الأخبار زمن نميري
.......
قالت النشرة( لقد قتلت قواتنا حوالي 75 متمرداً في جنوب السودان.. وفقدت قواتنا واحداً من أفرادها)
قال الأستاذ محمود:
أما نحن فنقول خسرنا 76 سودانيا,,
إن صدقوا هم في واحدهم هذا الذي فقدوه..
.............
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
كما يؤمن أي جمهوري..من تلاميذ الأستاذ محمود
بأن الفكرة الجمهورية راح تفاجئ الناس بجولة أخرى..قريبة.. وغريبة..هذه الجولة راح تقضي على الهوس المطروح في الساحة الآن في العالم من جذوره
هذا إستقراء لكل من يعرف دقائق الفكرة الجمهورية
بالعلم وليس العلمانية سيكون التفوق
بالطرح
بالتجسيد
من أعلاه
الي أدناه
.........
برفع الواقع
بتنزيل الفكرة الي أرض الناس
الفكرة الجمهورية لن تنتهي.. وإنما تمثل سير موجة البحر.. مرة تكون الموجة في السفح.. وتكون ظاهرة للعيان.. ومرة تكون في القاع ظاهرة لذوي النظر فقط ولكن وهي في القاع تعتمل الموجة لتقفز الى سفح أكبر.. وهكذا سير موجة البحر الفيزيائي...
الفكرة الجمهورية تبشر الناس بالولوج الي مرحلة الإنسانية
الإنسان كمرحلة، لم يأت في التاريخ كما تقول الفكرة الجمهورية
لم يأت منذ بزوغ فجر التاريخ وحتى الآن
مر ت مرحلة الحيوانية
ونحن الآن في أواخر مرحلة البشرية
بعدها وبإعتمال فضائل مرحلة البشرية تقفز البشريةالحاضرة الي حلقة أخرى
هي الإنسانية
والفرق بين الإنسان والبشر الحاليين.. كما الفرق الآن بين الحيوان والبشر
هذا كله مطروح في كتب الفكرة الجمهورية بصيغته الأساسية
وخاصة كتاب( الرسالة الثانية من الإسلام)
........
الفكرة الجمهورية
علم دقيق من عالم بمسيرة الكون نحو الأعالي..
الإنسان
مصيره
ذاته
سعادته
أم شقاءه
لذلك لم يفكر الأستاذ محمود ابداً في استرحام وقتما قدم له الإسترحام.. لأنه يعلم خطاه الي أين تسير..بلا مغالاة أو تعصب..
بأمانة
وبحق
وحقيقة
لا فكاك عن الفكرة الجمهورية أبداً
ولذلك صاحبها
يعشقها
وذهب الي ربه وهو يعشقها
ويعشق شعبه
الذي يحب أن يهدي اليه عصارة فكره
بلا تعصب
بلاهوس
بلا إحتقار لأي أحد
لافي دين
ولالون
ولاجنس
ولاجهة
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: كمال علي الزين)
|
صديق، أيها الحبيب،
اين أنت يا رجل؟
مشتاقين، لك وللأسرة الكريمة، ولجميع الإخوان والأخوات في أبو ظبي.
نعم:
Quote: أخذ الأشياء بنواصيها ويردها الي أصولها بدون أن ينزعج الشخص الذي يطرح السؤال عليه.. أو المستمع اليه..
له مقدرة عجيبة في الأصغاء والإستماع والإنصات للشخص الذي يتحدث اليه حتى ولو كان طفلاً ليس له أي موضوع..
الإلمام بثقافات العصر كلها صالحها وطالحها.. |
صح لسنانك!
أرجو زيارتي في خيوطي المتعددة التي افترعتها هذه الأيام، فقد تجد فيها ما يستحق التأمل والتعليق!
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
ما شفتا زول بيحب الناس زي الأستاذ محمود
حتى المعارضين له .كان يذكر لهم حسنات
.......
ومن مات منهم يوصي بقراءة القرآن على روحه
.........
الأمين داؤود القاضي المعروف.. كان القاسم المشترك الأعظم في محكمة الردة..
لما حضرت هذا الرجل الوفاة ونعاه الناعي
و قد كانت هنالك جلسة كبيرة في دار الأستاذ محمود يحضرها كل تلاميذه..
قال الأستاذ كل واحد يقرأ له الإخلاص حداشر مرة.. هو أحوج ما يكون لكم في هذه اللحظة...
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
الاخ منصورى
سلام
سيرة الشهيد الاستاذ محمود محمد طه ليست بالسيرة العابرة ..
فهى حياة داخل الحياة ....
وهى ما شابهت سيرة المتصوفة الصادقين وحسب ...
بل طابقت تجربته الذوقية كبار المتصوفة الذين نرقوا اعلى المراقى الروحية كالحلاج والسهروردى ...
لذا لم يكن من المستغرب ان تكون خاتمته مشابهة للاثنين ... فكان شهيد الفكرة قوى الايمان بها
وقد مثل الاستاذ الانسانية فى اعلى ما يمكن ان يبلغ اليه كمال الانسان ...
محققا عظمته التى هى من عظمة الخالق ..
هكذا يجب ان يحيا الانسان وان يسمو بانسانيته
وهو ما طبقه الشهيد قولا وعملا
..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
أخونا سمير شيخ ادريس
هي فعلاً كدة كما ذكرت أنت سيرته..وأضفت على أقوال أخونا الشامي
............
مدعاة للتفكير.. زول يخيرهو في البراءة ويصر على عدم التراجع..
( يقول يتراجع نميري. في قوانين سبتمبر..تلك القوانين التي أذلت الشعب.. وشوهت الإسلام.. وهددت وحدة البلاد..موش اتراجع أنا عن قولة الحق..)
وبالفعل هددت وحدة البلاد
وراح نميري فيها
حرصه على الحكم راح في شربة مية
وهددت وحدة البلاد
الحرب اشتعل أوارها في الجنوب
وتداعت الآلام والمصايب
...........
والشئ المحير الآخر في سيرته واقواله
التطابق الفكري
قول يكون قالوافي الخمسينات
وقول يكون قالو في الثمانينات
تلقى مافي تناقض ولاتراجع عن مبدأ..
صمامة
صدق
إخلاص
.....
أنا افتكر الموضوع دا له ما بعده..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
الأخ المنصورى
تحياتى
المعروف عن الفكر الجمهورى التسامح والقوة فى الحق..
فلماذا الحرص على الإحتفال بيوم اغتياله بدلا عن الإحتفال بميلاده..
فمثلا الإخوة المسيحيون لايحتفلون بيوم صلب المسيح بل بميلاده..
فالإحتفال بيوم استشهاد الأستاذ به شبهة تذكير الناس بظالميه والتذكير بالظالمين به شبهة انتقام لاتليق بالفكر الجمهورى..
أما الإحتفال والإحتفاء بميلاده فيه فرحة بيوم وجوده بيننا ليهدى لنا هذا الفكر وذاك السلوك المطابق للقول والقول المطابق للفكر والشجاعة فى تحمل تبعات ماينتج عن ذلك بكل ثبات ورضا. وكذلك فى ذكرى ميلاده تكمن ذكرى استشهاده ومابين التاريخين هو مكمن الإحتفال السنوى.
