كتب الكاتب الفاتح جبرا المتوفرة بمعرض الدوحة
|
|
 والـنيل يا سادتي !!
|
إنه وبعد :
يبقي مابقي التمر في الجروف يبقي مابقيت سماء بلادنا تمطر يبقي مابقيتا فكتوريا وتانا تبايعان الأرض ولارغبة لكليهما في الإعتزال ، وذاك حال النيل ، يعطي ويعطي بغير حساب ويأخذ مرة مرة . يأخذنا بعض ناس وأغنام وأبقار. ثم يمضي في دربه الطويل حتي دون إلتفاتة .
كان نهاراًً وصبيان قريتنا النيل أمامهم والجبال من خلفهم أرست جبالها التليدة يسبح بعضنا ويغني بعضنا والبعض منا في شقاوةٍ تخصه ،
صحت البهايم من قيلولتها وصحي الأبهات من نوم مقيلهم بعد أن أسدلوا جفونهم وراحو ينسلون في أضابير الحلم هاجت القرية وماجت والعصافير كذاك جاءت والأعمي جاء يحمل المكسر وتحول النهر يومها لبيت بكاء ... بكاء جد جد لاكبكاء المداين حيث المجاملات .
إرتجفت منا الأوصال وبلغت القلوب الحناجر وذاغت الأبصار والدموع رق رق رق رق شوووو كما المطور ..... والناس أضحت في حيص بيص !!!
كان ذلك من المرات التي قرر النيل فيها أن يأخذنا أخذة رجل واحد فحمل أوسمنا ، حمله بعيداً بعيداً وبالكاد رأينا أصابعه المتوسلة ... عشر أصابع بأكملها .... تظهر ثم تغيب ... صارن خمسة واليد الواحدة ( آآب تصفق ) فكيف حال الأصابع ؟
الآن يقول النهر كلمته ويحكم القدر قبضته ويتحول الناس مابين واجم وشارد الذهن وتصبح السكني لثلاث أسابيع ونيف أطراف النهر.... وتبقي الأمنيات أن يهب (صاحبنا) ... عله يهب عله يهب عله يهب .... وددنا لو عاد بيننا ..... وددنا لكنه النهر الذي .... فما عاد ،،، .
أصبت يومها بحال يعاودني كلما سمعت أن أحدهم (مضي) نحو الضفة الأخري ....
يرد لساني المرعوب . مات غرقان ؟
عدنا بعد الثلاث أسابيع ونيف لفراش كدنا ننساه .... وجدو نصفه الأعلي والباقيات الصالحات ذهبت في بطون الحيوات التي تملأ النهر جوعاًً .
تحكي القرية في أمسياتها المقمرة بأن فلان الفلاني وهو فارس من فرسان ذهنية القرية إصطاد ذات يوم تمساحاً وعندما سبرو غوره وجدوا في داخله عروساً من نواحي (الدامر) . لحسن حظها إبتلعها التمساح جملةً وتفصيلاً لا(بالقطاعي) كحال صديقنا الذي رحل . فستان زفافها وجدوه كما هو في رف المعدة و(ذهبها) الذي (ذهب) معها كان في (كومدينة ) داخلية يستخدمها ضيوف ذاك التمساح . أخرجو العروس يومها ونهبوا مانهبوا من حليها ثم سلمو جثمانها الطاهر لشرطة المديرية .
أما التمساح فأكلوهـ وما تركوا فيه شيئاً .
من يومها لم يعد يستهويني طعام عرقه النهر والبحر صار عدوي اللدود بسمكه وتماسيحه وأبو جلمباته وبضفادعه التي تثير فيني ماتثير من حراق الروح .
لكنه النيل أشجعه علي بعض لعبات حلوة يلعبها بذكاء فلا أملك إلا أن أجاريه ،، لكني مطلقاً لن أنسي فعلته التي حمل فيها صديقنا ليعيده لذاكرة طفولتنا يومها
(نصف) صديق ليس إلا . له البقاء وين ما كان .... له السلام كيفما كان وأينما كان .
وذاك ما كان من أمر النيل .
|
|
 
|
|
|
|
|
|
|
|
Re: والـنيل يا سادتي !! (Re: خضر حسين خليل)
|
خضر
النوريك الديكتاتورية الأشد من دكتاتورية البروليتاريا ..
الطير المهاجر ما بتنفع هنا
المفروض يكون عندك أغنية الكميروني ده .. مع إنه الكلام عن النيل
و ما شغال بيك لو ما عاجباك
| |
|
|
|
|
|
|
|
|
|
Re: والـنيل يا سادتي !! (Re: خضر حسين خليل)
|
يازول طير مهاجر شنو...
بالليل بركب ليك حمد الريح هنا يقيف ليك سداري هنا
وبعدين انا تاني ما حقرا ليك مالم تغير لون خطك ده خليه (كستنائي) لانو عندي نفسيات الايام دي
مما اكتب كتير كدة تعرف انو الككو ده قاعد فوق الراس.
