|
|
 كل النجوم حلفت تخلي علاها تتكبد مشاق الرحلة من الحضره للمعبد ( إهداء لكل أم )
|
كل النجوم حلفت تخلي علاها تتكبد
مشاق الرحلة من الحضرة للمعبد
تطوف حولك بذكرى المولي تتعبد
لانك ممرع النجمات
ومرمر يفرش الجنات
قدميك فوقها تتوسد
رقيب الحسنه من ولدوك وللساعة ما حدد
منابعا عامرة بالطيبات يغوص فيها يصدو المد
يعاود الرحلة من تاني يهاتي بيك ينادي مدد
وصاحبو عتيد خاتي ايديهو فوق الخد اكيد حيران
وصبره كمان حد الحد ده فرحان بيك يا روح الند
ده خيرك يمه ما بتعد كثير بالحيل ما بتحد
يمه نقاوه يمة طلاوه يمه حلاوة المشهد
كل شبرا بتوطيه يفتح زهرو ويفرهد
وكل نهرا تعديهو بيك يذداد ويتمدد
وكل حزنان تصابحيهو تفارقه الحسرة تتبدد
وكل كلمات تقوليها تصبح حكمة تبقي مثل وتتردد
وريدك يمه يرضى الرب ويجعل صاحبه منه أقرب
ومن الجنه قاب قوسين ويلحق موكب السبعة
يتفيئ ظلال العرش يوم الدين
بشوف فيك سورة النور
وسكر من لهيج العين
جمالك يمه ما تلوين كلامك يمه ما تلحين
يكفيك الله شر العين
وريدك منبع الريدات بريدك يا صلاة الزين
بريدك يمه زى امي بريدك يا قمر دورين
وريدك يمه ثمين وريدك مرسي للتايهين
وريدك مأمن الخائفين بريدك يا صلاة الزين
وبسال الله يجمعنا ويقهي ترهات البين
|
|
 
|
|
|
|
نزار باشري ابراهيم
فيس بوك
تويتر
انستقرام
يوتيوب
بنتيريست