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
أخونا بله موسى
سلام...
هو شايف الإحتفال السنة دي
بالذكرى المئوية للميلاد
......
لكن سؤالك الموضوعي يمكن ليه يصادف هذا ذكرى 18 يناير
هذه الذكرى الأليمة... برضو وجهة نظر..مقدرة
......
يمكن مصادفة 18 يناير
عشان
يذكروا الناس بهذه المفارقة
وعشان
يظلوا يدقوا على هذه الحتة عشان ماتتكرر تاني
وعشان
هذه الحادثة تشبه محاكم التفتيش والعصور المظلمة .. العصور الوسطى
............
وعشان هنالك أجيال مستجدة كل سنة تدخل أفواج سنة الرجال.. وتبدأ تعقل المعاني.. السيئة والمعاني الجميلة..
عشان كدة
من حق الأجيال الجديدة الناشئة تعرف عن هذه الحادثة الشنيعة وتداعياتها
....
لم تكن هنالك حركة توعية كبيرة أو عمل عام منظم منذ اغتيال الأستاذ محمود..
وذلك في سنة1985
بعملية حسابية
لو في واحد كان وقتها عمرو14 سنة يا داب بقى يقدر يميز الأفكار.. وماكانت الفكرة الجمهورية مطروحة في الساحة بصورة مباشرة.
هسه زول زي دا بيكون عمرو بقى38 سنة.. وما عارف حاجة تذكر عن فكر الأستاذ؟
فزي دا يحتاج يقولوا ليهو عنها
...........
ما المقصود بالدق على هذا التاريخ شخصياً؟
الظلم
والظالم
وشهوة الحكم
وتفسير الدين على هوى السياسة
سيف ( الردة المشهور على رقاب أي واحد يجي بفهم جديد.. مخالف لهوى الدين المسيس..)
........
عشان
لما يكون الدين بلطجة
يعرض حياة المعارضين السياسين للخطر
لأنك إنت معارضني كويس
ما بقدر أقارعك الحجة بالحجة وأنا حاكم
بقوم بجيب ليك ناس يفتوا يحكموا عليك إنك كافر. ويفتشوا ليك أسباب يفتشوا أضابير الفقه يجيبوا كلام يرضى الحاكم..
يكتلوك
ويقولوا ليك الله قال أكتلوهو..( مافاهمين الدين)
وبعدين هو معارض سياسي
كدة يكون خصمه السياسي خلص منو
ونفض أيدو
جاك بي طريقة ملتوية وخلص منك
والحكاية دي راح تستمر
مالم الناس يدقوا على الحتة دي الحصلت في 18 يناير
لأنو علماء السوء موجودين في أي مكان وأي زمان
..................
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
| Quote: فالإحتفال بيوم استشهاد الأستاذ به شبهة تذكير الناس بظالميه والتذكير بالظالمين به شبهة انتقام لاتليق بالفكر الجمهورى |
أما عن هذه يا حبيبنا بله..
لو تلاحظ الإحتفال
محاضرات
ندوات عن الفكرة
شرح الفكرة
أركان نقاش
.....
فرصة للطرح
مناسبة للطرح
ما قاعدين نتشفى في حاجة أخرى
وين الإنتقام؟
الإنتقام ما كان ساعتها؟
لكن تلميذ الأستاذ الأول سعيد الطيب شايب
قال ساعتها وبعد الحدث.. أنا تربيت على نهج الأستاذ
نهج السلام
الرضا في جميع الأحوال
ما أحب لأي واحد من أخواني أو أخواتي
يتصرف تصرف غير لائق
في أي صورة من صور الإنتقام
هكذا نهج الفكرة..( السلام)
السلام الحقيقي
أطرح فكرى
وأنت تطرح فكرك
من غير عنف
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
دهشتي
قبل شوية كنت فاتح القناة التلفزونية السودانية..
البرنامج كان اسمو( بلادي سلام)
كل مرة يجيب مدينة جميلة كدة ويوري معالمها
كاميرا التلفزيون وقفت أمام مكان رائع
أخضر جميل به خزان رائع التصميم
وحوله بحيرة مياه كبيرة للغاية
وحوله أشجار الفاكهة
حاجة في منتهى الروعة
قال المحدث للمذيع وهو رجل كبير معلم قديم
يتحدث بمنتهى الطلاقة
المدنية هي المدنية المعروفة
مدينة رشاد..
قال المعلم
هذا الخزان الكبير القوي
شيده المهندس الأستاذ محمود محمد طه عام1957
صامد حتى الآن بكل قواه قال
شيدوا بعدو خزان آخر جنبو في السبعينات وقع وانهار
هذا الخزان الآن مصدر مدينة رشاد في المياه مصدرها الأساسي
وكل الخضر والفاكهة تروى من هذا الخزان
.........
والحديث للمعلم
قال الحقيقة الأستاذ المهندس محمود محمد طه أقام على الخزان كراسي قوية عجيبة للإستمتاع بمناظر البحيرة حول الخزان.. وعمل فيه مركب كبيرة للسياحة..
..........
هنالك مئات من هذه الأعمال أقامها الأستاذ محمود ولاتزال خالدة..
لما تخرج من كلية غردون قسم الهندسة( جامعة الخرطوم) عمل في السكة حديد وعمل في مشاريع النيل الأبيض وعمل أعمال حرة في التشييد.. الكباري .. البرابخ.. المزارع
.......
برضو حكى لى مدير مكتب الأستاذ محمود بكوستي.. وقتها قال
كنا نشيد برابخ لواحد من الرأسمالية حول منطقة الجبلين.. جينا مارين بلاندروفر الأستاذ محمود قرب قرية وجد النساء يحملن المياه من مناطق بعيدة جداً.. بعد ما فتنا مشهد النساء هذا.مرينا على منحدر به وادي ويلتصق حوله جبلين.. قال لى الأستاذ محمود.. لو جبنا معداتنا وعمالنا وأسمنت ومواد لقدرنا نعمل خزان كبير للغاية هنا وسد يغني هؤلاء النسوة وسكان هذه المنطقة..
قال تاني يوم شرعنا في الموضوع على نفقة الأستاذ ... ثلاثة أسابيع إلا والخزان اكتمل وكان مثار حيرة لسكان هذه القرية.. واصبح مصدرهم الوحيد للمياه
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
في أوائل الستينات.. كان الأستاذ محمود محمد طه يعمل بالعمل الحر.. في تشييد مزارع النيل الأبيض.. وقت قسمت الحكومة آنذاك هذه المشاريع..
كان مكان انطلاقه مدنية كوستي
التي مكث بها سنوات عدة يشيد هذه المشاريع..
وقد جنى منها مبالغ طائلة يأخذها من الرأسمالية ويردها على الفقراء والمحتاجين فوراً.. الحساب على داير المليم مع الرأسمالية والإنفاق على أصحاب الحوجة بلا حساب ..
أصحاب المشاريع عرفوا جودة تصميمو لقنوات الري وأنو العمل البيعملو لايحتاج لمراجعة ,انه عمل قوي..
