الأسلحة الكيميائية وحقيقة استخدامها في السودان في منتدى ميديكس للحوار
|
|
 من الان ذكرى تابين الراحل المقيم مصطفى سيد احمد 17 يناير 2009
|
لكم الخيار والاختيار
ساقية الصاوى .. الزمالك
تاون هاوس ... بوسط البلد
دار حزب الوفد... الدقى
ارجو الافادة يا بورداب القاهرة والسادة الضيوف
تكريم العم جمعة عازف الساكسفون وايضا الشاعر الراحل المقيم عيد الرحيم ابو ذكرى
ارجو الاتصال للمشاركة
ت 0105506917
0103031023
قاسم المهداوى
|
|
 
|
|
|
|
|
|
|
 Re: من الان ذكرى تابين الراحل المقيم مصطفى سيد احمد 17 يناير 2009 (Re: قاسم المهداوى)
|
لك اخي مهداوي
يــــــــاروائع (الفنان مصطفى سيد أحمد)
يا روائع ...
حملت معانيك الطيور
ما اتحملت
نثرت أطاييبك زهور
ما اتخيلت
أنت البتسكب هالروائع
يا بدائع ...
طلت العشم
صمتك ألـم
ضقنا الندم
أنت المفصل بالنغـم
آخر مقاسات الهمم
وانت المطرز كالخليل
"عزه وهواها"يابدائع
ويا سواجع ...
سكت النغم
كمل الفـهم
زاد البـــلم
صارت أمم تتبع مسارك
والنجم عشق أنتشــارك
فى سماهو يا سواجع
ويا مزارع ...
أنت حــرثو
وأنت غرسو
وأنت درسو
تغرس الحق تروى شتلو
نجـنى ذاتنا وأنت تتلو
كل آياتو الروائع
وياروائعنا ودليلا
وياخليلا
ويانـبيلا
تشــرق الدنيا بفنك
ويشرق العالم واظنك
تشده الكل ياروائع
وياودائع ...
حـوجه ليك
وحاجه بيك
وحاجه فيك
لاتبتدى ...لاتنتــــهى
أنت النهيت أنت البدى
سيدا راجعـالو الودائع
ياروائع .
حملت معانيك الطيور
ما أتحملت
نثرت أطاييبك زهـــور
ما اتخيلت
أنك بتسكب هالروائع
يا بدائع .
طارق ميرغني
| |
|
|
|
|
|
|
|
|
 Re: من الان ذكرى تابين الراحل المقيم مصطفى سيد احمد 17 يناير 2009 (Re: قاسم المهداوى)
|
قاسم مهداوي
يسعد صباحك و يومك
انا مع الفكرة قلباً و قالبا 17 يناير ما بعيد و عليه الرجاء علي سرعة الانجاز .. في حالة انوا يكون في ساقية الصاوي من المستحسن منذ الان يتم مخاطبة الجهة المسئولة عشان يتم وضع الاحتفال في خريطة الساقية ..
اما التاون هاوس ففي ظني المتواضع ان مدير المكان وليم معروف بحبه للسودان و السودانيين و لن يضن علينا بالمكان و لكن.. المستحسن ان يتم اخباره مبكرا .. و الافضل طبعا ان يتم اجتماع ما بس لبورداب القاهرة و لكن لكل من يجد نفسه يستطيع ان يقدم شئ للفكرة دي .. لكن جد نحنا محتاجين للبورداب الاعزاء
تخريمة
اشتقت ليكم شديد
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: Sahar Yousif)
|
سحر يوسف
سلامات واشواق كميات
كدا خلينا نلتق اولا و... حبذا لو ابعدنا الفكرة عن قصة بورداب وما بورداب
لانها حتجلب لينا الهم والغم (والكلام الفاضى وخمج) وعلى فكرة انا من بورداب
جزيرة الوراق ( مسلسل هيما وكمان ساكن بالقرب من بيت ناس هيما )
ولكن مرحب بكل شخص له مساهمة فى انجاح واخراج اليوم بشكل يليق
وشكرا عميقا حضورك بوستنا هذا وخليك هنا
قاسم المهداوى
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: قاسم المهداوى)
|
تواريب العشم
ووقف براك
زي الملاك
أصلب بشر
ماكان معاك غير الصبر
هينين دُعا
وبرقاً فجع زرقة سماك
طرد المطر ..ياريح وجع كل القِبَل
قامة ثباتك يالجبل
أصلب يقين لازم تصل
ماجهجهك غدر الملوك
حُفر المقالب والشروك
ماصادتك أطول شِباك
وإنت البحر ..رغم الحصل
كنت الأهل لى ناس ميتمة بالفقر
فى الهم تلوك حنضل .. حجر
لانفط فرّج كُربته.
