|
|
 ولا بسمع كلام المديرة ولا بحضر االجزيرة
|
مدخل (1)
- ولا بسمع كلام المديرة ولا بحضر االجزيرة
- دة شنو يا ولد
انت داير تبقى شاعر جبدوك اهلك الكتياب
- لا لا يا ماما لكن المديرة قالت لينا
احضرو الجزيرة عشان تشوفو اطفال غزة كيف بموتو
انا مالي ومالهم اطفال غزة انا سوداني وبس
- طيب هم اطفال غزة القتلهم منو
- انا عارف
ايوا بابا قال لي قتلوهم الاسرائيليين
ونطت واحدة من هناك
- لا لا ضربوهم التشادييين
وحسع قالول حيجوا يضربونا
!!!!!!!!!!!!!!!!!!
مدخل (2)
- يا ماما اخت صاحبتي بتقرا في الجامعة
وقالت عملو ... هي اسمها شنو يا ماما لما يمرقو
- مظاهرات ؟
- أيوا قالت علموا مظاهرات
- قالو شنو
- قالوا ما دايرين البشير
- يا بت انتي متاكدة قالو كدة
- ايوا
- اها وانتي دايراه
- انا برضو ما دايراه
- ليه
- لانه مجرم
ونط واحد من هناك
-القال ليك منو مجرم حسع انتي بتقولي في كلامك دة عندك دليل
- المهم هو مجرم
- طيب ما دام ما عندك دليل ما تقولي كلام ساي ما متاكدة منه
- طيب خش سودانيز وهناك بتقلى الدليل
مدخل ( 3)
- انت الوحيد السوداني لانك مولود في السودان
- ايوا انا سوداني
- لكن نحن ما سودانيين
نحن يمننيين
- ها عان دي قال يمنييين حسع احسن نحن ولا هم
- حسع عليك الله مش اليمن احلى من هنا
المدرسة احلى
والشارع انضف
والحدايق احلى واكتر
واهم حاجة ما تنسي الجو
يعني ما في اي حر زي هنا.
- هي هي انا ولا يمني ولا سوداني انا الماني
لوني ابيض وشعري دهبي مش زي اليمنية ولا السودانيين لونهم اسود وشعرهم خشن
!!!!!!!!!!!!!!!!!!!!!!!!!!!!!
مدخل ( 4)
رغم اختلاف المداخل في المواضيع التي تمت مناقشتها ولكنها تناقش فضية جوهرية
وهي الهوية
والمهم
هكذا يتناول اطفالنا قضايا الساعة
حوار تم بين اطفال تترواح اعمارهم بين ستة وثمانية وآخر 14 سنة
كيف ينظرون لهوياتهم
ما اثر الاعلام في تشكيلها
وكيف تتبلور مواقفهم تجاه قضايا الساعة
وما دور الاسرة في ذلك
اسئلة تؤرقني
هل تترك لهم خيار تحديد مواقفهم ام تتدخل في محاولة لشرح او توضيح حقائق
وان تدخلت من اين تضمن ان تدخلك لا يخلو من تحيز لمنظلقك الفكري الايدولوجي ومواقفك السياسية كيف نستطيع ان نترك لهم حرية الاختيار وما هي الوسيلة التي تساعد في ذلك؟؟؟؟؟؟
محتارة
خارج النص:
| Quote: انا مالي ومالهم اطفال غزة انا سوداني وبس |
الزول دة اتكلم مع تراجي بالتلفون ولا شنو
يا تراجي هي نحن اديناك ناذر دة مالك ومال اطفال الجعليين ، هو ذاته بيني بينك مشكوك في جعوليته لانها لحمة اضان ساي
(لحمة اضان تعني انتماء من جهة الام فقط)
وتاني يجينا ناطي الجندر هو ماله ما بينتمي لامه مش جيناته النص بالنص غايتو المهم دة الحاصل
صفية
|
|
 
|
|
|
|
|
|
|
|
Re: ولا بسمع كلام المديرة ولا بحضر االجزيرة (Re: tayseer alnworani)
|
Quote: صفية ازيك
غزة صرخة فى وجه الضمير الانسانى القالها برضو طفل
حقو ما تركزى على سؤال الهوية ده كتييييييير
جابوه زمان من مدرسةالغابة و الصحراء |
اهلين تيسير
كلامك عين العقل
انا بس بتسائل
كيف يتم التوجيه
من غير تاثير بمواقفنا
اتفق معك ان قضية غزة قضية انسانية ولكنها تتقاطع مع احساسك بهويتك ولا موهيك يعني درجة تضامنك مع او ضد بحددها انت منو وليه بتتخذ هذا الموقف
ولكن يظل السؤال قائما
كيف توجه ابناءك من غير ما تؤثر على مواقفهم
تحياتي للجميع
| |
|
|
|
|
|
|
|
|
|
Re: ولا بسمع كلام المديرة ولا بحضر االجزيرة (Re: Safia Mohamed)
|
Quote: حسع عليك الله مش اليمن احلى من هنا
المدرسة احلى
والشارع انضف
والحدايق احلى واكتر
واهم حاجة ما تنسي الجو
يعني ما في اي حر زي هنا.