أجر بيت في حي المرابيع بكوستي
وأجر مكتب في سوق كوستي دكان لإدارة عملو.. وعملو في الفكرة والدعوة لاينقطع مع ذلك.. السكرتير في المكتب قبل أن يغادر هذه الحياة إستقيت منه معلومات هامة وكبيرة في معناها غير مدونة في أي مكان آخر..
نواصل
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
والحديث لسكرتير مكتب الأستاذ المهندس محمود
( الحقيقة الأستاذ ما محتاج لمكتب هندسة.. وسكرتارية بكوستي
لأنو كان هو المهندس وهو السكرتير وهو المقاول وهو العامل.زيشرف على عملو بنفسو وينزل يتم بي يدو العمل مع العمال بل يشتغل أكثر منهم..
المكتب كان مفتوح للأرامل والمحتاجين يجوا هنا يشيلوا راتب شهري.زلأنو الأستاذ مرات كثيرة يكون في الخلاء مع المشاريع وأنا هنا أصرف ليهم رواتب شهرية
أما البيت ما كان للجمهورين وحدهم أي عابر طريق أي زول عايز يتغدى يفطر يبيت يجي البيت..
جون الطباخ يشرف على نظافة البيت، أستاذ محمود ما كان بيخليهو يطبخ.. لما يكون الأستاذ مافي نجيب للضيوف الأكل من المطعم ونسجل بالشهر..
جون ولد محمود كما يسميهو الأستاذ.. كان يعطيهو راتب زمان يساوي راتب واحد في دي أس زمان في السكة حديد..جون يحب الأستاذ ولمان يجي من الخلا الأستاذ سلام جون ليهو يتعلق في رقبتو.. والأستاذ يضحك.. جون يقول أستاذ محمود إنت أمي وإنت أبوي وإنت أنا ذاتو..
لما يجي الأستاذ من الخلا.. يصر ما نجيب أكل من المطعم ويطبخ أستاذ محمود براهو أحلى طبيخ والله مرة ما تسوي زيو..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
شكراً اخونا بدر الدين
والله فعلاً بحر من الذكريات بفضل سيرة الأستاذ محمود
لكن لو عايزين سعيد محمد زين يكتبو.لازم نعدلوا بلغة الكتابة
لأنو البحر هنا يجري على السليقة..وباللهجة السودانية المبسطة أحياناً
لأنو قلنا الأستاذ يلامس قلب الناس الغبش حسب حالتهم
..........
نواصل
سكرتير مكتب الأستاذ قال لى في كوستي
الأستاذ يأخذ عمالو ويذهب للمشاريع.. يقعد الأسبوع أو يزيد
لما يجي راجع كوستي يوقف عمالو صف.. ويقول ليهم أي واحد عايز اي حاجة أجيبها ليهو معاي وبعدين تحت الحساب.. ناس يوصوهو وناس ما بيوصوهو.. قال حتى الناس الما بيوصوهو يجيب ليهم الحاجات البي يعرف أنهم عايزنها معاهو.. ولو في واحد عايز نوصل ليهو مصاريف لى أسرتو..
يسألهم عن كل شئ..
يا فلان شايف جزمة الباتا بتاعتك مخرومة ما عايز واحدة جديدة من كوستي.. يجيب ليهو واحدة..
في شق القنوات الأستاذ ينزل معاهم في الحفر
ويكون قاعد في ضل راكوبة يراقبهم
وزمن الشغل ينتهي عندو بالساعة والدقيقة.. وإذا عايز يزيد زمن الشغل لظروف زمن محدد عشان يسلمو صاحب المزرعة.. إذا عايز يزيد الزمن يستأذن من عمالو ويضاعف لهم الأجر بعد ذلك ضعفين..
ويظل يراقبهم قبل ما يطلعوا من حفر البرابخ.. يكون محضر أجر كل واحد يمسكو من يدو ويرفعو من الحفرة ويديهو أجره تنفيذ عملي لحديث النبي صلى الله عليه وسلم( أعطوا الأجير أجره قبل أن يجف عرقه)
والحديث للسكرتير
معروف أن العمالة التي تشتغل مع مهندس محمود ما بتشتغل مع مهندس غيرو.. لأنو يعطيهم أجور عالية جداً
كان يدر عايد في زمن القرش فيهو عزيز يدر عايد جبار
يأخذ منو مصاريف أسرتو والباقي لما يجي كوستي عندو طربيزة كلو يكون على التربيزة آلاف آلاف.. زمن الناس ما عندهم الجنيه الواحد
يجو اصحاب الحوجة مئات للبيت كل واحد يحكي مشكلتو
الأستاذ ما بناولو
الأستاذ إذا أداك حاجة ما بيجعل يدو العليا عليك ابداً
يكون خامش القروش في يدو ولما يطلع غادي من الناس يفتح ليك يدو.. وإنت تشيلا.. عشان يدك تكون اليد العليا..
أما في موضوع قروش مزارع النيل الأبيض أهو يجي يخت الآلاف فوق الطاولة
يجو أصحاب الحوجة..
يقول ليهو عايز كم يقضيك كم.. يقول كذا..
الأستاذ يقول ليهو أمشي التربيزة عد بي نفسك الحاجة الطلبتها.. يعلم الناس الأمانة ويديهم فيتحول الحرامي الى أمين...
مرة لما الأستاذ طلع أنا كنت مراقب قال لى فلان شيل كذا وإنت شيل كذا... 64 شخص سجلتهم. لما جيت عديت باقي القروش لقيتا هي مافي واحد شال أكثر من القالو ليهو الأستاذ
مرة جاء واحد طلب أثنين ألف في أوائل الستينات.. وكان مبلغ كبير للغاية..
الحقيقة أنا زعلت قلت للأستاذ يا أستاذ الراجل دا رأيو فيك موش كويس.. بعد تنتهي المحاضرة بالليل قاعد يحرض الناس ضدك؟
الأستاذ قال لى: أنا ما بيهمني رأيو في شنو؟ أنا محمود
يهمني رأي فيهو شنو؟
هو ذكر أعذار كبيرة وحاجات.. تخليهو يستاهل المبلغ الشالو؟
............
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
كوستي كلها كان عدد العربات فيها بالعدد
لمان لاندروفر مهندس محمود يجي ماشي الناس بيعرفوهو من دون اللاندروفرات
ليه.. مع إنو شكل الاندروفر كلو قريب من قريب..
يعرفوهو لأنو لاندروفر الأستاذ محمود بيكون ( شابي) مرفوع من قدام.. وموخرتو غاطسة.. ليه لكثرة الناس فيهو ورا..
معروف عن الأستاذ محمود إنو إذا إنت أشرت ليهو ما بيقول ليك كدة كدة. أو ماشين قريب أو مليان.. زي ما بيفعل معظم أصحاب العربات..لا
كان بيقيف ليك طوالي.. حتى لو مليان.. بعدين إنت تحدد شخصياً تركب والله لا.. تركب والله مليان مافيهو نفس.. كان عادتو كدة..لايتحرك إلا بعد تركب.. أو تقتنع إنت الشخص الأشرت ليهو إنو عملياً مافي خانة..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
معروف عن أستاذ محمود أنه لايفاصل أي صاحب بضاعة في السعر..