لاصهر معدن شو هطل
كانت ملازماك بالدعا
إلا الحزن كان البطل
زي الجبل شلتَ الحمل
ميلاد ملاقاة الأمل
كنت العرِض لما الأرِض
جوفه المِرِض نكر الفرِض
تفَّ التواريب العشم
قبل المخاض جاها النفِض
وداها للحرقة المحَل
لى وين تقبِّل وجهته ؟
مالدمعة حرقت وشها
لِي غيمة تكضم رشها
لِي طيرة ترجع عشها
وإنت الوحيد الشلتها
هدهتها .. ونومتها
فوق إيدك الحضن الأليف
قبل الخريف يملاها زيف
قبل النزيف يلفى الرصيف
حجيته بى حِجر الأرِض
غتيتة بى عافية وطن
إنت الوحيد أدمنتها
لما الضياع كان الكفن
بين الضلوع سكّنتها
لابِعتها..لامره جُعتَ رهنتها
وسدتها جدول رؤاك
بالبشري كم حلّمتها
بي خير صباحاتك براك
أكرمتها وطمنتها
نامت تواريب العشم
باتت معاك من غير ألم
لا ليلة باتت بالقوي
لا مرة شابت للهوي
أفراح تبِّرك وتلحقك
لي كل مناداتك نعم
في حِكرك الهاني الوهيط
القدرو أكبر من محيط
آلفتها غير إرتزاق
حالفتها من غير وسيط
كانت غناك وكنتها
رجّعتها زمن الصبا
تيربتها .. وبّوقتها
لامِن خلاص لقت الخلاص
كم راودوك ماخنتها
عيشاً صميم وإنت الأصم
فرهد قصادك وإستوي
ماهدَّ طيرن ماانهزم
لامرة لي إيدك لوّي
ما هزَّ غيرن .. مااتوهم
مااضاري منك وإنزوي
يازول ملاك ..واقف براك
مافي المعاك
زادك صبر..هينين دُعا تالا السما
يلقى الهنا..وطن المني
زمناً حفر وش البلد
من غير مطر!!
ورم العيون .. رهق الجفون
من غير سهر!!
وآخر سفر قبال شهر
تالا الوجع
خيش القلوب عبَّ وصرع
خبَّ وضرع..مليون وجع
جدع الخواطر بالألم
لليلة ما اتذكر رجع
شوّه ضحك طفل البلد
توَّه شعاع قمرو السطع
ضيّع سماح أسمح ولد
ضلَّم سنا شمسو وجهر
آخ من زمن لبلاب قلد
شدر الجروف سبَّ وكفر
حِملاً تقيل زي الجبل
حاجة فوق طاقة البشر
شدَه السحاب بالريح دفر
جرح المطر بالدم دشر
صحَّر جروف كانت بحر
يبَّس حروف جوه السفر
ووقف براك زي الملاك
ماطِر سماك فوق الهلاك
وإنت الأمان
وتد الركيزة الإتزان
ضد الإرتزاق
والإنسياق
الإرتهان
زرقاء يمامتك كم وصل
نور البصيرة الألهمك
هدهد سليمانك صدق
جاب النبا
قالوك كِضِب.. مجنون سبا
شوفلك عقولاً تفهمك
أحفظ غناك .. قولك كِضِب
لملِم شليلك للعب
زرقاء يمامتك ما ضِهِب
ماهمَّ من درباً صِعِب
ماحدّ ترحالو الوحل..ماكان خفوت
رغم الطشاش لفّ البيوت
رغم الغباش ..رغم الخيوت العنكبوت
مازعلُن لو كان تفوت
أو تمشي بالحسرة وتموت
أو يشرِقَك نضمك كُتُر
يرميك فى جُب السكوت
أحسن تموت .. مالحالة حوت
يبلع نداك من غير يلوك
أحسن تفوت من دنيا واطي غناها بوت
هدهد سليمانك صدق
جاب النبا
نور اللعب ضلّم خبا
خلي الوطن طفلاً حبا
جواد تسامحنا الهمام
قطع اللجام فى النيل كبا
صدق النبا
وخربت سبا
قشة بعيرك يامحل
كسرت ضهر بلدك عدل
ما جاك زعل
لساكَ في حلقك ندي
يمسح هجير شدراً رحل
لاتعبتَ من نوم البلد
لا غلبت
لا موتك
حصل
واقف
براك
فاروق أبو حُــوَّهـ
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: Elmosley)
|
الاخ قاسم .. .. فكرة جميلة واحتفاء مستحق لقامة من
قامات الفن السوداني .. وعراقة لايمكن ان يتخطاها اي
متذوق للفن .. مصطفي سيد احمد متفق عليه وعلي حبه كل
سوداني .. الدعوة مقبولة ..