روح يا شيخ (كوق المينام)
| |
|
|
|
|
|
|
|
|
|
Re: والـنيل يا سادتي !! (Re: GamarBoBa)
|
قمر بوبا
ازيك ياخ
ياخينا انت متين بس ما كنت زهجان ! لا حولا
وقيل ياموسي : مما عرفتك انت قافلة معاك
كربك كرب !
الككو دة نزلو شوية والله فتر معاك عديل
بالمناسبة الكود الرسلتو لي أمس اشتغل
معاي زي الحلاوة ! يمكن المساء
نوريكم عرض خفيف كدة !
اللون دة يادوب لمينا فيهو!
أصبر شوية ياخ
| |
|
|
|
|
|
|
|
|
|
Re: والـنيل يا سادتي !! (Re: خضر حسين خليل)
|
كان باريتك بفطس
عارف شنو بفطس؟
بتغتس حجرى
وتلحقنى الغتس كما كانت تقول امى
وبعد سنوات طويلة فهمت ان الغتس كان المعنى بها
هو سلطان اللماليك غطس
المصرى او كما قال
حين هرب جنوده الى الجنوب فى السودان واستقر بهم الحال
الى يومنا هذا
هذا ماكان من امر غطس
لكنك يا صديقى
الله يقطع سنين الغربة ويبارك فيها
دا جمع زهج
ياخ احبك زاتو
ومحل رهيفة التنقد
| |
|
|
|
|
|
|
|
|
|
Re: والـنيل يا سادتي !! (Re: سلمى الشيخ سلامة)
|
سلوم
كتبتها سلملوم بدون ما أحس
جنس سلام وأمان غايتو!!
لكن غطس غطسة مبالغة
باللاهي من ديك وعيك
لاحولا لاحولا
سلمي ياصاحبي
أنا مشتاق ليك عديل
هسي بردان وماقادر أكتب
خشي ماسنجر
نهتميل شوية
ولا خشي السوق عديل !!
باي باي
| |
|
|
|
|
|
|
|
|
|
Re: والـنيل يا سادتي !! (Re: سلمى الشيخ سلامة)
|
يا بت ملوك النيل يا أخت البدور
مين لى علاك ينيل فى البدو والحضور
الجبرة فيك بتخيل محمية الحما
الما حام حداه دخيل
ما أبوكى بخيل بت عز الرجال
أهل الدروع والخيل
والهنا... والسرور
يا السامية ست الجيل طرفك من حياء
فى عصر السفور خجيل
حسنك وضع تسجيل..فى صحف الدهور
يتلوه جيل عن جيل
لى يوم النشور
الهيفا يا الخنتيل حروف آيات محاسنك
أرتلن ترتيل
يعجبنى فيك تمثيل أخلاق الملاك
فى سطوة القتيل
الفارس الجسور
غضنك رطيب وعديل شعرك ليل
جبينك يخجل القنديل
النور عليكى سديل يا معنى الجمال
الما أتوجد له عديل
فى ناس ولا حور
فقتى الكانوا قبيل ما خدات فى الجمال
جائزة نوبيل
حيرتى كل نبيل عيناك سحرهن
يسحر سحر أبابيل
يخترق الصدور
يا صاحبة الأكليل ما أظن النهار
العين تدور له دليل
محياك نوره جليل كنت أقول شمس
لو ما الزمان كان ليل
أن عليك نور
لا زلت ليك أميل يا رمز السعادة
الما أتوجد له زميل
يا آية التكميل يا مراية الجمال
الفيكى كل جميل
ريحانة العصور
| |
|
|
|
|
|
|
|
|
|
Re: والـنيل يا سادتي !! (Re: محمد الشيخ أرباب)
|
يا بت ملوك النيل يا أخت البدور
مين لى علاك ينيل فى البدو والحضور
ودالشيخ كيفنك ياخ
والله انا شاكر ليك جداً حضورك السمين دة
جاي ويدينك مافاضية ملانه غنا سمح وطاعم
النيل دة بالمناسبة زيو مافي !!
ربنا يرجعنا ليهو علي علاتو !!
سلمت ياصاحب
| |
|
|
|
|
|
|
|
|
|
Re: والـنيل يا سادتي !! (Re: خضر حسين خليل)
|
و ان جيت بلادو، تلقى فيها النيل بيلمع في الظلام..زي سيف مجوهر بالنجوم من غير نظام. ايهما كان افتك بصلاح احمد ابراهيم ، وحشة الغربة ام الحنين الى النيل؟ النيل الطويل الملولو دا يا خضر ،اهلنا الحواتة قالوا سكنته البلهارسيا! عملتها كيف ما عارف.. لكن شكلها حاجة غير الدرسناها في الاحياء. امانة عليك يا نيل تفضل جميل.
| |
|
|
|
|
|
|
| |
خضر حسين خليل
fadlabi
GamarBoBa
سلمى الشيخ سلامة
محمد الشيخ أرباب
saadeldin abdelrahman
فيس بوك
تويتر
انستقرام
يوتيوب
بنتيريست