- هي هي انا ولا يمني ولا سوداني انا الماني
لوني ابيض وشعري دهبي مش زي اليمنية ولا السودانيين لونهم اسود وشعرهم خشن
!!!!!!!!!!!!!!!!!!!!!!!!!!!!! |
ديل اطفال حناكيش ساي
ما شافو اطفال مدن السودان الاخرى ولا اكلو ام تكشو
| |
|
|
|
|
|
|
|
|
|
Re: ولا بسمع كلام المديرة ولا بحضر االجزيرة (Re: Salahaldeen Nadir)
|
الأخت صفية
سلام
في سن الطفولة كنت والناس منفعلة تسمع في مبارة هلال/مريخ.. شدني "على ما أعتقد" تعليق المذيع الراحل علي الحسن مالك.. وكان يطري كثيرا على الحارس عبدالعزيز يا سلام يا عبدالعزيز.. رائع
وفنان يا عبدالعزيز.. وأنا أصفق سألوني: أنت بتشجع مين؟ الهلال ولا المريخ؟ قلت ليهم: لا لا..أنا بشجع عبدالعزيز.. ده أحسن واحد.. (واحد همهم: الود ده مريخابي).
أفضل شئ هو ترك الطفل ليحدد ميوله وانتمائه بنفسه..مهما كان اختياره هذا بعيدا عن هوى الوالدين..
لأن التوجيه الغير مقنع للطفل غالبا يأتي نتائج سلبية..
نواصل..
تحياتي
عبدالعزيز
| |
|
|
|
|
|
|
|
|
|
Re: ولا بسمع كلام المديرة ولا بحضر االجزيرة (Re: Abdlaziz Eisa)
|
Quote: أفضل شئ هو ترك الطفل ليحدد ميوله وانتمائه بنفسه..مهما كان اختياره هذا بعيدا عن هوى الوالدين..
لأن التوجيه الغير مقنع للطفل غالبا يأتي نتائج سلبية..
نواصل.. |
شكرا على المداخلة القيمة
واكيد عدم التدخل مطلوب لكن برضو التوجيه مهم
والسؤال هنا حول الحد الفاصل بين التوجيه والاملاء
يعني كيف تساعدهم/هن في تحديد مواقفهم/هن من غير الضغط نحو اتجاه معبن؟
تجيتي عبد العزيز
قلت لي بتشجع عبد العزيز
امبارح قريت مداخلتك للعيال قعدو يموتو من الضجك وقالول لي يا ماما اساليه هو عمره كان كم سنة الما عارف يحدد الهلال من المريخ
على راي خالتي نحن ولدنا قبال ما يتعلم الكلام بنمرخه يعني بعد ما نقرا ليه الاذان طوااالي
نمرخه يعني نبقيه مريخابي
حكمته بالغة انا طلعت هلالابية يبدو انه خالتي ما كانت موجودة
او التمريخ من عدمه خاص بالمواليد الذكور وتاني جندر
| |
|
|
|
|
|
|
|
|
|
Re: ولا بسمع كلام المديرة ولا بحضر االجزيرة (Re: salah awad allah)
|
Quote: ديل اطفال حناكيش ساي
ما شافو اطفال مدن السودان الاخرى ولا اكلو ام تكشو |
قصدك المهمشين والمهمشات ولا شنو؟
برضو يا صلاح يظل موضوع التوجيه مهم وخاصة اسسه يا ناس التربيةوعلم النفس وجهونا
شكرا يا صلاح على المرور وما تنسى تسال لي العصفورة بتاعتك من موضوعي دي يبقى نلقى عندها الحل !!!!!