-------------------------
Quote: حبذا لو ابعدنا الفكرة عن قصة بورداب وما بورداب
لانها حتجلب لينا الهم والغم (والكلام الفاضى وخمج) |
ياريت تبتعد بقدر الامكان عن نقاط تثير الخلاف ..وكلام زي دة
ماكان ليهو داعي .. هنالك بورداب في القاهرة مستعدين عمــل
اي شيء من اجل الالتقاء والتفاكر ولكنكم دون اي داع تثيرون
ان بورداب القاهرة كذا وكذا ولست ادري عن من تتحدثون ماعرفتهم
هنا في غاية الود .. ابحث عن مايوفق لا مايفرق؟؟؟
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: baha eassa)
|
بهاء عيسى
سلام وتحايا
اولا شكرا حضورك
وثانيا من المفترض ان يكون الاخ اكرم عبدة قد اتصل عليك بهذا الخصوص ...
ثالثا
قلنا ونكرر القول ابعاد فكرة بورداب أتت تمشيا مع استعداد الكل للمشاركة وعلى سبيل
المثال
بعض بورداب عكس الريح كافراد
وايضا الاخ تاج السر الحسن
الاستاذه مها البكرى
الاخ سفيان نابرى كفرد وليس كبوردابى
اسرة وادى النيل
الاخ سمير بول من مكتب تمثيل حكومة الجنوب
الصحافيين بحضارة السودان
الاخ محمد ادم الحسن
الدكتور شذى
الاخ الحاج عبد الرحمن
الصديقى رانيا فاروق ( face book.com)
بعض افراد من جمعية 6 اكتوبر كافراد
عزيزى بهاء عيسى
وعزيزى هذى اقولها بطيب خاطر واحساس فطرى ( ليس اجبارا ) جد لا احد يجبرنى على أى شىء اعلم
ان ما بينى وبعض البورداب اشكالات ولا احبذ وايضا اعتقد انهم كذلك لا يحبذون التواجد معهم فى ذات
المكان والزمان ولكن مصطفى ملك للكل وليس لمن يود الاحتنفاء به لهذا تركت أمر ترتيب الفقرات
للاخ اكرم عبدة وتاج السر والاخت سحر يوسف .... فقط انا مسئول عن مكان الاحتفال وايضا لملمة
الموسيقيين واجراء البروفات .... عرفتا ولا اشرح ليك اكثر ... يعنى انا لا يعنينى كثيرا من
الذى يود الحضور والمشاركة وايضا ذلك امر يخص اكرم, وسحر ,وتاج السر ... عرفتا
هامش :
ياخى بلاش تناقرنى جد انا زول شرانى . وانت لا تعرفنى ؟؟؟؟ سل الاخرين ؟؟؟؟
هامش تانى :
التقيتك فى ندوة دريج (صاح ) وما قلت لى الصورة ذهبت الى اين ؟؟؟؟ سؤال صعب صاح ؟؟؟؟
قاسم المهداوى
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: Elmosley)
|
استاذنا الكبير القدير جدا
يوسف الموصلى
مرحبا بك
Quote: قاسم كيف حالك
اود مشاركتكم كتابة من اجل ان تقرآوها ساعة الاحتفال
آو بالتلفون يومها اذا لم يتعارض مع وقت عملي ودراستي
مع تمنياتي لكم بالنجاح في احتفال يليق بالراحل المقيم |
فى العام 2003 وفى ذات المناسبة اتصل الاستاذ وردى من امريكا وتحدث مطولا عن تجربة مصطفى
وحبذا لو شاركتنا بالاتصال تيلفونيا لان فى ذلك بعد ثالث للمناسبة واعنى ( الصوت ) اقوى من الرسالة
فقط دعنا نحدد المكان فى غضون هذا الاسبوع ولنتمكن من ايجاد تيلفون ارضى بالقرب من المسرح لان تردد اشارة الموبايل يخلق زبزبة تعوق التواصل والسرد
الى ذلك الحين شكرا عميقا حضورك هنا وايضا مشاركتك من الان صوتيا
هامش
تكريم العم جمعة اسماعيل عازف الساكسفون
وايضا الشاعر عبد الرحيم ابو ذكرى
قاسم المهداوى
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: Elmosley)
|
استاذنا القدير
استاذ الصولفيج الايقاعى الاوحد
تانى شكرا عميقا حضورك
وجد اضفيت بعدا ثالثا لهذا الاحتفاء
كيف لا وانت العارف و الملازم لتلك التجربة وكل ابعادها ... وايضا بعض الذين
رفضوها ... ( اذاعة ناس زمان وناس قيقم وروضا الحاج الان ناس اغانى الحرابة والجهادية الان) وفكرة جلسات الاستماع .. وقبول الناس كل الناس
لها !!!!!!!!!!! ؟؟؟؟؟؟؟ يا ريت تملأ لنا علامات الاستفهام هذى وايضا التعجب ... بكلام كتير ...