عندما يريد يشتري حاجة..
مثلاً إذا جاء جنب صاحب بطيخ أو شمام.. وقال ليهو البطيخة دي بي كم؟ و ذكر السعر حتى لو السعر عالي
الأستاذ طوالي بيديهو...ويصدقوا تطبيقاً لقول النبي صلى الله عليه وسلم( المؤمن صديق)
مرة كان الأستاذ محمود في مدنية القضارف بصدد تقديم محاضرات في النوادي..
بالعصر الأستاذ قال نذهب للسوق بتاع القضارف عشان يحلق شعرو..
ذهب معاهو القيادي الجمهوري الثاني جلال الدين الهادي الطيب..
بعد إنتهاء الحلاقة.. الأستاذ دائماً بيحب يكرم ألناس الزي ديل بأكثر من سعر الحلاقة.. الأستاذ كان عايز يدي الحلاق
اصر أخونا جلال يدفع..
سعر الحلاقة كان في أواسط الستينات.. شلن.. أو للبرمكة ريال..
لما طلعوا برة الأستاذ قال لجلال.. أديتو كم..
أستاذ جلال قال: أديتو جنيه
الأستاذ قال:( تراكا ولداً نجيييض)..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
الحزن كثيف
كنت احد اطفال ذاك الزمن ..وكنا نلعب..
امام بيته ..احيانا نقف ..مع ذاك الموكب ...الجلل
والرهيب ونردد مع الجميع الله .الله ..الله
كان الحزن والمرارة كل ما امر امام المنزل المهيب
واتزكر الشلوخ المطارق علي وجه الاستاذ ..
واريحيته ..وترحيبه لنا ..
ونحن امام داره ..
الاستاذ باقي..في الفكر ة والزكري والف رحمه
تغشاك في سكونك الابدي
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
كان في أوائل الستينات في كوستي منزل الأستاذ محمود في حي المرابيع كأنو نادي فكري..القاضي الشرعي في المدنية وضابط المجلس.. ومدير المدرسة.. وكبار تجار السوق ..وإمام المسجد.. والتقدمي.. والمسيحي.. والدراويش والمتصوفة.. والفقراء.. وأصحاب الحوجة.. والأرامل.. كل واحد من ديل يجد حظو..من غير ما يتكدر الخاطر
ويحتوي كل هؤلاء بسعته.. في الستينات كان الناس صافية والإختلاف لايفسد للود قضية..
تنتهي المجادلات والمحاورات.. وينزل الجميع على صينية الفطور كلهم..
يحكي أحدهم من سكان كوستي اللصيقين بأستاذ محمود
مرة كنا في بيت مهندس محمود
قام القاضي الشرعي قال
والله يا أستاذ محمود شكلهم كدة ناس وزارة المعارف السنة دي راح ينسوا العلاوة السنوية بتاعتي.. رموني في الأقاليم وخلوني.. دفعتي في العاصمة فاتتني بي درجتين..
واحد تقدمي رد عليهو قال ليهو.. أفرض نسوك إنت رجل دين محسوبة ليك أجر..
قال قام القاضي زعل.. قال ليهو يافلان إنت تتكلم في الدين. إنت ذاتو دينك شنو؟ دين ماعندك؟
التقدمي قال ليهو.. أنا ديني دين المساكين والجوعى.. والعطشى.. والناس المظلومين.. أحاول أقدم ليهم حل..
إنتهى الموضوع على كدة
........
قال الكلام دا ظل يرن في مسامع أستاذ محمود فترة
قال بالله شوفو.. القاضي الذي يظن الشعب الأغبش.. إنو هو مظنة دين.. وومثل وجهة نظر الله.. أصلاً ما تكلم عن إنو قدم للناس شئ في الدين.. أو علم فلان .. أو رد ظلم مظلوم من ظالم.. بس يتكلم في علاوتو وإنو ناس الخرطوم راح يفطوهو..
وصاحبنا التقدمي يتكلم عن الغبش والمساكين
هسه بالله المتدين منو؟
هم الناس مفتكرين إنو الله دا بيلعبوا عليهو والله أيه..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
كان في أوائل الستينات في كوستي منزل الأستاذ محمود في حي المرابيع كأنو نادي فكري..القاضي الشرعي في المدنية وضابط المجلس.. ومدير المدرسة.. وكبار تجار السوق ..وإمام المسجد.. والتقدمي.. والمسيحي.. والدراويش والمتصوفة.. والفقراء.. وأصحاب الحوجة.. والأرامل.. كل واحد من ديل يجد حظو..من غير ما يتكدر الخاطر
ويحتوي كل هؤلاء بسعته.. في الستينات كان الناس صافية والإختلاف لايفسد للود قضية..
تنتهي المجادلات والمحاورات.. وينزل الجميع على صينية الفطور كلهم..
يحكي أحدهم من سكان كوستي اللصيقين بأستاذ محمود
مرة كنا في بيت مهندس محمود
قام القاضي الشرعي قال
والله يا أستاذ محمود شكلهم كدة ناس وزارة المعارف السنة دي راح ينسوا العلاوة السنوية بتاعتي.. رموني في الأقاليم وخلوني.. دفعتي في العاصمة فاتتني بي درجتين..
واحد تقدمي رد عليهو قال ليهو.. أفرض نسوك إنت رجل دين محسوبة ليك أجر..
قال قام القاضي زعل.. قال ليهو يافلان إنت تتكلم في الدين. إنت ذاتو دينك شنو؟ دين ماعندك؟
التقدمي قال ليهو.. أنا ديني دين المساكين والجوعى.. والعطشى.. والناس المظلومين.. أحاول أقدم ليهم حل..
إنتهى الموضوع على كدة
........
قال الكلام دا ظل يرن في مسامع أستاذ محمود فترة
قال بالله شوفو.. القاضي الذي يظن الشعب الأغبش.. إنو هو مظنة دين.. وومثل وجهة نظر الله.. أصلاً ما تكلم عن إنو قدم للناس شئ في الدين.. أو علم فلان .. أو رد ظلم مظلوم من ظالم.. بس يتكلم في علاوتو وإنو ناس الخرطوم راح يفطوهو..
وصاحبنا التقدمي يتكلم عن الغبش والمساكين
هسه بالله المتدين منو؟
هم الناس مفتكرين إنو الله دا بيلعبوا عليهو والله أيه..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
في أواخر عام84.. وقبل أن تبدأ الأحداث.. كانت هنالك كالعادة جلسة صباحية تقام كل يوم بصالون الأستاذمحمود يحضرها الجمهوريون والضيوف.. وأي شخص جاي..
يقرأ القرآن ويسمع الإنشاد العرفاني في هذه الجلسة وتسمع بعض الأخبار في الحركة وفي البلد والعالم وقد تدور نقاشات فكرية
..............