| |
|
|
|
|
|
|
|
|
|
Re: ولا بسمع كلام المديرة ولا بحضر االجزيرة (Re: Shamael Elnoor)
|
Quote: أقوليكـ المبالغة دي!!
طالبة جامعية بتسال صحبتها
اسمعيني ياهناية: غزة دى فى العراق ولا فلسطين |
استاذة شمايل
شكرا لتشريفك بالحضور
لكن مبالفة قالت شنو
والله لكن المهم الله يكون في العون
انت عارفة مرة كنت بعمل في بحث عن وعي المراة بحقوقها الدستورية قمت سالت خريجة جامعية
قامت قالت لي هوي ما تتعبي روحك ساي انا في الحكومة دي حدي بعرف الرئيس البشير
والنائب سلفاكير والوزيرة تابيتا وبس تاني لا تقولي لي دستور ولا نور هو دستور ذاتو يعني شنو؟؟؟؟!!!!!!!!!!!!!!!!!!!!!!!!!!!!!!!
الله غالب
دوركم يا اعلاميات ويا اعلاميين ترفعو من مستوى الوعي شوية خاصة بين الشباب والشابات والبلد ماشة على انتخابات
تحياتي
صفية
| |
|
|
|
|
|
|
|
|
|
Re: ولا بسمع كلام المديرة ولا بحضر االجزيرة (Re: Safia Mohamed)
|
سلام للاخت صفية (أم الرئيس) وتحية لشباب الغد معك
الموضوع مهم جدا ... وقراءة أفكار الأطفال تتطلب التعامل بجدية
وعدم تجاهل الحقائق مهما كانت مريرة
كثيرا يفاجئني طفلي محمد (7 سنوات ونصف) باسئلة وتعليقات
ابذل مجهود كبير بعدها للتماسك وعدم اظهار المفاجأة
وارد عليه بما يحفظ له حق المبادرة بالسؤال
مثلا أمس فاجأني بسؤال (يا ابوي البشير بيحاكموه ؟)
قلت له ... ممكن يحاكموه .. لكن من بعيد
قال لي : كيف يعني؟
قلت له : ان المحكمه تصدر قرار بتسليمه لها ويرفض ذلك
وتصدر المحكمة حكما غيابيا بدون ما يكون واقف امامها
قال لي لكن يا ابوي البلد بتولع نار
قلت له : ليه؟
قال لي :البشير دا سيدناوالناس كلها بتطلع مظاهرات
قلت له : قول رئيسنا وليس سيدنا فالسياده لله
قلت له :انت الكلام دا بتجيبو من وين ؟؟
قال : سمعت ناس خالي بتكلمو بيهو وجابوه في التلفزيون كمان
في تقديري يا صفية من المهم جدا التعامل مع الطفل بواقعية
وعدم التقليل من اتجاهات افكاره حتي لو كانت اكبر من عمره
| |
|
|
|
|
|
|
| |
Safia Mohamed
العوض المسلمي
salah awad allah
Salahaldeen Nadir
Abdlaziz Eisa
عبدالكريم الامين احمد
معتز القريش
عبود عبد الرحيم
فيس بوك
تويتر
انستقرام
يوتيوب
بنتيريست