استاذنا القدير ...
عزرا مكرر كل مبدعى البلاد خارج البلاد ؟؟؟ مصطفى وذهب ومات بعيدا خارج البلاد .... كيف لبلاد ان
تسير وجل مبدعيها مهجرون قسريا ؟؟؟؟ كيف لفن ان ينتشر وكل القائمين الحقيقيين عليه خارج البلاد قسرا ؟؟؟؟؟؟؟؟؟!!!!! والبعض ينتشى طربا وضحكا ؟؟؟؟؟؟؟ وزورا ؟؟؟؟؟
انها ازمة جيل باكملة ....
ومسئوليات تاريخية واخلاقية ... تجاه اجيالنا القادمة ...
كيف لنا ان نسمح فقط لخمسة فى المائة من الشعب السودانى التحكم فى مصائر الاخرين ؟؟؟؟؟
كيف لنا ؟؟؟؟؟
قاسم المهداوى
هامش
مدنا بهاتفك عبر البريد الالكترونى ... صوب البروفايل اذهب
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: Elmosley)
|
Quote: ياخى بلاش تناقرنى جد انا زول شرانى . وانت لا تعرفنى ؟؟؟؟ سل الاخرين ؟؟؟؟
|
كنت اود مناقشتك بصورة حضارية واخوية ولكن هذه الجملة الغت
كل شيء .. واذا كنت شرانيا فهذا راجع لك وانا في المنبر هنا
اناقش لا اناقر لان هذا ليس اسلوبي .. النقر .. فاذا كنت تريد
نقاشا حضاريا امام الجمع فانا معك واما غير ذلك فليذهب كل الي
شانه .. ..
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: baha eassa)
|
ياسلاام
الان احبكم اكثر ياخي مالو
نحتلف فكريا نختلف ادبيا نختلف سياسيا
والله فرحتوني يابها انت ومهداوي
تعالو شوفو الشغل حيبقي كيف
===============
اذا سآلتموني
كيف تريد السودان
اريده ديموقراطيا لا يسكت فيه
صوت واحد مهما كان اختلافي معه
صدقوني انا سآحترم خيارات الشعب السوداني
عندما تكون عبر ديموقراطية نظيفة
حتي ولو اختار الشعب الجن الاحمر
كل الحب وذكري مصطفي دي ابقو عليها
شداد
تسلمو
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: قاسم المهداوى)
|
مصطفي أكيد يستحق
قاسم سلامات....
ياريت ماتتطلع زي بتاعت السنة الفاتت...
بتذكر كان في سكسك شديد...قصدي تأجيل لانه كان سعيت للحضور لكن ماعرفت ليها مكان أو زمان مؤكدين...
والكلام ده للمنظمين يعني ماليك ياقاسم..ياسحر ويا أكرم 
أها...
انا شخصيا أحبذ تاونهاوس....زي ماقال عمرو...
مناسب وقريب لكل الناس وناسوا ظريفين وبحبوا السودانيين...
تحياتي...
| |
|
|
|
|
|
|
|
|
|
Re: من الان ذكرى تابين الراحل المقيم مصطفى سيد احمد 17 يناير 2009 (Re: Omayma Alfargony)
|
اميمة
مساء الصباح الباهى لونك
مرحبا بك وزركشة أولوان الطيف
Quote: ...ياريت ماتتطلع زي بتاعت السنة الفاتت...
بتذكر كان في سكسك شديد...قصدي تأجيل لانه كان سعيت للحضور لكن ماعرفت ليها مكان أو زمان مؤكدين...
والكلام ده للمنظمين يعني ماليك ياقاسم..ياسحر ويا أكرم
أها...
انا شخصيا أحبذ تاونهاوس....زي ماقال عمرو...
مناسب وقريب لكل الناس وناسوا ظريفين وبحبوا السودانيين...
تحياتي... |
يا ستى عزرا مكرر ودربكة العام الماضى ... احمال اثقل من اجنحتنا ساهمت فى منعنا و التحليق بعيدا وذكرى مصطفى سيد احمد
كلنا نود تاون هاوس .... لانها تاون هاوس
هل بالامكان ان نقدم لك دعوة .... ويدك معانا ...
مرحب بيك فى بوستنا هذا .... ومصطفى سيد احمد
قاسم المهداوى
| |
|
|
|
|
|
|
| |
قاسم المهداوى
Sahar Yousif
Marouf Sanad
فاروق أبوحوه
عمرو كمال ابراهيم
mahdy alamin
Elmosley
baha eassa
Omayma Alfargony
عاطف محمد أحمد زكريا
Saber Abdelhadi
فيس بوك
تويتر
انستقرام
يوتيوب
بنتيريست