الجلسة عادة يديرها أستاذ محمود
في الأيام الأخيرة كمنشدين حفظنا من غير ما حد يقول لنا قصيدة( أنا أمدرمان) كلمات عبد المنعم عبد الحي. أداء العميد أحمد المصطفي. الأستاذ قال عنها.هي كلمات عالية. ألحقتم فيها أمدرمان الملك بأمدرمان الملكوت بإنشادكم لها
عدد من المنشدين حفظها
مرة كنت أنشد فيها في حضرة الأستاذ محمود. كان يقابلني على كرسي
لما جيت في البيت البي يقول( فياسودان إذ ما النفس هانت... اقدم للفدا روحي بنفسي)
نظرت للأستاذ
فشفت دمعتو تجري كررررر على خدو
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
مرة جاء واحد زائر
قال يا أستاذمحمود
نسوان الزمن دا ثرثارات جنس ثرثرة..
وجلسات مطولة في المنازل بلا عمل وكلامن كتير النسوان
.........
الأستاذ محمود قال ليهو
كل حاجة في الوجود فيها حكمة
حتى لو ما شفت حكمتها أنت
دائما بيكون في طرف غايب
العارفين يشوفوها كلها
.............
ونسة النسوان الشايفا إنت دي كلام ساكت
هي مدرسة مفتوحة من العناية الإلهية للأطفال يحومو بين رجليهن يتعلموا الكلام وبالتكرار الممل يتعلموا الكلام
ويتعلموا الأدب
ويشوفوا الناس الكبار يتصرفوا كيف وهم يسجلو في ذاكرتهم
حتى لو ما بينطقوا الكلام صغار.. يسجلوا في ذاكرتهم
عيونهم المفتوحة دي زي عدسات الكاميرا
تسجل وتنقل للمخ طوالي
عشان كدة
الناس الكبار حقو ينضبطوا أمام الأطفال
حتى لو ما بيتكلموا لسه
دي مدرسة مفتوحة بلا رسوم للأطفال
عشان كدة لاتعترض عليها
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
في مدينة ما في السودان في أواسط الستينات
ذكر واحد صديق زميل دراسة للأستاذ محمود
قال..
جيت للأستاذ محمود قلت ليهو هنا عندنا في مدينتنا وجيراني أسرة مكلومة
راجل عربجي عندو حصان وكارو يعيش بيهم أولادو.. لكن كان رجل مخلص شديد لى ربو وأمين وصادق ويخدم الناس.. الرجل دا مات وترك تلاتة بنات.. عندو بيت ملكو.. زوجتو حادة في العدة.. أخوهو عايز يطلعا من البيت هي وبناتا..
لأنو فقهياً يأرث في البيت لأنو المراة ما عندها ولد..
زوجة المتوفي آخر كلام قالتو لزوجتي أم بارح هي عايزة تطلع من البيت وتروح أهلها في مدينة أخرى.. ما عايزة محاكم وفضائح وجرجرة.. إذا كان هو أخوهو وعايز كدة... الله موجود
....
ومعروف في الفقه انو إذا المرأة مات راجلها وماعندها ولد.. أخو راجلا.. أو ابو راجلا يأرثوا معاها يسمى في الفقه في السودان( سد الزريبة) يسد لهم الزريبة رجل آخر طالما مرأة المتوفي ماعندها ولد.. وهذا مايجري عليه تقسيم المواريث الآن في كل العالم المسلم
..........
قال أستاذ محمود كان يسمع القصة بإصغاء غريب
بعد انتهيت من كلامي قال:
هو الفقه بتاعهم دا هم ذاتهم ما عارفنو
الفقه يقول( لاتطلع من بيتا إلا بعد إنقضاء العدة) فترة الحداد..
خليهم يفهموا دي..
بعدين خلال هذه الفترة الكافية نحن ندبر نشتري لها البيت ليها ولى بناتا
.......
بالفعل تركوها تتم العدة في بيتا
بالفعل الأستاذمحمود أشترى لهم المنزل باسمهم ولم يروا وجهه الي أن ذهب الي ربه.. لأن المسألة كانت في سرية شديدة وقتها لحفظ ما وجه الأسرة..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
قصة أستاذمحمود ورباط(حرامي) خور أب عنجة..( أم درمان)
معروف عن الأستاذ محمود أنه لايخاف.. ولايعرف الخوف..
مرات لما ما يلقى وسيلة مواصلات من الثورة لي محاضرة في أم درمان يمشي بي رجليهو وبعد انقضاء المحاضرة يمشي بي رجليهو..
والحكاية للأخ حسن عبد الكريم رحمه الله..
قال مرة كان عند الأستاذ محاضرة في بحري.. وما لقينا وسيلة مواصلات.. من بحري لغاية بيت الأستاذ في الثورة الحارة الأولى جينا ماشين بي رجلينا..
..........
أها في مرة من المرات.. كان الأستاذ جاي آخر الليل ماراً بخور أبوعنجة
وكان وقتها في أواخر الستينات هناك حرامي يربط للناس يقعد تحت كبري خور أبوعنجة.. وكتبت عنو الجرايد وقتها..
أول ما وصل الأستاذ خور أبوعنجة.. الحرامي كان تحت الجسر.. وقتها كورك للأستاذ قال ليهو
يازول أوقف.. إنتظرني لما أطلع ليك..
الأستاذ قال ليهو لا أنا حا أنزل ليك..
...
اندهش الحرامي.. نزل ليهو الأستاذ
الحرامي يبدو إنو خاف وشعر إنو زول زي دا يتحدى.. وعمرو مافي زول من ضحاياه قال كدة.. يا جرى.. يا رمى ليهو القروش وجري..
الأستاذ شعر إنو الزول دا بلطجي..
وقدراتو العضلية ضعيفة
وصغير. ويبدو انو معوق في رجلو..
المهم الحرامي خاف
....
والأستاذ أداهو محاضرة في الأخلاق
وأداهو القروش العندو
الحرامي إطمأن وتأثر
الحرامي شعر بانو الزول دا صادق ..
الأستاذ وعدو يقابلو في محل بكرة يديهو قروش يعمل بيها راس مال حلال وشغل
يقال أن ظاهرة حرامي خور أب عنجة إنتهت
بدليل أن الأخ حسن عبد الكريم قال..
مشى سأل ناس المنطقة
قال ليهم وين الحرامي الكان هنا..
قالوا ليهو سمعنا قالوا تاب.. لكن ماعارفين التوبو شنو؟ أكيد يكون في زول أداهو علقة جامدة؟
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
طبق الوضوء فوق الوضوء
مما عرفناهو وحتى إنتقل لربه
يطبق الوضوء فوق الوضوء.. ويوصي تلاميذه بذلك
طبق الوضوء فوق الوضوء يعني أن تكون دائماً طاهر
...
كان في غرفتو الخاصة.. إبريق كبير من التوتيا.. ومغلسة نحاسية متحركة زي بتاعة المصريين دييك.. يتوضأ فيها باستمرار..
لما سأله الصحفي ماهي هوايتك المفضلة
قال: ( هي قيام الأسحار).. وبالفعل لا ينوم في ثلث الليل على الإطلاق.. طوال حياته حتى تطلع الشمس.. ويوصي تلاميذه بذلك ويقول في ثلث الليل الأخير بركة لاتحدها حدود.. لا تفوتوها..وقال طبق الوضوء فوق الوضوء يصرف وساوس الشيطان.. ويجب بركة كبيرة للغاية..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
نجي للحديث عن السيرة المجسدة بين الناس
..............
لما الحكومة زمان خططت مشاريع النيل الأبيض وقسمتا للرأسمالية..
آل كبيدة بأم درمان طلعت ليهم مجموعة من المزارع هناك..
ديل ناس كبيدة أهل الزول داك زمان العمل إنقلاب زمن ناس عبود.. هم ناس معظمهم أثرياء ووجهاء..
قاموا سألوا قالوا عايزين واحد مهندس يخطط لنا مزارعنا ويشق فيها قنوات ري وخلافه..
أهل العقد والحل من تجار السوق. قالوا ليهم
عليكم بالمهندس محمود. هو هسي ماسك مشاريع في نفس جيهتكم
زول شغلوا نضيف.. وقوي.. يقعد لى جنا الجنا
بعدين الميزة الأساسية فيهو إنو بيسلمك المشروع جاهز في نفس الزمن البي تحددوهو معاهو
.......
استلم الأستاذ مشروعهم
واحد منهم قال للأستاذ محمود هذا اللاندروفر جديد تحت تصرفك.. بي سواقو..
مرة من المرات أستاذ مهندس محمود كان جاي من كوستي بنفس اللاندروفر.. والسايق يسوق له.. جايين العاصمة عشان يشتروا مواد ومعدات للمشروع ويشحنوها..
يبدو أن السايق متعود مع هؤلاء الرأسمالية يسرع
كل مرة أثناء الرحلة أستاذ محمود ينبهو لاتسرع.. لاتسرع.. تمهل
بس فجأة في الطريق لطش ليهو دجاجة وكتاكيتا الستة أرداهم قتلى..
أستاذ محمود قال ليهو.. أوقف مكانك.. إنصرف من الظلط..
أستاذ محمود قال لاحول ولاقوة إلا بالله..
يروي هذه القصة.. أحد أبناء كبيدة عندما أخبره السائق
قال أستاذ محمود مشى وقف في نص الظلط وعاين ملياً للدجاجة وعيالها الستة قتلى
ومتحسر على موتهم..
قال شالهم هي وعيالها.. وحفر حفرة كبيرة بعيدة من الظلط وطمرهم بالتراب.. ونظر لهم مرة أخرى نظرة تأمل وجاء راجع للعربية
قال:
بالله ياخي هذه المسكينة تسعى في فجاج الأرض لجلب قوتها وقت عيالها.. مالقت من سرعتك الطائشة غير الموت.. ما ذنبها؟
أنا عارف إنك ليك تقدير خاص لي.. وأشكرك
لكن إذا كررتها تاني واسرعت..
يا إما أنا أسوق اللاندروفر براي وأتركك
يا إما أرجع اللاندروفر ومعاهو إنت لصحابكم..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
معروف عن الأستاذ محمود أنه لايلبس ساعة في يدو... وإذا هداها ليهو زول.. في اقرب فرصة يهديها الي أقرب واحد..
لأسباب كثيرة..
زي حكاية خاتم الحديد الي كان لابسو النبي صلي الله عليه وسلم.. وكان يخطب في المنبر.. شالو رماه.. لما سئل عن ذلك.. قال( تارة اليه وتارة اليكم)
...
برضو.. الإنسان ككيان فيهو زمنو.. وفيهو توقيتو وفيهو ساعتو الداخلية مفروض يوقظا فيه.. موش يكتلا بساعة التصنيع المصنعة..
لمان يعرف ساعتو الداخلية يكون وقتو منضبط بالدقيقة والثانية والثالثة والرابعة.. بل ساعتو تكون مضبوطة على النفس الطالع والنازل...
الإستعانة بالظل والزوال والشمس والنجوم والقمر.. والمد والجزر.. فيه إرتباط بالكون الخارجي ليقود للكون الداخلي..
أوقات الصلاة تحدد بهذه الأوقات.. والقرآن الكريم حددها بهذه الأوقات..
الرق
الرق للأشياء..
في الحج
التخلص من المخيط والمحيط.. وإذا لبستو فيهو كفارة
عايزنك أمام بيت الله تكون أقرب للسليقة..
الأستاذ محمود كان لايلبس ساعة.. وعمرو ما تأخر عن زمن محاضرة موعود يقدمها..
حكى جاره في عطبرة لما كان مهندس في السكة حديد بعطبرة
قال..
مهندس محمود كان جاري.. يقيم الليل. اسمع تهجدو الليل كلو.. يأخذ نومة خفيفة وبسيطة.. يلبس البنطلون والقميص والكرافته.. ويحمل حقيبة وأوراق الشغل.. ويكون واقف برة باب الحوش منتظر سايقو يجيه بالعربية
قال والله على ما أقول شهيد
عمري ما سمعت سواق الأستاذ محمود ضرب ليهو بوري عشان يطلع
والله العظيم ثلاثة كنت بضبط ساعتي اللابسا في يدي على طلعة محمود برة وانتظار السائق
انا كنت شغال في السكة حديد والحديث لهذا الرجل ( الختمي) الطريقة
قال بسمع صوت باب حوش مهندس محمود عمل ( كاك كراك) باب خشب.. كان
طوالي أعاين لى ساعتي بلقاها ستة إلا خمس دقايق
والسواق بيجي ستة
حتى السواق ذاتو انضبط على طلعة مهندس محمود..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
واحدة من تلميذات الأستاذ محمود محمد طه..إشترت عربية جديدة.. وكانت سايقة بيها.
المهم يوم في شوارع الثورة ضربت ليها كلب كتلتو...
جات للأستاذ محمود كلمتو...
قال ليها الناس الكبار والعارفين الكبار.. كان بيشوفو الروح هي روح.. الروح واحدة سواء كان في بني آدم.. أو كلب أو طيرة.. أو قطة.. يعني كأنك كتلتي ليك زول..بس دا زول مسؤول منو الله.. شخصياً. لأنو القانون الوضعي ما بيحفظ ليهو حقو في حالة وفاتو هذه..
أما الزول السوي الهيئة بشر.. تراهو القانون حافظ ليهو حقو في حالة الوفاة. يعاقب البي يقتلو بالقتل..أو الدية
...........
فهسى إنت شوفي تتخارجي من الموضوع كيف..؟
تصومي لله..
تتضرعي..تبحثي عن صاحب الكلب.. تشوفيهو كلب زول تعبان عليهو والله كلب ضال بدون صاحب؟
تتوبي من السواقة
المهم الموضوع متروك ليك..
.........
شوف بالله كلب.. كلب.. موش راضي يتقتل؟
هسه الناس تكتل بني آدم بي طولو وعرضو ولاتتأثر
...........
موش كدة القطط والكلاب تلقاها مطحونة طحن فوق الشوارع ميتة والعربات تمر بي فوقا.. لحمها متفوف تف..
....
الأستاذ محمود كان لما يلقى قطة أو كلب.. أو عنز ملقاه على قارعة الطريق في الشارع كان بينزل من اللاندروفر بتاعتو ويدفنا. ثم يمشي..إحتراماً لهيبة الموت.. وحماية لمشاعر المارة.. من تبعثر الجسد..
لأنو برضو نحن البشر حيوان.. بس حيوان ناطق. حيوان مفكر..حيوان عندو مقدرة على مد الفكر في المستقبل.. بس بنشترك معاهم ديل في الحيوانية وشكل الجسد.. خاصة الحيوانات العليا.. الحيوانات ذوات الثدي..
قال
لو يعرف الناس بني آدم دا.. الحياة .. والتطور والقدرة الإلهية إنفقت ليهو بسخاء في الزمن المديد. العديد زي شنو؟ من التطور. ما كان كتل ليهو زول ..
مفروض الإنسان يكرم حتى لو أبله
أخرص
أبكم..
غير سوي
قال الأستاذ
شوف التشريع الإسلامي دقيق كيف
نحن نحترم الجسد لما يموت
نغسلو
نوضيهو
نطيبو بالطيب
المخارج يتعمل ليها قطن
نكفنو في عدد من القطع..
نحفر ليهو قبر
داخل القبر ود أحد
حتى الطفل الطراح في الولادة
يقول ليك إذا صرخ أثناء الولادة طوالي يدخل حكم الزول الكبير يغسل ويصلى عليهو ويكفن
أما السقوط والطراح الما بيصرخ عادي ممكن يدفن..
تلفوا في خرقة عادية.. موش شرع تصلى عليهو.. لكن لو عايز مافي حد بيمنعك
ماهو برضو برعم إنسان
وبرعم الإنسان ليهو تقدير خاص
موش برعم حيوان أعجم
......
هسه في ناس غير المسلمين يحرقوهو.. يرموهو في البحر . الجسد بعد يموت
ينثروهو في الهواء
واشياء أخرى كثيرة ما فيها كرامة لجسد الميت..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
واحد تقدمي.. كبير في مدينة كوستي.. صديق شخصى للأستاذ محمود..معروف بالإسم.. ونحن هنا في هذا المقال.نركز على المعلومة.. والأسماء تتبع..
كان هذا التقدمي عندو كشك مكتبة كبيرة في كوستي..
لما أحب يختار اسم للكشك عشان البلدية ترخصوا ليهو.! جاء لأستاذ محمود عشان يختار ليهو إسم للكشك..
الأستاذ قال ليهو سميهو( مكتبة الفكر) أعظم إسم
فسماها مكتبة الفكر..
كل يوم الأستاذ يشتري الجرايد والكتب الجديدة وبعض الأشياء من مكتبتو.. يعني ( ينفعو)
..........
قال والله الناس تجي للأستاذ لمان يجي من المشاريع عشان يديها قروش تجيهو من القرى والأقاليم..
بس أنا عمري ما قلت للأستاذ عايز حاجة
وأجيهو البيت في المرابيع كل يوم
بس الأستاذ كان يعرف لمان أكون مفلس..
مرة جاني في الكشك
لقاني متضايق شديد
قال لى مالك
قلت ليهو يا أستاذ مافي بيع..
قال لى طيب ما انت ليك رب.. كلمو
قلت ليهو يا أستاذ أكلمو كيف؟
قال لى.. هو نزل ليك كلام عشان تكلمو بيهو( القرآن)
قلت ليهو طيب أقول شنو؟
قال لي.. أطلع برة الكشك دا شوية.. وارفع يديك الي السماء وقول(رب إني لما أنزلت الىّ من خير، فقير)...جرب
...........
المتحدث قال ليهو.. أها دعيت بدعاء الأستاذ محمود وعملتها وجربت والله لا..
قال: والله لو جات من أي واحد تاني بتاع دين ما كان عملتها.. عملتها عشان الأستاذ محمود
المتحدث قال ليهو.. أها الحصل شنو بعد داك؟
فرجت والله لا
قال ليهو والله فرجت جنس فرج... جاتني بيعة كبيرة كبر ماحصل جاتني بيعة زيها لحدي الآن..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
( موية المطرة بتاعتي ديك وين، أصلي متعلم عليها، وإشتقت ليها.. قاعدة تنفعني)
هكذا رفض يشرب الأستاذ محمودمحمد طه.. كباية شاي الصباح، لبنها كان زايد شوية، عندما كانت إحدي بنات البيت من الجمهوريات تقدم ليهو كباية شاي. وهو كان مريض.. عندو نزلة برد شديدة..
بيت الأستاذ في الحارة الأولى.. الثورة.. كثرة الضيوف.ناس البيت بالإضافة للجمهوريين والجمهوريات.. العدد كبير للغاية..دخل البيت كان من تأليف الكتب. بعد أن انقطع الأستاذ عن العمل الهندسي وتفرغ للفكرة والدعوة
لذلك عشان الأكل يمشى مع ما يتناسب مع الميزانية...( الكفاف)..
والنبي صلى الله عليه وسلم قال( اللهم أجعل قوت آل محمد الكفاف)
شاي الصباح يوزع في الجلسة الصباحية
شاي خفيف اللبن.. خفيف السكر.. خفيف حب الشاي....ناس الشمالية وخاصة الشايقية شاي زي دا يسموهو( البانجقلي) إلا أن البانجقلي لبنو تقيل ولبن ضان..
هنا في شاي الصباح في بيت أستاذ محمود.. لبنو خفيف للغاية..موش لبن ضان.. ولالبن كاني ولا لبن فورمست.. لأنو دا غالي,,
كان هنالك في سوق أم درمان زمان فراشين برة حول زنك سوق الخضار.. في لبن كدة بالشوال الصغير.. كيسو زي كيس الأسمنت. لبن تعبان وطعمو ماهو ياهو.. زي لبن نباتي كدة أو شئ من هذا القبيل.. سعرو رخيص للغاية.. حتى الرخيص دا الناس الضعفاء ما بيقدروا يشتروهو.. لذلك تجد الولد الذي يبيع هذا اللبن.. شارط الكيس.. ويبيع بالكباية مالي الكبابة لبن خاتيها فوق الكيس.. أظن الكباية بى خمسة قروش زمان.. والكيس كلو بي 4 جنيهات بي جنيه زمان..حاجة كدة أشبه بي موضوع( قدر ظروفك بتاع اليوم)
أها لبن بيت أستاذ محمود بتاع شاي الصباح كان من دا..
والقاصي والداني كان يعرف هذا الشاي في بيت أستاذ محمود
لما يعملوهو شاي يطلع زي موية المطرة أغبش..
لمان الولد بتاع الشاي يوزع في الشاي في الجلسة على الجمهوريين والجمهوريات والضيوف في الشاي موية المطرة دا في صالون بيت الأستاذ محمود..
في هذا الوقت رفض أستاذ محمود يشرب كباية شاي مصلحة شوية لبنها زايد شوية من جنس اللبن أعلاه..
وهو عندو نزلة تقيلة لمان النهار حره شوية.. جات أختو الحاجة الكبيرة في السن.شايلا ليها كباية ليمون مسكرة عشان تنفع ليهو النزلة.. وكان جنبو عدد حوالي عشرين من الجمهوريات والجمهورين والضيوف..
ختت كباية الليمون بي صينيتا في تربيزة قدام الأستاذ..
الأستاذ كان يتكلم. ما اتلفت على كباية الليمون الي أن انتهي من شرح سؤال في الفكرة.. وأختو قاعدة جنبو وتبحلق فيهو منتظراهو ينتهي من كلامو عشان يشرب كباية الليمون عشان تنفعوا شوية..
بعد ما انتهى من الكلام
اتلفت على أختو بي حنية شديدة وبسمة وقال ليها( إنت باقي ليك أخوك إضينة؟)
وقال لانكلفك تزيدها يمكن ماعندك تاني؟..
قدامو كوز بتاع طلس كبير كدة.. كباها فيهو وقال ياسعد جيب موية من القلة.. ملى بيها الكوز وشرب شوية ومرر الكوز على الحاضرين..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
كان يقول المفكر.. المنظر... إذا ما يطبق أفكارو عملياَ ويكون هو أول المطبقين ليها...يبقى مافي فايدة
..............
كيف ينتظر من الناس يطبقوا كتاباته وافكاره.. على الورق.. وهو ينظر بس وما بيطبق ولايلتزم أخلاقياَ
...........
وكان يقول ما يعملو الإنسان.. أهم وأبلغ مما يقولو الإنسان...
......
وكان يقول الفكر المعين.. إذا ما لامس ارض الناس وحل مشاكلهم يبقى مافي فائدة..
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
السطور الأخيرة في دفتر الحلاج الثاني ــــــــــــــــــــ
ـــــــــــــــــــــــ إلى روح الشهيد محمود محمد طه ــــــــــــــــــــــــ
ـــــــــــــــــــــــــــــ عالم عباس محمد نور ـــــــــــــــــــــــــــــ
الجوهرة
كدأبِكَ ما تنفكُّ أَجْلى وأضوأ....وغيرِكَ في الأوحالِ يخبو ويصدأُ
وشَأوكَ عالٍ لا تُرامُ سماؤهُ....وما أدركوا إلا الذي منهُ تبدأُ
الثمرة
والشجرُ إذا يُسقى من ماءٍ آسِن....ماذا يطرحُ غير الثمر الآسن
الفعل
وفي الدارِ شُجعانُ الأقاويلِ جَمَّةٌ....ولكِنَّ شُجعانُ الفِعالِ قليلُ
فإن قلتَ قولاً لا تموت وراءهُ ....ليحيا،فلا معنى لما ستقولُ
المشهد
حين جاؤا بِكَ للموتِ ابتسمت
ضوءَ الوجه النبيل
أزهرَ الشيبُ حواليهِ بياضاً ناصِعاً
ثم استدار
والشلوخُ الغائراتُ الحُزنِ أغفت
فازدهى فيها الوقار
وبريقٌ في عيونٍ
هي لولا جنَّةُ الإيمانِ
نارْ
المساومة
غداةَ أن رفضتَ زيفهمْ
باعوك قبل أن يبايعوكْ
ويوم أن نبذْتَ بيعة النِفاق
هرولوا يصارِعوا ليصرعوكْ
فهاهُمُ وأنت لم تمُتْ
تُرى ما الحُجَّةُ التي بها
أتوا يُقارِعوكْ
الغرس
إنْ اَرَدْتَ الحقَّ أن يورقَ
فاسْقِهِ دمَكْ
وزِنْهُ بالفِعالِ، لا المقالِ
تَسْتَطيبُ طَعْمَ الموتِ في فَمِكْ
الخلاص
كلمةٌ لا بُد أن تُقال
في بِركةِ الركودِ هذهِ
لا غير هِزَّةٍ عنيفةٍ
تُخلخل الجبالْ
تُحرِّرُ الأثقالْ
في كومةِ الرُكامِ هذهِ
لابدَّ من زلزال
المبارزة
تنهزِمُ الأفكارُ، نعم
لكن بالأفكارِ
يحتكُّ المنطِقُ بالمنطقِ
والحُجَّةُ بالحُجَّةِ
والبرهانُ الساطِعُ بالبرهان
نتجادل حتى
ينْثَلِمُ الرأي الأوهى
في وجهِ الرأىِ الأقوى
نختلفُ كما يختلفُ الناسْ
ولكن يا للخزي ويا للعارْ
إن أفلسنا حتى ضِقنا
ذرعاً بالرأيِ الآخرْ
المشهد الثاني
كان الدرج الصاعد نحو المشنقة المنصوبة في ساحة كوبر يُدركُ أت الخطوات المتزنات
اللائي سرت بهن وئيداً، تفضي نحو الموت الرائع، والمتسق تماماً مع ما كنت تقول.
كان الحبل الملتف على رقبتك الشامخة الرأس، هو الطرف الآخر من ذات الحبل الملتف على
عنق الوطن المقتول.
ليس بعيداً كان قضاتك والجلادون ملامحهم ذابت ووجوههم متفحمة خجلاً وصَغَاراً،وثباتُكَ مثل
الخنجر بين أضالِعِهِم، فكأنك تقتلهم بمخازيهم شنقاً، وتحرر رِبقة هذا الوطن الرائع من
نير الذُّلْ.
أنت الأغلى والأعلى والأنبلْ
كنا نُدركُ أنك تفدي الوطن الأجمل
فلتكن القربانَ إذن حتى يتطهر وجه الأرض
وينخَسِيء البُهتانْ
الطود
ثباتُكَ طودٌ والعُروشُ هباءُ
وإن هي إلا خِسَّةٌ وغباءُ
وصوتُكَ بعثٌ في الملايينِ كلها
وإن خنقتها الفتنةُ النكباءُ
وقد دِيسَ وجهُ الشعبِ في كل محفلٍ
ألم يَبْقَ في الشعبِ الأبيِّ إباءُ؟
عالم عباس ـ فبراير1985
| |
|
|
|
|
|
|
|
|
|
Re: في حياة الأستاذمحمودمحمد طه وسيرته بين الناس آية كبرى أخرى (Re: منصوري)
|
والله عاد ما قصرت يا صبري الشريف
شكراً دكتور حيدر على المرور المروحن.. المفهوم في إطاره
..............
الأستاذ محمود محمد طه
هدية ساقها الله للشعب السوداني خاصة..
وكل مرة ماشي يتكشف لهم طعم هذه الهدية
الزمن عامل مهم
الإتكشفت ليهم في الأول ديل هم درر شعبنا
زول يطرح ليك فكره..
تناقشو
تقبلو
أو ترفضو
بأدب
بإحترام
لاشايل عليك سيف
لابندقية
لاعصاة
لايسمعك كلمة نابية
بس يطرح فكرو ليك
الضيق الجابو شنو؟
والزعل الجابو شنو
ومصادرة الحرية الجابا شنو
والمحاصرة الجابا شنو
والخوف من شنو؟
نحاكم لى شنو؟
الفكر بيتحاكم؟
فكر مطروح
كان كويس اليمشي
كان كعب الينقرض
في شنو تاني
| |
|
|
|
|
|
|
| |
منصوري
Haydar Badawi Sadig
الشامي الحبر عبدالوهاب
سمير شيخ ادريس
باسط المكي
فيس بوك
تويتر
انستقرام
يوتيوب
بنتيريست